မိူဝ်ႈၼႆႉ ဝၼ်းတီႈ  24/08/2025  ယၢမ်းၵၢင်ၼႂ်ၸဝ်ႉ ၸဝ်ႈၵွၼ်းဝတ်ႉ ၵျွင်းလွႆၵပ်းမိူင်း တီႈပွၵ်ႉၵွင်းသႃႇ  ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ၺႃးၽၼ်း  လူႉလွၼ်ႇထင်တီႈ။

ၵူၼ်းမိူင်း ဝဵင်းၼမ်ႉၶမ်းၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ− “ ၼႂ်ၼႆႉၵူၼ်းၾၢႆႇၵေႃႇသၢင်ႈ ဢၼ်မႃးမႄးဝတ်ႉၵျွင်း လႆႈၵႂႃႇႁၼ်ၶၢပ်ႈတူဝ်ၸဝ်ႈသြႃႇ ၼွၼ်းတၢႆဢိူၵ်ႇလိူတ်ႈဝႆႉ ၼႂ်းဝိႁၢရ် မၼ်းၸဝ်ႈ။ တီႈၶၢပ်ႈတူဝ်မၼ်းၸဝ်ႈၾၢႆႇၼႃႈၼႆႉ ဢမ်ႇႁၼ်မီးႁွႆးမၢတ်ႇၸဵပ်းသင် သေတႃႉ ၾၢႆႇလင်လႄႈႁိမ်းၵွင်ႇၵေႃႈၸဝ်ႈၼၼ်ႉ လႆႈႁၼ်ႁွႆးၽၼ်းဝႆႉလၢႆႁွႆး ၶၢပ်ႈတူဝ်တၢႆၸဝ်ႈၵေႃႈမိူၼ်ထုၵ်ႇလၢၵ်ႈၶၢႆႉတီႈမၼ်းဝႆႉ ၊ မီးႁွႆးလၢၵ်ႈၶၢႆႉဝႆႉ” – ဝႃႈၼႆ။

ၵူၼ်းမိူင်းပိုၼ်ႉတီႈၵမ်ႈၽွင်ႈလၢမ်းၶၢတ်ႈလၢတ်ႈဝႃႈ လႅပ်ႈတေမီးၵူၼ်းမႃးႁွင်ႉႁႃမၼ်းၸဝ်ႈၸဵမ်မိူဝ်ႈယၢမ်းၵၢင်ၼႂ်ၸဝ်ႉမိူင်းပႆႇလႅင်း။ ယွၼ်ႉဝႃႈၼႂ်းမိုဝ်းၸဝ်ႈတိုၵ်ႉယိပ်းၵမ်ဝႆႉၼဵၼ်ၾႆးတႃႇပိုတ်ႇၾႆးသႅင်လႅတ်ႇဝႆႉ ဝႃႈၼႆ။    

ၵူၺ်းၵႃႈ ၶူဝ်းၶွင်ၼႂ်းဝတ်ႉတႄႉဢမ်ႇႁၼ်ႁွႆးသွၵ်ႈတဝ်ယႃႉယုင်ႈသင်ဝႆႉ။ ဢၼ်ႁၢႆဝႆႉၼႆႉပဵၼ်ရူတ်ႉၵႃးသီၶၢဝ်ဢွၼ်ႇဢၼ်ၸႂ်ႉတီႈဝတ်ႉၼၼ်ႉၵူၺ်း။ ၼၼ်ႉၵေႃႈပဵၼ်ၵူၼ်းႁၢႆႉဢဝ်ၵႂႃႇႁိုဝ်ဢမ်ႇၼၼ် ပဵၼ်ၸဝ်ႈတူၼ်ၶူး ဢဝ်ၵႂႃႇဝႆႉတီႈလႂ်သေတီႈတီႈႁိုဝ်ၼႆၵေႃႈၽႂ်ပႆႇႁူႉၸွမ်း- ဝႃႈၼႆ။

ဝတ်ႉလွႆၵပ်းမိူင်းၼႆႉ မီးဝႆႉတီႈပွၵ်ႉၵွင်းသႃႇ ၸဵင်ႇၸၢၼ်းဝၼ်းဢွၵ်ႇ ဝဵင်းၼမ်ႉၶမ်း။  ဝတ်ႉၼႆႉႁၢင်ႇၵႆယၢၼ်တင်းႁိူၼ်းၵူၼ်းဝႆႉ။ တီႈဝတ်ႉၼၼ်ႉမၼ်းၸဝ်ႈယူႇဝႆႉၸဝ်ႈလဵဝ်။ ယၢမ်းလဵဝ်ၵေႃႈတိုၵ်ႉၵုမ်းၵေႃႇလုမ်းလႃးဝတ်ႉဝႆႉယူႇ။ ယွၼ်ႉပိူဝ်ႈ သႃလႃးလႄႈတူဝ်ၵျွင်းၵမ်ႈၽွင်ႈၺႃးၸၢၵ်ႇမၢၵ်ႇသေလူႉၵွႆဝႆႉၸဵမ်မိူဝ်ႈၽႅၼ်ယၼ်ႇသိုၵ်း 1027 – ၵူၼ်းၼမ်ႉၶမ်းလၢတ်ႈၼေၼင်ႇၼႆ ။

ယၢမ်းလဵဝ်ၶၢပ်ႈတူဝ်ၸဝ်ႈတူၼ်ၶူးတႄႉ တႃႇၵူတ်ႇထတ်းတူၺ်းၼႆသေ ၾၢႆႇပလိၵ်ႈ  TNLA မႃးဢဝ်ၵႂႃႇယဝ်ႉ။

 ၸဝ်ႈသြႃႇၼႆႉ ၵူၼ်းပိုၼ်ႉတီႈႁွင်ႉၸပ်းသူပ်းဝႃႈ ၸဝ်ႈၸွႆႇ ၵူၺ်းၵႃႈၸိုဝ်ႈတဵမ်လႄႈဝႃႇသႃၸဝ်ႈမီးလၢႆဝႃႇ ၶၢပ်ႈတူဝ်တၢႆမၼ်းၸဝ်ႈၼၼ်ႉၸုမ်းသိုၵ်းတဢၢင်း TNLA  ၶဝ် တေၸတ်းၵၢၼ်ၸိူင်ႉႁိုဝ်ၵႂႃႇၼႆတႄႉ ဢမ်ႇပႆႇမီးၽႂ်ႁူႉၸွမ်း။

ၵူၼ်းဢၼ်ၶိုၼ်ႈမႃးႁဵတ်းႁၢႆႉၶႃႈႁႅမ်ၸဝ်ႈၵွၼ်းဝတ်ႉၼၼ်ႉပဵၼ်ၽႂ်လုၵ်ႉလႂ်မႃး ယွၼ်ႉသင်ၼႆၸိူဝ်းၼႆႉၽႂ်ပႆႇလႆႈႁူႉ။

ဝဵင်းၼမ်ႉၶမ်းၼႆႉ တင်ႈတႄႇၽႅၼ်ၵၢၼ်ယၢၼ်ႇသိုၵ်း 1027 တႄႇမႃးၼၼ်ႉ ၸုမ်းသိုၵ်းတဢၢင်း TNLA တိုၵ်းယိုတ်းလႆႈဝႆႉ၊ သိုၵ်းမၢၼ်ႈလႆႈထွႆထွၼ်ဢွၵ်ႇပၼ်။ သိုၵ်းတဢၢင်းၸတ်းၵၢၼ်ၽွင်းငမ်းမႃးတေႃႇထိုင်ယၢမ်းလဵဝ်။

  မိူဝ်ႈဝႃး ၼႂ်းဝၼ်းတီႈ 23 လိူၼ် August ပီ2025 ၼႆႉၵူၺ်း ၾၢႆႇပလိၵ်ႈတဢၢင်း TNLA ၸင်ႇႁႃဢဝ်ၽူႈလၵ်ႉၵူၼ်းၸူၼ် 5 ၵေႃႉ မႃးပၼ်ႇလဵပ်ႈၸွမ်းသဵၼ်ႈတၢင်းလူင် ၼႂ်းဝဵင်းၼမ်ႉၶမ်း။မိူဝ်ႈၼႆႉသမ်ႉပေႃးပဵၼ်လွင်ႈၸူၼ်လႄႈၶႃႈႁႅမ်ၸဝ်ႈတူၼ်ၶူးၼင်ႈၵျွင်းထႅင်ႈယူႇယဝ်ႉ။ ႁဵတ်းႁႂ်ႈၵူၼ်းမိူင်းၼမ်ႉၶမ်းပဵၼ်ဢၼ်မႆႈၸႂ်လွင်ႈႁူမ်ႇလူမ်ႈ။