မိူဝ်ႈဝၼ်းတီႈ 14/5/2026 လူင်ပွင်ၸိုင်ႈ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇဝႃႈ ႁၢင်ႈႁႅၼ်းၶပ်းၶိုင်ဝႆႉ ပၵ်းပိူင်ၾိင်ႈမိူင်း ဢၼ်တေၸၢင်ႈတီႉၺွပ်း လႄႈ ပၼ်တၢမ်ႇ ၵူၼ်းၸိူဝ်း ႁဵတ်းၵၢၼ်လွၵ်ႇလႅၼ်ၵိၼ်ငိုၼ်း တင်းဢွၼ်ႊလၢႆး (ၵျႃႊၽျႅၼ်ႉ) ၊ ၵူၼ်းၸိူဝ်းႁဵတ်းၽိတ်းပၵ်းပိူင် မိူၼ်ၼင်ႇ ၵၢၼ်လွၵ်ႇငိုတ်ႈ ၵၢၼ်ႁုၵ်းႁၢႆႉၸိူဝ်းၼႆႉလႆႈ ထိုင်တၢမ်ႇတၢႆၼၼ်ႉဝႆႉယဝ်ႉလီငၢမ်း ယဝ်ႉဝႃႈၼႆ။

ၼႂ်းမိူင်းႁူမ်ႈတုမ်ၼႆႉ ဝၢႆးလင်ၸုမ်းသိုၵ်းမၢၼ်ႈယိုတ်းမိူင်းယဝ်ႉ ၵိူတ်ႇပဵၼ်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ႁဵတ်းႁႂ်ႈ ၾႆးပၢင်တိုၵ်းလၢမ်းၽႄႈၸွတ်ႇၵႂႃႇသေ ႁဵတ်းႁႂ်ႈ ၵၢၼ်ၽွင်းငမ်းဢမ်ႇတၢႆတူဝ် ႁၢမ်းၵၢၼ်တတ်းသိၼ်တြႃး ၵူၼ်းမိူင်းဢမ်ႇလႆႈႁပ်ႉလွင်ႈၽဵင်ႇပဵင်း ႁူပ်ႉလွင်ႈတုၵ်ႉယၢၵ်ႈၶၢၼ်ၵိၼ်း ယွၼ်ႉႁၢမ်းၵၢၼ်ႁႃၵိၼ်လဵင်ႉတွင်ႉ ႁၢဝ်ႈႁႅင်း။

ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး (ၵျႃႊၽျႅၼ်ႉ) လၢမ်းၽႄႈၶဝ်ႈထိုင်မႃးၼႂ်းမိူင်းႁူမ်ႈတုမ် ၽွင်းၵူၼ်းမိူင်းထူပ်း​​ၽေးသိုၵ်းသိူဝ်။

ၵျႃႊၽျႅၼ်ႉၸႂ်ႉၵူႈလွၵ်းလၢႆး​​သေလွၵ်ႇလႅၼ်ၵိၼ်ၵၼ် တူဝ်ယၢင်ႇ ၸႂ်ႉတိုဝ်းလွင်ႈႁၵ်ႉလွင်ႈပႅင်းမၢဝ်ႇသၢဝ်​​သေလွၵ်ႇလႅၼ်တေႃႇ ၵူၼ်းၸႂ်ႉတိုဝ်းၼႅင်ႈသၢၼ် (Internet) တင်းလုမ်ႈၾႃႉ ႁႂ်ႈႁဵတ်းၵၢၼ်လူင်းတိုၼ်းၸွမ်း ၶရိပ်ႊတူဝ်ႊ ၸဵမ်ၸိူဝ်းၼႆႉ။

ပၵ်းပိူင်ၾိင်ႈမိူင်း ပိူင်ယုၵ်းယၢင် ဢၼ်လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ၶပ်းၶိုင်ႁၢင်ႈႁႅၼ်းဝႆႉ တႃႇႁႂ်ႈလုမ်းသၽႃး မၵ်းမၼ်ႈပၼ်ၼႆႉတႄႉ ႁၢင်ႈႁႅၼ်းဝႆႉ ႁႂ်ႈပေႃးပၼ်တၢမ်ႇတၢႆလႆႈ ၵူၼ်းၸိူဝ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး (ၵၢၼ်ၵျႃႊၽျႅၼ်ႉ) ၊ ၵူၼ်းၸိူဝ်းႁဵတ်းၵၢၼ်ႁုၵ်းႁၢႆႉ၊ ၵူၼ်းၸိူဝ်းတဵၵ်းတဵင်ပေႉၵိၼ်လူလၢႆ လႄႈ တီႉၺွပ်း မတ်ႉ ပေႃႉထုပ်ႉ ၸိူဝ်းၼႆႉ ဝႃႈၼႆ။

လိူဝ်ၼၼ်ႉ ၵူၼ်းၸိူဝ်းပဵၼ်ၽူႈၼမ်း ႁိုဝ် ၽူႈဢွၼ်ႁူဝ် ၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ လႄႈ ၵူၼ်းၸိူဝ်းၸႂ်ႉတိုဝ်းတၢင်းႁူႉပၢႆးမေႃ ၾၢႆႇဢၢႆႊထီႊ (IT) သေ လွၵ်ႇလႅၼ်ၵိၼ်ငိုၼ်းၼၼ်ႉၵေႃႈ ဢဝ်လိူင်ႈလႆႈလူၺ်ႈပၵ်းပိူင်ၾိင်ႈမိူင်းၶေႃႈၼႆႉ။တူတ်ႈတၢမ်ႇထိုင် တူတ်ႈၶွၵ်ႈ​​တေႃႇၸူဝ်ႈလႆႈ။

ပေႃးထိုင်မႃး လိူၼ်ၵျုၼ်ႊ ဝူင်ႈထီႉၼိုင်ႈၼႆႉ လုမ်းသၽႃးၼႂ်းမိူင်းႁူမ်ႈတုမ် ဢၼ်လႆႈယူႇတႂ်ႈဢၢမ်းၼၢတ်ႈ ၸုမ်းသိုၵ်းမၢၼ်ႈၼၼ်ႉ တေတႄႇပိုတ်ႇၶိုၼ်းယဝ်ႉလႄႈ ၾၢႆႇၶႃႈႁၢပ်ႇ ၵၢၼ်ၶုၼ် ၼႂ်းလူင်ပွင်ၸိုင်ႈယိုတ်းမိူင်း ၸင်ႇလႆႈႁၢင်ႈႁႅၼ်းပၵ်းပိူင်ၾိင်ႈမိူင်းၼႆႉ ၵႂႃႇတၢင်ႇလၢတ်ႈၼႂ်းလုမ်းသၽႃးသေ မၵ်းမၼ်ႈပဵၼ်တၢင်းၵၢၼ်ၵႂႃႇ ၼႆယဝ်ႉ။

ၽွင်းၸွမ်ၸိုင်ႈယိုတ်းမိူင်း မိၼ်းဢွင်ႇလၢႆႇ လႆႈၸၼ်ႉပဵၼ်တၢင်းၵၢၼ်ယဝ်ႉသေ ၶွတ်ႇၽွတ်ႈလူင်ပွင်ၸိုင်ႈမႂ်ႇ ဢွၼ်တၢင်းသုတ်းၼၼ်ႉ လႆႈဢဝ်ပိူင်ယုၵ်းယၢင်ႇ ပၵ်းပိူင်ၾိင်ႈမိူင်း ၵၢၼ်တိုၵ်းတေႃးၽဵဝ်ႈမူၺ်ႉၵျႃႊၽျႅၼ်ႉ ၼႆႉ တၢင်ႇလၢတ်ႈဝႆႉ ဢွၼ်တၢင်းသုတ်း ၼႂ်းလုမ်းသၽႃး ။

ၼႂ်းပိူင်ယုၵ်းယၢင်ႇ ပၵ်းပိူင်ၾိင်ႈမိူင်း ၵၢၼ်တိုၵ်းတေႃးၽဵဝ်ႈမူၺ်ႉၵျႃႊၽျႅၼ်ႉၼႆႉ ၸႅင်ႈဝႆႉဝႃႈ – တႃႇၽဵဝ်ႈမူၺ်ႉ ၸုမ်းႁဵတ်းၵၢၼ်ၵျႃႊၽျႅၼ်ႉၼႆႉ တေႁူမ်ႈမိုဝ်းၵၼ်တင်း မိူင်းၼွၵ်ႈၶဝ်သေ ၶွတ်ႇၽွတ်ႈၶိုၼ်းၵေႃႇမတီႇမႂ်ႇ- ၼႆလႄႈ ၶေႃႈၼႆႉ မိူၼ်ၵၼ်တင်း ပိုတ်ႇသဵၼ်ႈတၢင်း ႁႂ်ႈၸိုင်ႈမိူင်းၼွၵ်ႈၶဝ် ၶဝ်ႈမႃးႁူပ်ႉ ၵဵဝ်ႇၵွင်ႉၸွမ်းလႆႈ လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ပဵၼ်တၢင်းၵၢၼ်ၵူၺ်းၼႆ ၸႅင်ႈလႅင်းလီယူႇ။

ၼႂ်းႁူဝ်လိူၼ်မေႊၼႆႉ ၶၢဝ်းတၢင်း 5 ဝၼ်းၵူၺ်း ႁွင်ႈၵၢၼ်သိုဝ်ႇၶၢဝ်ႇ လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇဝႃႈ တီႉၺွပ်းလႆႈ ၵူၼ်းႁဵတ်းၵၢၼ်ၵျႃႊၽျႅၼ်ႉ ၼႂ်းမိူင်းတႆး ပွတ်းၸၢၼ်း ၵုမ်းလႆႈ ၵူၼ်းမိူင်းၶႄႇ 86 ၵေႃႉ ၵူၼ်းမိူင်းမၢၼ်ႈ 9 ၵေႃႉ ၼႆယဝ်ႉ။

မိူဝ်ႈပူၼ်ႉမႃး ဝၼ်းတီႈ 12-13/5/2026 ၼႆႉၵေႃႈ ပိုၼ်ၽၢဝ်ႇဢွၵ်ႇထႅင်ႈဝႃႈ တီႉၺွပ်းလႆႈ ၵူၼ်းမိူင်းၶႄႇ 90 ၵေႃႉ ၸိူဝ်းႁဵတ်းၵၢၼ်ၵျႃႊၽျႅၼ်ႉယူႇႁိမ်းၾင်ႇမႄႈၼမ်ႉၶူင်း ၸႄႈဝဵင်းမၢၵ်ႇမၢင် ၼႃႈတီႈၸုမ်းသိုၵ်းဝႃႉ ၵုမ်းၵမ် ၼႂ်းမိူင်းတႆးပွတ်းႁွင်ႇထႅင်ႈ ၼႆယဝ်ႉ။

ၸုမ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး (ၵျႃႊၽျႅၼ်ႉ) ၼႆႉ လုၵ်ႉတီႈၸွမ်းလႅၼ်လိၼ် မိူင်းၶႄႇ-မိူင်းမၢၼ်ႈ ၊ မိူင်းထႆး- မိူင်းမၢၼ်ႈသေ ယၢမ်းလဵဝ် ၽႄႈလၢမ်းၸွတ်ႇၵႂႃႇ ၼႂ်းမိူင်းတႆးပတ်းပိုၼ်ႉဝႆႉၵူၺ်းဢမ်ႇၵႃး ၸွမ်းၼႃႈတီႈၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ်ၵုမ်းၵမ် လႄႈ ၼႂ်းၼႃႈတီႈၸုမ်းသိုၵ်းမၢၼ်ႈ လႄႈ ပျီႇတူႉၸိတ်ႉၶဝ် ၵုမ်းၵမ်ဝႆႉၼၼ်ႉၵေႃႈ လိူင်ႇၽႄႈၼမ်မႃးႁႅင်း။