ၸဵမ်မိူဝ်ႈၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ယိုတ်းဢႃႇၼႃႇၸိုင်ႈမိူင်းသေ တီႉၺွပ်းတေႃႇဢွင်ႇ သၢၼ်းၸူႉၵျီႇမႃး ၶၢဝ်းတၢင်း 4 ပီပၢႆ၊ ထိုင်မိူဝ်ႈလဵဝ် ၽႂ်ပႆႇၵပ်းသိုပ်ႇလႆႈမၼ်းၼၢင်း ၵမ်းသိုဝ်ႈ ၊ တေႃႇၼင်ႇ လုၵ်ႈၸၢႆးဢွၵ်ႇဢွၵ်ႇမၼ်း ယင်းဢမ်ႇၵပ်းသိုပ်ႇၸူးလႆႈ။

ၶၢဝ်ႇမၼ်းၼၢင်းတႄႉ လိုဝ်းယူႇၼိူဝ်သူဝ်ႊသျႄႊမီႊတီႊယိူဝ်ႊ လၢႆသႅၼ်းလၢႆပိူင်။ ၶၢဝ်ႇလိုဝ်းပႃးဝႃႈ ပၢႆးတူဝ်ပၢႆးၸႂ်မၼ်းၼၢင်း ဢမ်ႇၶႅမ်ႉ၊ ၼိုင်ႈဝၼ်းၵိၼ်ၶဝ်ႈ 2 ၸေႃႉၵူၺ်း ၼႆၵေႃႈဝႃႈ။

တေႃႇဢွင်ႇသၢၼ်းၸူႉၵျီႇၼႆႉ ဢႃယု ထူၼ်ႈထိုင် 80 ပီ မိူဝ်ႈဝၼ်းတီႈ 19/06/2025 ၼႆႉ၊ ထိုင်မိူဝ်ႈလဵဝ် ၽႂ်ပႆႇႁူႉလႆႈဝႃႈ တေလွတ်ႈဢွၵ်ႇၶွၵ်ႈမႃးမိူဝ်ႈလႂ်။

မၼ်းၼၢင်းၼႆႉ ပဵၼ်လုၵ်ႈယိင်းၸွမ်သိုၵ်းဢွင်ႇသၢၼ်း၊ ၽူႈၵတ်ႉၶႅၼ်ႇၵၢၼ်မိူင်းၵၢၼ်သိုၵ်း၊ ၸဝ်ႈပေႃႈ လူင် တပ်ႉသိုၵ်းမၢၼ်ႈၼႆၵေႃႈ ဝႃႈလႆႈ။

ၸဵမ်မိူဝ်ႈပီ 1988 မႃး မၼ်းၼၢင်းၼႆႉ ယၢမ်ႈလတ်းၽၢၼ်ႇပၼ်ႁႃၵၢၼ်မိူင်းမႃးယူႇလၢႆၶၵ်ႉတွၼ်ႈ။ တႄႇဢဝ်ၼၼ်ႉမႃး မၼ်းၼၢင်းၺႃးသိုၵ်းမၢၼ်ႈၵုမ်းၵမ်မိပ်ႇဢီးလၢႆၸိူဝ်ႉလၢႆပိူင် ဢမ်ႇယွမ်း 20 ပီ ယဝ်ႉ။

မၼ်းၼၢင်းၼႆႉ ယၢမ်ႈပဵၼ်ၵေႃႉဢၼ် တင်းလုမ်ႈၾႃႉယုၵ်ႉယွင်ႈလႄႈဝႆႉၼမ်ႉၼၵ်းမႃးတႄႉတႄႉ ထိုင်တီႈလႆႈသူးငမ်းယဵၼ် Nobel Peace Prize ဢၼ်လုမ်ႈၾႃႉမၵ်းမၼ်ႈ ယိုၼ်ႈပၼ်။ ၵူၺ်းၵႃႈ လူင်ပွင်ၸိုင်ႈမၢၼ်ႈ၊ ၸဝ်ႈဢႃႇၼႃႇသိုၵ်းမၢၼ်ႈ ပၢၼ်သိုပ်ႇပၢၼ် ဢမ်ႇဝႆႉၵႃႈၶၼ်မၼ်းၼၢင်း၊ ဢမ်ႇ တွၼ်ႉပၼ်တီႈယူႇမၼ်းၼၢင်းသေပွၵ်ႈ၊ တီႉၺွပ်းမၼ်းၼၢင်းၶင်ၶွၵ်ႈဝႆႉတႃႇသေႇ။

ၸွမ်းၼင်ႇ ၸုမ်းပၵ်းတႃပႂ်ႉတူၺ်း တေႃႇဢွင်ႇသၢၼ်းၸူႉၵျီႇ ပြည်သူ့ရင်ခွင် – People’s Embrace ပိုၼ်ၽၢဝ်ႇဝႆႉတႄႉ – ၽွင်းမၼ်းၼၢင်းထုၵ်ႇသိုၵ်းမၢၼ်ႈၵုမ်းၶင်တူဝ်ဝႆႉ ၼႂ်းၶၢဝ်းတၢင်း 4 ပီမႃးၼႆႉ ၼိုင်ႈ ဝၼ်းမၼ်းၼၢင်းတူင်ႉၼိုင်ယူႇ 16 ၸူဝ်ႈမူင်း၊ ၶၢဝ်းယၢမ်းၼွၼ်းလိုဝ်ႈ 8 ၸူဝ်ႈမူင်း။ မၼ်းၼၢင်းတိုၼ်ႇ လုၵ်ႉၵၢင်ၼႂ်ၸဝ်ႉ 4 မူင်း 40 မိၼိတ်ႉ၊ ၶဝ်ႈၼွၼ်းၵၢင်ၶမ်ႈ 8 မူင်း 15 မိၼိတ်ႉ။ 

ၼႂ်းၼိုင်ႈဝၼ်းၼၼ်ႉ မၼ်းၼၢင်း တေၼင်ႈတြႃး ၊ လူဢၢၼ်ႇပပ်ႉလိၵ်ႈ ၊ ၵိၼ်တၢင်းၵိၼ်၊ လုမ်းလႃး ပၢႆးယူႇလီ ႁဵတ်းၼႆၵူႈဝၼ်း။

ၼႂ်းၶေႃႈမၢတ်ႈမၢႆၼၼ်ႉ ပႃးဝႆႉထႅင်ႈဝႃႈ – တေႃႇဢွင်ႇသၢၼ်းၸူႉၵျီႇၼႆႉ ၵိၼ်ၶဝ်ႈဝၼ်း 2 ၸေႃႉၵူၺ်း ၊ လိူဝ်ၼၼ်ႉ ၵိၼ်ၶဝ်ႈမုၼ်းၶဵၵ်ႉ 1 ၵွၼ်ႈ။ ၽၵ်းဢၼ်သိုၵ်းမၢၼ်ႈ လဵင်ႉမၼ်းၼၢင်းတႄႉ ပဵၼ်ပႃလႄႈ ၼိူဝ်ႉပဵတ်း။ လွင်ႈၸိူဝ်းၼႆႉ ပဵၼ်ၶေႃႈမၢတ်ႈမၢႆ ဢၼ်ၵဵပ်းဝႆႉပဵၼ်ၶေႃႈလပ်ႉ မိူဝ်ႈဝၼ်းတီႈ 06/01/2024 ၼၼ်ႉၼႆ ၽိုၼ်လိၵ်ႈလပ်ႉၼၼ်ႉႁူဝ်ႈဢွၵ်ႇမႃးၼင်ႇၼႆ။

လွင်ႈလိၵ်ႈလပ်ႉၼႆႉ မၢင်ၸိူဝ်းၵေႃႈလၢတ်ႈဝႃႈ ဢမ်ႇၸႂ်ႈလွင်ႈတႄႉ၊ ယွၼ်ႉဝႃႈ တေႃႇဢွင်ႇသၢၼ်းၸူႉၵျီႇ ဢမ်ႇၵိၼ်ၼိူဝ်ႉပဵတ်း ၼႆၵေႃႈမီး။

ၵဵဝ်ႇလူၺ်ႈ ၶၢဝ်ႇလိုဝ်းဝႃႈ တေႃႇဢွင်ႇသၢၼ်းၸူႉၵျီႇ တေႃႉတႄႉၵိၼ်ၶဝ်ႈၼိုင်ႈဝၼ်း 2 ၸေႃႉၵူၺ်းၼႆ ၼၼ်ႉသေ ၵမ်ႈၼမ် ဢွၼ်ၵၼ်မႆႈၸႂ်ပၢႆးယူႇလီ မၼ်းၼၢင်းႁႅင်းဝႆႉ။

ဢိင်ၼိူဝ်လွင်ႈၼႆႉသေ ႁိုၼ်း ၵႃယၢင်း ၽူႈထတ်းသၢင်ၵၢၼ်မိူင်း လၢတ်ႈၼႄဝႆႉၼင်ႇၼႆ -“ပေႃးတူၺ်း သုၼ်ႇတူဝ်မၼ်းၼႆ မိူဝ်ႈမၼ်းတႄႇဢွၵ်ႇၶွၵ်ႈမိူဝ်ႈၼႃႈ 2010 ၸိူဝ်းၼၼ်ႉ၊ ႁဝ်းယၢမ်ႈလႆႈႁူပ်ႉသေ ဢုပ်ႇၵၼ်တူၺ်း ၊ လႆႈႁူႉဝႃႈ မၼ်းၼၢင်းၼႆႉ ပဵၼ်ၵူၼ်းမေႃၼင်ႈသမထိ ၊ ယဝ်ႉၵေႃႈ ပဵၼ်ၵူၼ်းလဵၼ်ႈႁႅင်း။ မၼ်းဝႆႉ ပၢႆးယူႇလီမၼ်းပဵၼ်ပိူင်ယႂ်ႇ။ မၼ်းမေႃလုမ်းလႃးပၢႆးယူႇလီလႄႈ ႁႂ်ႈပေႃးႁၢႆႉၸႃႉၼင်ႇ တၢင်းၼွၵ်ႈဢွၵ်ႇၶၢဝ်ႇဝႆႉၸိူဝ်းၼၼ်ႉ ဢမ်ႇမီး။ ယူႇတီႈသုၼ်ႇတူဝ်ႁဝ်းႁၼ် ဢမ်ႇပဵၼ်လႆႈၸိူင်ႉၼၼ် ။ ၵွပ်ႈဢႃယုယႂ်ႇယဝ်ႉလႄႈ ပဵၼ်ၶႆႈပဵၼ်ၼၢဝ်ဢိတ်းဢီႈတႄႉၵေႃႈ ၶႄးတေပဵၼ်လႆႈယူႇ”- ဝႃႈၼႆ။

မၼ်းၼၢင်းပဵၼ်ႁိုဝ်ဝႆႉၵေႃႈယႃႇ ပေႃးဢဝ်ၸဵင်ႇၵၢၼ်မိူင်းသေတူၺ်းတႄႉ တႃႇႁႂ်ႈမၼ်းၼၢင်း တေဢွၵ်ႇမႃး ၵႄႈလိတ်ႈပၼ်ႁႃၵၢၼ်မိူင်းလႆႈတႄႉ တေဢမ်ႇငၢႆႈ။ ယွၼ်ႉဝႃႈ ၸူဝ်ႈမၼ်းၺႃးသိုၵ်းမၢၼ်ႈ ၵုမ်းၵႂႃႇၼႆႉၵူၺ်း ၸုမ်းလုၵ်ႉၽိုၼ်ႉတႅၵ်ႇပဵၼ်သၢမ်သီႇငႃးဝႆႉ။

မိူၼ်ၼင်ႇ ၸုမ်းလုၵ်ႉၽိုၼ်ႉၸၢဝ်းၶိူဝ်း ဢၼ်မီးမႃးၶၢဝ်းႁိုင်ၼၼ်ႉၵေႃႈ ၾၢႆႇၼိုင်ႈ ၊ ၸုမ်းလုၵ်ႉၽိုၼ်ႉ ၶၢဝ်းႁွင် ဢၼ်တိုၵ်ႉၵိူတ်ႇဢွၵ်ႇမႃးမႂ်ႇၵေႃႈ သမ်ႉပတ်ႉလၢႆးၼိုင်ႈ။ ၼႂ်းၸုမ်းလုၵ်ႉၽိုၼ်ႉၼၼ်ႉ ၼင်ႇၵၼ်ၵူၺ်းၵေႃႈ တႅၵ်ႇဢွၵ်ႇထႅင်ႈလၢႆလၢႆးလႄႈ တႃႇဝႃႈတေမုင်ႈမွင်းတေႃႇဢွင်ႇသၢၼ်းၸူႉၵျီႇ ဢွၵ်ႇမႃး ၵႄႈလိတ်ႈပၼ်ႁႃၵၢၼ်မိူင်းၼႆၼၼ်ႉတႄႉ လၢတ်ႈယၢပ်ႇယဝ်ႉၼႆ – ႁိုၼ်း ၵႃယၢင်း သိုပ်ႇလၢတ်ႈၼႄ ဝႆႉၼင်ႇၼႆ။

“ၵူၼ်းၶႂ်ႈႁႂ်ႈမၼ်းဢွၵ်ႇၶွၵ်ႈမႃးတႄႉ မီးယူႇၼင်ႇၵဝ်ႇ ၊ ၽႂ်ၵေႃႈ ယိၼ်းဢေးလူယူႇ။ ၵူၺ်းၵႃႈ ၵဵဝ်ႇလူၺ်ႈ ၵၢၼ်မိူင်းသေ မိူဝ်ႈလႂ် တေႃႇဢွင်ႇသၢၼ်းၸူႉၵျီႇဢွၵ်ႇမႃး ၸင်ႇတေၵႄႈလိတ်ႈပၼ်ႁႃၵၢၼ်မိူင်းလႆႈ ဢၼ်ဝႃႈၼၼ်ႉ ယူႇတီႈၸုမ်းၸၢဝ်းၶိူဝ်းလုၵ်ႉၽိုၼ်ႉတႄႉ လႅပ်ႈတေဢမ်ႇမီးတၢင်းမုင်ႈမွင်းယဝ်ႉ”။

ပေႃးမႃးတူၺ်း  မိူဝ်ႈပၢၼ်ၸုမ်းယိပ်းၵွင်ႈၵၢင်ႇ 7 ၸုမ်း လူင်းလၢႆးမိုဝ်း NCA မိူဝ်ႈပၢၼ်တဵင်းၸဵင်ႇၼၼ်ႉ ၸုမ်းလုၵ်ႉၽိုၼ်ႉ ၸၢဝ်းၶိူဝ်းထႅင်ႈ လၢႆၸုမ်းၵေႃႈ ၵႆႉတူၵ်ႇလၢတ်ႈဝႃႈ မိူဝ်ႈလႂ် တေႃႇဢွင်ႇသၢၼ်းၸူႉၵျီႇ မႃးပဵၼ်လူင်ပွင်ၸိုင်ႈမိူဝ်ႈလႂ် ၸင်ႇလူင်းလၢႆးမိုဝ်းၸွမ်းၼႆယူႇ။

ၵူၺ်းၵႃႈ ဝၢႆးသေ တေႃႇဢွင်ႇသၢၼ်းၸူႉၵျီႇ ၶိုၼ်ႈပဵၼ်လူင်ပွင်ၸိုင်ႈမႃးယဝ်ႉသမ်ႉ ဢမ်ႇႁၼ်ၶဝ်ငူပ်ႉငီႉဢုပ်ႇဢူဝ်း ၼႂ်းၸုမ်းလုၵ်ႉၽိုၼ်ႉၸၢဝ်းၶိူဝ်းတႄႉတႄႉဝႃႈဝႃႈ။

တေႃႉတႄႉ ႁဵတ်းၵႂႃႇပၢင်ၵုမ်လူင် ပီႁူဝ်ပၢၵ်ႇ 21 ပၢင်လူင်ၼၼ်ႉၵူၺ်း။ ၼၼ်ႉၵေႃႈ ဢမ်ႇလိူဝ်လႆႈ လၢႆးၵၢၼ်မၼ်းမီးလႄႈႁဵတ်းၵႂႃႇၵူၺ်း။ ဢမ်ႇၶဝ်ႈႁႃဢုပ်ႇဢူဝ်းငူပ်ႉငီႉၸၢဝ်းၶိူဝ်းမႃးတႄႉတႄႉ ဢမ်ႇဢဝ် ၶေႃႈလႆႈၸႂ်ၵၢၼ်မိူင်းသင် သေပွၵ်ႈ။ ယွၼ်ႉၼၼ် မၼ်းၼၢင်းဢွၵ်ႇမႃးၵေႃႈ တေဢမ်ႇပေႃးမီးတၢင်း မုင်ႈမွင်းသင်တႄႉတႄႉၼႆ ႁိုၼ်း ၵႃယၢင်း သိုပ်ႇလၢတ်ႈၼင်ႇၼႆ။

မိူၼ်ၼင်ႇ NUG ၼႆႉၵေႃႈ သူပ်းတႄႉဢွၼ်ၵၼ်လၢတ်ႈဝႃႈ မုင်ႈမွင်းႁႂ်ႈတေႃႇဢွင်ႇသၢၼ်းၸူႉၵျီႇ လွတ်ႈဢွၵ်ႇမႃး ဝႃႈၼႆၵူၺ်း ဢမ်ႇတွၼ်ႉပိုၼ်ၽၢဝ်ႇပဵၼ်တၢင်းၵၢၼ်ဝႃႈ ႁႂ်ႈမၼ်းၼၢင်းဢွၵ်ႇမႃး ဢွၼ်ႁူဝ်ၼႂ်း ၵၢၼ်မိူင်းၶိုၼ်း။

ၼႂ်းပိူင်ဢၼ်ၶဝ် သၢင်ႈဝႆႉၸူဝ်ႈၶၢဝ်းၼၼ်ႉၵေႃႈ ပႃးဝႆႉတၼ်းႁဵင်း ၽူႈၵိူဝ်းၵုမ်ၸိုင်ႈမိူင်းလႄႈ ၸွမ်ၸိုင်ႈ ဝႆႉယူႇဝႃႈၼႆသေတႃႉ ဢမ်ႇသႂ်ႇဝႆႉတႅတ်ႈတေႃးဝႃႈ ပုၼ်ႈၽွၼ်းတေႃႇဢွင်ႇသၢၼ်းၸူႉၵျီႇလႄႈ ဢူးဝိၼ်းမျိၼ်ႉ တေလႆႈၶိုင်သၢင်ႈႁၢင်ႈပွင်သင် ၼႆၼၼ်ႉ။ ယွၼ်ႉၼၼ် ပိူင်ၸိူဝ်းၼႆႉ ႁဵတ်းဢဝ်ၼႃႈတိူဝ်ႈ မၼ်းၵူၺ်းၼႆ ၽူႈထတ်းသၢင်ၵၢၼ်မိူင်း ၵေႃႉၼိုင်ႈ သိုပ်ႇလၢတ်ႈၼင်ႇၼႆ။

ပေႃးတူၺ်း PDF ၼႆၵေႃႈ တေႃႇဢွင်ႇသၢၼ်းၸူႉၵျီႇ လွတ်ႈဢမ်ႇလွတ်ႈၵေႃႈယဝ်ႉ ၾၢႆႇၶဝ်တႄႉ ၵႃႈတပ်ႉသိုၵ်းမၢၼ်ႈ ပႆႇၵူၼ်ႇပႆႇပင်းသေတႄႉ ၶဝ်တိုၼ်းတေတိုၵ်းတေႃးၵႂႃႇၼႆၼၼ်ႉၵူၺ်း။

ပၢင်လိူၵ်ႈတင်ႈ တေပဵၼ်ႁိုဝ်ဢမ်ႇပဵၼ် တေႃႇဢွင်ႇသၢၼ်းၸူႉၵျီႇ တေဢွၵ်ႇမႃးဢမ်ႇဢွၵ်ႇၼႆၼၼ်ႉတႄႉ ၶဝ်တေဢမ်ႇသူၼ်ၸႂ်ၵႃႈႁိုဝ်။ ၵႃႈသိုၵ်းမၢၼ်ႈတိုၵ်ႉမီးဢႃႇၼႃႇယူႇၼႆႉ ၶဝ်ႁူႉတႃႇတေတိုၵ်း တေႃးၵူၺ်း။

ပေႃးမႃးတူၺ်း တၢင်ႇၸိုင်ႈမိူင်းၵေႃႈ ပေႃးထိုင်ၶၢဝ်းလႂ်လႄႈ လီလႆႈဢွၵ်ႇလိၵ်ႈၼႆၵေႃႈ ဢွၵ်ႇပိုၼ်ၽၢဝ်ႇ ဝႃႈ ႁႂ်ႈပွႆႇပၼ်ၽူႈတူၵ်းၶွၵ်ႈၵၢၼ်မိူင်းၼႂ်းမိူင်းမၢၼ်ႈၼႆၵႃႈၼၼ်ႉၵူၺ်း ဢမ်ႇမီးမိူင်းလႂ် ယိုၼ်ႈယွၼ်း ပၼ်ႁႅင်းဢီး မႃးတႄႉတႄႉဝႃႈဝႃႈ။ ဢမ်ႇၼၼ် လွင်ႈဢွၼ်ႁူဝ်ၵၢၼ်မိူင်း မၼ်းၼၢင်းၼႆႉ ဢမ်ႇၶိုဝ်းယမ်မိူၼ်မိူဝ်ႈဢွၼ်ၼႃႈ 2010 ၼၼ်ႉယဝ်ႉႁႃႉၼႆ ပဵၼ်ၶေႃႈထၢမ်ဝႆႉယူႇ။

ပေႃးမႃးတူၺ်း ၸုမ်းမႅၵ်ႇၵွင်ႈလုၵ်ႉၽိုၼ်ႉၸိူဝ်းၼႆႉၵေႃႈ ပေႃးပဵၼ်ၸုမ်းဢၼ်လႆႈၵိၼ် လႆႈဝႃႈၸွမ်း သိုၵ်းမၢၼ်ႈတႄႉ ၶႅၼ်းတေဢမ်ႇၶႂ်ႈႁႂ်ႈမၼ်းၼၢင်းပူၼ်ႉလွတ်ႈဢွၵ်ႇၶွၵ်ႈမႃး။

တႃႇမၼ်းၼၢင်း တေဢွၵ်ႇၶွၵ်ႈမႃးလႆႈၼၼ်ႉတႄႉ ယူႇတီႈၸုမ်းသိုၵ်းမၢၼ်ႈၶဝ် တေဝူၼ်ႉသွၼ်ႇတႃႇ လႆႈၼမ်ႉမျၢတ်ႈၼမ်ႉတွၼ်းသင်တီႈမၼ်းၼၢင်းၼႆ တွၼ်ႈၼိုင်ႈ ဢမ်ႇၼၼ် သိုၵ်းမၢၼ်ႈ တေငူပ်ႉငီႉ မၼ်းၼၢင်းသေ တူၵ်းလူင်းလႆႈၸႂ်ၵၼ်သေပိူင်ပိူင် ၸင်ႇတေၸၢင်ႈလွတ်ႈဢွၵ်ႇၶွၵ်ႈမႃးလႆႈ။

တိူၵ်ႈတီႈဝႃႈ မၼ်းၼၢင်းလွတ်ႈဢွၵ်ႇၶွၵ်ႈမႃးၵေႃႈ မၼ်းတေဢမ်ႇၸၢင်ႈလၢတ်ႈဢွၵ်ႇသူပ်းဝႃႈတိုၵ်းလႄႈ ၽဵဝ်ႈမူၺ်ႉပႅတ်ႈသိုၵ်းမၢၼ်ႈလႄႈ ၼႆၸိူဝ်းၼႆႉ။ ယွၼ်ႉဝႃႈ မၼ်းၼၢင်းယၢမ်ႈၸုၵ်းၼိူဝ်ၶေႃႈယၼ်ႇၸႂ် လွင်ႈငမ်းယဵၼ် ၸိူဝ်းၼၼ်ႉမႃး ပီယၢဝ်းၶၢဝ်းႁိုင်။

ထႅင်ႈၾၢႆႇၼိုင်ႈၵေႃႈ မၼ်းၼၢင်း လႆႈႁပ်ႉဝႆႉသူးငမ်းယဵၼ် ၼူဝ်ႊပႄႊလ် Nobel Peace Prize ၼၼ်ႉ ဝႆႉၵေႃႈပိူင်ၼိုင်ႈလႄႈ သင်ဝႃႈလွတ်ႈဢွၵ်ႇၶွၵ်ႈမႃးၵေႃႈ တေမီးလွင်ႈတုမ်ႉယွၼ်ႈထိုင် ၸုမ်းၸိူဝ်းလုၵ်ႉ ၽိုၼ်ႉၶၢဝ်းႁွင်ၼႆႉတႄႉတႄႉ။ ၸုမ်းလုၵ်ႉၽိုၼ်ႉတႂ်ႈ NUG လႄႈသင် တၢင်ႇၸုမ်းလႄႈသင် တေၸၢင်ႈတႅၵ်ႇထႅင်ႈလၢႆတႃလူးၵွၼ်ႇၼႆ ၽူႈထတ်းသၢင်ၵၢၼ်မိူင်းၶဝ်ၸဝ်ႈ ထတ်းသၢင်ၼႄၼင်ႇၼႆ။