မၢႆတွင်း ဝၼ်းလုၵ်ႉၽိုၼ်ႉ ၶွပ်ႈတဵမ် 67 ပီၼႆႉသေ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး ၸတ်းႁဵတ်းပၢင်ၵႅဝ်ႈ တီႈငဝ်ႈငုၼ်းလွႆတႆးလႅင်း၊ လွႆၵေႃႇဝၼ်းလႄႈ ၼႂ်းၼႃႈတီႈၽွင်းငမ်း မၢႆ 3 ဝဵင်းၼမ်ႉၸၢင်။

ၸွမ်သိုၵ်းလူင် ယွတ်ႈသိုၵ်း လၢတ်ႈၼႂ်းဝၼ်းလုၵ်ႉၽိုၼ်ႉၸိုင်ႈတႆး ၶွပ်ႈတဵမ် 67 ပီၼၼ်ႉဝႃႈ -“ၼႂ်းၶၢဝ်းတၢင်းလုၵ်ႉၽိုၼ်ႉ 67 ပီၼႆႉ လႆႈထူပ်းပၼ်ႁႃၵၢၼ်မိူင်းၾၢႆႇၼွၵ်ႈၾၢႆႇၼႂ်း လၢႆလၢႆလွင်ႈလႄႈ ၶေႃႈႁၼ်ထိုင်ဢမ်ႇမိူၼ်ၵၼ်သေ ၸုမ်းလုၵ်ႉၽိုၼ်ႉတႆး လႆႈတႅၵ်ႇၵၼ်မႃးၵေႃႈမီး။ ၸုမ်းလုၵ်ႉၽိုၼ်ႉ မၢင်ၸုမ်းသမ်ႉ ၸဝ်ႈပၢႆးမၢၵ်ႈမီးၶဝ် ယူႇၾၢႆႇလင်သေ ႁဵတ်းၵိၼ် ၵၢၼ်ပၢႆးမၢၵ်ႈမီးသုၼ်ႇတူဝ် ၵေႃႈမီး။ ယွၼ်ႉၵူၼ်းမိူင်းတႆးႁဝ်း ပၢႆးပၺ်ႇၺႃႇ တင်းပိုၼ်ႉႁူႉပႆႇတဵမ်ထူၼ်ႈလႄႈ လႆႈထုၵ်ႇၽူႈၶဵၼ် သူၼ်းတုမ်လွၵ်ႇလႅၼ်သေ ၵႂႃႇပဵၼ်ၶိူင်ႈမိုဝ်းပိူၼ်ႈ ၵေႃႈ မီးတင်းၼမ်။ ၸိူဝ်းၼႆႉ ပဵၼ်လွင်ႈယူပ်ႈ ယွမ်းလၢႆးလုၵ်ႉၽိုၼ်ႉတႆးႁဝ်းလႄႈ ႁဵတ်းႁႂ်ႈလၢႆးလုၵ်ႉၽိုၼ်ႉတႆးႁဝ်း ဢမ်ႇပႆႇၸၢင်ႈထိုင်ယိူင်းမၢႆလူင်လႆႈ”- ဝႃႈၼႆ။

ၵွပ်ႈၼႆ ၵူၼ်းမိူင်းတႆးလႄႈ ၽူႈႁၵ်ႉၸၢတ်ႈ လီလဵပ်ႈႁဵၼ်းႁူႉသေ မူၼ်ႉမႄးတူဝ်ၸႂ် ပၢႆးဝူၼ်ႉၵၢၼ်ငၢၼ်း ၊ တႃႇႁႂ်ႈလၢႆးလုၵ်ႉၽိုၼ်ႉႁႂ်ႈၸဵဝ်းဢွင်ႇမၢၼ်ထိုင်ယိူင်းမၢႆလႄႈ ပူၼ်ႉၸၢတ်ႈပၢၼ်ၶီႈၶႃႈၼၼ်ႉ ႁႂ်ႈၵူၼ်းမိူင်းတႆးတင်းသဵင်ႈ ဝႆႉၸႂ်ႁတ်းႁၢၼ် ႁႂ်ႈမုင်ႈယိူင်းႁၼ်ထိုင်ၸိူဝ်ႉၸၢတ်ႈဝၢၼ်ႈမိူင်း ၽႃသႃ၊ သႃသၼႃသေ ၶဝ်ႈႁူမ်ႈႁဵတ်းသၢင်ႈၸွမ်းလၢႆးလုၵ်ႉၽိုၼ်ႉသေၵမ်း။ ႁႂ်ႈႁူမ်ႈၵၼ်ၶတ်းၸႂ် ဢဝ်ၸႂ်သႂ်ႇၼိူဝ်လၢႆးလုၵ်ႉၽိုၼ်ႉ ႁႂ်ႈပူတ်းပွႆႇလႆႈၸၢတ်ႈပၢၼ်ၶီႈၶႃႈသေၵမ်း – တိုၵ်းသူၼ်းၵႂႃႇၼင်ႇၼႆ။

ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP ၵေႃႈ ၸတ်းႁဵတ်းပၢင်ၵႅဝ်ႈတီႈငဝ်ႈငုၼ်းဝၢၼ်ႈ ႁႆး။ မီးၽူႈယႂ်ႇၵူၼ်းလူင် ၵေႃႇမတီႇငဝ်ႈငုၼ်း၊ ၾၢႆႇတပ်ႉ၊ ၾၢႆႇဢုပ်ႉပိူင်ႇ ၊ ၵူႈတပ်ႉႁွင်ႈၵၢၼ် ၊ ပေႃႈမႄႈၵူၼ်းမိူင်း ႁူမ်ႈႁႅင်းၵူၼ်း (1,500) ပၢႆ ၶဝ်ႈႁူမ်ႈ။

ၸွမ်သိုၵ်းလူင် သိူဝ်ထႅၼ်ႈ မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်လႄႈ ၶူၼ်ႉၶႆႈၼႄ ပိုၼ်းဝၼ်းလၢႆး လုၵ်ႉၽိုၼ်ႉယိပ်းၵွင်ႈၵၢင်ႇၸိုင်ႈတႆး ၊ ပဵၼ်ၵၢပ်ႈပၢၼ်ၵူၼ်းၼုမ်ႇလႅတ်းသႅဝ်း တူင်ႉတိုၼ်ႇလႅတ်း ၽၢႆၼႆႉ ၸုမ်းၽူႈဢွၼ်ႁူဝ်တင်းသဵင်ႈ ယႃႇပေဢွၼ်ႁူဝ်ၽိတ်း၊ ႁႂ်ႈမေႃဢွၼ်ႁူဝ်ၵူၼ်းၼုမ်ႇသႅၼ်း ႁုၼ်ႈမႂ်ႇၸိူဝ်းၼႆႉ ထုၵ်ႇမႅၼ်ႈ ဢွၼ်ပႆၸွမ်းသဵၼ်ႈတၢင်းမၢၼ်ႇမႅၼ်ႈသေၵမ်းၼႆ – ၼႃႈလိၵ်ႈၶၢဝ်ႇ SSPP Info ၼၼ်ႉ တႅမ်ႈတၢင်ႇဝႆႉၼင်ႇၼႆ။