ဝၼ်းတီႈ 24/06/2025 ယၢမ်းဝၢႆးဝၼ်း မွၵ်ႈ 5 မူင်း(ၶၢဝ်းယၢမ်းမိူင်းတႆး) သိုၵ်းမၢၼ်ႈဢဝ်ၶိူင်ႈမိၼ် သႅၼ်းၵျႅတ်ႊၾၢႆႊတိူဝ်ႊ ပွႆႇမၢၵ်ႇသႂ်ႇတီႈဝဵင်းၵျွၵ်ႉမႄး တိူဝ်ႉသႂ်ႇႁိူၼ်းယေးၵူၼ်းမိူင်း လူႉၵွႆ ၊ ၵူၼ်းၵေႃႈလူႉတၢႆ။
ၵူၼ်းပိုၼ်ႉတီႈလၢတ်ႈဝႃႈ ၶိူင်ႈမိၼ်သိုၵ်းမၢၼ်ႈမႃးပွႆႇမၢၵ်ႇလူင် 2 ၵမ်း။ တူၵ်းသႂ်ႇတီႈႁိမ်းၵျွင်းပလီႇလႄႈ ႁၢၼ်ႉၵိၼ်ၶဝ်ႈၽၵ်း ၸၢၼ်ႇပျႃႉ ပွၵ်ႉ 3 ဝဵင်းၵျွၵ်ႉမႄး။ ႁိူၼ်းယေးၵေႃႈၵွႆတင်းၼမ်။ ၵူၼ်းမိူင်းတၢႆ 8 ၵေႃႉ မၢတ်ႇၸဵပ်း 7 ၵေႃႉ။ ဢၼ်ႁၢႆဝႆႉၵေႃႈတိုၵ်ႉမီးတင်းၼမ်- ဝႃႈၼႆ။
တီႈဝဵင်းၵျွၵ်ႉမႄးၼႆႉ သိုၵ်းမၢၼ်ႈလႄႈသိုၵ်းတဢၢင်း TNLA ပိုတ်းယိုဝ်းၵၼ်မႃးတဵမ်ပီ။ ၵူၼ်းမိူင်းလႆႈမၢတ်ႇၸဵပ်းလူႉတၢႆ၊ သိုၵ်းမၢၼ်ႈၸႂ်ႉ ၶိူင်ႈမိၼ်ပိုတ်းယိုဝ်းၼႂ်းဝဵင်းတိၵ်းတိၵ်းလႄႈၵူၼ်း မိူင်းၵမ်ႈၼမ်ဢွၼ်ၵၼ်ပၢႆႈၽေးသိုၵ်း ၵႂႃႇသွၼ်ႈယူႇတၢင်ႇတီႈတၢင်ႇဝဵင်းဝႆႉ။ ယၢမ်းလဵဝ်တႄႉ သိုၵ်းတဢၢင်း TNLA ပိုၼ်ၽၢဝ်ႇၵုမ်းလႆႈဝႆႉ ၊ တႃႇလႆႈၶိုၼ်းၼၼ်ႉသိုၵ်းမၢၼ်ႈယိင်ႈၶႅၼ်းၸႂ်ႉၶိူင်ႈမိၼ်မႃးပွႆႇမၢၵ်ႇၼႂ်းဝဵင်းၶိူဝ်းယႂ်းဢမ်ႇထၢတ်ႇ။ သိုၵ်းတဢၢင်း TNLA ဢဝ်တိုဝ်ႉတၢင်းၼႆႉသေ တတ်းလႅင်းၾူၼ်း လႅင်းဢိၼ်ႊထိူဝ်ႊၼႅတ်ႉဝႆႉတင်ႈတႄႇလိူၼ်ၵျႅၼ်ႊၼိဝ်ႊရီႊထူၼ်ႈ 1 ႁူဝ်ပီၼႆႉမႃးတေႃႇထိုင်ယၢမ်းလဵဝ်။ ယွၼ်ႉၼၼ်လႄႈလွင်ႈလူႉသုမ်းမၢတ်ႇၸဵပ်းၵူၼ်းမိူင်း ဢမ်ႇလႆႈႁူႉတႅတ်ႈတေႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ