ငဝ်ႈငုၼ်း ပျီႇတူႉၸိတ်ႉသႅင်ၵႅဝ်ႉ ဢၼ်ယၢမ်ႈၵိုၵ်းပိုၼ်း SSPP မႃးၼၼ်ႉ ဢိင်ၼိူဝ်သိုၵ်းၶႄႇၵဝ်ႈၵၢင်ႉႁႅၼ်းသိုၵ်းၶဝ်ႈပိုၼ်ႉတီႈ လေႃႇတိုၵ်း ၼႂ်းဝၼ်းတီႈ 29/04/2025 သေ ယၢမ်းဝၢႆးဝၼ်း မွၵ်ႈ 4 မူင်းပၢႆၼၼ်ႉ ပျီႇတူႉၸိတ်ႉ လႆႈထွႆထွၼ်ဢွၵ်ႇတပ်ႉပၼ်မူတ်းယဝ်ႉ ။

ပျီႇတူႉၸိတ်ႉသႅင်ၵႅဝ်ႉ ဢၼ်ၸဝ်ႈသႅင်ႁၢၼ် ဢွၼ်ႁူဝ် ဝႆႉ မွၵ်ႈ 100 ပၢႆ ၼၼ်ႉလႆႈထွၼ်ဢွၵ်ႇပိုၼ်ႉတီႈမူတ်း ။ လႆႈဢွၼ်ၵၼ်ၵႂႃႇယူႇသဝ်းသွၼ်ႈတူဝ်ဝႆႉ ၼႂ်းဝၢၼ်ႈၽွင်ႈ ၵႂႃႇယူႇဝႆႉတၢင်းၼႃးတွင်ႉၽွင်ႈ လႄႈယူႇတၢင်းၶႃးၶဵဝ်ၽွင်ႈ ၵူၼ်းပိုၼ်ႉတီႈလၢတ်ႈၼင်ႇၼႆ။

“ယၢမ်းလဵဝ်တႄႉ တီႈငဝ်ႈငုၼ်းသႅင်ၵႅဝ်ႉၼၼ်ႉ ပဵၼ်သိုၵ်းၶႄႇၵဝ်ႈၵၢင်ႉၵႂႃႇမူတ်းယဝ်ႉ။ ပျီႇတူႉၸိတ်ႉ သိုၵ်းတႆးဢမ်ႇမီးသေၵေႃႉယဝ်ႉ။ ၶဝ်ၸဝ်ႈႁႅင်ႉဝႃႈ ဢူၺ်းလီ ၼႆၼႃႇလႄႇမေႃႉ။ ပိူၼ်ႈမႃးလိုပ်ႈၵေႃႈၵႃႈလႆႈထွၼ်ပၼ်ဢူၺ်းလီၶဝ်ယဝ်ႉၵမ်းၼႆႉတႄႉ”- ၵူၼ်းပိုၼ်ႉတီႈ လၢတ်ႈၼင်ႇၼႆ။

တီႈပၢင်တိုၵ်းၼၼ်ႉ သိုၵ်းၵဝ်ႈၵၢင်ႉတၢႆ 2 ၵေႃႉ ။ ဢၼ်မၢတ်ႇၸဵပ်းၵေႃႈမီး ဝႃႈၼႆသေတႃႉ ၼၼ်ႉတႄႉ ဢမ်ႇႁူႉႁူဝ်ၼပ်ႉတႅတ်ႈတေႃး။

သိုၵ်းၵဝ်ႈၵၢင်ႉၼႆႉ ၸဵမ်ယၢမ်းၵၢင်ၼႂ် ၼႂ်ၼႆႉ မႃးလိုပ်ႈသိုၵ်းတႆး ၸိူဝ်းယူႇဝႆႉၸွမ်းၼမ်ႉမႃႉ သွင်ၵႄး ၸိူဝ်းၼၼ်ႉသေ ယၢမ်းဝၢႆးဝၼ်းၼႆႉထႅမ်ႁႅင်းသိုၵ်းမႃးယူႇၸွမ်းဝၢၼ်ႈ သွင်ၵႄး၊ လႅၼ်တီႈ၊ ဝၢၼ်ႈၸၢင်ႉ၊ ၸိူဝ်းၼႆႉမီးမွၵ်ႈ ႁဵင်ပၢႆ။ သိုၵ်းတႆးသမ်ႉယူႇၸွမ်းတူၼ်းႁၢဝ်းသၼ်လွႆႁိမ်းႁွမ်းဝၢၼ်ႈၸိူဝ်းၼၼ်ႉလႄႈ ၵူၼ်းဝၢၼ်ႈဢွၼ်ၵၼ်မႆႈၸႂ်ၵူဝ်ႁႄသေ ငိူင်ႉပၢႆႈဢွၵ်ႇပိုၼ်ႉတီႈဝႆႉ။

ၸုမ်းပျီႇတူႉၸိတ်ႉ သႅင်ၵႅဝ်ႉၼႆႉ မိူဝ်ႈပီ 1989 ၼၼ်ႉ လႆႈၵိုတ်းတိုၵ်းၵၼ်တၢင်း တပ်ႉသိုၵ်းမၢၼ်ႈသေ ၽွင်းၼၼ်ႉ ႁူဝ်ပဝ်ႈပဵၼ် ၸွမ် ႁၢၼ် လွႆမၢဝ်း။ ထိုင်မႃး ပီ 2009-2010 ၸင်ႇလႅၵ်ႈလၢႆႈႁဵတ်းပဵၼ် ၸုမ်းပျီႇတူႉၸိတ်ႉ ၽၢတ်ႇဢွၵ်ႇ SSPP/SSA ၵႂႃႇ။ ဝၢႆးၼၼ်ႉ SSPP/SSA ၸင်ႇမၵ်းမၼ်ႈ ငဝ်ႈငုၼ်း ဝႆႉပဵၼ်တီႈဝၢၼ်ႈႁႆး တေႃႇထိုင်ဝၼ်းမိူဝ်ႈၼႆႉ။