မိူဝ်ႈၼႆႉ ဝၼ်းတီႈ 30/4/2026 ၸဝ်ႈၶုၼ်ထုၼ်းဢူး ႁူဝ်ပဝ်ႈ (ၵဝ်ႇ) ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး SNLD လူႉၶွႆႈ ၶွပ်ႈတဵမ် 4 ပီ လုၵ်ႈၼွင်ႉပွင်ႈပၢႆ လႄႈ ၸုမ်းပွင်ၵၢၼ်ငဝ်ႈငုၼ်း SNLD ၸတ်းႁဵတ်းပၢင်လူႇတၢၼ်းပၼ် တီႈႁိူၼ်းမၼ်းၸဝ်ႈ ဝဵင်းတႃႈၵုင်ႈ ၼႆယဝ်ႉ။
ပၢင်လူႇတၢၼ်း ႁဵတ်းၵၢၼ်လီၵုသူဝ်ႇၼႆႉ တၢမ်တူဝ် ႁူဝ်ပဝ်ႈ SNLD ယၢမ်းလဵဝ် ၸၢႆးၼုတ်း (ႁိုဝ်) ၸၢႆးၺုၼ်ႉလုၼ်ႇ ၵေႃႉၼမ်းၼႃႈ ဢွၼ်ဢဝ် ၽူႈၶဝ်ႈႁူမ်ႈပႃႇတီႇလႄႈ ၸိူဝ်းပဵၼ်လုၵ်ႈၼွင်ႉပွင်ႈပၢႆ ပီႈၼွင်ႉၸမ်ၸႂ်တင်းသဵင်ႈ တၢၼ်းၶိူင်ႈၸႂ်ႉတိုဝ်း ၼႂ်းၵၢၼ်သႃႇသၼႃႇ လူႇၶဝ်ႈသွမ်းၽၵ်း သွမ်း ၸတ်းပၢင်ႁႅၼ်းလူႇလဵၵ်ႉလဵၵ်ႉဢွၼ်ႇၵႂႃႇ ၼႆယဝ်ႉ။
“ႁူဝ်ပဝ်ႈလူင်ႁဝ်း လူႉသဵင်ႈသုတ်းမုၼ်ၵႂႃႇသေတႃႉ ၸိူဝ်းပဵၼ်လုၵ်ႈၼွင်ႉပွင်ႈပၢႆ တေသိုပ်ႇႁဵတ်းသၢင်ႈၵၢၼ်ငၢၼ်းၵႂႃႇ ၸွမ်းၼင်ႇသဵၼ်ႈတၢင်းၾႅတ်ႇတရႄႇ ဢၼ်ႁူဝ်ပဝ်ႈတမ်းဝၢင်း သိူဝ်ႇတၢင်းဝႆႉပၼ်ၼၼ်ႉယူႇ” ၼႆ ၵေႃႉပဵၼ်လုၵ်ႈၼွင်ႉၸမ်ၸႂ် ၸဝ်ႈၶုၼ်ထုၼ်းဢူး လၢတ်ႈၼင်ႇၼႆ။
ၼႂ်းဝၼ်းၸဝ်ႈၶုၼ်ထုၼ်းဢူး ၵေႃႉႁၵ်ႉၵၢၼ်ၸိူဝ်ႉၸၢတ်ႈ တေႃႇသူႈၸဝ်ႈဢႃႇၼႃႇသိုၵ်းမၢၼ်ႈသေ ၶတ်းၸႂ်သၢင်ႈလွင်ႈၾႅတ်ႇတရႄႇတီႇမူဝ်ႇၶရေႇၸီႇၼၼ်ႉ ၸိူဝ်းပဵၼ်လုၵ်ႈၼွင်ႉ ပွင်ႈပၢႆ လႄႈ ယုမ်ႇယမ်ၼပ်ႉထိုဝ်ၼိူဝ်မၼ်းၸဝ်ႈ ဢွၼ်ၵၼ်တႅမ်ႈၶိုၼ်း ၶေႃႈသင်ႇသွၼ်မၼ်းၸဝ်ႈသေ ပိုၼ်ၽႄ ၼိူဝ်သိုဝ်ႇတူင်ႇဝူင်းၵူၼ်းဝႆႉၶိုၼ်း ၼင်ႇၼႆ။
ႁူဝ်ၼႃႈႁဝ်းလႆႈသဵင်ႈၵၢမ်ႇၵႂႃႇထူၼ်ႈ 4 ပီ တူဝ်တၢႆၵေႃႈ ၸိုဝ်ႈသဵင်ဢမ်ႇႁၢႆ လၵ်းၼမ်းၵၢၼ်မိူင်း ဢၼ်မၼ်း ၸဝ်ႈလႆႈတေႇမႃး ၶေႃႈဢၢင်ႈ ဢၼ်မၼ်းၸဝ်ႈလႆႈၵၢဝ်ႇမႃး ၶေႃႈၸုၵ်းမၼ်ႈ ဢၼ်မၼ်းၸဝ်ႈလႆႈၼႄႉၼမ်း မႃးၸိူဝ်းၼၼ်ႉ ႁဝ်းၶႃႈဝႆႉၼၵ်းၼၵ်းၼႃၼႃသေ ႁူမ်ႈၶတ်းပွင် ဢွၼ်ထွင် လႄႈ ပႆၶပ်ႉယႆမႃးၸွမ်းဝႆႉယူႇ ဢေႃႈ။ ဢမ်ႇဝႃႈပဵၼ်ၵူၼ်းသီလႂ်လၢႆးလႂ်ပေႃးတၵ်းဝႃႈ ပဵၼ်တႆးယူႇၸိုင် ၼႂ်းမၢၵ်ႇႁူဝ်ၸႂ် တီႈလိုၵ်ႉလိုၵ်ႉတီႈ ၼိုင်ႈတႄႉ တေမီးလွင်ႈၼပ်ႉထိုဝ်ယုမ်ႇယမ်ၸဝ်ႈႁဝ်းဝႆႉယူႇၼႆ လပ်ႉလွင်းဝႆႉယူႇဢေႃႈ – ဝႃႈၼႆ။
ၸဝ်ႈၶုၼ်ထုၼ်းဢူးၼႆႉ ပဵၼ်လၢၼ်ၸၢႆးၸဝ်ႈၾႃႉ သီႇပေႃႉ ၽူႈႁၢပ်ႇႁၢမ်ၵၢၼ်ၸိူဝ်ႉၸၢတ်ႈ ၼႂ်းတူင်ႇဝူင်း ၵၢၼ်မိူင်းမႃးၸဵမ်လဵၵ်ႉ တေႃႇပေႃးလူႉသဵင်ႈသုတ်းမုၼ်ၵႂႃႇ မိူဝ်ႈဢႃႇယု 79 ပီ တီႈဝၢၼ်ႈတႆး 9 လၵ်း ဝဵင်းတႃႈၵုင်ႈ မိူဝ်ႈဝၼ်းတီႈ 30/4/2022။ ယၢမ်းလဵဝ် ၵိုတ်းဝႆႉ မေးၼၢင်း တေႃႇဝူၺ်ႇဝူၺ်ႇလုၼ်ႇ၊ လုၵ်ႈၸၢႆး ၶုၼ်ဢူးလုၼ်ႇ၊ လုၵ်ႈပႂ်ႉ တၼ်ႇတႃႇလုၼ်ႇ၊ လုၵ်ႈယိင်း ၼၢင်းဢႄးလ်ၵီး လႄႈ လၢၼ် 2 ၵေႃႉ။
တဝ်ႈၽဝ်ႇလုပ်ႇမၼ်းၸဝ်ႈတႄႉ လုမ်းလၢင်းလႄႈၵူၼ်းမိူင်းသီႇပေႃႉ ဢဝ်မိူဝ်းၾင်ႁဵတ်းၶုမ်ၵုတ်းဝႆႉတီႈပႃႇႁဵဝ်ႈၸဝ်ႈၾႃႉဝဵင်းသီႇပေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ