မိူဝ်ႈၼႆႉ ဝၼ်းတီႈ 16 လိူၼ်မၢတ်ႉၶျ် သိုၵ်းမၢၼ်ႈယိုတ်းမိူင်းၼမ်းၼႃႈသေ တႄႇၸတ်းပၢင်ၵုမ်လုမ်းသၽႃး ၵူၼ်းမိူင်း ပွၵ်ႈၵမ်းသၢမ်ၵႂႃႇ ယၢမ်းၵၢင်ၼႂ် 10 မူင်း တီႈဝဵင်းလူင်ၼေႇပျီႇတေႃႇ။
ၼႂ်းပၢင်ၵုမ်ဝၼ်းႁႅၵ်ႈတီႈပၢင်ၵုမ်လူင်သၽႃးၵူၼ်းမိူင်းၼၼ်ႉ သိုၵ်းမၢၼ်ႈ လႄႈ ၸုမ်းပႃႇတီႇၵၢၼ်မိူင်းၸိူဝ်းဢွင်ႇပေႉ ပၢင်လိူၵ်ႈတင်ႈပွမ် 2025-2026 လိူၵ်ႈ ဢူးၶိၼ်ႇယီႇ ႁူဝ်ပဝ်ႈ ပႃႇတီႇသၢင်ႇသီႈ (USDP) ႁဵတ်းပဵၼ်ႁူဝ်ပဝ်ႈလုမ်းသၽႃးၵူၼ်းမိူင်း ဢဝ် ဢူးမွင်ႇမွင်ႇဢူင်း ၽွင်းလူင်ၾၢႆႇ ႁွင်ႈၵၢၼ်ၶၢဝ်ႇ (ပြန်ကြားရေးဝန်ကြီး) ႁဵတ်းပဵၼ်ၵႅမ်ႁူဝ်ပဝ်ႈၵႂႃႇ ၼႆယဝ်ႉ။
သိုၵ်းမၢၼ်ႈယိုတ်းမိူင်းၼႆႉ မၢပ်ႇၼႄးဝႃႈ ပၢင်လိူၵ်ႈတင်ႈ ပီ 2020 ဢမ်ႇမီးလွင်ႈၽဵင်ႇပဵင်း ဢမ်ႇမီးလွင်ႈပူင်ႇသႂ် ၽွင်းတွတ်ႈၶႅပ်းၵၢင်ၸႂ် လႄႈ ၼပ်ႉဢၢၼ်ႇၶႅပ်းၵၢင်ၸႂ်ၼၼ်ႉၼႆသေ တဵၵ်းယိုတ်းဢဝ်ဢႃႇၼႃႇၸိုင်ႈမိူင်း မိူင်းႁူမ်ႈတုမ်ၵႂႃႇ မိူဝ်ႈလိူၼ်ၾႅပ်ႉပိဝ်ႊရီႇ ပီ 2021 ၼၼ်ႉသေ ႁိုင်ၶၢဝ်းတၢင်း 5 ပီယဝ်ႉ ၸင်ႇၶိၼ်တဵၵ်းႁဵတ်းပၢင်လိူၵ်ႈတင်ႈပွမ်ႁႂ်ႈပေႃးယဝ်ႉတူဝ်ႈၸင်ႇ ၶိုင်ပွင်ၸတ်းပၢင်ၵုမ်လူင်လုမ်းသၽႃးၶိုၼ်း ။
ၼႂ်းလုမ်းသၽႃးၵူၼ်းမိူင်း ပၢၼ်သိုၵ်းမၢၼ်ႈယိုတ်းမိူင်းၼႆႉ မီးၸွမ်ၽွင်းလူင်သိုၵ်းမၢၼ်ႈ ဢူးၺူဝ်ႇၸေႃး လႄႈ ၸွမ်သိုၵ်းလူင် ၸိူဝ်းလိုဝ်ႈၵၢၼ်သိုၵ်းဝႆႉၼၼ်ႉ ၶဝ်ႈယူႇဝႆႉၸွမ်း တင်း ၼမ်လၢႆ။
ပိူဝ်ႈတႃႇတေၸတ်းၼမ်းပၢင်ၵုမ်လုမ်းသၽႃးၵူၼ်းမိူင်းၼၼ်ႉၵေႃႈ တေလႆႈလိူၵ်ႈတူဝ်တႅၼ်းၵေႃႉၼိုင်ႈ ၼႂ်းၸုမ်းပႃႇတီႇၵၢၼ်မိူင်းၸိူဝ်းဢွင်ႇပေႉပၢင်လိူၵ်ႈတင်ႈၼၼ်ႉၼႆလႄႈ တႅၼ်းၽွင်းၶဵတ်ႇလိူၵ်ႈတင်ႈ ဝဵင်းတၵူင်ႇ ဢူးၼၼ်ႇတၵျေႃႇၸွႃႇ လႆႈၶႅပ်းၵၢင်ၸႂ်ၼမ်လိူဝ်ပိူၼ်ႈၵႂႃႇ ၼႆယဝ်ႉ။
ၼႂ်းပၢင်ၵုမ်လုမ်းသၽႃးဝၼ်းႁႅၵ်ႈၼၼ်ႉ တႅၼ်းၽွင်း ၸိူဝ်းဢွင်ႇပေႉပၢင်လိူၵ်တင်ႈ ပီ 2025-2026 လႆႈလူင်းလၢႆးမိုဝ်း ၼိူဝ်ၽိုၼ်ၵိၼ်ၵႅၼ်ႇ လႄႈ တိူင်ႇၵၢဝ်ႇၵတိသတ်ႉၸႃႇၵႂႃႇ ပဵၼ်တၢင်းၵၢၼ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ