ပၢင်ၶွပ်ႈၶူပ်ႇ 37 ပီတဵမ် ဝၼ်းၵေႃႇတင်ႈ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး (SNLD)  (ႁိုဝ်) ပႃႇတီႇႁူဝ်သိူဝ်  ၸတ်းႁဵတ်းၵႂႃႇတၢင်းဢွၼ်ႊလၢႆႊမိူဝ်ႈဝၼ်းတီႈ 26 /10/2025 ယၢမ်းၵၢင်ၼႂ် 9 မူင်း  ႁူဝ်ပဝ်ႈပႃႇတီႇႁူဝ်သိူဝ်  (SNLD)  ၸၢႆးၼုတ်း(ၸၢႆးၺုၼ်ႉလုၼ်ႇ)  မွၵ်ႇလၢတ်ႈၶေႃႈၵႂၢမ်း   ။

ၼႂ်းပၢင်ၵႅဝ်ႈၼၼ်ႉ ၽူႈၼမ်းၼႃႈ ပႃႇတီႇမႂ်ႇသုင်ၸိုင်ႈတႆး (SSPP/SSA) ၸွမ်သိုၵ်းလူင် ၸဝ်ႈသိူဝ်ထႅၼ်ႈ တင်း ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး (RCSS/SSA) ၸွမ်သိုၵ်းလူင် ယွတ်ႈသိုၵ်း၊ ၽူႈၼမ်းပႃႇတီႇတၢင်ႇၸၢဝ်းၶိူဝ်း ၸိူဝ်းႁူမ်ႈၽၢၵ်ႈၼႃႈၵၢၼ်ၵၼ်ၸိူဝ်းၼၼ်ႈၵေႃႈ ၶဝ်ႈႁူမ်ႈမွၵ်ႇလၢတ်ႈၶေႃႈၵႂၢမ်း  ပၼ်ႁႅင်းၵမ်ႉထႅမ်ၸွမ်း ၼိူဝ်ၶေႃႈၸုၵ်းမၼ်ႈပႃႇတီႇႁူဝ်သိူဝ် (SNLD)။

  မီးၵူၼ်းၶဝ်ႈႁူမ်ႈ ၸွမ်းပၢင်ၵႅဝ်ႈ ၼႂ်းသုၼ်ႇတူဝ်လႄႈႁူမ်ႈၵၼ်ၶဝ်ႈပဵၼ်ၸုမ်း ၸိူဝ်းၼႆႉ မီး 400 ၵေႃႉပၢႆ  ။

ၸၢႆးၺုၼ်ႉလုၼ်ႇ ႁူဝ်ပဝ်ႈပႃႇတီႇႁူဝ်သိူဝ် (SNLD) မွၵ်ႇလၢတ်ႈၵႂႃႇဝႃႈ “ၼႂ်းၶၢဝ်းတၢင်း 37 ပီၼႆႉ ၸွမ်းၼင်ႇငဝ်းလၢႆးၵၢၼ် ဝၢၼ်ႈမိူင်း ဢမ်ႇၼိမ်သဝ်းလႄႈ ပႃႇတီႇႁူဝ်သိူဝ် လႆႈလတ်းၽၢၼ်ႇမႃး လွင်ႈယၢပ်ႇၽိုတ်ႇ လႄႈ လွင်ႈၶဵင်ႇတႃႉ ၼႂ်းၶၵ်ႉၵၢၼ်မိူင်းယူႇတင်းၼမ်လၢႆ။ ႁၢၼ်ႉတေႃႇထိုင်ယၢမ်းလဵဝ်ၵေႃႈ ငဝ်းလၢႆးပႃႇတီႇႁူဝ်သိူဝ်ၼႆႉ ယင်းတိုၵ်ႉတူၵ်းယူႇၼႂ်းငဝ်းလၢႆးၾူၼ်လူမ်းလႅင်ႉလူင်ယူႇ” ၼႆယဝ်ႉ။

ၼႂ်းၶၢဝ်းယၢမ်းငဝ်းလၢႆးဝၢၼ်ႈမိူင်းဢမ်ႇၼိမ်သဝ်း ၽွင်းသဵၼ်ႈတၢင်းၵၢၼ်သိုၵ်းၵႂၢင်ႈၶႂၢင်သေ သဵၼ်ႈတၢင်းၵၢၼ်မိူင်းယူႇၼႆႉ  ဢမ်ႇၸၢင်ႈႁဵတ်းၵၢၼ်ၵမ်ႉ ၸွႆႈပေႃႈမႄႈပီႈၼွင်ႉၵူၼ်းမိူင်း ၸိူဝ်းႁူပ်ႉၺႃးၽေးလႆႈလွတ်ႈလႅဝ်းလီငၢမ်း  တဵမ်ထူၼ်ႈလႆႈၼၼ်ႉ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး (SNLD) ႁိုဝ် ပႃႇတီႇႁူဝ်သိူဝ် ယိၼ်းၸႂ်ဢမ်ႇလီၸွမ်းတေႉတေႉသေ ယွမ်းၼွမ်းထိုင် ပေႃႈမႄႈၵူၼ်းမိူင်း လူၺ်ႈၵၢင်ၸႂ်ၽိူၵ်ႇၸိုၼ်ႈၶၢဝ်သႂ်ၸႅတ်ႈၸၢင်ႇတေႉတေႉယူႇၼႆ တၢမ်တူဝ်ၸၢႆးၺုၼ်ႉလုၼ်ႇ ႁူဝ်ပဝ်ႈပႃႇတီႇ မွၵ်ႇလၢတ်ႈၵႂႃႇၼင်ႇၼႆ။

လိူဝ်ၼၼ်ႉ ယင်းသိုပ်ႇမွၵ်ႇလၢတ်ႈသပ်းၸႅင်ႈၼႄၶေႃႈဝူၼ်ႉၶပ်ႉႁၼ်ၶွင်ၸုမ်းပွင်ၵၢၼ်ပႃႇတီႇႁူဝ်သိူဝ်ၵႂႃႇထႅင်ႈဝႃႈ – ပႅၵ်ႉသမ်ႉၸုမ်း ၸိူဝ်းမီးဢႃႇၼႃႇ ပၼ်ႁႅင်းဢီးမိပ်ႇငႅၼ်းမႃးလၢႆးတၢင်းၸိူင်ႉႁိုဝ်ၵေႃႈလီ ယူႇတီႈပႃႇတီႇႁူဝ်သိူဝ် တိုၼ်းတေဢမ်ႇတူၺ်းပုၼ်ႈသုၼ်ႇတူဝ် သေယွမ်းႁဵတ်းသၢင်ႈၵႂႃႇၸွမ်းၼင်ႇ ၸုမ်းၸိူဝ်းမီးဢႃႇၼႃႇၶဝ် ၶႂ်ႈလႆႈၶႂ်ႈပဵၼ်ၼၼ်ႉလႃးလႃး ၼႆယဝ်ႉ။

မိူဝ်ႈပီ 2024 ပူၼ်ႉမႃးၼၼ်ႉၵေႃႈ ပႃႇတီႇႁူဝ်သိူဝ် ယၢမ်ႈပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ – ပၢင်တိုၵ်းၼႂ်းမိူင်းႁူမ်ႈတုမ် ဢၼ်ပဵၼ်မႃးၼပ်ႉႁူဝ်သိပ်းပီၼႆႉ ပဵၼ်ယွၼ်ႉၸဝ်ႈဢႃႇၼႃႇသိုၵ်း ၵူႈသိုပ်ႇၵူႈပၢၼ် ဢမ်ႇယွမ်းႁပ်ႉလွင်ႈၽဵင်ႇပဵင်းၸိူဝ်ႉၸၢတ်ႈလႄႈ ပိူင်ၽွင်းငမ်းတူဝ်ၵဝ်ႇ ၽဵင်ႇပဵင်းလွတ်ႈလႅဝ်း ။ ၵွပ်ႈၼႆထုၵ်ႇလီ ၽဵဝ်ႈမူၺ်ႉၸဝ်ႈဢႃႇၼႃႇသိုၵ်း တင်းငဝ်ႈႁၢၵ်ႈတူၼ်ႈတေႃတင်းမူတ်း – ၸင်ႇတေၸၢင်ႈၵေႃႇတင်ႈလႆႈၸိုင်ႈမိူင်းၾႅတ်ႊတရႄႊ ၵၼ်ၵိုင်ႇလႅပ်ႈၵၼ်တင်း ငဝ်းလၢႆးၵၢပ်ႈပၢၼ်လုမ်ႈၾႃႉ ဝႃႈၼႆ။

ဝၼ်းၶွပ်ႈၶူပ်ႇပႃႇတီႇႁူဝ်သိူဝ် 37 ပီတဵမ် 2025 ၼႆႉ ၸၢႆးၺုၼ်ႉလုၼ်ႇ ႁူဝ်ပဝ်ႈပႃႇတီႇႁူဝ်သိူဝ် တိုၵ်းသူၼ်းၵႂႃႇထႅင်ႈဝႃႈ “ ၼင်ႇႁိုဝ်   တေဢမ်ႇမီးၸုမ်းၸဝ်ႈဢႃႇၼႃႇ  မႃးထႅင်ႈၼၼ်ႉ တေလႆႈသိုပ်ႇႁဵတ်းသၢင်ႈၵႂႃႇ။ ၼၼ်ႉၵူၺ်းဢမ်ႇၵႃး တွၼ်ႈတႃႇ ၸုမ်းတႆးၼင်ႇၵၼ် တေၽွမ်ႉႁူမ်ႈၵၼ်၊ ၸုမ်းၸၢဝ်းၶိူဝ်း လႄႈ ပႃႇတီႇၵၢၼ်မိူင်းၸိူဝ်းမီးယိူင်းဢၢၼ်းမိူၼ်ၵၼ် တေမီးလွင်ႈၽွမ်ႉႁူမ်ႈၵၼ်မႃးၼၼ်ႉ ၼႆႉပဵၼ်ၵၢၼ်လမ်ႇလွင်ႈဢၼ်တေလႆႈႁဵတ်းသၢင်ႈၵႂႃႇမိူဝ်းၼႃႈ” ၼႆယဝ်ႉ။

ငဝ်ႈငုၼ်းတီႇမူဝ်ႇၶရေႇသီႇ ၸိူဝ်ႉၶိူဝ်းတႆး (SNLD) ပႃႇတီႇႁူဝ်သိူဝ်ၼႆႉ ၵေႃႇတင်ႈမႃးမိူဝ်ႈဝၼ်းတီႈ 26/10/1988 သေၶတ်းၸႂ် ႁဵတ်း ၵၢၼ်တႃႇသုၼ်ႇလႆႈၸိူဝ်ႉၸၢတ်ႈၵူၼ်းၸၢဝ်းၶိူဝ်းၼႂ်းၸိုင်ႈတႆးမႃး တေႃႇထိုင်ဝၼ်းမိူဝ်ႈၼႆႉ။ ၵူၺ်းၵႃႈ မိူဝ်ႈပီ 2022  သိုၵ်းမၢၼ်ႈယိုတ်း မိူင်း  ပိုၼ်ၽၢဝ်ႇၸႂ်ႉတၢင်ႇမၢႆၾၢင်ပႃႇတီႇၶိုၼ်း တႃႇၶဝ်ႈပၢင်လိူၵ်ႈတင်ႈဢၼ်ၸဝ်ႈဢႃႇၼႃႇသိုၵ်းတေဢွၼ်ၼမ်းၸတ်းႁဵတ်း။ ပႃႇတီႇ ႁူဝ်သိူဝ် ဢမ်ႇယွမ်းႁပ်ႉၸဝ်ႈဢႃႇၼႃႇသိုၵ်းလႄႈ ဢမ်ႇတၢင်ႇမၢႆၾၢင်ပႃႇတီႇလႄႈ ထုၵ်ႇသိုၵ်းမၢၼ်ႈယိုတ်းမိူင်းပိုၼ် ၽၢဝ်ႇယႃႉမၢႆၾၢင်ပႃႇတီႇဝႆႉ။

ႁၢၼ်ႉတေႃႇထိုင်ယၢမ်းလဵဝ်ပီ 2025 ၼႆႉၵေႃႈ ပႃႇတီႇႁူဝ်သိူဝ် ယင်းတိုၵ်ႉသိုပ်ႇၸုၵ်းမၼ်ႈၼိူဝ်ၶေႃႈယၼ်ႇၸႂ် တႃႇၵေႃႇသၢင်ႈၸိုင်ႈမိူင်း ၾႅတ်ႊတရႄႊတီႊမူဝ်ႊၶရေႇၸီႇသေ ဢမ်ႇယွမ်းႁပ်ႉလႆႈၼိူဝ်ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း ၼမ်းၸတ်းၼၼ်ႉ။