ပျီႇတူႉၸိတ်ႉပဢူဝ်း PNO ႁၢမ်ႈၸဝ်ႈႁိူဝ်းၵႂႃႇမႃးၼႂ်းထုင်ႉၸၢမ်ၵႃးယဝ်ႉသေဢမ်ႇၵႃး ၸႂ်ႉၵူၼ်းဝၢၼ်ႈသူင်ႇ ပၼ်ႁေႃႇၶဝ်ႈၸွၵ်းၽၵ်းၶဝ်ၵူႈဝၼ်း တီႈၼႂ်းထုင်ႉၸၢမ်ၵႃး ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း။
တႄႇႁၢင်လိူၼ်ၵျႃၼ်ႊၼႆႉမႃး ၸုမ်းပျီႇတူႉၸိတ်ႉပဢူဝ်း PNO ဢမ်ႇမီးလွင်ႈတၢင်းသင်သေ ႁၢမ်ႈၸဝ်ႈႁိူဝ်း ၸိူဝ်းဢၼ်မီးတီႈတၢင်းၾၢႆႇတူၵ်းဝၢၼ်ႈၸၢမ်ၵႃး ၵႂႃႇမႃးႁႃၵိၼ်လဵင်ႉတွင်ႉၼႂ်းၼွင်လႄႈ ႁဵတ်းႁႂ်ႈၵူၼ်းမိူင်း ထူပ်းတၢင်းယၢပ်ႇၽိုတ်ႇ။
ၵူၼ်းပိုၼ်ႉတီႈ ဝၢၼ်ႈတႃႇယႃႇၵုင်း လၢတ်ႈတီႈၽူႈတွႆႇႁွၵ်ႈဝႃႈ -“ႁိူဝ်းၸၢၵ်ႈၵေႃႈ ဢမ်ႇလႆႈ၊ ႁိူဝ်းဢၼ်ဢဝ်မိုဝ်းၽၢႆးၵေႃႈ ဢမ်ႇလႆႈ၊ ၵူၼ်းၵႂႃႇႁႃပႃႁႃၵိၼ်လဵင်ႉတွင်ႉၸိူဝ်းၼၼ်ႉၵေႃႈ ဢမ်ႇပၼ်ၵႂႃႇ၊ ၵွပ်ႈသင်လႄႈ ဢမ်ႇပၼ်ၵႂႃႇ ဢၼ်ဝႃႈၼၼ်ႉတႄႉ ဢမ်ႇလႆႈႁူႉၸွမ်းၶႃႈ ၶဝ်ႁၢမ်ႈဝႆႉဢေႃႈ၊ တေႃႈလဵဝ် ပေႃးဢမ်ႇယူႇလီ ၵိၼ်ဝၢၼ် ဢမ်ႇၸၢင်ႈၵႂႃႇယူတ်းယႃတူဝ် တီႈတၢင်းၸၢမ်ၵႃးယဝ်ႉ၊ မိူဝ်ႈတႄႇမၼ်းၶဝ်ဝႃႈ တေဢိုတ်းဝႆႉ 15 ဝၼ်း။ ၵူၺ်းၵႃႈ တေႃႇထိုင်ယၢမ်းလဵဝ်ၵေႃႈ ၶဝ်ပႆႇပၼ်ၵႂႃႇမႃးၶႃႈ”- ဝႃႈၼႆ။
ယၢမ်းလဵဝ် ၵူၼ်းဝၢၼ်ႈဢၼ်မီးၾၢႆႇတူၵ်းထုင်ႉၸၢမ်ၵႃး ၸိူဝ်းၼၼ်ႉ ပေႃးဝႃႈ ဢမ်ႇယူႇလီၵိၼ်ဝၢၼ်၊ ပဵၼ် ၽေးၵိုင်ႉၵၢင်ႉ မႃးၼႆၸိုင် တေၵႂႃႇႁႃမေႃယႃ တီႈထုင်ႉၸၢမ်ၵႃးၼၼ်ႉ ၵႂႃႇတၢင်းၼမ်ႉ (တၢင်းႁိူဝ်း) တႄႉ ဢမ်ႇလႆႈ။ ၵူၺ်းၵႃႈ သဵၼ်ႈတၢင်းရူတ်ႉၵႃးတႄႉ ၵႂႃႇလႆႈယူႇသေတႃႉ ၼၼ်ႉသမ်ႉ ယွၼ်ႉသဵၼ်ႈတႃႈသၢႆ တၢင်းယၢပ်ႇၽိုတ်ႇဝႆႉ ဝႃႈၼႆ။
ၵူၼ်းၸၢႆး ၽူႈၸွႆႈထႅမ်ၵူၼ်းပိုၼ်ႉတီႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးလုၵ်ႉဢဝ်တီႈဝၢၼ်ႈ တႃႇယႃႇၵုင်း ၵႂႃႇၸၢမ်ၵႃးၸိုင် ပေႃးဢဝ်ႁိူဝ်းၵႂႃႇ တေႁိုင်15 မိၼိတ်ႉၵူၺ်း။ ယွၼ်ႉၸုမ်းပျီႇတူႉၸိတ်ႉပ ဢူဝ်း PNO ၶဝ်ႁၢမ်ႈ ဢမ်ႇပၼ်ၵႂႃႇတၢင်းႁိူဝ်းလႄႈ ယၢမ်းလဵဝ် လႆႈဢဝ်ရူတ်ႉၶိူင်ႈ ပၼ်လဵပ်ႈၵႂႃႇတၢင်းဝၢၼ်ႈၼမ်ႉပၼ်ႇ (နန်းပန်) ၊ ၼွင်တရႃး ၸိူဝ်းၼႆႉ ဢဝ် တေႁိုင်မွၵ်ႈ 1 ၸူဝ်ႈမူင်းၼႆႉ သဵၼ်ႈတၢင်းၵေႃႈ ဢမ်ႇလီ ႁိုင်ၵေႃႈႁိုင်ဢေႃႈ ယၢပ်ႇၸႂ်ၼႃႇ”- ဝႃႈၼႆ။
လိူဝ်ၼၼ်ႉ ၸုမ်းပျီႇတူႉၸိတ်ႉပဢူဝ်း ဢၼ်ယူႇဝႆႉတီႈႁူင်းႁဵၼ်းၼႂ်းဝၢၼ်ႈၸၢမ်ၵႃး မီးဢဵၼ်ႁႅင်း 20 ပၢႆ ၼၼ်ႉၵေႃႈ ၶၢၼ်းၵူၼ်းဝၢၼ်ႈ ႁုင်ၶဝ်ႈၽၵ်းသူင်ႇပၼ် ၵူႈဝၼ်းသေဢမ်ႇၵႃး လႆႈပၼ်ပႃးငိုၼ်း တႃႇၵမ်ႉၸွႆႈ သိုၵ်းမၢၼ်ႈ ၵူႈလိူၼ်ထႅင်ႈ – ၵူၼ်းပိုၼ်ႉတီႈလၢတ်ႈ။
“ႁဝ်းၶႃႈ လႆႈသူင်ႇပၼ်ႁေႃႇၶဝ်ႈၼႆႉ မီးၸမ် 4 လိူၼ်ယဝ်ႉ၊ လႆႈသူင်ႇပၼ်ၵူႈဝၼ်း ၼိုင်ႈႁိူၼ်းၼိုင်ႈႁေႃႇ ၊ ငိုၼ်းတႃႇၵမ်ႉၸွႆႈသိုၵ်းမၢၼ်ႈၵေႃႈ သမ်ႉလႆႈပၼ်ထႅင်ႈ ၼိုင်ႈလိူၼ်ၼိုင်ႈမိုၼ်ႇ ၼၼ်ႉၵေႃႈ ဢမ်ႇပၼ်ဢမ်ႇ လႆႈ”။
ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈၵပ်းသိုပ်ႇၸူး ၽူႈၶၢၼ်ပၢၵ်ႇ ပျီႇတူႉၸိတ်ႉပဢူဝ်း PNO ၵေႃႈ ဢမ်ႇလႆႈ။
တႄႇႁူဝ်လိူၼ်ၵျုၼ်ႊၼႆႉမႃး ယွၼ်ႉၾူၼ်တူၵ်းဢမ်ႇထၢတ်ႇ ၼမ်ႉၵိုင်ႉၵၢင်ႉၶိုၼ်ႈလႄႈ ႁဵတ်းႁႂ်ႈသူၼ်ၶဝ်ႈ ၵၢပ်ႇၵူၼ်းမိူင်းထုင်ႉၸၢမ်ၵႃး လူႉသုမ်းၼပ်ႉႁူဝ်ပၢၵ်ႇသႅၼ်ပျႃး – ၵူၼ်းပိုၼ်ႉတီႈလၢတ်ႈ။
တႄႇဢဝ် ဝၼ်းတီႈ 18/07/2024 ၼၼ်ႉမႃး သိုၵ်းမၢၼ်ႈ ယိုတ်းမိူင်းတင်း ၸုမ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း တီႈထုင်ႉၸၢမ်ၵႃးသေ ႁဵတ်းႁႂ်ႈတုမ်ႉတိူဝ်ႉၵူၼ်းမိူင်း 2,000 ပၢႆ လႆႈငိူင်ႉပၢႆႈ ၽေးသိုၵ်း၊ တုမ်ႉတိူဝ်ႉၵူၼ်းမိူင်း ဢမ်ႇၸၢင်ႈႁႃၵိၼ်လဵင်ႉတွင်ႉလႆႈလီလီ။ ႁဵတ်းႁႂ်ႈၸုမ်းပျီႇတူႉၸိတ်ႉပ ဢူဝ်း PNO ၶဝ် လႆႈတိုဝ်ႉတၢင်းၶဝ်ႈဢဝ်တီႈယူႇၼႂ်းဝၢၼ်ႈသေ ၼႄၶေႃႈဢၢင်ႈလွင်ႈၼိုင်ႈယဝ်ႉ လွင်ႈၼိုင်ႈ ၵဵပ်းၶွၼ်ႇၵူၼ်းမိူင်း ၼႂ်းထုင်ႉၸၢမ်ၵႃးမႃးၶိူဝ်းယႂ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ