တႄႇဢဝ်လိူၼ်ထီႉသွင် ၾႅပ်ႉပိဝ်ႊရီႊ ပီ 2021 တေႃႇထိုင် ဝၼ်းတီႈ 22 လိူၼ်ထူၼ်ႈႁူၵ်း ၵျုၼ်ႊ ပီ 2026 ဝၢႆးလင် တပ်ႉသိုၵ်းမၢၼ်ႈ ယိုတ်းဢဝ်ဢႃႇၼႃႇၸိုင်ႈမိူင်းမႃးၼႆႉ ၵူၼ်းမိူင်း ထုၵ်ႇႁဵတ်းႁၢႆႉႁႅမ်တၢႆ 8100 ပၢႆ ဝႃႈၼႆ။

ၵမ်ႈၼမ် လႆႈလူႉတၢႆယွၼ်ႉ သိုၵ်းမၢၼ်ႈၸႂ်ႉႁိူဝ်းမိၼ်တိုၵ်းပွႆႇမၢၵ်ႇ၊ ၸႂ်ႉၶိူင်ႈၵွင်ႈလူင် ယိုဝ်းတိုၵ်း၊ ၸုမ်းၶွၼ်ႉတဝ်ႉသိုၵ်းမၢၼ်ႈ လၢႆမူႇလၢႆၸုမ်းၵေႃႈ တီႉၺွပ်းႁဵတ်းႁၢႆႉတေႃႇၵူၼ်းမိူင်း။ ၸဵမ်ယိင်းၸၢႆး လုၵ်ႈဢွၼ်ႇ ၵူၼ်းထဝ်ႈ လႄႈ မႄႈမၢၼ်း မႄႈလုၵ်ႈဢွၼ်ႇၸိူဝ်းၼႆႉၵေႃႈ ထုၵ်ႇႁဵတ်းႁၢႆႉႁႅမ်တၢႆ ၼပ်ႉႁူဝ်ပၢၵ်ႇႁူဝ်ႁဵင်။

သဵၼ်ႈမၢႆၸိူဝ်းၼႆႉ မုၵ်ႉၸုမ်းၾၢႆႇၸွႆႈထႅမ်ၵူၼ်းတူၵ်းၶွၵ်ႈၵၢၼ်မိူင်း AAPP လႆႈၵဵပ်းၶေႃႈမုလ်းသေ ႁၢႆးငၢၼ်းဢွၵ်ႇဝႆႉ။ ပဵၼ်သဵၼ်ႈမၢႆ ဢၼ်ယိုၼ်းထိုင်လႆႈသေ ၵဵပ်းမၢႆဝႆႉၵူၺ်း၊ ၼႂ်းပိုၼ်ႉတီႈ ၸၢင်ႈၼမ်လိူဝ်ၼႆႉထႅင်ႈ ဝႃႈၼႆ။

လိူဝ်ၼၼ်ႉ ၶၢဝ်းတၢင်း 5 ပီပၢႆမႃးၼႆႉ ၵူၼ်းမိူင်း 30000 ပၢႆ ထုၵ်ႇၸုမ်းသိုၵ်းမၢၼ်ႈ တီႉၺွပ်းယဵတ်ႈၶွၵ်ႈ။ ၼႂ်းၼၼ်ႉ ၵူၼ်းမိူင်း 14000 ပၢႆၼႆႉ တိုၵ်ႉၺႃးၵုမ်းၶင်ၶွၵ်ႈဝႆႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉ။

တပ်ႉသိုၵ်းမၢၼ်ႈၼႆႉ ၼႄၶေႃႈဢၢင်ႈဝႃႈ ၵဵဝ်ႇၵွင်ႉတင်းၸုမ်းလုၵ်ႉၽိုၼ်ႉ၊ သၢၼ်ၶတ်း လွင်ႈယိုတ်းဢဝ်ဢႃႇၼႃႇၸိုင်ႈမိူင်း၊ ၵေႃႇၵၢၼ်ႁုၵ်ႉႁၢႆႉ ႁဵတ်းႁႂ်ႈဝၢၼ်ႈမိူင်း ဢမ်ႇမီးလွင်ႈၼိမ်သဝ်း ဢိၵ်ႇပႃးထႅင်ႈလၢႆလွင်ႈလၢႆတၢင်းသေ တီႉၺွပ်းၵူၼ်းမိူင်း ဢဝ်လိူင်ႈယဵတ်ႈၶွၵ်ႈ။