ၼႂ်းလိူၼ်ဢေႃႊၵတ်ႊသ်ၼႆႉ ၾူၼ်တူၵ်းထပ်းၵၼ်လၢႆဝၼ်းသေ ႁဵတ်းႁႂ်ႈၼမ်ႉယိုင်ႈၶိုၼ်ႈႁၢဝ်ႈႁႅင်း ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်းပၢႆႈၽေးၼမ်ႉသေဢမ်ႇၵႃး သူၼ်ႁႆႈၼႃး ၸိူဝ်းၼႆႉၵေႃႈ လူႉသုမ်းၸွမ်းထႅင်ႈတင်းၼမ်လၢႆ ၼႆယဝ်ႉ။

ၵူၼ်းပိုၼ်ႉတီႈ ၼႂ်းၼွင်ႁၢႆးယႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၵၢၼ်ၽုၵ်ႇသွမ်ႈတႄႉ ဢမ်ႇၸၢင်ႈလၢတ်ႈယဝ်ႉ မိူဝ်ႈၼမ်ႉယိုင်ႈၼွင်းထူမ်ႈၼမ်ၸိူင်ႉၼႆၼႆႉ ၼႃးၼႂ်းၼွင်ၼႆႉ ႁူဝ်ပၢၵ်ႇမၼ်း တေသုမ်းမွၵ်ႈ 99 % ယဝ်ႉ။ ၼမ်ႉမႃးထူမ်ႈပႅတ်ႈမူတ်း ၵမ်ႈၽွင်ႈ ဢမ်ႇတၼ်းလႆႈပၢတ်ႇ။ ပေႃးဢဝ်ဢေႊၶိူဝ်ႊမၼ်းဝႃႈတႄႉ လူႉသုမ်းႁူဝ်ပၢၵ်ႇ ႁူဝ်ႁဵင်မၼ်းၶႃႈယူဝ်ႉ။ မိူဝ်ႈလဵဝ်သမ်ႉ တုမ်ႉတိူဝ်ႉၸၢၵ်ႈတေႃးႁုၵ်ႇ ၸိူဝ်းၼႆႉထႅင်ႈ ၸၢၵ်ႈတေႃးႁုၵ်ႇၶဝ်ၵေႃႈ ဢမ်ႇပဵၼ်ၵၢၼ်ယဝ်ႉ တုမ်ႉတိူဝ်ႉမူတ်းယဝ်ႉ ၵၢၼ်ၽုၵ်ႇသွမ်ႈၵေႃႈ ၵွႆမူတ်း”- ဝႃႈၼႆ။

ၽွင်းၵူၼ်းဝၢၼ်ႈဢွၼ်ၵၼ်ပၢႆႈၽေးၼမ်ႉၼႆႉ လိူဝ်သေလူႉသုမ်းၶူဝ်းၶွင်ႁိူၼ်းယေး၊ မၢၵ်ႇၶဝ်ႈတဝ်ႈၼမ်ႉ ၼႂ်းသူၼ်ၼႂ်းႁိူၵ်ႈယဝ်ႉ ယင်းလႆႈမႆႈၸႂ်ပႃး တႃႇႁႃၵိၼ်လဵင်ႉတွင်ႉယၢမ်းလဵဝ်လႄႈ မိူဝ်းၼႃႈ။ ယွၼ်ႉဝႃႈ ၵုမ်ႇလႆႈပၢႆႈၽေးယူႇလႄႈ တႃႇတေသိုပ်ႇႁဵတ်းၵၢၼ်ႁႃၵိၼ်လဵင်ႉတွင်ႉၵေႃႈ မီးဝႆႉလွင်ႈယၢပ်ႇၽိုတ်ႇၼမ်။

“ဢၼ်ယၢပ်ႇတႄႉ ၵူၼ်းႁဝ်းၼႆႉ ပေႃးလႆႈပၢႆႈလႆႈၼီယဝ်ႉ ဢမ်ႇမီးတီႈႁိူၼ်းၼႆ ၵၢၼ်ၵေႃႈ တေဢမ်ႇပဵၼ်။ ဢမ်ႇလႆႈႁဵတ်းလီလီ။ ၵၢၼ်ၵိၼ်ၵၢၼ်ယႅမ်ႉၵေႃႈ ဢမ်ႇၵုမ်ႇထူၼ်ႈ၊ ၵၢၼ် ၵိၼ်ၵၢၼ်ယႅမ်ႉ ၸိူဝ်းၼႆႉ မၼ်းတေယၢပ်ႇမႃးတိၵ်းတိၵ်းယဝ်ႉ ပေႃးမီးၵူၼ်းၸွႆႈတူၺ်းထိုင်ပၼ်ၵူၼ်းပၢႆႈၽေးၼမ်ႉတႄႉ တေလီဢိတ်းၼိုင်ႈ”- ၵူၼ်းပိုၼ်ႉတီႈ ၼႂ်းၼွင်ႁၢႆးယႃႈ သိုပ်ႇလၢတ်ႈၼႄၼင်ႇၼႆ။

ၼႂ်းပီ 2025 ၼႆႉၵူၺ်း ၵူၼ်းမိူင်းၼႂ်းၼွင်ႁၢႆးယႃႈၼႆႉ ထူပ်းၽေးယၢပ်ႇၽိုတ်ႇ လွင်ႈၼမ်ႉယိုင်ႈၼွင်းၶိုၼ်ႈမႃးၼႆႉ မီးလၢႆပွၵ်ႈလၢႆၵမ်းယဝ်ႉ။ ၼႂ်းလိူၼ်ဢေႃႊၵတ်ႊသ်ၼႆႉ ၼမ်ႉယိုင်ႈ ၶိုၼ်ႈၼိုင်ႈဝၼ်းလႂ်ၶိုၼ်ႈ 1 ထတ်း/ ပေႇ ဢမ်ႇၼၼ် 5 ၼိဝ်ႉထိုင် 6 ၼိဝ်ႉ ၼႆၸိူဝ်းၼႆႉ။ မိူၼ်ၸိူင်ႉႁိူၼ်းတႅမ်ႇ ၸိူဝ်းၼႆႉ လႆႈပၢႆႈသွၼ်ႈယူႇဝႆႉတီႈၵျွင်းမုၼ်ၸဝ်ႈ။ ၼႂ်းၼွင်ၼႆႉ ၶႂ်ႈမိူၼ် ၵၼ်ၵူႈတီႈယဝ်ႉ ပေႃးႁိူၼ်းတႅမ်ႇၼႆ တိုၼ်းထူမ်ႈ ဝႃႈၼႆ။

ဢိင်ၼိူဝ် လွင်ႈၼမ်ႉယိုင်ႈၶိုၼ်ႈသုင်သေ ၼၢၼ်းယွမ်းလူင်းၼႆႉ ပဵၼ်ယွၼ်ႉဢမ်ႇပိုတ်ႇၾၢႆတီႈမိူင်းပၢႆးၼႆ – ၵူၼ်းပိုၼ်ႉတီႈ ၼႂ်းၼွင်ႁၢႆးယႃႈ လၢတ်ႈၼႄၼင်ႇၼႆ။

“ဢၼ်ၼမ်ႉၼၢၼ်းယွမ်းလူင်းၼႆႉ ၵွပ်ႈပိူဝ်ႈၶဝ်ဢမ်ႇပိုတ်ႇၾၢႆမိူင်းပၢႆးလႄႈ ၼမ်ႉဢမ်ႇၸၢင်ႈလူင်း ၸူးၸႂ်တႄႉ ၶႂ်ႈႁႂ်ႈၶဝ်ပိုတ်ႇပၼ်ၾၢႆ ပေႃးၶဝ်ပိုတ်ႇပၼ်တီႈပုၼ်ႉၼႆ ၼမ်ႉၵေႃႈတေယွမ်း။ မိူဝ်ႈလဵဝ်တႄႉ ပေႃးယိုင်ႈၶိုၼ်ႈမႃးတိၵ်းတိၵ်းၼႆ မၼ်းတေၸၢင်ႈထူမ်ႈပႃးႁိူၼ်းသေ ၵူၼ်းမိူင်းတေတုၵ်ႉၶထႅင်ႈတင်းၼမ်။ ပေႃးၶဝ်ဢမ်ႇပိုတ်ႇၾၢႆပၼ်တႄႉ ႁဝ်းၶႃႈ ၵူၼ်းမိူင်း တေလႆႈပၢႆႈၽေးၼမ်ႉထူမ်ႈထႅင်ႈ ၸိူင်ႉၼင်ႇပီၵၢႆ ၼၼ်ႉယဝ်ႉ”။

ၽွင်းလႆႈပၢႆႈၽေးၼမ်ႉထူမ်ႈၼႆႉ လႆႈမႆႈၸႂ်ပႃး လွင်ႈၵိၼ်လွင်ႈယႅမ်ႉသေဢမ်ႇၵႃး တႃႇပၢႆးယူႇလီ ၸိူဝ်းၼႆႉၵေႃႈ လႆႈမႆႈၸႂ်ပႃး။ ၽွင်းၶၢဝ်းၾူၼ်ၼႆႉသမ်ႉ ယွၼ်ႉၼမ်ႉဝူၺ်ႇႁင်ႈသေ ၸၢင်ႈပဵၼ်တွင်ႉၵႂႃႇတွင်ႉႁေႈ၊ ၸၢင်ႈပဵၼ်ၶူမ်းပဵၼ်ၵၢႆးၸိူဝ်းၼႆႉလႄႈ ၼႆႉၵေႃႈပဵၼ်ဢၼ်လီလႆႈမႆႈၸႂ်ပႃး ဢၼ်ၼိုင်ႈ ဝႃႈၼႆ။

ႁွင်ႈၵၢၼ် ပႂ်ႉတူၺ်းၾိင်ႈၾႃႉရႃႇသီႇ မိူင်းႁူမ်ႈတုမ် ပိုၼ်ၽၢဝ်ႇဝႆႉ ၼႂ်းဝၼ်းတီႈ 13/08/2025 ၼၼ်ႉဝႃႈ – တႄႇဢဝ်ဝၼ်းတီႈ 18-28/08/2025 ၼႆႉ ၼမ်ႉၼႂ်းၼွင်ႁၢႆးယႃႈ ၸၢင်ႈၶိုၼ်ႈထိုင်ၶိတ်ႇလႅင် (ၶိတ်ႇမၢႆလႅင်) ဢၼ်မၵ်းတတ်းဝႆႉၼၼ်ႉ ၸၢင်ႈထိုင်တီႈမႆႈၸႂ်လႄႈ ၵွပ်ႈၼႆၵူၼ်းပိုၼ်ႉတီႈ ၸိူဝ်းယူႇသဝ်းၼႂ်းၼွင် ၶႅၼ်းတေႃႈ ၾၢင်ႉယူႇၾၢင်ႉၵိၼ် ႁႂ်ႈငိူင်ႉဝႄႈဝႆႉ တီႈသုင်တီႈလွတ်ႈၽေးၵၼ် ဝႃႈၼႆ။