ဢိင်ၼိူဝ် ငဝ်းလၢႆးဝၢၼ်ႈမိူင်းဢမ်ႇၼိမ်သဝ်းသေ ၵၢၼ်ႁႃၵိၼ်လဵင်ႉတွင်ႉၵေႃႈ ယၢပ်ႇယဵၼ်းမႃးလိူဝ်ၵဝ်ႇ။ ၸွမ်းလူၺ်ႈ သၽႃႇဝၵူၼ်းၼုမ်ႇတႄႉ ပေႃးမီးလွင်ႈၶဵင်ႇတႃႉမႃး ၶတ်းၸႂ်တေႃႇသူႈႁႂ်ႈၶၢမ်ႈပူၼ်ႉ လႆႈယူႇၼႆၵေႃႈ ပေႃးမၼ်းပူၼ်ႉမႃႇ ၵိူၼ်းႁႅင်းမႃးၸိုင် သၢင်ႇထုၵ်ႇလၢႆးလႂ်ၵေႃႈ ၵႆႉၶိုင်ပႅတ်ႈလၢႆးၼၼ်ႉ။

ၼႂ်းပီ 2024-2025 မႃးၼႆႉ ႁၢၼ်ႉတေႃႇလွင်း ႁွင်ႉၽဵင်းၵႂၢမ်း KTV ၵေႃႈလိူင်ႇၼမ်မႃး။ တီႈႁၢၼ်ႉ KTV ၼႆႉ တွၼ်ႈတႃႇၵူၼ်းၼုမ်ႇတႄႉ ၵၢၼ်ၵေႃႈငၢႆႈ လႆႈငိုၼ်းၵေႃႈငၢႆႈ သမ်ႉပဵၼ်တီႈၵိၼ်ၵျေႃႇမူၼ်ႈသိူဝ်း လႄႈ ၼေႃႇတႅၼ်းၶိူဝ်းၵူၼ်းၼုမ်ႇၵမ်ႈၼမ် ဢွၼ်ၵၼ်ၵႂႃႇႁဵတ်းၵၢၼ်ၼႂ်းႁၢၼ်ႉ KTV ။ လိုမ်းဝူၼ်ႉဝႃႈ ၸဝ်ႈၵဝ်ႇၶဝ်ႈၸူးတူင်ႇႁႅဝ်ႉ ပႃႇၽေးၶဵၼ်။

ၼႂ်းၶၢဝ်းတၢင်း 2 လိူၼ်မႃးၼႆႉၵူၺ်း ၼႂ်းမိူင်းတႆးၼႆႉ ဢွၼ်ႇယိင်းသၢဝ်ၵႂႃႇတၢႆၼႂ်းႁၢၼ်ႉ KTV  2 ၵေႃႉယဝ်ႉ။ တၢင်ႇတီႈဢၼ်ဢမ်ႇလႆႈႁပ်ႉႁူႉၶၢဝ်ႇ ယိင်ႈၶႅၼ်းတေမီးထႅင်ႈၵႃႈႁိုဝ်။ 

ဢိင်ၼိူဝ်ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၼႆႉသေ ၼေႃႇတႅၼ်းၶိူဝ်း ၵူၼ်းၼုမ်ႇတႆး ႁႃငိုၼ်းၸွမ်း သဵၼ်ႈတၢင်းလတ်းမႃးၼမ်လၢႆ။ ၸဵမ်မိူဝ်ႈတၢင်းပဵၼ်ၶူဝ်ႊဝိတ်ႉလၢမ်းၽႄႈ ၼၼ်ႉသေ ၵမ်ႈၼမ် ပႆႇၸၢင်ႈပူၵ်းပွင်ၸၢတ်ႈပၢၼ်လႄႈ ၼႃႈႁိူၼ်းၸဝ်ႈၵဝ်ႇလႆႈ။

တၢင်းပဵၼ်ၶူဝ်ႊဝိတ်ႉပႆႇႁၢႆ သိုၵ်းမၢၼ်ႈသမ်ႉ ၶိၼ်ယိုတ်းမိူင်းလႄႈ ဝၢၼ်ႈမိူင်းယိင်ႈၶႅၼ်းသုၵ်ႉသေ ႁဵတ်း ႁႂ်ႈတုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉၵူၼ်းမိူင်းၵူႈသႅၼ်းထၢၼ်ႈ။ ဝၢႆးၼၼ်ႉသမ်ႉ မီးၽူႈလမ်ႇမၢၵ်ႈၶဝ် တင်ႈပဵၼ်ၸုမ်းသေ ႁႃလႅၼ်ၵိၼ်ၼိူဝ်ဢွၼ်ႊလၢႆႊ ဢၼ်လိုဝ်းၵၼ်ဝႃႈ ပဵၼ်ၸုမ်းၵျႃးၽႅၼ်ႉၼႆၼၼ်ႉထႅင်ႈ။

ၵၢၼ်ၵျႃးၽႅၼ်ႉၼႆႉၵေႃႈ ၵူၼ်းမိူင်းတႆးတူၵ်းပဵၼ်တူဝ်ယိူဝ်ႇတင်းၼမ်တင်းလၢႆ။ ၵူၼ်းၼုမ်ႇၸိူဝ်းႁၼ် လီၼိူဝ်ၵၢၼ်ၵျႃးၽႅၼ်ႉသေ တဵမ်ၸႂ်ၶဝ်ႈႁဵတ်းၵေႃႈမီး ယွၼ်ႉဝႃႈ ႁႃငိုၼ်းငၢႆႈ လူၺ်ႈဢမ်ႇလူဝ်ႇဢွၵ်ႇ ဢဵၼ်ဢွၵ်ႇႁႅင်း။

ၶၢဝ်းသိုၵ်းမၢၼ်ႈယိုတ်းမိူင်းၼႆႉ ယိင်ႈၶႅၼ်းထႅမ်ႁႅင်း ႁႂ်ႈၵၢၼ်ၵျႃးၽႅၼ်ႉ ၸွတ်ႇတူဝ်ႈၼႂ်းမိူင်းႁူမ်ႈ တုမ်မၢၼ်ႈလႆႈငၢႆႈငၢႆႈ။

ၽွင်းၼၼ်ႉ ၵူၼ်းၼုမ်ႇၼႂ်းမိူင်းတႆး သူင်ႁဵတ်းၵၢၼ်ၼႂ်းၵျႃးၽႅၼ်ႉၼမ်မႃးလိူဝ်ၵဝ်ႇ။ ၼႂ်းပီ 2021 – 2022 ၼၼ်ႉ ႁူဝ်ၼပ်ႉၵူၼ်းႁဵတ်းၵၢၼ်ၵျႃးၽႅၼ်ႉ ပုင်ႈၶိုၼ်ႈသုင် ၼပ်ႁူဝ်ႁဵင်ၼႆ ၵူၼ်းၼုမ်ႇႁဵတ်း ၵၢၼ်တူင်ႇၵူၼ်း ၵေႃႉၼိုင်ႈလၢတ်ႈ။

ၸဵမ်ဢဝ် ၵူၼ်းၼွၵ်ႈမိူင်းၼႂ်းမိူင်း သူင်ႁဵတ်းၵၢၼ်လွၵ်ႇလႅၼ်ၵိၼ်ငိုၼ်းဢွၼ်ႊလၢႆႊၼမ်ႁႅင်းၼႃႇလႄႈ ၵူႈၸိုင်ႈမိူင်း ၸင်ႇပၼ်ႁႅင်းဢီးႁႂ်ႈၽူႈမီးပုၼ်ႈၽွၼ်းၶဝ် ဢဝ်ၶၢဝ်းယၢမ်းၵႄႈလိတ်ႈလွင်ႈၼႆႉ။

ၼႂ်းတွၼ်ႈၼႆႉ ယူႇတီႈ ၸုမ်းဢူၺ်းလီသၢမ်ပီႈၼွင်ႉမိူင်းတႆးပွတ်းႁွင်ႇ သိုၵ်းရၶႅင်ႇ AA သိုၵ်းၶႄႇၵဝ်ႈၵၢင်ႉ MNDAA သိုၵ်းပလွင်ႈတဢၢင်း TNLA ၸင်ႇႁူမ်ႈၵၼ် ၸတ်းပၢင်ယၼ်ႇသိုၵ်း 1027 မိူဝ်ႈပီ  2023 ဢၼ်ပႃးၶၵ်ႉၵၢၼ် တႃႇၽဵဝ်ႈမူၺ်ႉ ၸုမ်းၵျႃးၽႅၼ်ႉ။

သၢမ်ၸုမ်းၼႆႉ ဢွၵ်ႇၸိုဝ်ႈဝႃႈ တႃႇၽဵဝ်ႈမူၺ်ႉၸုမ်းၵျႃးၽႅၼ်ႉၼႆသေတႃႉ ၾၢႆႇၼိုင်ႈၵေႃႈ လေႃႇတိုၵ်း သိုၵ်းမၢၼ်ႈ တႃႇၵုမ်းဢဝ်ဢွင်ႈတီႈ ႁႂ်ႈပဵၼ်ၼႃႈလိၼ်ၵုမ်းၵမ်တူဝ်ၵဝ်ႇမႃး။

ၵွႆပၢႆဝၢႆးမႃး ၸုမ်းၵျႃးၽႅၼ်ႉၵေႃႈ ဢမ်ႇမူၺ်ႉႁၢႆမူတ်းလႆႈ၊ ပၢင်တိုၵ်းၵေႃႈ ဢမ်ႇယဵၼ်လႆႈ။ ၼႂ်းၵႄႈၼႆႉ ႁၢၼ်ႉၵိၼ်ၵျေႃႇ KTV ၊ ယႃႈမဝ်းၵမ် ၊ ပၢင်တေႃႇပၢင်လွင်း ယိင်ႈၶႅၼ်းတိူဝ်းၼမ်မႃးလိူဝ်ၵဝ်ႇ။ ဢွင်ႈတီႈ ပဵၼ်ပၢင်တိုၵ်းၵေႃႈ သဵင်ၵွင်ႈသဵင်ၵၢင်ႇဢမ်ႇထၢတ်ႇ၊ ဢွင်ႈတီႈဢၼ်ယဵၼ်ၼၼ်ႉယူႇၵေႃႈ ၵူၼ်းမိူင်းၶမ် ယူႇၼႂ်းၵႄႈႁုၵ်ႉႁၢႆႉ ဢၼ်ဢမ်ႇမီးပၵ်းမီးပိူင်။

ၸွမ်းလူၺ်ႈသၽႃႇဝတူၼ်ႈၸႂ်ၵူၼ်းၼုမ်ႇတႄႉ ငဝ်းလၢႆးပၼ်မႃးၸိူင်ႉႁိုဝ်ၵေႃႈ ၵႃႈလႆႈၸိုၼ်ႇတူဝ် ၸိုၼ်ႇၸႂ်သေႁဵတ်းၵၢၼ်ႁႃၵိၼ်လဵင်ႉတွင်ႉ။ တႃႇတူဝ်ၵဝ်ႇ တႃႇၼႃႈႁိူၼ်းၸဝ်ႈၵဝ်ႇ တေယူႇလွတ်ႈ ၵႂႃႇလႆႈၼၼ်ႉ ႁၼ်လွၵ်းလၢႆးၸိူင်ႉႁိုဝ်ၵေႃႈ ႁိုဝ်ႁွၼ်ႇဝႄႈလႆႈလၢႆးလႂ်ဢဝ်လၢႆၼၼ်ႉ ၵမ်ႈပႃႈၼမ်။

ၼႂ်းၶၢဝ်းတၢင်းဝၢၼ်ႈမိူင်းသုၵ်ႉၼႆႉ ၵူၼ်းၼုမ်ႇၵမ်ႈၼမ် ဢမ်ႇဝႃႈယိင်းဝႃႈၸၢႆး သူင်ႁဵတ်းၵၢၼ်ၼႂ်း ႁၢၼ်ႉၵိၼ်ၵျေႃႇလၢႆလၢႆသႅၼ်းမႃး။ မိူၼ်ၼင်ႇ ၸွမ်းႁၢၼ်ႉ KTV ၸိူဝ်းၼႆႉၵေႃႈ ၼုမ်ႇယိင်းၼုမ်ႇၸၢႆး သူင်ၶဝ်ႈႁဵတ်းၵၢၼ်ၼမ်မႃး။

မိူၼ်ၼင်ႇ ပွတ်းတၢင်းလႃႈသဵဝ်ႈၼႆႉ ၽွင်းသိုၵ်းၵဝ်ႈၵၢင်ႉၵုမ်းၵမ် ၸႂ်ႉၶေႃႈဢၢင်ႈပၢင်ပွႆးၾိင်ႈထုင်း ႁဵတ်းၼႃႈတိူဝ်ႈသေ ပွႆႇႁႂ်ႈၸဝ်ႈငိုၼ်းသႃးၶဝ် ပိုတ်ႇပၢင်တေႃႇလွင်းၵူႈသႅၼ်းသႅၼ်း၊ ၸဵမ်ဢဝ်ႁၢၼ်ႉၵိၼ် ၵျေႃႇ(ႁၢၼ်ႉႁွင်ႉၵႂၢမ်း) ၸိူဝ်းၼႆႉၵေႃႈ ပိုတ်ႇဝႆႉၼမ်။ မိူဝ်ႈလဵဝ် သိုၵ်းမၢၼ်ႈ ၶိုၼ်းယိုတ်းလႆႈၶိုၼ်းယဝ်ႉ သေတႃႉပၢင်တေႃႇပၢင်လွင်းလႄႈ ႁၢၼ်ႉၵိၼ်ၵျေႃႇၸိူဝ်း ၼႆႉ တိုၵ်ႉၵိုတ်းယူႇ ဝႃႈၼႆ။

မိူင်းၼင်ႇ တၢင်ႉယၢၼ်း မိူင်းယႆလႄႈ မူႇၸေႊ ၸိူဝ်းၼႆႉၵေႃႈ ၼုမ်ႇယိင်းဢွၼ်ႇ ၸိူဝ်းပၢၼ်သိၵ်ႉႁိၵ်ႉ ၶဝ်ႈႁဵတ်းၵၢၼ်ၼႂ်းႁၢၼ်ႉၵိၼ်ၵျေႃႇ ၸိူဝ်းၼႆႉၼမ်မိူၼ်ၵၼ်ၼႆယဝ်ႉ။ မိူဝ်ႈလဵဝ် ပွတ်းတၢင်းၵႃလီႉ၊ ၵုၼ် ႁဵင် ၊ မိူင်းပၼ်ႇလႄႈ တႃႈၶီႈလဵၵ်း ၸိူဝ်းၼႆႉၵေႃႈ ႁၢၼ်ႉ KTV ၼမ်မႃးလႄႈ ၵူၼ်းၼုမ်ႇၵမ်ႈၼမ် တူၵ်း ပဵၼ်တူဝ်ယိူဝ်ႇဝႆႉၼႆ ၵူၼ်းပိုၼ်ႉတီႈလၢတ်ႈ။

ၼႂ်းလိူၼ်ထူၼ်ႈ 6 လႄႈ 7 သွင်လိူၼ်ထပ်းၵၼ်မႃးၼႆႉ ၼုမ်ႇယိင်းဢွၼ်ႇ လူႉသဵင်ႈ ယွၼ်ႉၵိၼ်ယႃႈ မဝ်းၵမ် လူၼ်ႉလိူဝ်ၼႂ်းႁၢၼ်ႉၵိၼ်ၵျေႃႇ KTV မီးပဵၼ် 2 ၵေႃႉ ၼႆလူးၵွၼ်ႇ။

ၵေႃႉၼိုင်ႈ ပဵၼ်ၵူၼ်းၵႃလီႉ ဢႃယု တိုၵ်ႉမီး 25 ပီ ၊ ၵေႃႉၼိုင်ႈ ပဵၼ်ၵူၼ်းမိူင်းပၼ်ႇ ဢႃယု တိုၵ်ႉလႆႈ 16  ပီ ။ ဢိင်ၼိူဝ် ပိူင်ပဵၼ်ၸိူဝ်းၼႆႉသေ လီမႆႈၸႂ်တႃႇၶၢဝ်းတၢင်းမိူဝ်းၼႃႈ ၵူၼ်း ၼုမ်ႇတႆး ၼႃႇၼႆ ၼၢင်းယိင်း ၵူၼ်းႁဵတ်းၵၢၼ်တူင်ႇၵူၼ်းၵေႃႉၼိုင်ႈလၢတ်ႈ။

“ၼႂ်းပီ 2 ပီ မႃးၼႆႉၵူၺ်း တီႈၵႃလီႉ KTV ၼမ်ႁႅင်းမႃး၊ ပေႃးၶဝ်ႈ KTV ၼိုင်ႈၶိုၼ်းၼႆႉသဵင်ႈငိုၼ်း 20-30 သႅၼ်။ ယႃႈမဝ်းၵမ်ၵေႃႈႁႃသိုဝ်ႉငၢႆႈၼႃႇ၊ တေႃႈလဵဝ်ၼႆႉ ပေႃးလႆႈၵႂႃႇႁၢၼ်ႉလဝ်ႈ ႁၢၼ်ႉ KTV ၸင်ႇၶဝ် ဝူၼ်ႉဝႃႈ ၶိုတ်းၵၢပ်ႈၶိုတ်းပၢၼ် ၊ လီမႆႈၸႂ်တွၼ်ႈတႃႇၸၢတ်ႈပၢၼ်မိူဝ်းၼႃႈ လုၵ်ႈဢွၼ်ၼႃႇ”- ဝႃႈၼႆ။

ယႃႈမဝ်းၵမ် ဢၼ်ၽႄႈယူႇၼႂ်းမိူင်းတႆးယၢမ်းလဵဝ် ၵမ်ႈၼမ်ၵူၼ်းၼုမ်ႇ တေဢမ်ႇသွၼ်ႇဝႃႈ မၼ်းပဵၼ်ယႃႈမဝ်းၵမ်။ ၶဝ်တေႁၼ်ဝႃႈ မၼ်းပဵၼ်တၢင်းၵိၼ် ဢၼ်လႆႈၵိၼ်မိူဝ်ႈ လူဝ်ႇမူၼ်ႈလူဝ်ႇၵျေႃႇၼႆ ၵႃႈၼၼ်ႉၵူၺ်း။

မိူၼ်ၼင်ႇ Happy Water ဢၼ်ဝႃႈၼၼ်ႉ ၸွမ်းၼင်ႇ ၽူႈၶူၼ်ႉၶႂႃႉၶဝ်လၢတ်ႈဝႃႈတႄႉ – မၼ်းပဵၼ် ယႃႈဢၼ်ဢမ်ႇမီးသႅဝ် ဢမ်ႇမီးသီ။ သႂ်ႇလေႃးသင်ၵေႃႈ တေဢမ်ႇႁူႉလႆႈဝႃႈ ပႃးယႃႈသႅၼ်းၼႆႉ။ မၢင်သႅၼ်းၵေႃႈ ႁဵတ်းဢွၵ်ႇမႃးပဵၼ်ၼမ်ႉ၊ မၢင်သႅၼ်းၵေႃႈပဵၼ်ၽွင် – ဝႃႈၼႆ။

Happy Water တေပႃးထၢတ်ႈ ecstasy, methamphetamine, caffeine, tramadol, diazepam, ketamine ၸဵမ်ၸိူဝ်းၼႆႉလႄႈ တေႁဵတ်းႁႂ်ႈၵူၼ်းဢမ်ႇႁိူဝ်ႉဢမ်ႇဢူၼ်ႈ ဢမ်ႇၶႂ်ႈၼွၼ်း ၊ တေၶႂ်ႈတိုၼ်ႇၶႂ်ႈမူၼ်ႈယူႇတႃႇသေႇ။

ၵမ်ႈၼမ် တေသႂ်ႇၼႂ်းၼမ်ႉသူမ်ႈၼမ်ႉဝၢၼ် ႁိုဝ်ဢမ်ႇၼၼ် ၼႂ်းၼမ်ႉလဝ်ႈ ၊ ပီႊယႃႊ ၸိူဝ်းၼႆႉသေ ၵိၼ်။ မၼ်းပႃးထၢတ်ႈၵၾိင်ႊလႄႈ ထၢတ်ႈ tramadol ဝႆႉလႄႈ တေဢမ်ႇႁူႉ ၵူၼ်ႉမူၺ်ႈ ၶိုၼ်ႈသင်။ ၵွပ်ႈၼၼ် ၵႃႈလႆႈ ယွပ်ႇလႆႈ တဵၼ်ႈလႆႈ ၼႂ်း Night Club ပၢင်မူၼ်ႈသိူဝ်းတင်းၶိုၼ်း ထိုင်မိူင်းလႅင်းၵေႃႈလႆႈ။

ၽူႈမီးတူဝ်ထူပ်းလၢတ်ႈဝႃႈ – မိူဝ်ႈတႄႇၵိၼ်တႄႉ ႁပ်ႉႁူႉလႆႈတၢင်းမူၼ်ႈတၢင်းၵျေႃႇမၼ်း။ ဢမ်ႇၵိၼ် ဢမ်ႇၼွၼ်းသေ ယူႇလႆႈႁိုင်ႁိုင်။ ၵူၺ်းၵႃႈ ဝၢႆးယႃႈမၼ်းၸၢႆႇၵႂႃႇယဝ်ႉတႄႉ ႁူဝ်တေၶႆႈ ၊ တေလူင်တေ လိုမ်း ၊ လူမ်းမႆႈၶိုၼ်ႈ ၊ လိူတ်ႈၶိုၼ်ႈ ၊ ႁိူဝ်ႇဢွၵ်ႇတင်းတူဝ်သေ တေယူႇယၢပ်ႇ။ ၵမ်းလိုၼ်းၵေႃႈ ၵႃႈလႆႈသွၵ်ႈၵိၼ်ထႅင်ႈ ၸင်ႇလီယူႇမႃး ၼႆယဝ်ႉ။

တႄႇတီႈၼၼ်ႈသေ ၸင်ႇၸပ်းယိၼ်ႉမၼ်းမႃးလွႆးလွႆး ထိုင်တီႈတိုတ်းဢမ်ႇလႆႈ။ သင်လူၼ်ႉလိူဝ်ၵေႃႈ ၸၢင်ႈလူႉၶွႆႈၸွမ်းယူႇ။ မၢင်ၸိူဝ်း ပႆႇတၼ်းၸပ်းယိၼ်ႉမၼ်းၵေႃႈ ဢမ်ႇမေႃၵိၼ်လႄႈ လူႉတၢႆၵႂႃႇလူၺ်ႈ ႁႅင်းၵမ်ႉတူဝ်ဢမ်ႇငၢမ်ႇၵၼ်တင်းယႃၼၼ်ႉၵေႃႈမီး။

ယွၼ်ႉၼၼ် ၼင်ႇႁိုဝ် တေဢမ်ႇတိတ်းၸပ်းယႃႈမဝ်းၵမ် ၸိူဝ်းၼႆႉ ၼၢင်းယိင်း ႁဵတ်းၵၢၼ်တူင်ႇၵူၼ်း ၵေႃႉၼိုင်ႈ လၢတ်ႈဝႆႉၼင်ႇၼႆ –

“တႃႇၵၢင်းယၢၼ်လႆႈ ယႃႈမဝ်းၵမ်ၼၼ်ႉ လူဝ်ႇတႄႇတီႈတူဝ်ၸဝ်ႈၵဝ်ႇ၊ ၸိူဝ်းပဵၼ်ပေႃႈမႄႈၼႆၵေႃႈ ထုၵ်ႇလီသင်ႇသွၼ်ႁႂ်ႈလုၵ်ႈလၢင်းႁဝ်း ယႃႇႁႂ်ႈၵဝ်းၸွမ်းယႃႈမဝ်းၵမ်လႄႈ ပၼ်လွင်ႈဢုၼ်ႇၸႂ်ႁႂ်ႈလုၵ်ႈ ဢွၼ်ႇႁဝ်း ႁႂ်ႈမၼ်းတဵမ်ထူၼ်ႈ။ ႁႂ်ႈပၼ်ႁႅင်းၶဝ် ၾၢႆႇပၢႆးပၺ်ႇၺႃႇ။ မိူၼ်ၼင်ႇ ၼႂ်းမူႇၼႂ်းဝၢၼ်ႈၼႆၵေႃႈ ႁႂ်ႈမီးပၢင်ပၼ်ပိုၼ်ႉႁူႉ ၵဵဝ်ႇလူၺ်ႈယႃႈမဝ်းၵမ်ၼမ်ၼမ်။ ၽူႈယႂ်ႇၵူၼ်းလူင်ၼႂ်းဢိူင်ႇၼႂ်းဝၢၼ်ႈၵေႃႈ ႁႂ်ႈ ၵႆႉႁဵတ်းပၢင်ႁူပ်ႉထူပ်းသေ လၢတ်ႈပၼ်လွင်ႈတုမ်ႉယွၼ်ႈယႃႈမဝ်းၵမ်ၼမ်ၼမ်။ ၵၢပ်ႈယၢမ်းလဵဝ် တၢင်းႁူႉၼႆႉ တူၺ်းလႆႈၼႂ်းဢွၼ်ႊလၢႆႊယူႇၼႆသေတႃႉ မိူင်းတႆးသမ်ႉ မၢင်တီႈ ဢိၼ်ႊထိူဝ်ႊၼႅတ်ႊ ပႆႇလႆႈ ၵေႃႈတိုၵ်ႉမီး”။  

ယႃႈမဝ်းၵမ် ၸိူဝ်းဢၼ် ၵူၼ်းၼုမ်ႇသူင်ၵိၼ်ယူႇယၢမ်းလဵဝ်ၼႆႉ ၵမ်ႈၼမ် တေၵိၼ်ငၢႆႈသေမဝ်းငၢႆႈ လႄႈ မၼ်းတုမ်ႉတိူဝ်ႉပၢႆးတူဝ်ပၢႆးၸႂ်ၵူၼ်းႁႅင်း ၊ တၵ်းလူဝ်ႇငိူင်ႉဝႄႈၵၼ်ႁႂ်ႈလႆႈၼႆ မေႃယႃယိင်း CDM ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ယႃႈမဝ်းၵမ်ႈ ဢၼ်ဢွၵ်ႇမႃးလင်လင်ၼႆႉ မိူၼ်ၼင်ႇ ၶေႊ ၊ ႁပ်ႊပီႊဝႃႊတိူဝ်ႊ ၸိူဝ်းၼႆႉၵမ်ႈၼမ် တေ ပဵၼ်ၽွင် မၼ်းၸႂ်ႉတိုဝ်းငၢႆႈ။ သုတ်ႇဢဝ်ဢၢႆမၼ်း ၶဝ်ႈၵႂႃႇၵူၺ်းၵေႃႈလႆႈ။ မၼ်းတေၸဵဝ်းႁၼ်ၽွၼ်း တုမ်ႉယွၼ်ႈမၼ်းဝႆး ၵွပ်ႈၼၼ်လႄႈ ၸၢင်ႈပဵၼ်ၽေးႁၢႆႉႁႅင်းတႄႉတႄႉ။ သင်ဝႃႈ ၸႂ်ႉတိုဝ်းလူၼ်ႉလိူဝ် ၵႂႃႇၼႆၵေႃႈ မၼ်းၸၢင်ႈပဵၼ်ၽေးတေႃႇဢသၢၵ်ႈသၢႆၸႂ်။ ႁႂ်ႈႁူႉဝႆႉဝႃႈ ယႃႈမဝ်းၵမ်ဢၼ်ၸႂ်ႉတိုဝ်းငၢႆႈၼၼ်ႉ ၽွၼ်းတုမ်ႉယွၼ်ႈမၼ်းတိုၼ်းၶဝ်ႈမႃးဝႆးၼၼ်ႉဢေႃႈ”။

ယႃႈမဝ်းၵမ် ဢၼ်ဢွၵ်ႇမႂ်ႇၼႆႉ ၵမ်ႈၼမ် ၵူၼ်းၶူင်ႁဵတ်းမၼ်း တေဢမ်ႇသွၼ်ႇႁၼ်ၸၢတ်ႈပၢၼ်ၵူၼ်း ၊ ဢၼ်လႂ်တေၸဵဝ်းမဝ်း ယႃႈဢၼ်လႂ် တေၸဵဝ်းႁၼ်ၽွၼ်းယွၼ်ႈမၼ်း ၼႆၼၼ်ႉ ၶဝ်သႂ်ႇလေႃးယႃႈ ၶႅမ်ႊမီႊၶိူဝ်ႊလၢႆပိူင်လၢႆသႅၼ်း။ ဢမ်ႇဝႃႈယိင်းဝႃႈၸၢႆး ပေႃးတိတ်းယိၼ်ႉမၼ်းယဝ်ႉ ငိုၼ်းၵေႃႈသဵင်ႈ သၢႆၸႂ်ၵေႃႈသုမ်း။ တုမ်ႉတိူဝ်ႉပႃး ၵၢၼ်ၼႃႈႁိူၼ်းလႄႈ ၵၢၼ်တူင်ႇၵူၼ်းထႅင်ႈလႄႈ ႁႂ်ႈမေႃဝႄႈလႄႈ ၸွႆႈၵၼ်ႁႄႉၵင်ႈ ယႃႇႁႂ်ႈၽႂ်တိတ်းၸပ်းယိၼ်ႉမၼ်းသေၵမ်း။