မိူဝ်ႈဝၼ်းတီႈ 6 လိူၼ်ဢေႃးၵၢတ်ႉသ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်း ၸိူဝ်းလူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ၸတ်းႁဵတ်းပၢင်ဢုပ်ႇဢူဝ်းၵၼ် တၢင်းဢွၼ်ႊလၢႆႊ ၽူႈၼမ်း EAOs ၸွမ်သိုၵ်းလူင် ယွတ်ႈသိုၵ်း ၼမ်းၼႃႈ ပၢင်ၵုမ် ။

ပၢင်ၵုမ်ၼၼ်ႉ မီးၵႅမ်ၽူႈၼမ်း ဢွင်ႇမိၼ်းၼၢႆႇ လႄႈ ၸုမ်းၽူႈၼမ်းၼႂ်း၊ ၽူႈၵွၼ်းၾၢႆႇဢုပ်ႇဢူဝ်းငူပ်ႉငီႉ ၼႂ်းၶွမ်ႇမတီႇ ၾၢႆႇႁဵတ်းသၢင်ႈၵၢၼ်ငၢၼ်း ၸိူဝ်းၼႆႉ ၶဝ်ႈႁူမ်ႈဢုပ်ႇဢူဝ်း ထတ်းသၢင် ၽိုၼ်လိၵ်ႈႁၢႆးငၢၼ်း ၼႃႈၵၢၼ်မုၵ်ႉၸုမ်း လႄႈ ၽိုၼ်လိၵ်ႈႁၢႆးငၢၼ်း လွင်ႈၶၵ်ႉၵၢၼ်မိူင်း ဢၼ်ပဵၼ်ယူႇမီးယူႇယၢမ်းလဵဝ် ။

ၸုမ်းသိုၵ်းၸၢဝ်းၶိူဝ်း ၸိူဝ်းလူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ၼႆႉ တမ်းဝၢင်း ၽႅၼ်တၢင်း 5 ၶေႃႈသေ ဢုပ်ႇဢူဝ်းၵၼ်ပႃး လွင်ႈပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း တေဢွၼ်ၼမ်းၸတ်းႁဵတ်း ၼႂ်းႁၢင်ပီ 2025 ၼႆႉ။

ၸဝ်ႈသိုၵ်းလူင် ၶုၼ်ႇဢူၵ်ႉၵႃႇ ႁူဝ်ပဝ်ႈ တပ်ႉသိုၵ်းလွတ်ႈလႅဝ်းၸိူဝ်ႉၸၢတ်ႈပဢူဝ်း (PNLO) လၢတ်ႈၼႄတီႈၽူႈတွႆႇႁွၵ်ႈဝႆႉၼင်ႇၼႆ။

“ဢိင်ၼိူဝ်ငဝ်းလၢႆး ၵၢၼ်မိူင်း ၼႂ်းမိူင်းႁူမ်ႈတုမ်ယၢမ်းလဵဝ်မီးလွင်ႈလႅၵ်ႈလၢႆႈၼၼ်ႉသေ ၵူႈမူႇၵူႈၸုမ်းလူဝ်ႇႁူပ်ႉဢုပ်ႇၵၼ်ယူႇၼႆသေ လႄႈ ၸင်ႇႁွင်ႉဢဝ် ၽူႈၶဝ်ႈၸုမ်း တင်း 7 ၸုမ်း ႁဵတ်းပၢင်ၵုမ်ၵၼ်။ လႆႈဝႃႈပဵၼ်ပၢင်ၵုမ်ဢၼ်မီး တူဝ်တႅၼ်းၵူႈမူႇၵူႈၸုမ်း ၶဝ်ႈႁူမ်ႈပႃး ၼႆ ၵေႃႈ ဝႃႈလႆႈယူႇ။ ၼႂ်းပၢင်ၵုမ်မိူဝ်ႈဝႃးၼႆႉ လမ်ႇလွင်ႈသုတ်း မၢႆ 1 ဢုပ်ႇဢူဝ်းၵၼ်ၵႂႃႇ ၵဵဝ်ႇၵပ်း တႃႇၸတ်းႁဵတ်း ပၢင်ၶွပ်ႈၶူပ်ႇ 10 ပီ တဵမ် NCA ။ ယွၼ်ႉဝႃႈ NCA ၼႆႉ တင်းသွင်ပႃႈသွင်ၾၢႆႇ ႁူမ်ႈလႆႈၸႂ်ၵၼ်လႄႈ ၸင်ႇၵိူတ်ႇပဵၼ်မႃး။ ၵွပ်ႈၼၼ် ၼႂ်းပၢင်ၶွပ်ႈၶူပ်ႇၼၼ်ႉ ၽႂ် တေႁပ်ႉပုၼ်ႈၽွၼ်းၸိူင်ႉႁိုဝ်လႄႈ ၽႂ်တေတူင်ႉၼိုင်သင်၊ တေႁူမ်ႈၵၼ်ႁဵတ်းသၢင်ႈၵႂႃႇၸိူင်ႉႁိုဝ် ၸဵမ်ၸိူဝ်းၼႆႉ။ ၶေႃႈလမ်ႇလွင်ႈ မၢႆ 2 ၵေႃႈ ပဵၼ်လွင်ႈပၢင်လိူၵ်ႈတင်ႈ။ ပၢင်လိူၵ်ႈတင်ႈပွၵ်ႈၼႆႉ ဢမ်ႇၵွင်ႉၵဵဝ်ႇၵၼ်တင်း ၸုမ်းသိုၵ်း 7 ၸုမ်းၵမ်းသိုဝ်ႈလႄႈ ၼင်ႇႁိုဝ် တေ ဢမ်ႇ ပဵၼ်ၾၢႆႇလႂ်ၼၼ်ႉ ယူႇတီႈၸုမ်းလူင်းလၢႆးမိုဝ်း NCA 7 ၸုမ်းသေ ထုၵ်ႇလီယိပ်းၵမ်ပေႃႇလသီႇယူႇၵၢင်(ကြားနေ ပေါ်လစီ) ၵႂႃႇ” ၼႆယဝ်ႉ။

ပေႃးထိုင်မႃး လိူၼ်ဢွၵ်ႊထူဝ်ႊပိူဝ်ႊ 15 ဝၼ်း ပီ 2025 ၼႆႉ သိုၵ်းမၢၼ်ႈ တင်း ၸုမ်းသိုၵ်းၸၢဝ်းၶိူဝ်း 7 ၸုမ်း လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA တဵမ် 10 ပီ။

ၵူၺ်းၵႃႈယူႇတီႈ EAO 7 ၸုမ်းသေတေၸတ်းႁဵတ်းဝၼ်းမၢႆတွင်းၸိူင်ႉႁိုဝ်ၼႆတႄႉပႆႇလႆႈႁူႉႁူဝ်ယွႆႈမၼ်း။

ၼႂ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်း ၸိူဝ်းၽွမ်ႉၸႂ်ၵၼ်တင်းသိုၵ်းမၢၼ်ႈသေ လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၼႆႉ ပဵၼ်ၶွင်ႇသီႇဢဝ်ၶိုၼ်းၸိုင်ႈတႆး RCSS ၊ သိုၵ်းပဢူဝ်း PNLO ၊ သိုၵ်းလႃးႁူႇ LDU ၊ သိုၵ်းရၶႅင်ႇ ALP ၊ သိုၵ်းယၢင်းၽိူၵ်ႇ KNU/ KNLA-PC ၊ သိုၵ်းယၢင်းၽိူၵ်ႇၵမ့်ၸွႆႈတီႇမူဝ်ႇၶရေႇသီႇ DKBA လႄႈ ပႃႇတီႇမိူင်းမွၼ်းမႂ်ႇ NMSP ၸဵမ်ၸိူဝ်းၼႆႉ။

တႅမ်ႈ-ၽူၺ်းၼုမ်ႇ