ဝၼ်းတီႈ 01/06/2025 ယၢမ်းၵၢင်ဝၼ်း 1 မူင်းတေႃႇ 2 မူင်းၶိုင်ႈ ပႃႇတီႇမႂ်ႇသုင်ၸိုင်ႈတႆး SSPP လႄႈ သိုၵ်းၵဝ်ႈၵၢင်ႉ MNDAA ယိုဝ်းၵၼ် ၾၢႆႇတၢင်းဢွၵ်ႇဝၢၼ်ႈၼႃးလႆ ဝၢၼ်ႈၼိူဝ်လႄႈ ဝၢၼ်ႈၼမ်ႉလုၵ်း ႁိမ်းၸဝ်ႈမိူင်းဝၢၼ်ႈၼမ်ႉလုၵ်း ဢိူင်ႇႁၢင်ၼႃး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ဝၢႆးလင် ပၢင်တိုၵ်းၼႂ်းဢိူင်ႇၼမ်ႉမ ယဵၼ်ၵႂႃႇယဝ်ႉ သိုၵ်းတင်းသွင်ၸုမ်း ထိုင်တီႈဝၢၼ်ႈလႂ်ၵေႃႈ ၵိုတ်းဝႆႉ တီႈၼၼ်ႉသေ သိုပ်ႇၽိူမ်ႉဢဵၼ်ႁႅင်းသိုၵ်းဝႆႉႁင်းၽႂ်မၼ်း။ ႁိုင်မႃးၶၢဝ်းတၢင်းၼိုင်ႈလိူၼ် ၽွင်းသိုၵ်းတႆး SSPP တူင်ႉၼိုင်ၵၢၼ်သိုၵ်း လုၵ်ႉတၢင်းဝၢၼ်ႈႁိူၼ်းလွၼ်ႉ တေၵႂႃႇတၢင်းဝၢၼ်ႈပုင်းထုၼ် – ဝၢၼ်ႈၼွင်မွၼ်ၼၼ်ႉ တင်းသွင်ၾၢႆႇ ၸင်ႇလႆႈပဵၼ်ပၢင် တိုၵ်းၵၼ်မႃးၼႆ ၵူၼ်းဝၢၼ်ႈၼႂ်းဢိူင်ႇႁၢင်ၼႃး ၵေႃႉၼိုင်ႈ လၢတ်ႈၼႄၼင်ႇၼႆ။

“ၽွင်းသိုၵ်းတႆး ဢွၵ်ႇဝၢၼ်ႈႁိူၼ်းလွၼ်ႉ လတ်းဝၢၼ်ႈႁၢင်ၼႃး တေၵႂႃႇတၢင်း ဝၢၼ်ႈပုင်းထုၼ် – ဝၢၼ်ႈၼွင် မွၼ် ၼိူဝ်သဵၼ်ႈတၢင်းလူင် ဝဵင်းလိူဝ်ႇ – သီႇပေႃႉ – လႃႈသဵဝ်ႈၼၼ်ႉ သိုၵ်းၵဝ်ႈၵၢင်ႉဝႃႈ ယႃႇႁႂ်ႈတႆႇ သဵၼ်ႈ တၢင်းလူင်ၼႆလႄႈ သိုၵ်းတႆးၵေႃႈ လုၵ်ႉဝၢၼ်ႈႁၢင်ၼႃး ၵႄႈၵၢင်ဝၢၼ်ႈႁိူၼ်းလွၼ်ႉ (မွၵ်ႇလွၼ်ႉ)ၼႆႉ ၸင်ႇလတ်း ၵႂႃႇ သဵၼ်ႈတၢင်းထိူၼ်ႇဢဝ်။ ၶိုၼ်ႈၵႂႃႇတၢင်းၽၢၵ်ႈၼိူဝ်ၸဝ်ႈမိူင်းႁၢင်ၼႃး ၵႂႃႇပွင်ႇသဵၼ်ႈတၢင်း  ၼႃးလႆလႄႈ ၼမ်ႉလုၵ်းၼႆႉ ပဵၼ်သဵၼ်ႈတၢင်းလိၼ်သဵၼ်ႈၼိုင်ႈ။ သဵၼ်ႈၼႆႉၵေႃႈၵႂႃႇပွင်ႇ သဵၼ်ႈတၢင်းလူင် သီႇပေႃႉ – လႃႈသဵဝ်ႈၵူၺ်းၼင်ႇၵဝ်ႇ။ ႁဵတ်းၼႆႁႄ ၾၢႆႇသိုၵ်းၵဝ်ႈၵၢင်ႉသမ်ႉ ၶီႇရူတ်ႉၶိူင်ႈ လမ်းၸွမ်းတၢင်းလင် သိုၵ်းတႆးလႄႈ သိုၵ်းတႆးၵေႃႈ ၸင်ႇၵႂႃႇဢဝ်တီႈယူႇလီလီႁႄ ယိုဝ်းပၼ် ၶိုၼ်းၼၼ်ႉၼႃႇ”။

ထိုင်မႃးမိူဝ်ႈၼႆႉ ဝၼ်းတီႈ 02/06/2025 တႄႉ ဢမ်ႇလႆႈငိၼ်းသဵင်ၵွင်ႈတႅၵ်ႇ ၊ တင်းသွင်ၾၢႆႇယဵၼ်ဝႆႉယူႇသေ ၾၢႆႇသိုၵ်းၵဝ်ႈၵၢင်ႉ ဢမ်ႇပၼ်ၵူၼ်းဝၢၼ်ႈႁၢင်ၼႃး – ႁိူၼ်းလွၼ်ႉ ၵႂႃႇမႃးႁႃၵၼ်ၼႆ ၵူၼ်းပိုၼ်ႉတီႈ ဢၼ်ယူႇဝႆႉ ၼႂ်းၼႃႈတီႈပဵၼ်ပၢင်တိုၵ်းၼၼ်ႉ လၢတ်ႈၼႄၼင်ႇၼႆ။

“မိူဝ်ႈဝႃးၼႆႉ ၶဝ်ယိုဝ်းၵၼ် ၾၢႆႇသိုၵ်းၵဝ်ႈၵၢင်ႉ တၢႆၵႂႃႇ 8 ၵေႃႉၼႆႉ။ ၾၢႆႇသိုၵ်းတႆးတႄႉ ဢမ်ႇမီးလွင်ႈမၢတ်ႇ ၸဵပ်းလူႉ တၢႆသင်။ သိုၵ်းၵဝ်ႈၵၢင်ႉ ဢၼ်ၵိုင်ႉၵၢင်ႉထႅမ်ႁႅင်းသိုၵ်း လုၵ်ႉတၢင်းလႃႈသဵဝ်ႈမႃး ၵႃးဢွၼ်ႇ 4 လမ်း ၶဝ်ႈမႃးတၢင်းႁၢင်ၼႃးၼၼ်ႉ ၶိုၼ်းဢွၵ်ႇမိူဝ်းၵႂႃႇတၢင်းၼွင်မွၼ်ၶိုၼ်း ၶမ်ႈဝႃး ဝၼ်းတီႈ 01/06/2025 ႁႄ ဢဝ်ယဵၼ်ၵႂႃႇဢေႃႈ”။

ယၢမ်းလဵဝ် ၵူၼ်းဝၢၼ်ႈၼမ်ႉလုၵ်းလႄႈ ၼႃးလႆ ၸိူဝ်းပဵၼ်ၵူၼ်းထဝ်ႈၵူၼ်းၵႄႇ မႄႈလုၵ်ႈဢွၼ်ႇလႄႈ လုၵ်ႈဢွၼ်ႇ ၸိူဝ်းၼႆႉ လႆႈငိူင်ႉပၢႆႈဢွၵ်ႇဝၢၼ်ႈသေ ၵႂႃႇသေႃႉယူႇဝႆႉၸွမ်းဝၢၼ်ႈပီႈဝၢၼ်ႈၼွင်ႉ ဢွင်ႈတီႈ ဢမ်ႇပဵၼ်ပၢင်တိုၵ်းၼၼ်ႉ။

လႆႈႁူႉဝႃႈ တွၼ်ႈတႃႇတေၵႄႈလိတ်ႈပၼ်ႁႃ ၵႄႈၵၢင်သိုၵ်းတႆး SSPP လႄႈ သိုၵ်းၵဝ်ႈၵၢင်ႉ MNDAA ဢၼ်ပဵၼ်ယူႇ ၼႂ်းၸႄႈဝဵင်းသီႇပေႃႉတင်း ၸႄႈဝဵင်းလႃႈသဵဝ်ႈၼႆႉ ၽူႈယႂ်ႇၵူၼ်းလူင် ၼႂ်းတပ်ႉသိုၵ်းတင်းသွင်ၾၢႆႇ ၵႂႃႇႁူပ်ႉဢုပ်ႇဢူဝ်းၵၼ်မႃး တီႈဝဵင်းပၢင်သၢင်း ဢွင်ႈတီႈတပ်ႉသိုၵ်းဝႃႉ (UWSA) ၵုမ်းၵမ်သေတႃႉ ဢမ်ႇလႆႈၶေႃႈတူၵ်းလူင်းသင်ၵၼ်မႃး ႁႂ်ႈပဵၼ်တၢင်းၵၢၼ်တႄႉတႄႉ ဝႃႈၼႆ။

တႅမ်ႈ – ၼၢင်းၽူၺ်းၼုမ်ႇ