သိုၵ်းမၢၼ်ႈ ယိုတ်းမိူင်းတင်း ပျီႇတူႉၸိတ်ႉပဢူဝ်း PNO ၶႃႈႁႅမ်တၢႆ ထဝ်ႈၸၢႆး ၵေႃႉၼိုင်ႈ တီႈဝဵင်းယွင်ႁူၺ်ႈ ယဝ်ႉၵေႃႈ ဢဝ်ၾႆးၽဝ်ႁိူၼ်းယေးၵူၼ်းဝၢၼ်ႈထႅင်ႈ 40 လင်ပၢႆ။

ပူၼ်ႉမႃး ဝၼ်းတီႈ 09/05/2025 ယၢမ်းဝၢႆးဝၼ်း သိုၵ်းမၢၼ်ႈ ၵႂႃႇတီႉၺွပ်းဢဝ် လုင်းၸိင်း ဢႃယု 54 ပီ ဢၼ်ၼွၼ်းပႂ်ႉႁႆႈ တၢင်းၼွၵ်ႈဝၢၼ်ႈၸၢင်ႈၸွႆႉ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ၺႃးသိုၵ်းၶဝ် ဢဝ်မိတ်ႈပၢတ်ႇၶေႃးတၢႆ ယဝ်ႉၵေႃႈ ဢဝ်ငိုၼ်းၵႂႃႇထႅင်ႈ 9,700,000 ပျႃးၼႆ – ယူႇတီႈ ၵဝ်ႉငဝ်ႈသုၼ်ႇလႆႈ ၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆးဝႆႉၼင်ႇၼႆ။

“မိူဝ်ႈဝၼ်းတီႈ 9 ယၢမ်းၵၢင်ၼႂ်ၸဝ်ႉၼၼ်ႉ သိုၵ်းမၢၼ်ႈတင်း PNO ႁွတ်ႈၽႅဝ်ၵႂႃႇတီႈဝၢၼ်ႈၸၢင်ႈၸွႆႉသေ ဢဝ်ၾႆးၸုတ်ႇႁိူၼ်းၵူၼ်းဝၢၼ်ႈ 20 လင်ပၢႆ။ ထိုင်မႃး ယၢမ်းဝၢႆးဝၼ်း သိုၵ်းမၢၼ်ႈၼႆႉ ၵႂႃႇတီႉမတ်ႉ လုင်း ၸိင်း ဢႃယု 54 ဢၼ်ပႂ်ႉဝႆႉတီႈႁႆႈ တၢင်းၼွၵ်ႈဝၢၼ်ႈၼၼ်ႉသေ ဢဝ်မိတ်ႈပၢတ်ႇၶေႃႈတၢႆ ယဝ်ႉၵေႃႈ ဢဝ် ငိုၼ်းၵႂႃႇထႅင်ႈ”- ဝႃႈၼႆ။

တႄႇဢဝ် ဝၼ်းတီႈ 06-13/05/2025 ၼႆႉ သိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ဢဝ်ၾႆး ၸုတ်ႇၽဝ်ႁိူၼ်းၵူၼ်းဝၢၼ်ႈ 40 လင်ပၢႆ ၼႂ်းဝၢၼ်ႈၸၢင်ႈၸွႆႉ လိူဝ်ၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ် ပွႆႇ မၢၵ်ႇၸမ်ဝၢၼ်ႈထႅင်ႈ တိူဝ်ႉၺႃးဝတ်ႉ/ ၵျွင်းလႄႈ ႁိူၼ်းၵူၼ်းဝၢၼ်ႈလူႉၵွႆထႅင်ႈ 3 လင်။

ဝၢၼ်ႈၸၢင်ႈၸွႆႉၼႆႉ တင်းမူတ်းမီးလင်ႁိူၼ်း 80 ပၢႆ မီးၾၢႆႇၸၢၼ်းဝဵင်းယွင်ႁူၺ်ႈ ယၢၼ်ဝဵင်း 66 ၵီႊလူဝ်ႊ မႄႊတိူဝ်ႊ။

ပူၼ်ႉမႃး မိူဝ်ႈလိူၼ်ၵျႅၼ်ႊၼိဝ်ႊရီႊ 2024 ၼၼ်ႉၵေႃႈ သိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ၶဝ်ႈၵႂႃႇၼႂ်းဝၢၼ်ႈၸၢင်ႈၸွႆႉသေ သွၵ်ႈတဝ်ဢဝ်ၶူဝ်းႁိူၼ်းယေးၵူၼ်းဝၢၼ်ႈ ႁဵတ်းႁႂ်ႈၵူၼ်းဝၢၼ်ႈတူၵ်းၸႂ်ၵူဝ် ႁႄ ဢွၼ်ၵၼ်တိုၼ်ႇပၢႆႈ။ တင်ႈတႄႇၼၼ်ႉမႃး ၼႂ်းဝၢၼ်ႈဢမ်ႇပေႃးမီးၽႂ်ႁတ်းယူႇ ၵူၺ်းမီးၵူၼ်းဝၢၼ်ႈ ၵမ်ႈၽွင်ႈ လွမ်ၵႂႃႇၸႂ်းႁႆႈၼႃး ဢၼ်မီးႁိမ်းၸမ်ၼၼ်ႉၵူၺ်း – ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး SHRF ဢွၵ်ႇဝႆႉၼင်ႇၼႆ။