ၵူၼ်းပၢႆႈၽေးသိုၵ်း 70 ပၢႆ ဢၼ်ပၢႆႈၽေးႁွတ်ႈဝႆႉ တီႈပွၵ်ႉ 5 ၼႂ်းဝဵင်းၵႃလီႉ ၸိုင်ႈတႆးပွတ်းၸၢၼ်းၼႆႉ ယၢမ်းလဵဝ် ထူပ်းတၢင်းယၢပ်ႇလွင်ႈၾႆးတႆႈ၊ ၸွမ်းသုမ်ႉ ၸွမ်းသဵၼ်ႈတၢင်းၸိူဝ်းၼႆႉၵေႃႈ ၾႆးတႆႈဢမ်ႇမီးၵုမ်ႇထူၼ်ႈလႄႈ ၵမ်ႈၽွင်ႈလႆႈယူႇလပ်းသိင်ႇဝႆႉၸိူင်ႉၼၼ်ၵေႃႈမီး။

ၽူႈၶဝ်ႈႁူမ်ႈၸွႆႈထႅမ် ၵူၼ်းပၢႆႈၽေး ၼႂ်းဝဵင်းၵႃလီႉ လၢတ်ႈတီႈၽူႈတွႆႇႁွၵ်ႈဝႃႈ –“မိူဝ်ႈလဵဝ်ၾႆးၼႂ်းဝၢၼ်ႈ ၶဝ်ၼၼ်ႉ မၼ်းပႆႇမီး၊ မီးဝႆႉၾႆးၼႂ်းႁိူၼ်းသေ လႅင်းဝႆႉၵူၺ်း။ မိူဝ်ႈလဵဝ်တႄႉ သူဝ်ႊလႃႊ တႃႇတေတႆႈပၼ် ၼႂ်းၵၢင်ဝၢၼ်ႈၶဝ်ၼၼ်ႉ သင်ဝႃႈမီး 8 ႁူၺ်ႇၼႆ မၼ်းတေလႅင်းတွၼ်ႈတႃႇၶဝ် မၼ်းတေၶႅၼ်းဢိတ်းၼိုင်ႈၼႆ။ ၸွမ်းတၢင်းလႄႈၼႂ်းၵိဝ်ႇဝၢၼ်ႈၶဝ် တီႈဢၼ်ၶဝ်ယူႇၼၼ်ႉ မၼ်းတိုၵ်ႉလပ်းသိင်ႇဝႆႉ၊ ၵူၼ်းႁဝ်းၶႃႈၼႃႇၼေႃႈ ယူႇတီႈဢၼ်လပ်းသိင်ႇ၊ တီႈဢၼ်ၶဝ်ၵႂင် ဢၼ်ၶဝ်လိူတ်ႇလိူတ်ႇမႆႈမႆႈသေမႃး၊ ယၢမ်းလဵဝ်သမ်ႉ လႆႈမႃးယူႇၼႂ်းလပ်းသိင်ႇထႅင်ႈႁႄၼႆ ပၢႆးၸႂ်ၶဝ်ၼႆႉ မၼ်းတေတူၵ်းၶႃႈယဝ်ႉ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ႁွတ်ႈတီႈဝဵင်းၵႃလီႉၼႆႉ ၵမ်ႈၼမ် ပဵၼ်လုၵ်ႈဢွၼ်ႇ၊ လုၵ်ႈႁဵၼ်း၊ မႄႈလုၵ်ႈဢွၼ်ႇလႄႈ ၵူၼ်းထဝ်ႈ ၸိူဝ်းၼႆႉ။ ယၢမ်းလဵဝ် လိူဝ်သေထူပ်းတၢင်းယၢပ်ႇ လွင်ႈဢမ်ႇမီးၾႆးတႆႈယဝ်ႉ မိူၼ်ၼင်ႇ ၼမ်ႉတႃႇၵိၼ်တႃႇၸႂ်ႉၸိူဝ်းၼႆႉၵေႃႈ ယၢပ်ႇၽိုတ်ႇပႃး။   

“ဢဝီႇၸီႉၼႆႉ ယၢမ်းလဵဝ် ၶႃႈယိုၼ်းထိုင်ၵႂႃႇ တီႈသိင်ႊၵပူဝ်ႊ Tai Family ၼၼ်ႉ ၶဝ်တေလူႇမႃးတႃႇငိုၼ်း 5 လၢၼ်ႉၼႆဝႃႇ၊ ဢဝီႇၸီႉၼႆႉသမ်ႉ တေပဵၼ် 7 လၢၼ်ႉ။ ယေႇၵၢၼ်ႇမၼ်းတႄႉ ႁဝ်းၶႃႈမီးယဝ်ႉ မိူဝ်ႈလဵဝ်ၼႆႉ ႁဝ်းၶႃႈလူဝ်ႇၶုတ်းဢဝီႇၸီႉ။ သင်ဝႃႈ မီးဢဝီႇၸီႉႁႄ မီးၾႆးႁႄၼႆၵူၺ်းၵေႃႈ တွၼ်ႈတႃႇၶဝ်ၼႆႉ ဢူဝ်ႊၶႄႊ ယဝ်ႉ။ ပေႃးထိုင်ၶၢဝ်းႁႅင်ႈမႃးၼႆ ၼမ်ႉၼႆႉ မၼ်းၵိုတ်းဢိတ်းၼိုင်ႈၵူၺ်းယဝ်ႉၶႃႈ မၼ်းဢမ်ႇႁႅင်ႈသဵင်ႈၼႆ သေတႃႉၵေႃႈ မၼ်းဢမ်ႇပေႃးၸႂ်ႉတွၼ်ႈတႃႇၶဝ်။ ပေႃးႁဝ်းၶႃႈၶုတ်းဢဝီႇၸီႉတႄႉ မၼ်းတေပဵၼ်ၶၢဝ်း ယၢဝ်း တွၼ်ႈတႃႇၶဝ်။ လွင်ႈၼိုင်ႈသွင်တၢင်း ပေႃးၶဝ်မီးၼမ်ႉၼႆၵေႃႈ ၶဝ်တေၸၢင်ႈၽုၵ်ႇၵိၼ်ၽၵ်းၶဵဝ်  ၼၼ်ႉၶႃႈၼႃႇၼႆ”– ၽူႈၶဝ်ႈႁူမ်ႈၸွႆႈထႅမ် ၵူၼ်းပၢႆႈၽေး ၼႂ်းဝဵင်းၵႃလီႉ သိုပ်ႇလၢတ်ႈၼင်ႇၼႆ။

ၵူၼ်းပၢႆႈၽေးၸိူဝ်းၼႆႉ ယၢမ်းလဵဝ် ဢွၼ်ယူႇဝႆႉဢွင်ႈတီႈပၢႆႈၽေးသေ ၵမ်ႈၽွင်ႈၵေႃႈ ၵႂႃႇႁႃႁဵတ်းၵၢၼ် ၵိၼ်ၸၢင်ႈလၢႆးဝၼ်း ၸွမ်းၼႂ်းဝၢၼ်ႈၼႂ်းသူၼ်။ ၼႆႉၵေႃႈ ပဵၼ်ငိုၼ်းၶဝ်ႈဢၼ် ၼိုင်ႈ တႃႇတေႁႃၵိၼ်လဵင်ႉ တွင်ႉၵႂႃႇလႆႈ တႃႇလႂ်တႃႇၼၼ်ႉ ဝၼ်းလႂ်ဝၼ်းၼၼ်ႉ ၼႆယဝ်ႉ။

“မိူဝ်ႈလဵဝ်ၼႆႉတႄႉ ၶဝ်ၵႂႃႇၵိၼ်ၸၢင်ႈၸွမ်းဝၼ်းၵူၺ်းၶႃႈဢေႃႈ၊ ပီႈၼွင်ႉၼႂ်းၵႃလီႉႁဝ်းၼႆႉ ႁဵတ်းသူၼ်ၶဝ်ႈၵၢပ်ႇ လွင်းၶဝ်ႈၵၢပ်ႇ၊ မိူဝ်ႈပိူၼ်ႈသႂ်ႇၶဝ်ႈၵၢပ်ႇၵေႃႈ ၶဝ်ၵႂႃႇၸွမ်း မိူဝ်ႈပိူၼ်ႈတီႇသူၼ်ၶဝ်ႈၵၢပ်ႇၵေႃႈၶဝ်ၵႂႃႇ။ မိူဝ်ႈလဵဝ်သမ်ႉ ပိူၼ်ႈသွမ်ႈၼႃး ၸိူဝ်းဢၼ်မေႃသွမ်ႈၼႃးၵေႃႈ ၵႂႃႇသွမ်ႈၼႃး၊ ပေႃးပဵၼ်ၶၢဝ်းပိူၼ်ႈပၢတ်ႇၶဝ်ႈ ပုမ်ႇၶဝ်ႈ ပေႃႉၶဝ်ႈၵေႃႈၵႂႃႇၸွမ်းပိူၼ်ႈတိၵ်းတိၵ်း ပေႃးပိူၼ်ႈလူဝ်ႇႁဵတ်းၼၼ်ဢေႃႈ။ ၼိုင်ႈဝၼ်းၼႆႉတေလႆႈ 2 မိုၼ်ႇ၊ မၢင်တီႈၵေႃႈ လႆႈ 2 မိုၼ်ႇႁႃႈ”- ၽူႈၸွႆႈထႅမ် ၵူၼ်းပၢႆႈၽေးလၢတ်ႈ။

ၵူၼ်းပၢႆႈၽေးသိုၵ်း 70 ပၢႆ ဢၼ်ႁွတ်ႈဝႆႉၼႂ်းဝဵင်းၵႃလီႉၼႆႉ ၵမ်ႈၼမ် ပဵၼ်ၵူၼ်းဝၢၼ်ႈၼႂ်းၸႄႈဝဵင်းၵျွၵ်ႉမႄး၊ ဝဵင်းလႃႈသဵဝ်ႈ ၸိူဝ်းၼႆႉ။ ၵမ်ႈၽွင်ႈ ဢွၼ်ပၢႆႈမႃး တင်ႈတႄႇၽွင်းပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၼၼ်ႉသေ တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈၶိုၼ်းႁိူၼ်းယေးၵၼ်။ ယၢမ်းလဵဝ်သမ်ႉ ပၢင်တိုၵ်း တၢင်းဝဵင်းၵျွၵ်ႉမႄး၊ ၼွင်ၶဵဝ် တိုၵ်ႉပဵၼ်ႁၢဝ်ႈႁႅင်းယူႇလႄႈ တႃႇတေပွၵ်ႈၶိုၼ်းၵေႃႈ မီးလွင်ႈယၢပ်ႇၽိုတ်ႇဝႆႉ။ ထႅင်ႈလွင်ႈၼိုင်ႈ ၾၢႆႇၸွႆႈထႅမ်ၶဝ်ၵေႃႈ တိုၵ်ႉႁႃလၢႆးတၢင်းတႃႇလႆႈတၢင်းၵမ်ႉၸွႆႈယူႇ။