ပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း ၼႂ်းၸႄႈဝဵင်းၼွင်ၶဵဝ် ယင်းပႆႇယဝ်ႉတူဝ်ႈ ပႆႇလႆႈႁူႉတႅတ်ႈတေႃး ဝႃႈၽႂ်ပေႉၽႂ်သုမ်းၼႆ ၽွင်းတိုၵ်ႉပဵၼ်ၶၢဝ်း တင်းသွင်ၾၢႆႇႁိမ်ၼႃႈတီႈၵၼ်သေ ယိုဝ်းၵၼ်ႁၢဝ်ႈႁႅင်းယူႇၼၼ်ႉ ၾၢႆႇသိုၵ်းတဢၢင်း ပိုၼ်ၽၢဝ်ႇဢွၵ်ႇဝႃႈ တႅပ်းတတ်းတႃႇၽွတ်ႈႁႅၼ်း ၶွမ်ႊမတီႊၸၼ်ႉၵၢၼ်မိူင်း သုင်သုတ်း ဝႃႈၼႆ။

ၼႂ်းၶွမ်ႊမတီႊ တိူင်ႇပၢင်ႇလွင်ႈၵၢၼ်မိူင်းတဢၢင်း (TPCC) ဢၼ်ၽွတ်ႈႁႅၼ်းမႃး မိူဝ်ႈဝၼ်းတီႈ 24/03/2021 ၼၼ်ႉ ၶဝ်ႈပႃးဝႆႉ ပႃႇတီႇၸိူဝ်ႉၸၢတ်ႈတဢၢင်း (TNP)၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း PSLF/TNLA လႄႈ ၸုမ်းတူင်ႇဝူင်းၵူၼ်းၸၢဝ်းၶိူဝ်းတဢၢင်း (ပလွင်ႈ) ၸဵမ်ၸိူဝ်းၼႆႉ။

မိူဝ်ႈဝၼ်းတီႈ 09/06/2025 ၼႆႉ ၾၢႆႇသိုၵ်းတဢၢင်း ပိုၼ်ၽၢဝ်ႇပဵၼ်တၢင်းၵၢၼ်ဝႃႈ “ၶွမ်ႊမတီႊၼႆႉ ၽွတ်ႈႁႅၼ်းမႃး တႃႇၵုမ်းၵမ် ႁွင်ႈၵၢၼ် ၾၢႆႇဢုပ်ႉပိူင်ႇ၊ ၾၢႆႇၽွင်းငမ်းလႄႈ ၾၢႆႇၸတ်းၵၢၼ်ၾိင်ႈမိူင်း။ ၼႂ်းၼၼ်ႉ ဢဝ်ၽူႈမီးၸၼ်ႉ ၼႂ်းတင်းသၢမ်ၸုမ်း ၶဝ်ႈပႃးဝႆႉ တႃႇ 9 ၵေႃႉသေ ၽွတ်ႈပဵၼ်ၶွမ်ႊမတီႊၸၼ်ႉၵၢၼ်မိူင်းသုင်သုတ်း” ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၽူႈၼမ်းၼႂ်း ၾၢႆႇၶွမ်ႊမတီႊၸၼ်ႉၵၢၼ်မိူင်းသုင်သုတ်း TPCC မၢႆးၼႅင်ႇၵွင်းၸၢၼ်ႇ (မိုင်းနိုင်ဂေါင်ဇာရ်) တွပ်ႇလၢတ်ႈဝႆႉတီႈၽူႈတွႆႇႁွၵ်ႈဝႃႈ -“လမ်ႇလွင်ႈသုတ်းတႄႉ ပိူဝ်ႈတႃႇ ၶွတ်ႇ ၽွတ်ႈလႆႈ ၸုမ်းလူင်ပွင်ၸိုင်ႈ ၼႂ်းၶၢဝ်းတၢင်းႁဵတ်းၵၢၼ်လုၵ်ႉၽိုၼ်ႉၼႆႉ။ ပၼ်ဝႆႉပုၼ်ႈၽွၼ်းတီႈၸုမ်းၼႆႉ ပိူဝ်ႈတႃႇပဵၼ်ၸုမ်းဢၼ်ၵုမ်းထိင်း ႁွင်ႈၵၢၼ်သၢမ်ဢၼ် ၾၢႆႇဢုပ်ႉပိူင်၊ ၾၢႆႇၽွင်းငမ်းလႄႈ ၾၢႆႇပၵ်းပိူင် မၢႆမီႈ (ၾိင်ႈမိူင်း)။ မိူဝ်ႈၼႃႈမႃး တေၶွတ်ႇၽွတ်ႈၸုမ်းသင်ထႅင်ႈၼႆတႄႉၵေႃႈ ယၢမ်းလဵဝ် တိုၵ်ႉလၢတ်ႈယၢပ်ႇဝႆႉယူႇ။ ၵူၺ်းဝူၼ်ႉဝႃႈ ၼႂ်းၶၢဝ်းတၢင်းႁဵတ်းၵၢၼ်လုၵ်ႉၽိုၼ်ႉယူႇၼႆႉ ထုၵ်ႇလီမီး ၸုမ်းလူင်ပွင်ၸိုင်ႈ ယူႇၼႆလႄႈ ၸင်ႇႁၢင်ႈႁႅၼ်းၶွတ်ႇၽွတ်ႈမႃး” – ဝႃႈၼႆ။

ၾၢႆႇၼိုင်ႈၵေႃႈ သိုၵ်းမၢၼ်ႈ ၸႂ်ႉၶိူင်ႈၵွင်ႈလူင်၊ ၶိူင်ႈတရူၼ်ႊ ဢိၵ်ႇပႃး ၶိူင်ႈမိၼ်တိုၵ်းၸိူဝ်းၼႆႉသေ ႁႅၼ်း သိုၵ်းလေႃႇတိုၵ်း တပ်ႉသိုၵ်းတဢၢင်း ၸိူဝ်းယူႇဝႆႉ ၼႂ်းၸႄႈဝဵင်းၼွင်ၶဵဝ် ႁၢဝ်ႈႁႅင်းလႄႈ တႄႇႁူဝ်လိူၼ်ၵျုၼ်ႊၼႆႉမႃး တင်းသွင်ၾၢႆႇ ပဵၼ်ပၢင်တိုၵ်းၵၼ်ႁၢဝ်ႈႁႅင်း။

လူၺ်းယေႇဢူး ၽူႈၶၢၼ်ပၢၵ်ႇ သိုၵ်းတဢၢင်း TNLA လၢတ်ႈၼႄဝႃႈ -“ပၢင်တိုၵ်းၼႆႉ ပဵၼ်ၵၼ်တၢင်း ဝၢၼ်ႈၵၢၼ်ႇၵျီးၼၼ်ႉႁၢဝ်ႈႁႅင်း။ ၼႂ်းငဝ်းလၢႆးယၢမ်းလဵဝ်ၼႆႉ ပႆႇၸၢင်ႈယိုၼ်ယၼ်လႆႈသင်။ မိူဝ်ႈလဵဝ် ပဵၼ်ၽွင်းၾၢႆႇသိုၵ်းမၢၼ်ႈ ႁႅၼ်းသိုၵ်းလေႃႇတိုၵ်းမႃးႁႅင်း။ ၸႂ်ႉၶိူင်ႈၵွင်ႈလူင်ၸိူဝ်းၼႆႉယိုဝ်းမႃးပႃးထႅင်ႈ”- ဝႃႈၼႆ။

ယွၼ်ႉၵိူတ်ႇပဵၼ်ပၢင်တိုၵ်းၶိုၼ်းႁၢဝ်ႈႁႅင်း ႁိမ်းၸမ်ဝဵင်းၼွင်ၶဵဝ်ၶိုၼ်းလႄႈ ၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ်မႆႈၸႂ်တႃႇလွင်ႈႁူမ်ႇလူမ်ႈၸဝ်ႈၵဝ်ႇသေ ငိူင်ႉပၢႆႈပၢင်တိုၵ်းၵႂႃႇသွၼ်ႈယူႇတၢင်း ၸႄႈဝဵင်းၵျွၵ်ႉမႄး ၼပ်ႉႁူဝ်ပၢၵ်ႇ ၼႆယဝ်ႉ။