ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈၵႂႃႇ ၼႂ်းပၢင်ၵုမ် ဢၼ်ၸတ်းႁဵတ်းၵႂႃႇ တီႈၼေႇပျီႇတေႃႇ ၼႂ်း ဝၼ်းတီႈ 19/05/2025 ယၢမ်းၵၢင်ၼႂ်ၼၼ်ႉဝႃႈ – မိူဝ်ႈပီ 2015 ပၢၼ်လူင်ပွင်ၸိုင်ႈၼူၵ်ႉယုင်း NLD ၼၼ်ႉ ယူႇတီႈတပ်ႉသိုၵ်းမၢၼ်ႈ ပၼ်လွင်ႈႁူမ်ႈမိုဝ်းႁဵတ်းသၢင်ႈမႃး တဵမ်တီႈယူႇသေတႃႉ ၼႂ်းငဝ်းလၢႆးလမ်ႇလွင်ႈၼၼ်ႉ ဢမ်ႇႁွင်ႉႁဵတ်းပၢင်ၵုမ် ၶွင်ႇသီႇၾၢႆႇ ႁူမ်ႇလူမ်ႈလႄႈ ၾၢႆႇၵၢၼ်ၵႅတ်ႇၶႄႁႄႉၵင်ႈမႃး ဝႃႈၼႆ။

လိူဝ်ၼၼ်ႉ ယူႇတီႈတပ်ႉသိုၵ်း လႆႈႁၼ်မႅၼ်ႈ လူင်ပွင်ၸိုင်ႈၼူၵ်ႉယုင်း တႅပ်းတတ်းႁဵတ်းသၢင်ႈ လွင်ႈဢမ်ႇ မႅၼ်ႈၸွမ်းပၵ်းပိူင်မၢႆမီႈၸိူဝ်းၼႆႉ ဝႃႈၼႆ။

ယၢမ်းလဵဝ် ၸွမ်းၼင်ႇၶေႃႈတႅပ်းတတ်း ၶွင်ႇသီႇၾၢႆႇႁူမ်ႇလူမ်ႈလႄႈ ၾၢႆႇၵႅတ်ႇၶႄႁႄႉၵင်ႈၼၼ်ႉ ၸင်ႇတေ ပဵၼ်ၵၢၼ်ႁၢင်ႈႁႅၼ်းမႃး တႃႇၸတ်းႁဵတ်းပၢင်လိူၵ်ႈတင်ႈ။ လူင်ပွင်ၸိုင်ႈ ဢၼ်ထုၵ်ႇလိူၵ်ႈတင်ႈ ၶိုၼ်ႈမႃးၼႆႉ ပဵၼ်ဢၼ်လီ တွၼ်ႈတႃႇဝၢၼ်ႈမိူင်းယဝ်ႉ ဝႃႈၼႆ။

တႃႇလွင်ႈငမ်းယဵၼ် ၼႂ်းမိူင်းၼႆသေ မိူဝ်ႈပၢၼ်လူင်ပွင်ၸိုင်ႈ တဵင်းၸဵင်ႇၼၼ်ႉၵေႃႈ ယူႇတီႈ တပ်ႉသိုၵ်းမၢၼ်ႈ လႆႈဢုပ်ႇၵုမ်ငူပ်ႉငီႉၵၼ်တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းသေ လူင်းလၢႆးမိုဝ်း လိၵ်ႈႁူမ်ႈမၢႆၵိုတ်း တိုၵ်းတူဝ်ႈမိူင်း NCA မႃး။ မိူဝ်ႈၽွင်းၼၼ်ႉ ပႃႇတီႇ NLD ယင်းသေႃႇသူၼ်း ယႃႇႁႂ်ႈလူင်းလၢႆးမိုဝ်းလူးၵွၼ်ႇ – ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ မၢပ်ႇၼႄးၼင်ႇၼႆ။  

ဢၢင်ႈဢိင် – The Irrawaddy