ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး ၸတ်းႁဵတ်းပၢင်ၵုမ်ၶွပ်ႈၶူပ်ႇ  ၼႂ်းဝၼ်းတီႈ 12 ထိုင် 14 လိူၼ် May ပီ2026 တီႈဝတ်ႉပိတၵၢတ်ႈ ဝဵင်းပၢင်လူင်။ ပၢင်ၵုမ်ပွၵ်ႈၼႆႉ လႆႈၶိုၼ်းလိူၵ်ႈတင်ႈ ၸဝ်ႈႁူဝ်ပဝ်ႈလႄႈ ၸဝ်ႈမႁႃၼႃယၵ တူၼ်တီႈ 8  ။

ၸဝ်ႈသြႃႇၵဝိထသ ၵႅမ်ၽူႈမၢႆငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ- “ဢၼ်လၢၵ်ႇ လၢႆး ၼႂ်းပၢင်ၵုမ်ပီၼႆႉတႄႉ ႁဝ်းၸဝ်ႈၶဝ်လႆႈၶိုၼ်းမႄးယုၵ်ႉတၢင်ႇ ၸဝ်ႈသြႃႇလူင် တွၵ်ႊတိူဝ်ႊပၺ်ၺႃၼၼ်တ ဝတ်ႉထၢတ်ႈတေႃႇဝဵင်းလွႆလႅမ် ၶိုၼ်ႈပဵၼ်မႁႃၼႃယၵ ထူၼ်တီႈ(8) ၼၼ်ႉၼႃႇ။ ဢၼ်တၢင်ႇႁူဝ်ပဝ်ႈမႂ်ႇ ၼႆႉသမ်ႉ ပဵၼ်ၸဝ်ႈသြႃႇသုၽေႃၵႃၽိပႃလ ၵေႃႉဢၼ်ပဵၼ် သင်ႇၶမႁႃၼႃယၵ ၸိုင်ႈမိူင်း ဝတ်ႉၵျွင်းႁေႃၶမ်း ဝဵင်းလၢႆးၶႃႈဢေႃႈ။ ဢၼုၼႃယၵၼမ်ႉ ပဵၼ် ၸဝ်ႈသြႃႇၼရၼႃထ ဝတ်ႉၵျွင်းႁွင်ႇ ဝဵင်းမူႇၸေႊ ၶိုၼ်းၽိူမ်ႉမႂ်ႇ ၼၼ်ႉၼႃႇ။ ၵႅမ်ႁူဝ်ပဝ်ႈၼႆၵေႃႈ တွၵ်ႊတိူဝ်ႊဝိၼယၸႃရ ဝတ်ႉၵျွင်းၸေယသုၶ ဝဵင်းၼမ်ႉၶမ်းၼႆသေ ပဵၼ်ၶၵ်ႉပဵၼ်တွၼ်ႈဝႆႉယူႇ။”- ဝႃႈၼႆ။

 ၼႂ်းပၢင်ၵုမ်ၼႆႉ သင်ႇၶၸဝ်ႈ ၵူႈၸႄႈဝဵင်း မႃးၶဝ်ႈႁူမ်ႈမီးႁိမ်းၸမ် 200 တူၼ်။  ဢုပ်ႇၵုမ်လၢႆးငၢၼ်း ထတ်းထွင်ၶိုၼ်း ၵၢၼ်ငၢၼ်းဢၼ်လႆႈႁဵတ်းသၢင်ႈမႃးၸိူဝ်းၼၼ်ႉသေ ႁူမ်ႈၵၼ် တမ်းဝၢင်းၽႅၼ်ၵၢၼ်ၵႂႃႇ တႃႇၶၢဝ်းတၢင်းမိူဝ်းၼႃႈ ပိူင်လူင်မၼ်းတႄႉ ပဵၼ်တႃႇၵၢၼ်ႁဵၼ်း ။

ၸဝ်ႈသြႃႇၵဝိထသ ၵႅမ်ၽူႈမၢႆငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး လၢတ်ႈဝႃႈ “သင်ႇၶၸဝ်ႈမိူင်းတႆး ၵူႈတီႈတီႈမႃးၵုမ်ၵၼ်သေ ၼင်ႇႁိုဝ်လိၵ်ႈလၢႆးပၢႆးပၺ်ၺႃ တေၶိုပ်ႈၼႃႈ။ လၵ်းသုတ်ႇၵၢၼ်ႁဵၼ်းမႂ်ႇ ပေႃးတေ မုၼ်းလႅင်းၶိုၼ်ႈယႂ်ႇမႂ်ႇသုင်မႃးၼႆသေ ပီၵၢႆလႄႈ ဢၼ်ပူၼ်ႉမႃး ၶၢဝ်းတၢင်း 4−5 ပီၼႆႉႁဝ်းလႆႈႁဵတ်းသင်ဝႆႉ မိူဝ်ႈလဵဝ်ႁဝ်းသမ်ႉ ႁဵတ်းထိုင်မွၵ်ႈၵႃႈႁိုဝ်ယဝ်ႉ။ မိူဝ်းၼႃႈမႃး ႁဝ်းသမ်ႉတေသိုပ်ႇႁဵတ်းၸိူင်ႉႁိုဝ်ထႅင်ႈၼႆသေ ႁဵတ်းပၢင်ၵုမ်ၵၼ် ၸဵမ်ၸိူဝ်းၼႆႉဢိူဝ်ႈ။”– ဝႃႈၼႆ။

လၵ်းႁဵၼ်းမႂ်ႇ ဢၼ်ၾၢႆႇပၢႆးပၺ်ၺႃငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆးၵေႃႇတင်ႈမႃးၼႆႉ မီးၽွၼ်းလီတႃႇ သင်ႇၶၸဝ်ႈ၊ ၸဝ်ႈၶၢဝ်ၸိူဝ်းၼႆႉၵူၺ်းဢမ်ႇၵႃး တႃႇလုၵ်ႈဢွၼ်ႇ ၸိူဝ်းၶၢတ်ႇတိုဝ်ႉတၢင်းၵၢၼ်ႁဵၼ်းၵေႃႈ ပဵၼ်တီႈၸႂ်ယႂ်ႇဝႆႉဢၼ်ၼိုင်ႈ – ဝႃႈၼႆ။

ၸဝ်ႈသြႃႇၵဝိထသ ၵႅမ်ၽူႈမၢႆငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆး လၢတ်ႈထႅင်ႈဝႃႈ “ၽွၼ်းလီမၼ်းမီးၸိူင်ႉႁိုဝ်ၼႆ လၵ်းသုတ်ႇၵၢၼ်ႁဵၼ်းမႂ်ႇၼႆႉ မၼ်းမီးပၢႆးႁဵတ်းၵူႈပၢႆးပၢႆး။ လုၵ်ႈဢွၼ်ႇဝၢၼ်ႈၼွၵ်ႈၼႃးပၢင်ႇ ဢၼ်ႁၢမ်းတိုဝ်ႉတၢင်းၵၢၼ်ႁဵၼ်းၸိူဝ်းၼႆႉၵေႃႈ လႆႈႁဵၼ်း ၽိင်ႈငႄႈၸၢဝ်ႈၶိူဝ်းသေ ဢၼ်ႁၢမ်းၶိုၼ်ႈႁူင်းႁဵၼ်းၵေႃႈ။ မီးတိုဝ်ႉတၢင်းလႆႈႁဵတ်းလိၵ်ႈ တႄႇၸဵမ်ဢဝ် ၸဝ်ႈသၢင်ႇ၊ ၸဝ်ႈၶၢဝ်၊လုၵ်ႈဢွၼ်ႇယိင်းၸၢႆးတင်းၼမ်။ ပေႃးတူၺ်းတူင်ႇဝဵင်းသီႇပေႃႉၼႆၸိုင် ဝဵင်းလဵဝ်ၵူၺ်း လုၵ်ႈႁဵၼ်းမီးပဵၼ် 2−3ႁဵင်ဢၼ်ၶဝ်ႈမႃးၼႂ်းလၵ်ႉသုတ်ႇၵၢၼ်ႁဵၼ်းမႂ်ႇ။ ၶဝ်ၵေႃႈလႆႈႁဵၼ်းလိၵ်ႈ ဢၼ်ၶိုတ်းၸၼ်ႉၶိုတ်းပၢၼ်ၼၼ်ႉၼႃႇ။”– ဝႃႈၼႆ။

ငဝ်ႈငုၼ်းမုၵ်ႉၸုမ်းလူင်သင်ႇၶၸိုင်ႈတႆးၼႆႉ တႄႇတင်ႈမႃး မိူဝ်ႈပီ 1957 ၼႆႉသေ ဢွၼ်ၼမ်းၸတ်းႁဵတ်း ပၢင်ၶူၼ်ႉၶႆႈတႅမ်ႈတွပ်ႇလိၵ်ႈ ပရိယတ်တိသတ်ထမ်မပႃလၵႅၼ်ႇၸဝ်ႈၸိုင်ႈတႆးၵူႈပီ။  ထိုင်မႃးဝၢႆးပီ 2021 သမ်ႉ ၶိုၼ်းလႅၵ်ႈလၢႆႈပၢႆးပၺ်ႇၺႃႇ ႁႂ်ႈပဵၼ်လၵ်းသုတ်ႇၵၢၼ်ႁဵၼ်းမႂ်ႇသေ ၽိူမ်ႉထႅမ်ပႃး ပၢႆးႁဵၼ်းလၢႆပၢႆးယဝ်ႉ ပူင်သွၼ်ပၼ်ၼႂ်းမိူင်းတႆးပတ်းပိုၼ်ႉၵူၺ်းဢမ်ႇၵႃး ဝၢတ်ႈၵႂၢင်ႈထိုင်ပႃး ၼႂ်းမိူင်းၶၢင်၊မိူင်းယၢင်းလႅင်၊မိူင်းမွၼ်းလႄႈ တိူင်းတႃႇလိူဝ်ႇ၊တႃႈၵုင်ႈၸိူဝ်းၼႆႉလၢႆတီႈ။ ၼႂ်းပီ 2026 ၼႆႉ လုၵ်ႈႁဵၼ်းတင်းမူတ်း မီးမိုၼ်ႇၸဵတ်းႁဵင်ပၢႆယဝ်ႉ ။