တႄႇလိူၼ်ၵျုၼ်ႊၼႆႉမႃး သိုၵ်းၵဝ်ႈၵၢင်ႉ MNDAA ၸိူဝ်းပၵ်းတပ်ႉ ၵုမ်းၵမ်ယူႇၼႂ်းထုင်ႉၼမ်ႉပွင်ႈလႄႈ ၼွၵ်ႈဝဵင်းလႃႈသဵဝ်ႈၼၼ်ႉ ဢွၵ်ႇၶေႃႈၸီႉသင်ႇ တီႈၵၢင်ႉၵႄႇၸွမ်းဝၢၼ်ႈၸွမ်းသူၼ် ႁႂ်ႈႁႃပၼ်ၵူၼ်းတႃႇ ၶဝ်ႈႁဵတ်းသိုၵ်းၼိုင်ႈဝၢၼ်ႈလႂ် ဢေႇသုတ်းၼိုင်ႈၵေႃႉ ဝႃႈၼႆ။

ဝၢႆးလင် သိုၵ်းၵဝ်ႈၵၢင်ႉ လႆႈထွႆဢွၵ်ႇၼႂ်းဝဵင်းလႃႈသဵဝ်ႈ ပၼ်သိုၵ်းမၢၼ်ႈယဝ်ႉၼၼ်ႉ သိုၵ်းၵဝ်ႈၵၢင်ႉ ဢွၵ်ႇ ၶေႃႈၸီႉသင်ႇ တေႃႇၵူၼ်းမိူင်း ၸိူဝ်းယူႇၸွမ်းသၢပ်ႇဝဵင်းလႃႈသဵဝ်ႈလႄႈ ထုင်ႉၼမ်ႉပွင်ႈၼၼ်ႉ ႁႂ်ႈႁႃၵူၼ်း သေ ဢဝ်သဵၼ်ႈမၢႆၵူၼ်း ၸိူဝ်းတေၶဝ်ႈႁဵတ်းသိုၵ်း ၵႂႃႇသူင်ႇပၼ် ၼႂ်းဝၼ်းတီႈ 25/06/2025 တေမႃးၼႆႉ ႁႂ်ႈ ပဵၼ်ဝၼ်းလိုၼ်းသုတ်းၼႆ ၵူၼ်းပိုၼ်ႉတီႈ ၵေႃႉယူႇၼႂ်းထုင်ႉၼမ်ႉပွင်ႈ ၵေႃႉၼိုင်ႈလၢတ်ႈၼႄၼင်ႇၼႆ။

“တၢမ်တူဝ်ၵႅမ်ၸႄႈဝဵင်းမၢႆ (2) ၾၢႆႇဢုပ်ႉပိူင်ႇ သိုၵ်းၵဝ်ႈၵၢင်ႉၵေႃႉ လူင်းၵဵပ်း။ ၼိုင်ႈဝၢၼ်ႈၼႆႉ တေလႆႈပၼ် ၼိုင်ႈၵေႃႉ။ ပေႃးဢမ်ႇႁႃပၼ်လႆႈၵူၼ်းၸွမ်းၼင်ႇၶဝ်ၶႂ်ႈလႆႈၼၼ်ႉ ၶဝ်တေမႃးသွၵ်ႈၺွပ်းဢဝ် ၼႂ်းဝၢၼ်ႈႁင်းၵူၺ်းၼႆဢေႃႈ။ ၵူၼ်းဝၢၼ်ႈၼႂ်းဢိူင်ႇဝၢၼ်ႈၸေႈၶဝ်တႄႉ ႁႃၵူၼ်းတႃႇၵႂႃႇႁဵတ်းသိုၵ်းပၼ်ၶဝ်ၼႆႉ လႆႈၸၢင်ႈၵႂႃႇ 60 သႅၼ်ၼႆၶႃႈဢေႃႈ”။

ပူၼ်ႉမႃး ဝၼ်းတီႈ 17/06/2025 ၼႆႉ သိုၵ်းၵဝ်ႈၵၢင်ႉ MNDAA တင်း သိုၵ်းတႆး SSPP ၶဝ် ဢုပ်ႇဢူဝ်းၵၼ် တီႈဝၢၼ်ႈတၢၼ်ႇလုၼ်ႇ ႁိမ်းထုင်ႉၼမ်ႉပွင်ႈၼၼ်ႉ ပဵၼ်ပွၵ်ႈၵမ်းသွင်သေ တင်းသွင်ၾၢႆႇငူပ်ႉငီႉၵၼ်လႆႈ ၸႂ်ၶေႃႈတူၵ်းလူင်း ၵၼ်ဝႆႉဝႃႈ ယႃႇႁႂ်ႈၾၢႆႇသိုၵ်းၵဝ်ႈၵၢင်ႉ MNDAA ယွၼ်းၵူၼ်း/ ၵဵပ်းၵူၼ်းမိူင်း ၸိူဝ်းယူႇ ၼႂ်းၼႃႈတီႈသိုၵ်းတႆးၵုမ်းၵမ် ၵႂႃႇၶဝ်ႈႁၢပ်ႇထၢမ်းၵၢၼ်သိုၵ်း ဝႃႈၼႆ။

“ၶဝ်တူၵ်းလူင်းၵၼ် ၸိူင်ႉၼၼ်တႄႉၸႂ်ႈယူႇ။ ၵူၺ်းမိူဝ်ႈလဵဝ်ၼႆႉ ပွၵ်ႉလႂ်၊ ဝၢၼ်ႈၸိူဝ်းလႂ် ပဵၼ်ၼႂ်းၼႃႈ တီႈၽႂ်ၼႆၵေႃႈ ၶဝ်ဢမ်ႇလၢတ်ႈဝႆႉ တႅၵ်ႇလႅင်းလီလီ။ ယွၼ်ႉၼၼ် ဢွင်ႈတီႈလႂ် ပဵၼ်ၼႂ်းၼႃႈတီႈၽႂ် ဢၼ် ဝႃႈၼၼ်ႉ ႁဝ်းၵူၼ်းမိူင်းဢမ်ႇလႆႈႁူႉၸွမ်းတႄႉတႄႉလႄႈ မီးလွင်ႈယၢပ်ႇယူႇ” ၵူၼ်းပိုၼ်ႉတီႈ ထုင်ႉၼမ်ႉပွင်ႈ လၢတ်ႈၼႄၼင်ႇၼႆ။

လႆႈႁူႉဝႃႈ သိုၵ်းၵဝ်ႈၵၢင်ႉ ဢွၵ်ႇၶေႃႈသင်ႇ ယွၼ်းၵူၼ်းတီႈဝၢၼ်ႈၵွင်းႁုင်း ဢိူင်ႇမိူင်းပၢႆ၊ ဢိူင်ႇၼႃးၼၢင်း၊ ဢိူင်ႇဝၢၼ်ႈၸေႈ၊ ဢိူင်ႇၵျေႃႇတီး၊ ဢိူင်ႇတွၼ်းၼႄႇ ၸိူဝ်းၼႆႉသေ တေလႆႈဢဝ်သဵၼ်ႈမၢႆၵႂႃႇသူင်ႇပၼ် ၼႂ်းဝၼ်းတီႈ 25/06/2025 ၼႆႉ ပဵၼ်ဝၼ်းလိုၼ်းသုတ်း ဝႃႈၼႆ။

တႅမ်ႈ – ၽူၺ်းၼုမ်ႇ