ဝၼ်းတီႈ 15/06/2025 ယၢမ်းႁူဝ်ၶမ်ႈ 5 မူင်းၶိုင်ႈ တေႃႇထိုင် 7 မူင်းၵၢင်ၶမ်ႈ သိုၵ်းတႆး SSPP တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် တီႈၸဵင်ႇၸၢၼ်းဝၼ်းဢွၵ်ႇ ဝၢၼ်ႈႁူးသူၼ် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

သဵင်ၵွင်ႈတႅၵ်ႇၼႂ်းၸႄႈဝဵင်းၵျွၵ်ႉမႄးၼႆႉ ပဵၼ်ယွၼ်ႉၾၢႆႇသိုၵ်းတဢၢင်း TNLA ထူဝ်းသိုၵ်းၽိုတ်ႉၶဝ်ႈမႃး ၸူးၼႂ်းၼႃႈတီႈသိုၵ်းတႆး SSPP လႄႈတင်းသွင်ၾၢႆႇ ၸင်ႇလႆႈပဵၼ်ပၢင်တိုၵ်းၵၼ်ၼႆ ၵူၼ်းၼႂ်းပိုၼ်ႉတီႈ ၸႄႈဝဵင်းၵျွၵ်ႉမႄး ၵေႃႉႁူႉႁၼ်ၸွမ်း ငဝ်းလၢႆးပၢင်တိုၵ်း လၢတ်ႈတီႈၽူႈတွႆႇႁွၵ်ႈၼင်ႇၼႆ။

“သိုၵ်းလွႆၼႆႉၶိုၼ်ႈၸူးသိုၵ်းတႆး 3 ၸုပ်ႈ။ ၾၢႆႇသိုၵ်းတႆးယိုဝ်းၶိုၼ်းလႄႈ သိုၵ်းလွႆ ၸင်ႇလႆႈထွႆလူင်းၵႂႃႇယူႇ ဝႆႉတီႈၵျွင်းပိင်ႇၺႃႇ ၼႂ်းဝၢၼ်ႈႁူးသူၼ်။ ႁႅင်းၵူၼ်းၾၢႆႇသိုၵ်းလွႆၼႆႉ တေမီးမွၵ်ႈ 80 ၵေႃႉ၊ သိုၵ်းလွႆၼႆႉ ၸႂ်ႉသိုၵ်းတႆးၶဝ်ၶၢႆႉတပ်ႉ တီႈလွႆၽၵ်းၶိူဝ်းၸိူၵ်ႈၼၼ်ႉ မီးမႃး 3 ဝၼ်းယဝ်ႉ”။

ပၢင်တိုၵ်းသိုၵ်းတႆး SSPP လႄႈ သိုၵ်းတဢၢင်း TNLA  ၼႂ်းၸႄႈဝဵင်းၵျွၵ်ႉမႄး ဝၢၼ်ႈႁူးသူၼ် ပွၵ်ႈၼႆႉ လႆႈႁူႉဝႃႈ မီးၾၢႆႇသိုၵ်းတဢၢင်း တၢႆ 3 ၵေႃႉၼႆသေတႃႉ ယင်းပႆႇယိုၼ်ယၼ်လႆႈ ပဵၼ်တၢင်းၵၢၼ်တႄႉတႄႉ ႁၢၼ်ႉတေႃႇထိုင် မိူဝ်ႈၼႆႉ ဝၼ်းတီႈ 16/06/2025 ယၢမ်းၵၢင်ၼႂ်ၸဝ်ႉ တင်းသွင်ၾၢႆႇတိုၵ်ႉၶဵင်ႈၶႅင်ၵၢၼ် သိုၵ်းၵၼ်ယူႇၼႆ – ၵူၼ်းၼႂ်းပိုၼ်ႉတီႈ ၸႄႈဝဵင်းၵျွၵ်ႉမႄး လၢတ်ႈၼႄၼင်ႇၼႆ။

ပိူဝ်ႈတႃႇယိုၼ်ယၼ်လႆႈ လွင်ႈမၢတ်ႇၸဵပ်းလူႉတၢႆ ၼႂ်းပၢင်တိုၵ်းၸႄႈဝဵင်းၵျွၵ်ႉမႄးၼႆႉ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇ ၽူႈၶၢၼ်ပၢၵ်ႇ သိုၵ်းတဢၢင်း TNLA လူၺ်းယေႇဢူး ယူႇသေတႃႉ ဢမ်ႇတုမ်ႉတွပ်ႇသင်မႃးၶိုၼ်။ ၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇသိုၵ်းတႆး SSPP ၸၢႆးၽူင်းႁၢၼ်ၵေႃႈ ဢိုတ်းၾူၼ်းဝႆႉ။  

ဢိူင်ႇဝၢၼ်ႈႁူးသူၼ် ၼႂ်းၸႄႈဝဵင်းၵျွၵ်ႉမႄးၼႆႉ ယၢမ်ႈပဵၼ်ဢွင်ႈတီႈ ဢၼ်သိုၵ်းတႆး RCSS/SSA ၊ သိုၵ်းတႆး SSPP/SSA တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်း မိူဝ်ႈပီ 2021 ။

မိူဝ်ႈပီ 2024 ပူၼ်ႉမႃး လိူၼ်ၵျူႊလၢႆႊ ဝူင်ႈတီႈၼိုင်ႈၼၼ်ႉ သိုၵ်းတႆး SSPP/SSA တင်း သိုၵ်းတဢၢင်း TNLA ယၢမ်ႈပဵၼ်ပၢင်တိုၵ်းၵၼ် ၼႂ်းဢိူင်ႇၼွင်ပိင် ၸႄႈဝဵင်းၵျွၵ်ႉမႄးလႄႈ ဝၢၼ်ႈၼမ်ႉဢုၼ်ႇ၊ ဝၢၼ်ႈသူၼ်ဢွႆႈ ၸႄႈဝဵင်းသီႇပေႃႉသေ တင်းသွင်ၾၢႆႇ ဢွၵ်ႇလိၵ်ႈတုၵ်းယွၼ်းႁႂ်ႈ ၶွမ်ႊမတီႊ ဢုပ်ႇဢူဝ်းၵၢၼ်မိူင်း မိူင်းႁူမ်ႈတုမ် FPNCC ဢၼ်ၸုမ်းသိုၵ်းဝႃႉ UWSA ဢွၼ်ႁူဝ်ဝႆႉ ၸွႆႈၶဝ်ႈၵႄႈလိတ်ႈပၼ်ႁႃၵႂႃႇ။

တႅမ်ႈ – ၽူၺ်းၼုမ်ႇ