ၼႂ်းၵၢင်လိူၼ်ၵျုၼ်ႊ 2025 ၼႆႉ ၵူၼ်းဝၢၼ်ႈလိၼ်ပူၵ်ႇတႅၵ်ႇလႄႈထႅင်ႈလၢႆလၢႆဝၢၼ်ႈ ၼႂ်းၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ၸိူဝ်းဢွၼ်ၵၼ်ပၢႆႈၽေးသိုၵ်းၵႂႃႇသွၼ်ႈဝႆႉ တီႈၼွင်ႁၢႆးယႃႈၼၼ်ႉ ၸပ်းတၢင်းပဵၼ် ၶႆႈၼၢဝ်ၵၼ်ၼမ် ။

ၵူၼ်းဝၢၼ်ႈလိၼ်ပူၵ်ႇတႅၵ်ႇၼႆႉ ဢၼ်ပၢႆႈၽေးသိုၵ်းယူႇၼႆႉ ယၢမ်းလဵဝ် ၸုမ်းတူင်ႇၵူၼ်းၼပ်ႉဝႆႉ မီး 250 မုင်ႉႁေႃႁိူၼ်း ၼႂ်းၼၼ်ႉ ၸၢႆး 516 ၵေႃႉ ယိင်း 511 ၵေႃႈ ႁူမ်ႈသဵင်ႈ 1027 ။ မိူဝ်ႈလဵဝ် ၸိူဝ်းပဵၼ်သႅၼ်းလုၵ်ႈဢွၼ်ႇလဵၵ်ႉလႄႈ ၵူၼ်းထဝ်ႈ ၼပ်ႉႁူဝ်သိပ်း ၸပ်းတၢင်းပဵၼ်ၶႆႈၼၢဝ်ၵၼ်ဝႆႉဝႃႈၼႆ ။

ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ် ၵူၼ်းဝၢၼ်ႈႁဝ်း လႆႈပၢႆႈမႃးယူႇဝႆႉ တီႈၼႂ်းၼွင်ႁၢႆးယႃႈယဝ်ႉ ၊ ယၢပ်ႇၽိုတ်ႇလၢႆလွင်ႈၼႃႇ မိူဝ်ႈလဵဝ် ၸဵမ်လုၵ်ႈဢွၼ်ႇၵူၼ်းလူင် ဢွၼ်ၵၼ်ၸပ်းတၢင်းပဵၼ်ၼၢဝ် ၵၼ်ၼမ်တေႉၶႃႈဢေႃႈ ။ လုၵ်ႈဢွၼ်ႇသႅၼ်းတိုၵ်ႉၵိၼ်ၼူမ်းၵေႃႈ ၼၢဝ်။  မေႃယႃၶဝ် မႃးတူၺ်းပၼ်ၵေႃႈ မၼ်းဢမ်ႇၵုမ်ႇထူၼ်ႈသဵင်ႈၶႃႈ လူဝ်ႇတၢင်းၸွႆႈထႅမ်တေႉၶႃႈမိူဝ်ႈလဵဝ် ” – ဝႃႈၼႆ။

ယူႇတီႈဝၢၼ်ႈလိၼ်ပူၵ်ႇတႅၵ်ႇ ဢမ်ႇလႆႈလႄႈ ၵူၼ်းဝၢၼ်ႈဢွၼ်ၵၼ်ပၢႆႈၵႂႃႇယူႇၸွမ်း ဝၢၼ်ႈလွႆပဝ်း ဝၢၼ်ႈလႃႉႁေႉ၊ ဝၢၼ်ႈၺွင်ႇမူၼ်းၸိူဝ်းၼႆႉၵေႃႈ သိုၵ်းမၢၼ်ႈတိုၵ်ႉၸွမ်းဢဝ်ၶိူင်ႈမိၼ်မႃးပၼ်ႇလဵပ်ႈ ဢမ်ႇလိူၵ်ႈၶိင်ႇၶၢဝ်းလႄႈ ဢမ်ႇႁတ်းယူႇ သမ်ႉလႆႈပၢႆႈၵႂႃႇတၢင်းဝၢၼ်ၼွင်ပႃယဵၼ်ႇထႅင်ႈ ။ၵမ်းလိုၼ်းၵေႃႈ ပၢႆႈထိုင်ထုင်ႉၼွင်ႁၢႆးယႃႈ ။

ၶၢဝ်းၾူၼ်ၼႆႉ ပဵၼ်ၶၢဝ်းလီၽုၵ်ႇမၢၵ်ႇၶဝ်ႈတဝ်ႈၼမ်ႉလဵင်ႉလူၼႃႈႁိူၼ်းၽႂ်မၼ်းသေတႃႉ သမ်ႉၵုမ်ႇလႆႈပၢႆႈၽေးသိုၵ်း ၵူၺ်းလႄႈ ဢၼ်ၽုၵ်ႇဝႆႉၼႂ်းသူၼ်ၸိူဝ်းၼၼ်ႉၵေႃႈ ဢမ်ႇတၼ်းလႆႈလုမ်းလႃး ၵႃႈလႆႈပွႆႇသုမ်းပႅတ်ႈလၢႆလၢႆ ။

ၵူၼ်းပၢႆႈၽေးသိုၵ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၽုၵ်ႇၶဝ်ႈၵၢပ်ႇဝႆႉၸိူဝ်းၼၼ်ႉၵေႃႈ ဢမ်ႇၸၢင်ႈလုမ်းလႃးလႆႈယဝ်ႉ။တႃႇတေသိုပ်ႇၵႂႃႇၶၢဝ်းတၢင်းမိူဝ်းၼႃႈၵေႃႈ ဢမ်ႇၸၢင်ႈဝူၼ်ႉဢွၵ်ႇသင်ယဝ်ႉ။ၵတ်ႉၵႃႈယင်းမီးၸုမ်းၸွႆႈလၢႆလၢႆၾၢႆႇႁပ်ႉၸွႆႈဝႆႉယူႇၵမ်ႈၽွင်း” – ဝႃႈၼႆ။

ၼႂ်းလိူၼ်ၵျုၼ်ႊ ပီ 2025 ၼႆႉၵူၺ်း ၵူၼ်းမိူင်းလႆႈဢွၼ်ၵၼ်ပၢႆႈၽေး ဢမ်ႇယွမ်း 3 တီႈ။ လိူဝ်သေဝၢၼ်ႈလိၼ်ပူၵ်ႇတႅၵ်ႇ ၸႄႈဝဵင်းယွင်ႁူၺ်ႈယဝ်ႉ မိူၼ်ၼင်ႇ ဝၢၼ်ႈၼမ်ႉဢုၼ်ႇ ဝၢၼ်ႈၽြႃးလွႆ ဝၢၼ်ႈၼမ်ႉတိုၵ်း ဢၼ်မီးၼႂ်းထုင်ႉၸၢမ်ၵႃး ၸိူဝ်းၼႆႉၵေႃႈ ၵိၼ်းၸႂ်မိူၼ်ၵၼ်ဝႃႈၼႆ။

ႁူဝ်လိူၼ်ၵျုၼ်ႊၼႆႉၵူၺ်း တီႈဝၢၼ်ႈၼမ်ႉဢုၼ်ႇတင်း ဝၢၼ်ႈၽြႃးလွႆၼႆႉ သိုၵ်းမၢၼ်ႈတင်း ၸုမ်းပျီႇတူႉၸိတ်ႉ PNO ထႅမ်ႁႅင်းသိုၵ်း ၶဝ်ႈဢဝ်တီႈယူႇဝႆႉတင်းၼမ်လႄႈ ၵူၼ်းမိူင်းပိုၼ်ႉတီႈ ဢွၼ်ၵၼ်ပၢႆႈၽေးဝႆႉတေႃႇထိုင်ယၢမ်းလဵဝ်။

ၾၢႆႇဢွၵ်ႇၼွင်ဝဵင်းၾၢႆၶုၼ် ၼႂ်းၵႄႈ ဝဵင်းယွင်ႁူၺ်ႈ-ဝဵင်းပၢင်လွင်းၸိူဝ်းၼႆႉၵေႃႈ ၼႂ်းၶၢဝ်းတၢင်းသွင်လိူၼ်ၵူၺ်း သိုၵ်းမၢၼ်ႈတင်း ၸုမ်းပျီႇတူႉၸိတ်ႉ PNO ပွႆႇမၢၵ်ႇသႂ်ႇ ဢမ်ႇယွမ်း 71 ၵမ်း။ ၵူၼ်းမိူင်းလူႉတၢႆ ၵေႃႉၼိုင်ႈၼႆ ၸုမ်းတူင်ႉၼိုင်သုၼ်ႇလႆႈၵူၼ်း ထုင်ႉၼွင်ႁၢႆးယႃႈ ပိုၼ်ၽၢဝ်ႇဝႆႉ မိူဝ်ႈႁူဝ်လိူၼ်ၵျုၼ်ႊၼႆႉၼင်ႇၼႆ။