ၵူၼ်းဝၢၼ်ႈၼမ်ႉမႆႈ၊ ဝၢၼ်ႈၽြႃးလွႆ၊ ဝၢၼ်ႈလိၼ်ပူၵ်ႇတႅၵ်ႇ ၼႂ်းၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ယွၼ်ႉၽေးပၢင်တိုၵ်း ယွၼ်ႉသိုၵ်းမၢၼ်ႈၵူတ်ႇထတ်းႁႅင်းလႄႈ ႁဵတ်းႁႂ်ႈ ၵူၼ်းမိူင်းဢွၼ်ၵၼ် ပၢႆႈၽေးသိုၵ်းတီႈၼိုင်ႈယဝ်ႉ တီႈၼိုင်ႈ။

ၵူၼ်းပၢႆႈၽေးသိုၵ်း တီႈဝၢၼ်ႈလိၼ်ပူၵ်ႇတႅၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းဝၢၼ်ႈလိၼ်ပူၵ်ႇတႅၵ်ႇ ဢၼ်လႆႈပၢႆႈၽေးသိုၵ်းၼႆႉ ၼပ်ႉဢမ်ႇလႆႈယဝ်ႉၶႃႈ ယွၼ်ႉမၼ်းပဵၼ်လႅၼ် ၸပ်းလႄႈ ပေႃးႁဝ်း ၵႂႃႇယူႇသမ်ႉ မၼ်းဢမ်ႇလိုမ်းၸႂ်။ ၶိူင်ႈမိၼ်ၵေႃႈ ၾၢႆႇၼိုင်ႈ ၶႂ်ႈမႃးၶိင်ႇလၢႆမႃး ယဝ်ႉၵေႃႈ ၾၢႆႇၼႆႉ ထၢင်ႇတေယူႇလႆႈ သမ်ႉဢမ်ႇယူႇလႆႈ ၶၢႆႉၵႂႃႇတီႈဝၢၼ်ႈလွႆပဝ်း ဝၢၼ်ႈလႃႉႁေႉ၊ ဝၢၼ်ႈၺွင်ႇမူၼ်းၼၼ်ႉၵေႃႈ ထၢင်ႇတေယူႇလႆႈ ဢမ်ႇယူႇလႆႈ လႆႈပၢႆႈၶိုၼ်ႈၵႂႃႇတၢင်းၼွင်ပႃယဵၼ်ႇ”- ဝႃႈၼႆ။

ယၢမ်းလဵဝ် တီႈၼွင်ပႃယဵၼ်ႇၼႆႉ မီးဝႆႉတပ်ႉသိုၵ်းမၢၼ်ႈ ၵူၼ်းပၢႆႈၽေးသိုၵ်းတႄႉ ဢွၼ်ၵၼ်မႃးၶၢမ်ဝႆႉ တီႈဝၢၼ်ႈၼႆႉသေ ဢွၼ်ၵၼ်ဢိုပ်းၼမ်ႉၵိၼ်ၼမ်ႉၸႂ်ႉ လႆႈတုင်းၼမ်ႉၾူၼ်သေ ၸႂ်ႉၵၼ်ၵူၺ်း ယဝ်ႉၵေႃႈ ၶွင်ၵိၼ်ယႅမ်ႉ ၸိူဝ်းၼႆႉ သင်ဢမ်ႇမီးၵူၼ်းမႃးၶၢႆၽၵ်းၶဵဝ်ၼႆ ဢမ်ႇမီးၵိၼ်ယဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းယွင်ႁူၺ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၶဝ်ၶၢႆႉလၢႆလၢႆတီႈၶႃႈဢေႃႈ လုၵ်ႉတီႈလိၼ်ပူၵ်ႇတႅၵ်ႇ ၶၢႆႉၵႂႃႇတၢင်းၸၢၼ်းသေ ယဝ်ႉၵေႃႈ ၶိုၼ်းၶိုၼ်ႈမႃးတၢင်းသီႇသႅင်ႇ။ လုၵ်ႉတီႈသီႇသႅင်ႇ ၶိုၼ်း လူင်းမႃးၶိုၼ်းတၢင်းယွင်ႁူၺ်ႈ။ ယူႇလႆႈၼိုင်ႈတီႈ 2−3 ဝၼ်းၸိူင်ႉၼႆသေ မၢၵ်ႇၵွင်ႈၵေႃႈ တူၵ်းတိၵ်းတိၵ်းလႄႈ ၶဝ်ဢမ်ႇယူႇလႆႈ လႆႈၶၢႆႉၵႂႃႇထႅင်ႈဢေႃႈ”- ဝႃႈ ၼႆ။  

ၼႂ်းလိူၼ်ၵျုၼ်ႊ ပီ 2025 ၼႆႉၵူၺ်း ၵူၼ်းမိူင်းလႆႈဢွၼ်ၵၼ်ပၢႆႈၽေး ဢမ်ႇယွမ်း 3 တီႈ။ ယွၼ်ႉၵိုင်ႉ ၵၢင်ႉလႆႈပၢႆႈလႄႈ ၶဝ်ႈၼမ်ႉတၢင်းၵိၼ်ၵေႃႈ ဢမ်ႇတၼ်းလႆႈသင် ၵွပ်ႈၼႆ ဢွၼ်ၵၼ် ထူပ်းတၢင်းယၢပ်ႇယိုတ်ႇ ႁင်းၽႂ်မၼ်းဝႆႉ။

ၵူၼ်းပၢႆႈၽေးသိုၵ်း ဝၢၼ်ႈလိၼ်ပူၵ်ႇတႅၵ်ႇ လၢတ်ႈဝႃႈ -“မိူဝ်ႈပၢႆႈၽေးမႃးၼႆႉၵေႃႈ လႆႈပၢႆႈၵၢင်ၶိုၼ်းၵူၺ်း ၶႃႈၼႃႇ မိူၼ်ဢွၼ်တၢင်းၼၼ်ႉ။ မိူဝ်ႈပၢႆႈၵႂႃႇတၢင်းၺွင်ႇမူၼ်းၼၼ်ႉ လႆႈပၢႆႈၵၢင်ၶိုၼ်းလႄႈ ပိူၼ်ႈဝႃႈ ငဝ်းလၢႆးဢမ်ႇပေႃးၶႅမ်ႉ တေလႆႈပၢႆႈၵမ်းလဵဝ်ယဝ်ႉ ၸဵမ်မိူဝ်ႈၵိၼ်ၶဝ်ႈၶမ်ႈယဝ်ႉ ၾႆးၵေႃႈဢမ်ႇပၼ်တႆႈ လွင်ႈတၢင်းတုၵ်ႉၶၼႆႉ ဢမ်ႇၸၢင်ႈလၢတ်ႈယဝ်ႉ။ ယွၼ်ႉၼၼ် ၶဝ်ႈၼမ်ႉတၢင်းၵိၼ်ၵေႃႈ ဢမ်ႇပေႉၼမ်ၶႃႈၼႃႇၼေႃႈ”- ဝႃႈၼႆ။

ၵူၼ်းပၢႆႈၽေးသိုၵ်းတႄႉ မုင်ႈမွင်းၶႂ်ႈႁႂ်ႈပၢင်တိုၵ်းၸဵဝ်းယဝ်ႉတူဝ်ႈသေ လႆႈပွၵ်ႈၶိုၼ်းႁိူၼ်းယေး ႁဵတ်း ၵၢၼ်ၽုၵ်ႇသွမ်ႈၶိုၼ်းမိူၼ်ၵူႈၵဝ်ႇ ဝႃႈၼႆ။

“ၶႂ်ႈႁႂ်ႈၵတ်းယဵၼ်ၶႃႈဢေႃႈ။ ယွၼ်ႉဝႃႈမၼ်းတုမ်ႉတိူဝ်ႉတင်းပၢႆးပၺ်ႇၺႃႇ ယဝ်ႉၵေႃႈ ပၢႆႈမၢၵ်ႈမီးၵူၼ်း မိူင်းၼႆႉ မၼ်းတုမ်ႉတိူဝ်ႉႁႅင်းၼႃႇယဝ်ႉ။ ၵမ်ႈၽွင်ႈၵေႃႈ ၽုၵ်ႇဝႆႉၶဝ်ႈၵၢပ်ႇ ၵမ်ႈၽွင်ႈ ပႆႇတၼ်းလႆႈ ၽုၵ်ႇသွမ်ႈ။ ပေႃးဢမ်ႇလႆႈႁဵတ်းသူၼ်ၶဝ်ႈၵၢပ်ႇတႄႉ တေမီးတၢင်းၵိၼ်းၸႂ်ၶႃႈဢေႃႈ ပေႃးယူႇၵႂႃႇ ၸိူင်ႉၼႆတိၵ်းတိၵ်းတႄႉ”- ၵူၼ်းပၢႆႈၽေးသိုၵ်း ဝၢၼ်ႈလိၼ်ပူၵ်ႇတႅၵ်ႇ သိုပ်ႇလၢတ်ႈၼႄၼင်ႇၼႆ။

တႄႇဢဝ်ႁူဝ်လိူၼ်ၵျုၼ်ႊ ပီ 2025 ၼႆႉမႃး တီႈဝၢၼ်ႈၼမ်ႉဢုၼ်ႇတင်း ဝၢၼ်ႈၽြႃးလွႆၼႆႉ သိုၵ်းမၢၼ်ႈတင်း ၸုမ်းပျီႇတူႉၸိတ်ႉ PNO ထႅမ်ႁႅင်းသိုၵ်း ၶဝ်ႈဢဝ်တီႈယူႇဝႆႉတင်းၼမ်လႄႈ ၵူၼ်းမိူင်းပိုၼ်ႉတီႈ ဢွၼ်ၵၼ်ပၢႆႈၽေးဝႆႉတေႃႇထိုင်ယၢမ်းလဵဝ်။

ၾၢႆႇဢွၵ်ႇၼွင်ဝဵင်းၾၢႆၶုၼ် ၸွမ်းပိုၼ်ႉတီႈ မူႇဝၢၼ်ႈၸႄႈဝဵင်းယွင်ႁူၺ်ႈတင်း ဝဵင်းပၢင်လွင်း ၸိူဝ်းၼႆႉ ၼႂ်းၶၢဝ်းတၢင်းသွင်လိူၼ်ၵူၺ်း သိုၵ်းမၢၼ်ႈတင်း ၸုမ်းပျီႇတူႉၸိတ်ႉ PNO ပွႆႇမၢၵ်ႇသႂ်ႇ ဢမ်ႇယွမ်း 71 ၵမ်း။ ၵူၼ်းမိူင်းလူႉတၢႆ ၵေႃႉၼိုင်ႈၼႆ ၸုမ်းတူင်ႉၼိုင်သုၼ်ႇလႆႈၵူၼ်း ထုင်ႉၼွင်ႁၢႆးယႃႈ ပိုၼ်ၽၢဝ်ႇဝႆႉ မိူဝ်ႈႁူဝ်လိူၼ်ၼႆႉၼင်ႇၼႆ။