ဝၢႆးသိုၵ်းၵဝ်ႈၵၢင်ႉ ထွႆဢွၵ်ႇတီႈဝဵင်းမိူင်းယႆ ၵမ်ႈၽွင်ႈယဝ်ႉ ၸဝ်ႈႁၢၼ်ႉၶၢႆၵုၼ်ႇယွႆႈ တီႈဢိူင်ႇႁူဝ်ယ ၸႄႈဝဵင်းမိူင်းယႆ ဢွၼ်ၵၼ်ၶၢင်းပွင်ႉ ယွၼ်ႉသိုၵ်းၶဝ် ၸိုၵ်းၵိၼ်ၶူဝ်းၵုၼ်ႇယဝ်ႉ ဢမ်ႇတၼ်းသၢႆႈၼီႈ တင်းမူတ်းမွၵ်ႈ 10 ႁၢၼ်ႉ။

မိူဝ်ႈဝၼ်းတီႈ 18/04/2025 ၼၼ်ႉ သိုၵ်းၵဝ်ႈၵၢင်ႉ MNDAA ဢၼ်ပႂ်ႉၵဵတ်ႉတီႈဝၢၼ်ႈၼွင်မူဝ် ၼႂ်းဢိူင်ႇႁူဝ်ယ ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ၸိုၵ်းၵိၼ်ၶူဝ်းၵုၼ်ႇ ၵူၼ်းဝၢၼ်ႈလူင် တင်းမူတ်း 7 ႁၢၼ်ႉ ၼိုင်ႈႁၢၼ်ႉလႂ် ၸိုၵ်းၵိၼ်ဝႆႉ 2-3 သႅၼ်ပျႃး ၼႆယဝ်ႉ။

ၵူၼ်းပိုၼ်ႉတီႈ မိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈတႄႇမၼ်းတႄႉ ယွၼ်ႉႁၼ်ထိုင်ဝႃႈ ၵူၼ်းတေႃႇ ၵူၼ်း ဢီးလူၼိူဝ်ၵၼ်ၼႆသေ ပၼ်ၵူႈႁိမ်ၵိၼ်ဢိတ်းဢွတ်းဢေႃႈ။ ၼီႈဢၼ် သိုၵ်းၶဝ် ၸိုၵ်းၵိၼ်ဝႆႉတႄႉ မၢင်ႁၢၼ်ႉၵေႃႈ ထုၵ်ႇၼီႈဝႆႉ သႅၼ်ပၢႆ၊ မၢင်ႁၢၼ်ႉ 2 သႅၼ်ပၢႆ၊ မၢင်ႁၢၼ်ႉ 3 သႅၼ်ပၢႆ ယဝ်ႉၵေႃႈ ငိုၼ်းၾူၼ်း ၸိူဝ်းၼႆႉထႅင်ႈ တင်းမူတ်း 7 ႁၢၼ်ႉဢေႃႈ ဢၼ်ၶဝ်ထုၵ်ႇၼီႈဝႆႉၼႆႉ”- ဝႃႈၼႆ။

ဢိင်ၼိူဝ် လွင်ႈၼႆႉ ယူႇတီႈ ၽူႈယႂ်ႇၵူၼ်းလူင် တၢင်းၼိူဝ်တႄႉ တေပႆႇလႅပ်ႈႁူႉၸွမ်းလႄႈ ၶႂ်ႈႁႂ်ႈၽူႈယႂ်ႇ တၢင်းၼိူဝ်ၶဝ် လႆႈႁူႉၸွမ်းလွင်ႈပိူင်ပဵၼ်ၼႆႉသေ လၢတ်ႈပၼ်လုၵ်ႈၼွင်ႉၶဝ်ႁႂ်ႈမႃးသၢႆႈၶိုၼ်း ယွၼ်ႉဝႃႈ ၵူၼ်းမိူင်းၼႆႉ ပၢႆသေလိူဝ် ၺႃးၽေးသိုၵ်းယဝ်ႉ သမ်ႉမႃးၺႃးလွင်ႈလႅၼ်ၵိၼ်ၸိူင်ႉၼႆထႅင်ႈလႄႈ ဢမ်ႇၶႂ်ႈ ႁႂ်ႈပဵၼ်။ ၵွပ်ႈၼႆ ႁႂ်ႈသိုၵ်းၵဝ်ႈၵၢင်ႉၶဝ် မေႃဝႆႉၵႃႈၶၼ်ၼပ်ႉယမ်ၵူၼ်းမိူင်းၽွင်ႈ – ၵူၼ်းပိုၼ်ႉတီႈ မိူင်းယႆ တိုၵ်းသူၼ်း လၢတ်ႈၼႄၼင်ႇၼႆ။

“သိုၵ်းၶဝ် မၢင်ၵေႃႉၼႆႉ ႁႃၵူႈႁိမ်ငိုၼ်းၵူၼ်းဝၢၼ်ႈသေ သမ်ႉၵိုင်ႉၵၢင်ႉလႆႈဢွၵ်ႇမိူဝ်းၵႂႃႇပႅတ်ႈၵေႃႈမီး ၵႆႇ ၵူၼ်းဝၢၼ်ႈၼွင်မူဝ်ၼႆႉ ၺႃးၶဝ်လၵ်ႉၵႂႃႇ 4 တူဝ်ဢေႃႈ။ တေႃႈလဵဝ် ဢၼ်သိုၵ်းၵဝ်ႈၵၢင်ႉၶဝ် မီးဝႆႉတႄႉ ၸွမ်းတၢင်းလူင်မိူင်းယႆ – လႃႈသဵဝ်ႈ ၸိူဝ်းၼၼ်ႉၵူၺ်း။ တီႈဝၢၼ်ႈၼွင်မူဝ်ၼႆႉတႄႉ ဢမ်ႇမီးယဝ်ႉ”- ၵူၼ်းမိူင်းယႆ သိုပ်ႇလၢတ်ႈၼႄၼင်ႇၼႆ။

ၵဵဝ်ႇလူၺ်ႈလွင်ႈၼႆႉသေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇတိတ်းတေႃႇ တီႈၽူႈမီးပုၼ်ႈၽွၼ်း တပ်ႉသိုၵ်းၵဝ်ႈၵၢင်ႉၵေႃႈ ဢမ်ႇလႆႈ။

ၵဵတ်ႉသိုၵ်းၵဝ်ႈၵၢင်ႉ တီႈဝၢၼ်ႈၼွင်မူဝ်ၼၼ်ႉ ၶဝ်ပႂ်ႉမႃးႁိုင်မွၵ်ႈ 10 လိူၼ်ယဝ်ႉ။ ထိုင်မႃးဝၼ်းတီႈ 18 ၼႆႉ သိုၵ်းၵဝ်ႈၵၢင်ႉၶဝ် ဢၼ်ပႂ်ႉၵဵတ်ႉတီႈၼၼ်ႈ လႆႈထွႆၶိုၼ်းမူတ်းယဝ်ႉ။ ဢၼ်သိုၵ်းၵဝ်ႈၵၢင်ႉ တင်ႈၵဵတ်ႉဝႆႉတီႈ ဝၢၼ်ႈၼွင်မူဝ်ၼၼ်ႉ ယွၼ်ႉပဵၼ်သဵၼ်ႈတၢင်းလတ်း ၵႂႃႇၸူးဝၢၼ်ႈၸၢင်ႉ ဝဵင်းသီႇပေႃႉ ၼႆယဝ်ႉ။

ဢိူင်ႇႁူဝ်ယၼႆႉ တင်းမူတ်းမီး 21 ဝၢၼ်ႈ မီးၾၢႆႇႁွင်ႇဝဵင်းမိူင်းယႆ ယၢၼ်ဝဵင်း 5 လၵ်း ၼႆယဝ်ႉ။