ဝၼ်းတီႈ 07/07/2025 ႁွင်ႈၵၢၼ် ပိုၼ်ၽၢဝ်ႇ ၾၢႆႇတပ်ႉသိုၵ်းၵဝ်ႈၵၢင်ႉ ဢွၵ်ႇဝႆႉဝႃႈ ၾူၼ်တူၵ်းႁၢဝ်ႈႁႅင်း ၼႂ်းၸႄႈဝဵင်းၵၢတ်ႇၵဝ်ႇ (ဝဵင်းလၢဝ်ႇၵၢႆး) ၼမ်ႉၼွင်းလုပ်ႇထူမ်ႈႁိူၼ်းယေး၊ တိူၵ်ႇ ႁႆႈလွၵ်းၼႃးၵူၼ်းမိူင်းလႄႈ ထိုင်တီႈလႆႈၶၢႆႉပၢႆႈဢွၵ်ႇဝၢၼ်ႈ ၵႂႃႇသွၼ်ႈယူႇတၢင်ႇတီႈတၢင်ႇလႅၼ် ၼႆယဝ်ႉ။
ယွၼ်ႉၾူၼ်တူၵ်းႁၢဝ်ႈႁႅင်းဢမ်ႇထၢတ်ႇ ၼႂ်းၼႃႈတီႈသိုၵ်းၵဝ်ႈၵၢင်ႉၵုမ်းၵမ် (MNDAA) သေ ၼမ်ႉလုပ်ႇၼွင်းထူမ်ႈ ၸွမ်းဝၢၼ်ႈၸွမ်းသူၼ် ၼႂ်းပွၵ်ႉ 3 လႄႈ ပွၵ်ႉ 5 ၼႂ်းဝဵင်းၵျိၼ်ႊသျႅၼ်ႊၶျိူင်ႊ (Jin Xiang Cheng) ၸႄႈဝဵင်းၵၢတ်ႇၵဝ်ႇ (ဝဵင်းလၢဝ်ႇၵၢႆး) ၵူၺ်းဢမ်ႇၵႃး ဢၢင်ႇၵဵပ်းၼမ်ႉၼႂ်းဝဵင်းသီႇဢေႃႈ ၵူၼ်ႇပင်းလူႉၵွႆၵႂႃႇလႄႈ ၵူၼ်းမိူင်းလႆႈႁူပ်ႉတၢင်းယၢပ်ႇၽိုတ်ႇဝႆႉ – ၵူၼ်းမိူင်းဝဵင်းၵၢတ်ႇၵဝ်ႇ လၢတ်ႈၼႄၼင်ႇၼႆ။
“တီႈသီႇဢေႃႈၼႆႉ ၵူၼ်းတၢႆၵႂႃႇ 3 ၵေႃႉ။ ႁိူၼ်းၸိူဝ်းၼႆႉၵေႃႈ ၺႃးၼမ်ႉလုပ်ႇဢဝ်ၵႂႃႇၼမ်ႁႅင်းတႄႉတႄႉ။ ပေႃးပဵၼ်ႁိူၼ်းသွင်ၸၼ်ႉၼႆ ၸၼ်ႉတႂ်ႈၼႆႉၺႃးၼမ်ႉထူမ်ႈမူတ်း။ ႁႅင်းၼမ်ႉၵေႃႈၸႅဝ်ႈၼႃႇ”။
မိူဝ်ႈဝၼ်းတီႈ 03/07/2025 ၼႆႉ ၾူၼ်တူၵ်းႁႅင်းလႄႈ ၵူၼ်းမိူင်းၸိူဝ်းယူႇသဝ်းၼႂ်း ၸႄႈတွၼ်ႈမိူင်းၵူဝ်း ဝဵင်းမိူင်းပေႃႈ၊ ပၢင်ႇသၢႆး ၸိူဝ်းၼႆႉ ႁူပ်ႉၽေးၼမ်ႉထူမ်ႈၼမ်ႉၼွင်း ၼႆယဝ်ႉ။
လႆႈႁူႉဝႃႈ ၵူၼ်းမိူင်းၸိူဝ်းႁူပ်ႉၽေးၼမ်ႉ ၼႂ်းၼႃႈတီႈသိုၵ်းၵဝ်ႈၵၢင်ႉ ၵုမ်းၵမ်ၼႆႉ မီးၵႂႃႇတႃႇမုင်ႉႁေႃႁိူၼ်း 46 လင်၊ ႁိူၼ်းဢၼ်လွင်ႈၵႂႃႇၸွမ်းၼမ်ႉ မီး 1 လင်၊ မၢၵ်ႇၶဝ်ႈတဝ်ႈၼမ်ႉလႄႈ တိူၵ်ႇႁႆႈလွၵ်းၼႃး ဢၼ်ၵူၼ်းမိူင်းၵဵပ်းႁွမ်တွမ်ဝႆႉၸိူဝ်းၼၼ်ႉၵေႃႈ လူႉသုမ်းၵႂႃႇၼပ်ႉႁူဝ်သိပ်းဢေႊၶိူဝ်ႊ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ