သိုၵ်းၵဝ်ႈၵၢင်ႉ MNDAA  ၵဵပ်းၶွၼ်ႇရူတ်ႉၵႃးၵႂႃႇမႃး တီႈၵဵတ်ႉလၢၼ်ႇ ၼိူဝ်သဵၼ်ႈတၢင်းလႃးသဵဝ်ႈ – မိူင်းယႆ ၸိုင်ႈတႆးပွတ်းႁွင်ႇႁၢဝ်ႈႁႅင်း ႁဵတ်းႁႂ်ႈၸဝ်ႈၵႃးၵႂႃႇမႃး ႁႃၵိၼ်လဵင်ႉတွင်ႉယၢပ်ႇၽိုတ်ႇ ဝႃႈၼႆ။

တႄႇႁူဝ်လိူၼ်ၵျႃၼ်ႊၼႆႉမႃး သိုၵ်းၵဝ်ႈၵၢင်ႉ MNDAA ၵူတ်ႇထတ်းၵႃးၵႂႃႇမႃး ၵဵပ်းငိုၼ်းယွၼ်းၶွၼ်ႇၼမ်ႁႅင်း တီႈၵဵတ်ႉလၢၼ်ႇ ဝၢၼ်ႈလွႆငိုၼ်း ဢၼ်မီးၼႂ်းၵႄႈၼမ်ႉပွင်ႈလႄႈ ႁူဝ်ယ ႁဵတ်းႁႂ်ႈၸဝ်ႈၵႃးတေႃႉသူင်ႇၵုၼ်ႇ ယၢပ်ႇၽိုတ်ႇၵိၼ်းၸႂ် ဝႃႈၼႆ။

ၸဝ်ႈၵႃး ဢၼ်တေႃႉၵုၼ်ႇလႅၼ်ႈသၢႆသဵၼ်ႈတၢင်းၼၼ်ႉ လၢတ်ႈၽူႈတွႆႇႁွၵ်ႈဝႃႈ -“တီႈၵဵတ်ႉသိုၵ်းၵဝ်ႈၵၢင်ႉ ၶဝ်ပႂ်ႉၼႂ်းၵႄႈႁူဝ်ယလႄႈ ၼမ်ႉပွင်ႈၼၼ်ႉ ၶဝ်ၵဵပ်းငိုၼ်း၊ ပေႃးပဵၼ်ၵႃးတၢင်ႇၶဝ်ႈၼႆႉ 5 ႁဵင်ပျႃး၊ ပေႃးပဵၼ် ၵႃးတၢင်ႇၵုၼ်ႇ12 လေႃႉၼႆႉ ယွၼ်း 25 သႅၼ်ထိုင် 30 သႅၼ်၊ ပေႃးပဵၼ်ၵႃးတၢင်ႇၵုၼ်ႇ1 တၼ်ႊၶိုၼ်ႈၼႆ ၶဝ်ယွၼ်း 2 သႅၼ် 5 မိုၼ်ႇပျႃး၊ ပေႃးတၢင်ႇမႃးၵုၼ်ႇၼမ် ၵႃးၼိုင်ႈလမ်းၼႆႉ လႆႈပၼ်ၼပ်ႉႁူဝ်သိပ်းသႅၼ်ပျႃး၊ ၸဝ်ႈၵႃးတေႃႉသူင်ႇၵုၼ်ႇၵေႃႈ ယၢပ်ႇၽိုတ်ႇဝႆႉ”- ဝႃႈၼႆ။

သိုၵ်းၵဝ်ႈၵၢင်ႉ MNDAA ၵေႃႈ ပိုတ်ႇၵဵတ်ႉလၢၼ်ႇဝႆႉ တီႈၾၢႆႇၼိူဝ်ၵၢတ်ႇ ဝၢၼ်ႈလွႆငိုၼ်း ၼႂ်းၸႄႈဝဵင်းမိူင်းယႆသေ ၵဵပ်းၶွၼ်ႇၵႃးတၢင်ႇၵုၼ်ႇဢၼ်တေႃႉမႃးတၢင်း ၸိုင်ႈတႆးပွတ်း ၸၢၼ်း ဢၢၼ်းတေတေႃႉၵႂႃႇတၢင်း ဝဵင်းလႃႈသဵဝ်ႈ။

ၵႃးလူင် 12 လေႃႉ ဢၼ်တေႃႉၼမ်ႉမၼ်းၸၢၵ်ႈမႃးၼၼ်ႉၵေႃႈ ပေႃးထိုင်တီႈၵဵတ်ႉလၢၼ်ႇ ၼႂ်းၵႄႈလႃႈသဵဝ်ႈ – မိူင်းယႆ လႆႈပၼ်ငိုၼ်းၼိုင်ႈလမ်း 35 သႅၼ်ထိုင် 40 သႅၼ်ပျႃးမိူၼ် ၵၼ်။  

ၶူဝ်းၵုၼ်ႇဢၼ် တေႃႉသူင်ႇၶဝ်ႈမႃးတၢင်း လႅၼ်လိၼ်မၢၼ်ႈ – ၶႄႇ ၼၼ်ႉၵေႃႈ ပေႃးထိုင်မႃးတီႈၵဵတ်ႉလၢၼ်ႇ ၼႂ်းၵႄႈလႃႈသဵဝ်ႈ – မိူင်းယႆၵေႃႈ လႆႈပၼ်ထႅင်ႈၶွၼ်ႇ တီႈသိုၵ်းၵဝ်ႈၵၢင်ႉ MNDAA – ၵူၼ်းၵႃႉၶၢႆၵုၼ်ႇ ၼႂ်းပိုၼ်ႉတီႈ ၵေႃႉၼိုင်ႈလၢတ်ႈ။

“ၶူဝ် ၼႂ်းၵႄႈလႃႈသဵဝ်ႈ – သီပေႃႉၼၼ်ႉ တိုၵ်ႉမႄးဝႆႉယူႇ ၵႃးတၢင်ႇၵုၼ်ႇပႆႇၸၢင်ႈၵႂႃႇမႃး၊ ၶူဝ်းၵုၼ်ႇဢၼ် လုၵ်ႉတၢင်းမိူင်းၶႄႇ ဢၼ်သူင်ႇၶဝ်ႈမႃးၸိူဝ်းၼၼ်ႉၵေႃႈ လတ်းမႃးတၢင်းၼမ်ႉပွင်ႈ သမ်ႉမႃးလႆႈပၼ်ၶွၼ်ႇ တီႈၵဵတ်ႉ MNDAA ၼမ်လႄႈ ၵူၼ်းမိူင်းၵေႃႈ ဢမ်ႇၶႂ်ႈၶၢမ်ႇလႆႈယဝ်ႉ ဢွၼ်ၵၼ်ၶၢင်းၼႃႇ”- ဝႃႈၼႆ။ 

ဝၢႆးလင် ၶႄႇၶဝ်ႈၵႄႈၵၢင်ငူပ်ႉငီႉသေ သိုၵ်းမၢၼ်ႈ ၶဝ်ႈၵုမ်းၵမ်ၶိုၼ်း ဝဵင်းလႃႈသဵဝ်ႈယဝ်ႉ ၸုမ်းသိုၵ်းဢူၺ်း လီသၢမ်ၸုမ်း ပိုၼ်ၽၢဝ်ႇလၢတ်ႈဝႃႈ တႄႇၼႂ်းႁူဝ်လိူၼ်ၵျႃၼ်ႊၼႆႉမႃး တေၵဵပ်းၶွၼ်ႇ တီႈ 105 လၵ်း ၼႂ်းၸႄႈဝဵင်းမူႊၸေႊ ဝႃႈၼႆ။