သိုၵ်းမၢၼ်ႈၵႆႉမႃးပွႆႇမၢၵ်ႇ လႄႈႁဵတ်းႁႂ်ႈ ၵူၼ်းမိူင်းၵျွၵ်ႉမႄး ၸိုင်ႈတႆးပွတ်းႁွင်ႇ မႆႈၸႂ် လွင်ႈႁူမ်ႇလူမ်ႈ ငိူင်ႉပၢႆႈၽေးသိုၵ်းထႅင်ႈ   ။

ဝၢႆးလင် သိုၵ်းမၢၼ်ႈႁဵတ်းပၢင်ၵုမ်တီႈၼေႇပျီႇတေႃႇ ၽူဝ်ႊရမ်ႊ လွင်ႈငမ်းယဵၼ် ၼႂ်းဝၼ်း 25-27 /6/2025 ၼၼ်ႉမႃး သိုၵ်းမၢၼ်ႈ ၵႆႉဢဝ်ၶိူင်ႈမိၼ် ပွႆႇမၢၵ်ႇတီႈဝဵင်းၵျွၵ်ႉမႄး ၵူၼ်းမိူင်း ငိူင်ႉပၢႆႈၽေးသိုၵ်း ၵႂႃႇတၢင်း ဝၢၼ်ႈတွင်ႇၶျေႇ ၼႂ်းၵႄႈၵၢင်ၸႄႈဝဵင်းၵျွၵ်ႉမႄးတင်း ၸႄႈဝဵင်းၼွင်ၶဵဝ် ဝႃႈၼႆ။

ၼၢင်းယိင်းၸဝ်ႈသူၼ်ၽူႈသိုပ်ႇငိူင်ႉပၢႆႈၽေးသိုၵ်းထႅင်ႈၼၼ်ႉလၢတ်ႈလၢတ်ႈၽူႈတွႆႇႁွၵ်ႈဝႃႈ – “ တီႈပီႈၶဝ် ပၢႆႈမႃးသွၼ်ႈယူႇၼၼ်ႉ မီးၸမ်လုမ်းလႄႈ ဢမ်ႇႁတ်းယူႇယဝ်ႉ။  ၸင်ႇဢွၼ်ၵၼ် သိုပ်ႇပၢႆႈမႃးထႅင်ႈ တၢင်းတွင်ႇၶျေႇၼႆႉ ၊ ဢမ်ႇၶႂ်ႈသိုပ်ႇပၢႆႈၽေးသိုၵ်းထႅင်ႈယဝ်ႉၼႆသေဢၢၼ်းတိုဝ်သေယူႇထႅင်ႈၵေႃႈ  သိုၵ်းမၢၼ်ႈသမ်ႉ ယူႇယူႇၵႆႉမႃးပွႆႇတိၵ်းတိၵ်း ဢမ်ႇႁတ်းယူႇလႄႈပၢႆႈထႅင်ႈၵမ်း ၊ လုၵ်ႈဢွၼ်ႇ ၵူၼ်းထဝ်ႈၵေႃႈဢွၼ်ၵၼ်ၵူဝ်။ သိုၵ်းမၢၼ်ႈတေမႃးပွႆႇမၢၵ်ႇထႅင်ႈမိူဝ်ႈလႂ် တီႈလႂ်ၵေႃႈဢမ်ႇၸၢင်ႈႁူႉလႆႈ။ ဢမ်ႇမီးလွင်ႈႁူမ်ႇလူမ်ႈသေဢိတ်းယဝ်ႉၶႃႈၼႃႇ ”- ဝႃႈၼႆ ။

ယွၼ်ႉသိုၵ်းမၢၼ်ႈၵႆႉမႃးပွႆႇမၢၵ်ႇလႄႈ ယၢမ်းလဵဝ် တီႈဝဵင်းၵျွၵ်ႉမႄး ၽႂ်ဢမ်ႇႁတ်းယူႇ၊ ဝဵင်းပေႃးယဵၼ် ႁၢၼ်ႉတၢင်းၶၢႆၵေႃႈ လႆႈဢိုတ်းဝႆႉ။ ၵူၼ်းမိူင်း သၢမ်ပုၼ်ႈ ၼိုင်ႈပုၼ်ႈ ဢွၼ်ၵၼ် ငိူင်ႉပၢႆႈၽေးသိုၵ်းထႅင်ႈ – ၵူၼ်းပိုၼ်ႉတီႈလၢတ်ႈၼင်ႇၼႆ ။

ပၢင်တိုၵ်းသိုၵ်းသိူဝ်ဢမ်ႇၼိမ်သဝ်း၊  ၵူၼ်းမိူင်းၵေႃႈ ယွၼ်ႉလႆႈပၢႆႈပၢႆႈပွၵ်ႈပွၵ်ႈလႄႈ ပဵၼ်ဢၼ်ယၢပ်ႇၸႂ် ၼႂ်းၵၢၼ်ႁႃၵိၼ်လဵင်ႉတွင်ႉ၊ ဢမ်ႇမီးတီႈယူႇတီႈသဝ်း    – ၵူၼ်းပၢႆႈၽေးသိုၵ်းလၢတ်ႈၼင်ႇၼႆ ။

မၼ်းၼၢင်းသိုပ်ႇလၢတ်ႈထႅင်ႈဝႃႈ -“မိူဝ်ႈဢွၼ်တၢင်းၵေႃႈ ပၢႆႈယဝ်ႉပွၵ်ႈၼိုင်ႈ ၊ တလဵဝ်ၵေႃႈ လႆႈပၢႆႈထႅင်ႈ ၊ ၵူၼ်းမီးငိုၼ်းၶဝ်တႄႉဢွၼ်ၵၼ်ပၢႆႈၵႂႃႇယူႇဝဵင်းလူင်ႁိုင်ယဝ်ႉဢေႃႈ ၊ မိူၼ်ႁဝ်းၶႃႈၼႆႉ ပေႃးၵမ်းၵမ်းလႆႈပၢႆႈယူႇၸိူင်ႉၼႆ ယၢပ်ႇၸႂ်ၼႃႇ ၊ တလဵဝ်ၵေႃႈ ပႃးမႃးၶဝ်ႈသၢၼ် 5 ပေႇၵူၺ်း ၊ ငိုၼ်းၵေႃႈဢမ်ႇမီး ” – ဝႃႈၼႆ ။

ပေႃးထိုင်မႃး ၼႂ်းလိူၼ်ဢေႃႊၵတ်ႊသ်ၼႆႉ တူဝ်တႅၼ်း သိုၵ်းမၢၼ်ႈတင်း သိုၵ်းတဢၢင်း မီးၽႅၼ်ၵၢၼ်တႃႇၵႂႃႇႁူပ်ႉဢုပ်ႇၵၼ် လွင်ႈပၼ်ႁႃပၢင်တိုၵ်း  တီႈဝဵင်းလူင်ၶုၼ်ႊမိင်ႊ ၸိုင်ႈမိူင်းၶႄႇ။ ၵွပ်ႈၼႆလႄႈ ၾၢႆႇတင်းသိုၵ်းမၢၼ်ႈ ၶႂ်ႈပၼ်ႁႅင်းမိပ်ႇဢီးသေ ၸင်ႇမႃးပွႆႇမၢၵ်ႇၵူၺ်းၼႆ ၽူႈၶဝ်ႈၸုမ်းတပ်ႉသိုၵ်းထၼူႉ DPLA လၢတ်ႈၼင်ႇၼႆ ။ 

“ၾၢႆႇတၢင်းသိုၵ်းမၢၼ်ႈ ထူဝ်းသိုၵ်းၶဝ်ႈ ၼႂ်းၼွင်ၶဵဝ်တင်းၼမ် ၊ ဢဝ်တင်း ၶိူင်ႈမိၼ် ၶိူင်ႈၵွင်ႈလူင် တိုၵ်းၸွႆႈ ၊တလဵဝ် တီႈပဵၼ်ပၢင်တိုၵ်းၼၼ်ႉယၼ်ၵႆၵၼ်တင်း ၼွင်ၶဵဝ် 4 လၵ်းၵူၺ်း ၊ ယဝ်ႉၵေႃႈ ၶႅၼ်ႈဝၼ်း ပွႆႇမၢၵ်ႇၸူးတၢင်းသီႇပေႃႉ ၵျွၵ်ႉမႄးၼႆႉတိၵ်းတိၵ်း ၊ ၶႃႈႁၼ်ဝႃႈ ၶဝ်လွၵ်ႈဝႆႉတႃႇ ႁႂ်ႈလႆႈၼမ်ႉတွၼ်း ၼႂ်းပၢင်ဢုပ်ႇဢူဝ်း ၼႂ်းလိူၼ်ဢေႃႊၵတ်ႊသ် ဢၼ်တေမႃးၼႆႉလႄႈ ၸင်ႇမႃးပွႆႇမၢၵ်ႇၼႄၸိူင်ႉၼႆၵူၺ်း ”- ဝႃႈၼႆ ။

ၼႂ်းႁၢင်လိူၼ်ၵျုၼ်ႊၼႆႉ ဝၼ်းတီႈ 24/27/29 သိုၵ်းမၢၼ်ႈၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ ၼႂ်းဝဵင်းၵျွၵ်ႉမႄးထပ်းၵၼ် တိူဝ်ႉၺႃးၵူၼ်းမိူင်း  တၢႆ 5 ၵေႃႉ မၢတ်ႇၸဵပ်း 21 ၵေႃႉ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈလႆႈပၢႆႈထႅင်ႈ ။