မိူဝ်ႈၼႆႉ ဝၼ်းတီႈ 6/5/2026 ႁူဝ်ပဝ်ႈ ဢႃႊသီႊယၼ်ႊ ပိုၼ်ၽၢဝ်ႇယွၼ်းႁူပ်ႉ တေႃႇဢွင်ႇသၢၼ်းၸူႉၵျီႇ ၵေႃႉၺႃးသိုၵ်းမၢၼ်ႈယိုတ်းမိူင်းၵုမ်းၶင်ဝႆႉ ပီယၢဝ်းၶၢဝ်းႁိုင်။

သိုဝ်ႇၶၢဝ်ႇ Reuter ႁၢႆးငၢၼ်းဝႆႉဝႃႈ – ႁူဝ်ပဝ်ႈ ဢႃႊသီႊယၼ်ႊ လႄႈ ၽွင်းတၢင်ၶိုၵ်ႉတွၼ်း ဢႃႊသီႊယၼ်ႊ ဢွၵ်ႇလိၵ်ႈတိုၵ်းသူၼ်း လူင်ပွင်ၸိုင်ႈသိုၵ်း ႁႂ်ႈပၼ်တေႃႇဢွင်ႇသၢၼ်းၸူႉၵျီႇ ႁူပ်ႉၵၼ်တင်း တူဝ်တႅၼ်းၸုမ်း ဢႃႊသီႊယႅၼ်ႊၵူၺ်းဢမ်ႇၵႃး ႁႂ်ႈလႆႈႁူပ်ႉပႃး ၵူၼ်းၼႂ်းမုင်ႉႁေႃႁိူၼ်းမၼ်းၼၢင်း ဝႃႈၼႆ။

ၽူႈမီးပုၼ်ႈၽွၼ်းၼႂ်းႁွင်ႈၵၢၼ်ၽွင်းလူင်မိူင်းၼွၵ်ႈ မိူင်းၾိလိပ်ႉပိၼ်ႊသ် ပိုၼ်ၽၢဝ်ႇလၢတ်ႈဝႃႈ “ပိူဝ်ႈတႃႇၽွင်းတၢင်ၶိုၵ်ႉတွၼ်းမိူင်းဢႃႊသီႊယၼ်ႊ တေသိုပ်ႇႁဵတ်းသၢင်ႈၵၢၼ်ငၢၼ်း ၵဵဝ်ႇလူၺ်ႈမိူင်းႁူမ်ႈတုမ် (မိူင်းမၢၼ်ႈ) သိုပ်ႇၵႂႃႇလႆႈၸၼ်ႉၸိူဝ်ႉၸၢတ်ႈၼၼ်ႉ တေလႆႈႁူပ်ႉဢုပ်ႇၸွမ်း တေႃႇဢွင်ႇသၢၼ်းၸူႉၵျီႇယူႇၵမ်းၼိုင်ႈလႄႈ ၶႂ်ႈႁႂ်ႈၾၢႆႇလူင်ပွင်ၸိုင်ႈမိူင်းမၢၼ်ႈ ပၼ်သုၼ်ႇလႆႈႁူပ်ႉထူပ်းၸွမ်းယူႇ” ၼႆယဝ်ႉ။

မိူဝ်ႈဝၼ်းတီႈ 30/4/2026 ၽွင်းမိၼ်းဢွင်ႇလၢႆႇ ပဵၼ်ၸွမ်ၸိုင်ႈယူႇၼၼ်ႉ လႆႈဢဝ်တေႃႇဢွင်ႇသၢၼ်းၸူႉၵျီႇ ၶၢႆႉဢွၵ်ႇၶွၵ်ႈၶင် ၵႂႃႇယူႇဝႆႉတီႈႁိူၼ်းသေ ဢဝ်ႁူမ်ႇလူမ်ႈပၵ်းတႃပႂ်ႉတူၺ်း ၸွမ်းဝႆႉၵူႈၶၵ်ႉတွၼ်ႈဝႆႉ။ ၼႂ်းဝၼ်းၼၼ်ႉ လူင်ပွင်ၸိုင်ႈသိုၵ်းယိုတ်းမိူင်း ပွႆႇပၼ်ၵူၼ်းတူၵ်းၶွၵ်ႈၵၢၼ်မိူင်း လႄႈ ၵူၼ်းၸိူဝ်းႁဵတ်းၽိတ်းသေ တူၵ်းၶွၵ်ႈၶင်ဝႆႉပီယၢဝ်းၶၢဝ်းႁိုင်။

ၸုမ်းဢႃႊသီႊယၼ်ႊၼႆႉ ယင်းတိုၵ်ႉသိုပ်ႇယိုၼ်ယၼ်ဝႃႈ ႁပ်ႉတိုဝ်းၵမ်ဝႆႉ ၶေႃႈတူၵ်းလူင်းဢႃႊသီႊယၼ်ႊ 5 ၶေႃႈ မိူၼ်ၵဝ်ႇ ဢၼ်ပႃးဝႆႉဝႃႈ တေလႆႈၵိုတ်းယိုတ်း လွင်ႈႁဵတ်းႁၢႆႉၶႃႈတၢႆၵၼ် တေလႆႈပွႆႇလွတ်ႈၽူႈတူၵ်းၶွၵ်ႈၵၢၼ်မိူင်းသေ ဢုပ်ႇဢူဝ်းၶဝ်ႈႁႃလွင်ႈလီၵၼ်ၸိူဝ်းၼၼ်ႉယူႇ ၼႆယဝ်ႉ။

လိူဝ်ၼၼ်ႉၼႂ်းၶေႃႈတူၵ်းလူင်းၸုမ်းဢႃႊသီႊယၼ်ႊ 5 ၶေႃႈၼၼ်ႉ ယင်းပႃးဝႆႉထႅင်ႈဝႃႈ တေဢမ်ႇပၼ်သုၼ်ႇလႆႈ မိၼ်းဢွင်ႇလၢႆႇ ၵေႃႉဢဝ်ဝႆႉတီႈယူႇၸၼ်ႉၸွမ်ၸိုင်ႈ မိူင်းႁူမ်ႈတုမ်ဝႆႉယူႇယၢမ်းလဵဝ်ၼၼ်ႉ ၶဝ်ႈႁူမ်ႈပၢင်ၵုမ်ၸုမ်းဢႃႊသီႊယၼ်ႊ တႃႇတႅပ်းတတ်း လွင်ႈၵၢၼ်မိူင်းမိူင်းႁူမ်ႈ တုမ်ၼၼ်ႉ ဝႃႈၼႆ။