ၼင်ႇႁိုဝ် တေၽေႃႇၼမ်ႉၼႄတူဝ် ႁဵတ်းသၢင်ႈၶိုၼ်း ၽႅၼ်ၵၢၼ်သဵၼ်ႈတၢင်းႁွပ်ႈလူၵ်ႈ (BRI) ဢၼ်ၸိူင်ႉၵၢတ်ႈၵႂႃႇယွၼ်ႉ သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းၼၼ်ႉၼႆသေ ၽွင်းတၢင်မိူင်းၶႄႇ H.E. Ms. Ma Jia ၵေႃႉႁပ်ႉဢဝ်ပုၼ်ႈၽွၼ်း လွင်ႈမိူင်းႁူမ်ႈတုမ် (မိူင်းမၢၼ်ႈ) ၼႆႉ မႃးႁူပ်ႉထူပ်းၵၼ်တင်း ၵႅမ်ၸွမ်ၸိုင်ႈ ဢူးၺူဝ်ႇၸေႃး ၸုမ်းလူင်ပွင်ၸိုင်ႈယိုတ်းမိူင်း တီႈဝဵင်းလူင်ၼေႇပျီႇတေႃႇ။
မိူဝ်ႈဝၼ်းတီႈ 19/5/2026 ၽွင်းတၢင်မိူင်းၶႄႇ ၵႂႃႇႁူပ်ႉထူပ်းၸွမ်း ၵႅမ်ၸွမ်ၸိုင်ႈ ဢူးၺူဝ်ႇၸေႃး ၵူၺ်းဢမ်ႇၵႃး ႁူပ်ႉထူပ်းပႃး ႁူဝ်ပဝ်ႈလုမ်းသၽႃးၵူၼ်းမိူင်း ဢူးၶိၼ်ႇယီႇ ၵေႃႉပဵၼ်ႁူဝ်ပဝ်ႈ ပႃႇတီႇသၢင်ႇသီႈၼၼ်ႉထႅင်ႈ။
ႁွင်ႈၵၢၼ်သိုဝ်ႇၶၢဝ်ႇလူင်ပွင်ၸိုင်ႈယိုတ်းမိူင်း ႁၢႆးငၢၼ်းဝႃႈ တင်းသွင်ၾၢႆႇ လႆႈဢုပ်ႇဢူဝ်းၵၼ်ၵႂႃႇ လွင်ႈၽႅၼ်ၵၢၼ် ၶူင်းၵၢၼ်ဢၼ်တင်းသွင်ၸိုင်ႈမိူင်းတေႁူမ်ႈၵၼ်ႁဵတ်းသၢင်ႈၵႂႃႇ ၼၼ်ႉၵူၺ်းဢမ်ႇၵႃး လွင်ႈၵၢၼ်ၵႃႉၶၢႆ၊ လွင်ႈယုၵ်ႉမုၼ်းၵၢၼ်လူင်းတိုၼ်းလၢင်း၊ ၵၢၼ်ၼိမ်တဵင်ႈၸွမ်းလႅၼ်လိၼ်၊ ၵၢၼ်ၽဵဝ်ႈမူၺ်ႉ ၸုမ်းၵျႃႊၽျႅၼ်ႉ ႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ လႄႈ ၵႂၢတ်ႇလၢင်ႉယႃႈမဝ်းၵမ် ၸဵမ်ၸိူဝ်းၼႆႉ ဝႃႈၼႆ။
ၶူင်းၵၢၼ်ဢၼ်မိူင်းၶႄႇ -မိူင်းမၢၼ်ႈ တေႁူမ်ႈၵၼ်ႁဵတ်းသၢင်ႈၽေႃႇၼမ်ႉၼႄတူဝ်ၵႂႃႇၼၼ်ႉ ပဵၼ်ၽႅၼ်ၵၢၼ် သဵၼ်ႈတၢင်းရူတ်ႉၾႆးႁွပ်ႈလူၵ်ႈ (BRI) တႃႈႁိူဝ်းၵျွၵ်ႉၽိဝ်ႇ-ဝဵင်းလိူဝ်ႇ (မၢၼ်းတလေး) မႃးတၢင်းဝဵင်းပၢင်ႇဢူး – ၼွင်ၶဵဝ် – ၵျွၵ်ႉမႄး-သီႇပေႃႉ-လႃႈသဵဝ်ႈ-သႅၼ်ဝီ -ၵူတ်ႉၶၢႆ- မူႇၸေႊ ၼၼ်ႉၵူၺ်းဢမ်ႇၵႃး မီးပႃးၶူင်းၵၢၼ် ၼႂ်းမိူင်းၶၢင်၊ မိူင်းရၶႅင်ႇ လႄႈ တိူင်းတႃႈၵုင်ႈၸိူဝ်းၼႆႉထႅင်ႈ ႁူမ်ႈသဵၼ်ႈ 35 ဢၼ် ၼႆယဝ်ႉ။
မိူဝ်ႈၽွင်းတၢင်မိူင်းၶႄႇ ၵႂႃႇႁူပ်ႉဢုပ်ႇၵၼ်တင်း ႁူဝ်ပဝ်ႈလုမ်းသၽႃးၵူၼ်းမိူင်း ဢူးၶိၼ်ႇယီႇၼၼ်ႉၵေႃႈ လႆႈဢုပ်ႇဢူဝ်းၵၼ်ၵႂႃႇ တႃႇသၢင်ႈလွင်ႈမိုတ်ႈၵိုဝ်း လုမ်းတႅၼ်းၽွင်းမိူင်းၶႄႇ လႄႈ မိူင်းမၢၼ်ႈ ႁႂ်ႈၶဝ်ႈထိုင်ၵၼ်လႆႈ လိုၵ်ႉလမ်ႇလိူဝ်ၼႆႉ ၼႆယဝ်ႉ။
လိူဝ်ၼၼ်ႉ ဢူးၶိၼ်ႇယီႇ လႆႈလၢတ်ႈၼႄတီႈ ၽွင်းတၢင်မိူင်းၶႄႇၵႂႃႇ လွင်ႈၾၢႆႇမိူင်းမၢၼ်ႈ လႆႈႁၢင်ႈႁႅၼ်းၶဵၼ်ႇတႅမ်ႈဝႆႉ ပၵ်းပိူင်ၾိင်ႈမိူင်း တႃႇၽဵဝ်ႈမူၺ်ႉၸုမ်းၵျႃႊၽျႅၼ်ႉ ပဵၼ်ပိူင်ယုၵ်းယၢင်ႇဝႆႉယဝ်ႉသေ တေၶတ်းၸႂ်သိုပ်ႇဢဝ်တၢင်ႇလၢတ်ႈၼႂ်းလုမ်းသၽႃးသေ ႁႂ်ႈမၵ်းမၼ်ႈၸႂ်ႉတိုဝ်းၵႂႃႇ ပဵၼ်တၢင်းၵၢၼ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ