တွၼ်ႈတႃႇတေၸွႆႈထႅမ်ၵူၼ်းထူပ်းၽေးၽႅၼ်ႇလိၼ်ဝႆၼႆသေ NUG ပိုၼ်ၽၢဝ်ႇတေၵိုတ်းၵၢၼ်တိုၵ်းတေႃး တင်းသိုၵ်းမၢၼ်ႈထႅင်ႈ 1 ဝူင်ႈ တႄႇဢဝ်ဝၼ်းတီႈ 13 တေႃႇထိုင် ဝၼ်းတီႈ 20 ဢေႊပရိူဝ်ႊ ဝႃႈၼႆ။

 ဢၼ် NUG ပိုၼ်ၽၢဝ်ႇၵိုတ်းတိုၵ်းၼႆႉ ၵမ်းၼႆႉပဵၼ်ပွၵ်ႈၵမ်း 2။ ဝၢႆးလင်ၽႅၼ်ႇလိၼ်ဝႆယဝ်ႉ တင်ႈတႄႇဝၼ်းတီႈ 30 မၢတ်ႉၶျ်တေႃႇထိုင်ဝၼ်းတီႈ 12 ဢေႊပရိူဝ်ႊလ်ၼႆႉပိုၼ်ၽၢဝ်ႇၵိုတ်းတိုၵ်းယဝ်ႉၵမ်းၼိုင်ႈ။

ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉဝႃႈ – ၵိုတ်းတိုၵ်းထႅင်ႈ 7 ဝၼ်းၵမ်းၼႆႉ ႁႂ်ႈမၵ်းမၼ်ႈပဵၼ်ဝၼ်းဢၼ်တမ်ႇၼွႆႉမွင်ၸႂ်လႄႈ ဝၼ်းဢၼ်ပၼ်ႁႅင်းၸႂ်ၵၼ် ဝႃႈၼႆ။ ၵွပ်ႈၼႆၼႂ်းဝၼ်းဢၼ်ပိုၼ်ၽၢဝ်ႇဝႆႉၼၼ်ႉ ၼႂ်းပိုၼ်ႉတီႈၵူၼ်းမိူင်းထူပ်းၽေးၽႅၼ်ႇလိၼ်ဝႆၼၼ်ႉ  ၼွၵ်ႈလိူဝ် ၵႅတ်ႇၶႄတူဝ် သိုၵ်းၵႅတ်ႇၶႄၵူၼ်းမိူင်း PDF တႂ်ႈ  NUG ၵုမ်းၵမ် တေဢမ်ႇတႄႇပိုတ်းယိုဝ်းၽႂ် ဢွၼ်တၢင်းဝႃႈၼႆဝႆႉပႃး။

ၼွၵ်ႈလိူဝ်ၼၼ်ႉၸုမ်းၸွႆႈထႅမ်ၼႂ်းမိူင်းၼွၵ်ႈမိူင်းၸိူဝ်းတေမႃးၸွႆႈထႅမ်ၵူၼ်းထူပ်းၽေးၽႅၼ်ႇလိၼ်ဝႆၼၼ်ႉၵေႃႈ ယူႇတီႈ NUG သေ တေၸွႆႈထႅမ် တေၵႅတ်ႇၶႄႁႄႉၵင်ႈပၼ်ၵႂႃႇ ၼင်ႇပွင်ပဵၼ်လႆႈ  ဝႃႈၼႆ။

 ယူႇတီႈၶွင်ႇသီႇသိုၵ်းမၢၼ်ႈၵေႃႈ ပိုၼ်ၽၢဝ်ႇၵိုတ်းတိုၵ်းဝႆႉၼႂ်းဝၼ်းတီႈ 2 ထိုင် 22 လိူၼ်ဢေႊပရိူဝ်ႊလ်ၼႆႉ။ ၵူၺ်းၵႃႈတေႃႇထိုင်ယၢမ်းလဵဝ် တိုၵ်ႉဢဝ်ၶိူင်ႈမိၼ်ယိုဝ်းသိုၵ်း ပိုတ်းယိုဝ်းယူႇတိၵ်းတိၵ်း။ ၵူၼ်းမိူင်းၵေႃႈမၢတ်ႇၸဵပ်းလူႉတၢႆတင်းၼမ်။ 

RFA