ဝၼ်းတီႈ 17-18/06/2025 ၼႆႉ တူဝ်တႅၼ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) လႄႈ သိုၵ်းၵဝ်ႈၵၢင်ႉ (MNTJP/ MNDAA) ႁူပ်ႉဢုပ်ႇၵၼ် တီႈဝၢၼ်ႈတၢၼ်ႇလုၼ်ႇ ႁိမ်းဢိူင်ႇၼမ်ႉပွင်ႈ ဝူင်ႈၵၢင်ၸႄႈဝဵင်းလႃႈသဵဝ်ႈ – မိူင်းယႆ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

မိူဝ်ႈဝၼ်းတီႈ 18 ယၢမ်းၵၢင်ၶမ်ႈ ၾၢႆႇႁွင်ႈၵၢၼ်ပိုၼ်ၽၢဝ်ႇ တပ်ႉသိုၵ်းၵဝ်ႈၵၢင်ႉ ပိုၼ်ၽၢဝ်ႇဢွၵ်ႇပဵၼ်တၢင်း ၵၢၼ်ဝႆႉဝႃႈ – တင်းသွင်ၸုမ်း ဢုပ်ႇဢူဝ်းၵၼ်ၵႂႃႇ ပၼ်ႁႃလွင်ႈၶွင်ႈၶမ် ဢၼ်ပဵၼ်ယူႇယၢမ်းမိူဝ်ႈလဵဝ်ၼႆႉ သေ တင်းသွင်ၾၢႆႇ တူၵ်းလူင်းလႆႈၸႂ်ၵၼ်ၵႂႃႇလီငၢမ်းယဝ်ႉ – ဝႃႈၼႆ။

ၵဵဝ်ႇၵပ်းလွင်ႈၼႆႉသေ ၽူႈၸမ်ၸႂ်ၵၼ်တင်း ၸုမ်းသိုၵ်း SSPP လႄႈ ႁူႉႁၼ်ၸွမ်းငဝ်းလၢႆး ပၢင်ဢုပ်ႇဢူဝ်း ပွၵ်ႈၵမ်းၼႆႉတႄႉ သပ်းလႅင်းလၢတ်ႈၼႄတီႈၽူႈတွႆႇႁွၵ်ႈဝႃႈ – “ၵႂႃႇဢုပ်ႇၵၼ်ပွၵ်ႈၼႆႉ ဢမ်ႇလႆႈၶေႃႈတူၵ်း လူင်းသင်ၵၼ်။ ပေႃးဢုပ်ႇၵၼ်ဢမ်ႇလႆႈမႃးၵေႃႈ သဵင်ၵွင်ႈလူဝ်ႇတႅၵ်ႇထႅင်ႈၵူၺ်းယဝ်ႉ”- ဝႃႈၼႆ။

လႆႈႁူႉဝႃႈ တႃႇပဵၼ်ပၢင်ဢုပ်ႇဢူဝ်းၵၼ်ၼႆႉ ၾၢႆႇသိုၵ်းၵဝ်ႈၵၢင်ႉ ယွၼ်းၵႂႃႇႁူပ်ႉဢုပ်ႇတီႈ ငဝ်ႈငုၼ်းပႃႇတီႇ မႂ်ႇသုင်ၸိုင်ႈတႆး SSPP ၊ ၾၢႆႇၽူႈယႂ်ႇၵူၼ်းလူင်ၼႂ်း SSPP ဢမ်ႇၽွမ်ႉၸွမ်း ဢၢၼ်းၶႂ်ႈၵႂႃႇၸတ်းႁဵတ်းတီႈ ဝဵင်းပၢင်သၢင်း။ တင်းသွင်ၾၢႆႇဢမ်ႇၽွမ်ႉၸွမ်းသေ ၸင်ႇလႆႈၸတ်းႁဵတ်းၵႂႃႇ တီႈဝၢၼ်ႈတၢၼ်ႇလုၼ်ႇ (ဝၢၼ်ႈၵဝ်ႈၵၢင်ႉ) ဢၼ်လေႃႇသျိင်းႁၢၼ်ႇ မႃးတႄႇဝႆႉၼၼ်ႉ ဝႃႈၼႆ။

ၼႂ်းပၢင်ဢုပ်ႇဢူဝ်းၼၼ်ႉ ၾၢႆႇ SSPP တုၵ်းယွၼ်းႁႂ်ႈ MNDAA သုတ်ႉႁူၼ်လင်ၶိုၼ်းၵႂႃႇ ၾၢႆႇၼိူဝ်တၢင်း ဝဵင်းသႅၼ်ဝီတင်းသဵင်ႈ။ ၾၢႆႇသိုၵ်းၵဝ်ႈၵၢင်ႉ MNDAA ဢမ်ႇၽွမ်ႉၸွမ်းသေ ဢမ်ႇလႆႈၶေႃႈတူၵ်းလူင်းသင် ၵၼ်မႃးတႄႉတႄႉၼႆ – ၵူၼ်းၸမ်ၸႂ်ၵၼ်တင်း ပႃႇတီႇမႂ်ႇသုင်ၸိုင်ႈတႆး လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ပိူင်လူင်မၼ်း လွင်ႈၼႃႈတီႈ၊ လွင်ႈယူႇႁူမ်ႈၵၼ်ၼႆႉ ယႃႇႁႂ်ႈတုမ်ႉတိူဝ်ႉၵၼ် လွင်ႈၵႂႃႇမႃး၊ ယႃႇႁႂ်ႈမီးလွင်ႈ ႁႄႉႁၢမ်ႈၵၼ်၊ လွင်ႈၵဵပ်းသိုၵ်း တမ်းဝၢင်းဢုပ်ႉပိူင်ႇ ၼႂ်းၼႃႈတီႈ SSPP ၸိူဝ်းၼႆႉၵေႃႈ ယႃႇႁႂ်ႈမီး ၸဵမ်ၸိူဝ်း ၼႆႉဢေႃႈ။”

လႆႈႁူႉဝႃႈ တူဝ်တႅၼ်းတင်းသွင်ၸုမ်း ၸိူဝ်းၵႂႃႇႁူပ်ႉဢုပ်ႇဢူဝ်းၵၼ်ၼႆႉ ၾၢႆႇသိုၵ်းတႆး SSPP  ပဵၼ်ၵႅမ်ၽူႈ ပွင်ၵၢၼ်သိုၵ်း ၸွမ်သိုၵ်း ငဝ်းၾႃႉလႄႈ ၸွမ်ႁၢၼ် ဝုၼ်းဢွင်ႇ ဢွၼ်ႁူဝ်သေ ၾၢႆႇသိုၵ်းၵဝ်ႈၵၢင်ႉ MNDAA သမ်ႉ ပဵၼ်ၽူႈပွင်ၵၢၼ်သိုၵ်း ၵႅမ်ၸွမ်ႁၢၼ် လၼ်ႊထဵင်ႊဢၼ်ႊ Mr. Lan Tian En ဢွၼ်ႁူဝ်ၼမ်းၼႃႈမႃးဢုပ်ႇဢူဝ်း ၼႆယဝ်ႉ။

ၼႂ်းပၢင်ဢုပ်ႇဢူဝ်း ၵႄႈလိတ်ႈပၼ်ႁႃၵၼ်ၼႆႉ မီးပႃးၵႅမ်ၽူႈၵွၼ်းသိုၵ်း တပ်ႉၸုမ်း မၢႆ 710 တပ်ႉသိုၵ်းဝႃႉ UWSA ၶဝ်ႈႁူမ်ႈႁပ်ႉထွမ်ႇၸွမ်းၵႂႃႇ ႁႂ်ႈပဵၼ်သၢၵ်ႈသေႇလၵ်းထၢၼ် ၼႂ်း ၵႄႈၵၢင် ၵၢၼ်ၵႄႈလိတ်ႈပၼ်ႁႃ တင်းသွင်ၸုမ်း ဝႃႈၼႆ။

မိူဝ်ႈဝၼ်းတီႈ 28/04/2025 ၼၼ်ႉ သိုၵ်းၵဝ်ႈၵၢင်ႉ ထူဝ်းသိုၵ်းၽိုတ်ႉၶဝ်ႈ ၵႂႃႇၼႂ်းၼႃႈတီႈ သိုၵ်းတႆး SSPP ၵုမ်းၵမ်ဝႆႉ တၢင်းထုင်ႉၼမ်ႉမၼၼ်ႉသေ တင်းသွင်ၾၢႆႇ လႆႈယိုဝ်းၵၼ် ၼႂ်းၸႄႈဝဵင်းသီႇပေႃႉမႃး လၢႆပွၵ်ႈလၢႆၵမ်းယူႇ။

တႅမ်ႈ – ၽူၺ်းၼုမ်ႇ