တႄႇဢဝ်ႁူဝ်လိူၼ်မေႊၼႆႉမႃး ၸွမ်းဝၢၼ်ႈၼမ်ႉဢုၼ်ႇ၊ ဝၢၼ်ႈလွႆလူင် ၼႂ်းၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်းၼႆႉ သိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ႁူမ်ႈၵၼ်သေ သိုပ်ႇ ပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉၶဝ်ဢမ်ႇထၢတ်ႇလႄႈ ႁဵတ်းႁႂ်ႈၵူၼ်းပၢႆႈၽေး ပႆႇၸၢင်ႈပွၵ်ႈၶိုၼ်းႁိူၼ်းယေး ၼႆယဝ်ႉ။

ၵူၼ်းပိုၼ်ႉတီႈ ၸႄႈဝဵင်းယွင်ႁူၺ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇလူင်ၸိူဝ်းၼႆႉ ၵႆႉတူၵ်းၼႃႇၶႃႈ။ ၼႂ်းဝူင်ႈၼႆႉၵူၺ်း တူၵ်း 2 လုၵ်ႈ ၵူၼ်းဝၢၼ်ႈၵူၼ်းသူၼ်ၶဝ်တႄႉ ဢမ်ႇယူႇၼႂ်းဝၢၼ်ႈယဝ်ႉ ၶဝ်ပၢႆႈႁိုင်ယဝ်ႉ။ ပီႈၼွင်ႉဝၢၼ်ႈၼမ်ႉမႆႈ(ဝၢၼ်ႈၼမ်ႉဢုၼ်ႇ) ၶဝ်ၼႆႉ ပေႃးလင်ႁိူၼ်း 100 ၼႆ တႃႇ 50 ၼႆႉ ၵွႆယဝ်ႉၶႃႈ။ ယၢမ်းလဵဝ် သိုၵ်းၶဝ်ၼႆႉ တိုၵ်ႉထႅမ်ႁႅင်းသိုၵ်း ၶဵင်ႈၶႅင်ၵၼ်ဝႆႉယူႇ”- ဝႃႈၼႆ။

ၵူၼ်းပၢႆႈၽေးသိုၵ်း ၵမ်ႈၼမ်တႄႉ မုင်ႈမွင်းၶႂ်ႈပွၵ်ႈႁိူၼ်းယေးၵၼ် ယွၼ်ႉမႆႈၸႂ်ၶူဝ်းသူၼ်ႁႆႈၼႃး ဢၼ် ၵိုတ်းဝႆႉတင်းလင် ၸိူဝ်းၼၼ်ႉ ဝႃႈၼႆ။

ၵူၼ်းပၢႆႈၽေးသိုၵ်း ၼႂ်းၸႄႈဝဵင်းယွင်ႁူၺ်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းၶဝ်ၼႆႉ ယူႇတီႈၵႆသေ ၵႆႉပွႆႇမၢၵ်ႇလူင်းမႃးတိၵ်းတိၵ်းဢေႃႈ။ ၼႂ်းဝူင်ႈၼႆႉၵူၺ်း ၶဝ်ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇထႅင်ႈသွင်လမ်း။ ဢၼ်လႆႈမႆႈၸႂ်တႄႉ မီးဢေႃႈ။ တႃႇတေမိူဝ်းၼႆႉ သမ်ႉပေႃးဢမ်ႇႁၼ်သဵၼ်ႈတၢင်း မၼ်းယဝ်ႉ။ ႁဝ်းၶႃႈၵူၼ်းဝၢၼ်ႈတႄႉ ဢွၼ်ၵၼ်မႃးၶွၼ်ႈတုမ်ၵၼ်သေ ယူႇဝႆႉတီႈဝၢၼ်ႈမွၵ်ႇပီၼႆႉ ႁဵတ်းသုမ်ႉလဵၵ်ႉ လဵၵ်ႉလွၵ်ႉလွၵ်ႉၸိူင်ႉၼႆဝႆႉဢေႃႈ။ ပေႃးလႆႈပၢႆႈၸိူင်ႉၼႆ ၶူဝ်းၼႂ်းသူၼ်ႁႆႈၼႃး ဢၼ်ႁဝ်း ၽုၵ်ႇသွမ်ႈဝႆႉ ၼၼ်ႉၵေႃႈ မၼ်းဢမ်ႇလႆႈသင်သေမဵဝ်းယဝ်ႉ။ မိူဝ်ႈလဵဝ်ၼႆႉ ၶႂ်ႈမိူဝ်းတူၺ်းၵေႃႈ ယင်းဢမ်ႇၸၢင်ႈမိူဝ်းလူးၵွၼ်ႇ။ တေၵႂႃႇတင်းၼႃႈၵေႃႈဢမ်ႇၸၢင်ႈ တေပွၵ်ႈမိူဝ်းၶိုၼ်းတီႈႁိူၼ်းၵေႃႈ ဢမ်ႇၸၢင်ႈ ပဵၼ်ၼႆဝႆႉ ၶႃႈၼေႈ”– ဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်းၶဝ် မႃးသွၼ်ႈယူႇဝႆႉ ၸွမ်းပိုၼ်ႉတီႈ ဝဵင်းၸၢမ်ၵႃးလႄႈ ဝၢၼ်ႈမွၵ်ႇပီ။ လိူဝ်ၼၼ်ႉ တႃႇၵမ်ႉၸွႆႈၶဝ်ႈၼမ်ႉတၢင်းၵိၼ်သမ်ႉ သိုၵ်းမၢၼ်ႈတင်ႈၵဵတ်ႉလၢၼ်ႇ ပႂ်ႉၵူတ်ႇထတ်း ၸွမ်းသဵၼ်ႈတႃႈသၢႆတၢင်းလႄႈ ႁဵတ်းႁႂ်ႈၵူၼ်းပၢႆႈၽေးၶဝ် ဢွၼ်ၵၼ်ထူပ်းတၢင်းယၢပ်ႇ တႃႇယူႇသဝ်းၵိၼ်သၢင်ႈ ၸိူဝ်းၼႆႉ။

“တီႈၸၢမ်ၵႃးၼႆႉ ႁဝ်းၶႃႈ ပႆႇၸၢင်ႈၵႂႃႇၸွႆႈထႅမ်။ တီႈၼၼ်ႉ မၼ်းၵႂႃႇမႃးယၢပ်ႇ။ ၶွင်ၵိၼ်ၶွင်ယႅမ်ႉ မိူၼ်ၼင်ႇ ၶဝ်ႈသၢၼ်၊ ၼမ်ႉမၼ်း ၸိူဝ်းၼႆႉ ပေႃးတေဢဝ်ၵႂႃႇၼႆ သိုၵ်းၶဝ် ၸႅတ်ႈထၢမ်ႁႅင်းၼႃႇ။ ၸဝ်ႈတႃႇ ၼၵေႃႈ ဢမ်ႇႁတ်းၵႂႃႇၸွႆႈယဝ်ႉ။ သိုၵ်းပႂ်ႉၸႅတ်ႈထၢမ်ၼၼ်ႉ ပဵၼ်သိုၵ်းမၢၼ်ႈတင်း သိုၵ်းပဢူဝ်းဢေႃႈ ”- ၵူၼ်းပိုၼ်ႉတီႈ ဝဵင်းယွင်ႁူၺ်ႈ သိုပ်ႇလၢတ်ႈ ၼႄၼင်ႇၼႆ။

ယွၼ်ႉၸဝ်ႈတႃႇၼၶဝ် ဢမ်ႇၸၢင်ႈၵႂႃႇၸွႆႈထႅမ် ၵူၼ်းပၢႆႈၽေးသိုၵ်းလႄႈ တွၼ်ႈတႃႇ တေယူႇလွတ်ႈၵႂႃႇ လႆႈၼၼ်ႉ လႆႈၵႂႃႇၵိၼ်ၸၢင်ႈၽုၵ်ႇမၢၵ်ႇၶိူဝ်သူမ်ႈသေ လဵင်ႉတွင်ႉၵႂႃႇၵူၺ်း – ၵူၼ်းပၢႆႈၽေးသိုၵ်း ၼႂ်း ၸႄႈဝဵင်းယွင်ႁူၺ်ႈလၢတ်ႈ။

“လွင်ႈၵိၼ်လွင်ႈယႅမ်ႉတႄႉ ယၢပ်ႇၽိုတ်ႇဢေႃႈ။ ပီႈၼွင်ႉဢၼ်မႃးၸွႆႈၵေႃႈ တေႃႉတႄႉမီးယူႇ ၼႆသေတႃႉ ၵူၼ်းပၢႆႈၽေးႁဝ်းသမ်ႉ ၼမ်ၼႃႇလႄႈ လႆႈၸႅၵ်ႇၵၼ် ၵေႃႉဢိတ်းၵေႃႉဢွတ်းၵူၺ်း။ တႃႇယူႇ လွတ်ႈလႆႈၼႆႉသမ်ႉ တီႈၶႃႈၶဝ်ပၢႆႈၽေးၼႆႉ ပိူၼ်ႈဢွၼ်ၵၼ် ၽုၵ်ႇမၢၵ်ႇၶိူဝ်သူမ်ႈလႄႈ ၶႃႈၶဝ်လႆႈၵႂႃႇႁႃ ၵိၼ်ၸၢင်ႈႁဵတ်းၵၢၼ်ၵူႈဝၼ်းသေ လဵင်ႉတွင်ႉၵႂႃႇဢေႃႈ။ ၵႃႈၸၢင်ႈတႄႉ ၼိုင်ႈဝၼ်းလႂ် လႆႈၼိုင်ႈမိုၼ်ႇ ၵူၺ်း လႆႈၽိမ်းၸႂ်ႉၽိမ်းၵိၼ်ဢေႃႈ”။

ၼႂ်းၸႄႈဝဵင်းယွင်ႁူၺ်ႈၼႆႉ သိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ၵႆႉယိုဝ်းၵွင်ႈလူင်ပွႆႇ မၢၵ်ႇသႂ်ႇၸွမ်းဝၢၼ်ႈ ၵူၺ်းဢမ်ႇၵႃး ၵႆႉပဵၼ်ပၢင်တိုၵ်းၵၼ်တင်း ၸုမ်းယိပ်းၵွင်ႈၵၢင်ႇၶဝ်လႄႈ ၵူၼ်း ဝၢၼ်ႈၼမ်ႉဢုၼ်ႇ၊ ဝၢၼ်ႈလွႆလူင်၊ ဝၢၼ်ႈၺွင်ႇလေးပိၼ်ႇ၊ ဝၢၼ်ႈၼမ်ႉတူၵ်း၊ ဝၢၼ်ႈၵုင်းသႃႇ၊ ဝၢၼ်ႈ ဢိူင်ႇမူလႄႈ ဝၢၼ်ႈလိၼ်ပူၵ်ႇတႅၵ်ႇ ၸိူဝ်းၼႆႉ လႆႈဢွၼ်ၵၼ်ပၢႆႈၽေးဝႆႉ မီးဢမ်ႇယွမ်း 3 ႁဵင်။

ၵူၼ်းပၢႆႈၽေးၶဝ် ၸိူဝ်းၼႆႉ ၵမ်ႈၽွင်ႈပၢႆႈမႃးမိူဝ်ႈလိူၼ်ဢေႊပရိူဝ်ႊ ပီ 2024။ ၵမ်ႈၽွင်ႈၵေႃႈ ပၢႆႈမႃးၽွင်းလိူၼ်ၾႅပ်ႊပိဝ်ႊရီႊ ၼႂ်းပီ 2025 ၼႆႉ – ၽူႈၸွႆႈထႅမ် ၵူၼ်းပၢႆႈၽေးၶဝ်လၢတ်ႈၼႄၼင်ႇၼႆ။