ႁွင်ႈၵၢၼ်ၶၢဝ်ႇတႆးလွတ်ႈလႅဝ်း ပိုၼ်ၽၢဝ်ႇဝႃႈ ဝၼ်းတီႈ 27/05/2026 ၽွင်းမိူဝ်ႈ ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး RCSS ၸွမ်သိုၵ်းလူင် ယွတ်ႈသိုၵ်း ႁွတ်ႈထိုင်တီႈဝၢၼ်ႈၼၢင်း ဢိူင်ႇၶူဝ်ဢုတ်ႇ ၸႄႈဝဵင်းၶူဝ်လမ် ၸိုင်ႈတႆးပွတ်းၸၢၼ်းၼၼ်ႉ တပ်ႉသိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်း ပၼ်ႇလဵပ်ႈႁိမ်းဝၢၼ်ႈၼၢင်း ဝႃႈၼႆ။
ဝၼ်းၼၼ်ႉၵၢင်ၼႂ်မွၵ်ႈ 10 မူင်း ၽွင်းမိူဝ်ႈ ႁူဝ်ပဝ်ႈ RCSS ႁူပ်ႉထူပ်းၵူၼ်းမိူင်း ဝၢၼ်ႈၼၢင်းယူႇၼၼ်ႉ ႁိူဝ်းမိၼ်တိုၵ်း သႅၼ်း MTX-1A or 1B လမ်းၼိုင်ႈ မႃးပၼ်ႇလဵပ်ႈသေ လူင်းၸမ်ပိုၼ်ႉတီႈ မွၵ်ႈ 6 ႁွပ်ႈ။
ၵမ်းဢွၼ်တၢင်းသုတ်း ႁိူဝ်းမိၼ်ၼၼ်ႉ ယူႇတီႈၵႆပၼ်ႇလဵပ်ႈၵူၺ်းသေတႃႉ ဝၢႆးၼၼ်ႉမိၼ်လဵပ်ႈၸမ်ဝၢၼ်ႈမႃးၵမ်းလွႆးလွႆး ၼႄၾၢင်ႁၢင်ႈလွၵ်ႇငိုတ်ႈပႃး ဝႃႈၼႆ။
လွင်ႈၼႆႉ ၾၢႆႇတပ်ႉသိုၵ်းမၢၼ်ႈလၢတ်ႈဝႃႈ ပဵၼ်ၵၢၼ်ၾိုၵ်းမိၼ်ၵူၺ်း ၼႆသေတႃႉ ၾၢင်ႁၢင်ႈဢမ်ႇမိူၼ်ၵၢၼ်ၾိုၵ်း၊ ပၼ်ႇလဵပ်ႈလၢႆၵမ်းထပ်းၵၼ်၊ ၼႄၾၢင်ႁၢင်ႈပဵၼ်ၵၢၼ်လွၵ်ႇငိုတ်ႈ၊ ဢမ်ႇတူၺ်းၼႃႈတႃၵၼ်သေ လူလၢႆ ၵၼ်ၵူၺ်း – ဝႃႈၼႆ။
ၸွမ်ၸိုင်ႈ မိၼ်းဢွင်ႇလၢႆႇ ႁူဝ်ၼႃႈသိုၵ်းယိုတ်းမိူင်းလၢတ်ႈဝႃႈ – ၸွမ်းၼင်ႇ ၽႅၼ်ၵၢၼ် 100 ဝၼ်းသေ ႁဵတ်းသၢင်ႈလွင်ႈငမ်းယဵၼ်ယူႇၼႆသေတႃႉ ဢမ်ႇမႅၼ်ႈငၢမ်ႇၸွမ်းၵၢၼ်သၢင်ႈငမ်းယဵမ်၊ ၸၢင်ႈတုမ်ႉတိူဝ်ႉပႃး လွင်ႈယုမ်ႇယမ်သွင်ၾၢႆႇ- ၼႆ တႆးလွတ်ႈလႅဝ်း ႁွင်ႈၵၢၼ်ၶၢဝ်ႇ ၶွင်ႇသီႇဢဝ်ၶိုၼ်းၸိုင်ႈတႆး RCSS ႁၢႆးငၢၼ်း ဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ