ဝၼ်းတီႈ 23/06/2025 ယၢမ်းၵၢင်ၼႂ်မွၵ်ႈ 10 မူင်းၶိုင်ႈ သိုၵ်းတႆး SSPP တင်း သိုၵ်းတဢၢင်း TNLA ပဵၼ် ပၢင်တိုၵ်းၵၼ် ၾၢႆႇၸၢၼ်းဝၢၼ်ႈမိူင်းႁူၵ်း ၸႄႈဝဵင်းမိူင်းမိတ်ႈ ၸႄႈတွၼ်ႈမိူင်းမိတ်ႈ ၸိုင်ႈတႆးပွတ်းႁွင်ႇ။

လွင်ႈပၢင်တိုၵ်းၼႆႉ သိုၵ်းတင်းသွင်ၾၢႆႇ ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ် ၼိူဝ်ၼႃႈလိၵ်ႈ သိုဝ်ႇတူင်ႇဝူင်းၵူၼ်း ၽႂ်မၼ်းဝႆႉၼင်ႇၼႆ။

ၾၢႆႇသိုၵ်းတႆး တႄႉပိုၼ်ၽၢဝ်ႇဢွၵ်ႇဝႆႉဝႃႈ ယွၼ်ႉသိုၵ်းတဢၢင်း ဢဝ်ငႃးသိုၵ်းသၢမ်သဵၼ်ႈ ၶဝ်ႈမႃးၼႂ်းၼႃႈ လိၼ်သိုၵ်းတႆး ၵုမ်းၵမ်ဢွၼ်တၢင်းလႄႈ ၸင်ႇလႆႈယိုဝ်းၵႅတ်ႇၶႄတူဝ်ၼႆသေတႃႉ ၾၢႆႇသိုၵ်းတဢၢင်းၵေႃႈ ပိုၼ်ၽၢဝ်ႇဢွၵ်ႇသိုဝ်ႇဝႆႉဝႃႈ ၽွင်းဢဝ်သၢႆသိုၵ်း လဵပ်ႈပၼ်ႇၵူတ်ႇထတ်းလွင်ႈႁူမ်ႇလူမ်ႈၼႂ်းပိုၼ်ႉတီႈယူႇၼႆႉ ၺႃးသိုၵ်းတႆး ငွႆးယိုဝ်းလႄႈ တင်းသွင်ၾၢႆႇ ၸင်ႇလႆႈပဵၼ်ပၢင်တိုၵ်းၵၼ် ၼႆယဝ်ႉ။

လႆႈႁူႉဝႃႈ မိူဝ်ႈဝၼ်းတီႈ 19/06/2025 ၼၼ်ႉ သိုၵ်းတဢၢင်း ၸတ်းဢဝ်တပ်ႉၵွင် မၢႆ 2 ၊ မၢႆ 3 ၊ မၢႆ 9 ႁႅင်း သိုၵ်း 200 ပၢႆ လုၵ်ႉတၢင်းမိူင်းလူင် – မိူင်းၵုတ်ႈ မုင်ႈၼႃႈၵႂႃႇၼႂ်းၸႄႈဝဵင်းမိူင်းမိတ်ႈ ဢွင်ႈတီႈမီးတပ်ႉပၢင် သဝ်း သိုၵ်းတႆး SSPP ယူႇသဝ်းဝႆႉ ဝႃႈၼႆ။

မိူဝ်ႈဝၼ်းတီႈ 15/06/2025 ၼၼ်ႉၵေႃႈ သိုၵ်းတႆးတင်း သိုၵ်းတဢၢင်း ပဵၼ်ပၢင်တိုၵ်းၵၼ် တီႈၸဵင်ႇၸၢၼ်းဝၼ်းဢွၵ်ႇ ဝၢၼ်ႈႁူးသူၼ် ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇသေ ၾၢႆႇသိုၵ်းတဢၢင်း တၢႆၵႂႃႇ မွၵ်ႈ 3 ၵေႃႉ ဝႃႈၼႆ။

သိုၵ်းတႆး SSPP တင်း သိုၵ်းတဢၢင်း TNLA ၼႆႉ ယၢမ်ႈပဵၼ်ပၼ်ႁႃၵၼ်မႃး လၢႆပွၵ်ႈလၢႆၵမ်းမႃးယဝ်ႉလႄႈ ၼင်ႇႁိုဝ် တေၵႄႈလိတ်ႈလႆႈပၼ်ႁႃၼႆႉ ၽူႈယႂ်ႇၵူၼ်းလူင် တင်းသွင်ၸုမ်းယၢမ်ႈဢွၵ်ႇလိၵ်ႈတုၵ်းယွၼ်းႁႂ်ႈ ၶွမ်ႊမတီႊ ဢုပ်ႇဢူဝ်းၵၢၼ်မိူင်း မိူင်းႁူမ်ႈတုမ် FPNCC ဢၼ်ၸုမ်းသိုၵ်းဝႃႉ UWSA ဢွၼ်ႁူဝ်ဝႆႉၼၼ်ႉ ၸွႆႈၶဝ်ႈၵႄႈလိတ်ႈပၼ်ႁႃယူႇ ၼႆယဝ်ႉ။

တႅမ်ႈ – ၽူၺ်းၼုမ်ႇ