မိူဝ်ႈၼႆႉ ဝၼ်းတီႈ 23/08/2025 ယၢမ်းၵၢင်ဝၼ်း ၸုမ်းသိုၵ်းတဢၢင်း TNLA တီႉၺွပ်းလႆႈၽူႈလၵ်ႉၸၵ်ႉၶုတ်ႈ 5 ၵေႃႉ ဢၼ်ဢႅဝ်ႇလၵ်ႉၶူဝ်းၼႂ်းႁိူၼ်းယေးပိူၼ်ႈ၊ လၵ်ႉၶိူင်ႈၾူၼ်းၸွမ်းႁၢၼ်ႉလႄႈ လၵ်ႉရူတ်ႉၶိူင်ႈ ၸိူဝ်းၼႆႉ သိုၵ်းတဢၢင်း ပၼ်တၢမ်ႇၶဝ်ပၼ်ႇလဵပ်ႈၸွမ်း ၼႂ်းၵၢင်ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ -“တေလႆႈဝႃႈ ၵူၼ်းၸိူဝ်းၼႆႉ ပဵၼ်ၵူၼ်းလၵ်ႉၶူဝ်းပိူၼ်ႈ ယႃႉႁိူၼ်းပိူၼ်ႈၼၼ်ႉၼႃႇ။ ၾၢႆႇပလိၵ်ႈၸုမ်းသိုၵ်းပလွင်ႈၶဝ် လုၵ်ႉတၢင်းႁူဝ်ဝဵင်းတၢင်ႇၵႃးသေ ၼႄၵူၼ်းမိူင်းတေႃႇပေႃးထိုင်ႁၢင်ဝဵင်းၼၼ်ႉၼႃႇ။ ပဵၼ်တီႈသဵၼ်ႈတၢင်းလူင်ၵၢင်ဝဵင်းၼႆႉ ၵမ်းလဵဝ်ယဝ်ႉ”- ဝႃႈၼႆ။

သိုပ်ႇလၢတ်ႈဝႃႈ – “ပေႃးယဝ်ႉၵေႃႈ ၼႂ်းဝဵင်းၼႆႉ ၶဝ်ပူၵ်းပၢႆႉပိုၼ်ၽၢဝ်ႇႁႃၽူႈလၵ်ႉၼႆႉ ၸွမ်းၵၢင်ဝဵင်း ၸွမ်းၾႆးၶဵဝ်ၾႆးလႅင် ၸိူဝ်းၼႆႉပႃးဢေႃႈ”- ဝႃႈၼႆ။

ယၢမ်းလဵဝ် တီႈဝဵင်းၼမ်ႉၶမ်းၼႆႉ ၾၢႆႇပလိၵ်ႈၸုမ်းသိုၵ်းတဢၢင်းၶဝ် ယင်းပူၵ်းပၢႆႉၸွမ်းၵၢင်ဝဵင်းသေ ပိုၼ်ၽၢဝ်ႇ သွၵ်ႈႁႃၵူၼ်းဢၼ်ပဵၼ်ႁူဝ်ၼႃႈၽူႈလၵ်ႉၸၵ်ႉၶုတ်ႈၼၼ်ႉ ဝႆႉထႅင်ႈလူးယူႇ။ ဢၼ်တီႉၺွပ်း လႆႈဝႆႉၽူႈလၵ်ႉ 5 ၵေႃႉၼႆႉ တေႁဵတ်းႁိုဝ်ပၼ်တၢမ်ႇဢၼ်ဝႃႈၼၼ်ႉတႄႉ ပႆႇလႆႈႁူႉ။

ၸႄႈဝဵင်းၼမ်ႉၶမ်းၼႆႉ ဝၢႆးလင် ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး သိုၵ်းတဢၢင်း TNLA ပိုၼ်ၽၢဝ်ႇယိုတ်းၵုမ်းလႆႈပဵၼ်တၢင်းၵၢၼ်သေ ပၼ်ႇၵၢၼ်ၽွင်းငမ်းဝႆႉတေႃႇထိုင်ယၢမ်းလဵဝ် ၼႆယဝ်ႉ။