မိူဝ်ႈၼႆႉ ဝၼ်းတီႈ 01/04/2025 ယၢမ်းၵၢင်ဝၼ်းမွၵ်ႈ 11 မူင်းၶိုင်ႈၼၼ်ႉ ၵူၼ်းသိုၵ်းတပ်ႉသိုၵ်းၵဝ်ႈၵၢင်ႉတင်း တပ်ႉသိုၵ်းတဢၢင်း ၽိတ်းမေႃးၵၼ် လွင်ႈဢွင်ႈတီႈ ႁႃငိုၼ်းၵွင်ၵၢင် တႃႇၸွႆႈထႅမ်ၵူၼ်းႁူပ်ႉၽေး ၽႅၼ်ႇလိၼ်ဝႆ(ဢိင်ႇသၼ်ႇ) သေ ဢဝ်ၵွင်ႈပေႃႉထုပ်ႉၵၼ် ၾၢႆႇၼႃႈၵၢတ်ႇလူင် ၼႂ်းၵၢင်ဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်းၼႂ်းပိုၼ်ႉတီႈ ဝဵင်းၵူတ်ႉၶၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းလွႆ မႃးလၢတ်ႈႁႂ်ႈသိုၵ်းၵဝ်ႈၵၢင်ႉ ဢၼ်တင်ႈသုမ်ႉလူႇၶၢမ်ႇဝႆႉ တီႈႁိမ်းၵၢတ်ႇၼၼ်ႉပၢႆႈပၼ်ၼႆဝႃႇ။ လုၵ်ႉတီႈၼၼ်ႈသေ ၶဝ်ထဵင်ၵၼ် ၽိတ်းၵၼ်မႃး။ သိုၵ်းၵဝ်ႈၵၢင်ႉ ၵေႃႉၼိုင်ႈ ၸူးလၢၵ်ႈဢဝ်ၵွင်ႈ ဝူတ်ႇပၼ်ဢၢႆႈသိုၵ်းလွႆၼၼ်ႉ ႁူဝ်မၼ်းပေႃးတႅၵ်ႇလိူတ်ႈၵႂႃႇဢေႃႈ”- ဝႃႈၼႆ။

လႆႈႁူႉဝႃႈ တႃႇတေႁဵတ်းသၢင်ႈ တူင်ႉၼိုင်ၵႂႃႇမႃးႁိုဝ် တႃႇတေတင်ႈသုမ်ႉလူႇၶၢမ်ႇ ယွၼ်းတၢင်းၸွႆႈထႅမ် တႃႇၵူၼ်းႁူပ်ႉၽေးၽႅၼ်ႇလိၼ်ဝႆၵူၺ်းၵေႃႈ တေလႆႈယွၼ်းၶႂၢင်ႉ တီႈတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ။ ၾၢႆႇသိုၵ်းၵဝ်ႈၵၢင်ႉသမ်ႉ ဢမ်ႇယွၼ်းၶႂၢင်ႉ တီႈသိုၵ်းတဢၢင်းလႄႈ ၾၢႆႇသိုၵ်းတဢၢင်း ၸင်ႇလႆႈမႃးလိုပ်ႈလမ်း ႁႂ်ႈသိုၵ်းၵဝ်ႈၵၢင်ႉၶၢႆႉ ပူတ်းယႃႉသုမ်ႉၶိုၼ်း ၼႆယဝ်ႉ။

ယွၼ်ႉလွင်ႈၽိတ်းမေႃး ပေႃႉထုပ်ႉၵၼ်ၼႆႉသေ ၾၢႆႇတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း ႁူဝ်တႅၵ်ႇၵႂႃႇသေ လူႉတၢႆၵႂႃႇ ၵေႃႉၼိုင်ႈ ၼႆယဝ်ႉ။

ၼင်ႇႁိုဝ် တေယိုၼ်ယၼ်လႆႈဝႃႈ လွင်ႈၼႆႉ မၢၼ်ႇမႅၼ်ႈတႄႉယူႇႁိုဝ် လွင်ႈတၢင်းမၼ်း ပဵၼ်ၸိူင်ႉႁိုဝ်လီလီ တႄႉတႄႉၼႆၼၼ်ႉ ၾၢႆႇၸုမ်းၶၢဝ်ႇၽူႈတွႆႇႁွၵ်ႈ ယင်းတိုၵ်ႉၶတ်းၸႂ်ၵပ်းသိုပ်ႇၸူး ၽူႈၶၢၼ်ပၢၵ်ႇ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ယူႇ။

မိူၼ်ၼၼ် ၼင်ႇၵဝ်ႇ မိူဝ်ႈပူၼ်ႉမႃး လိူၼ်မၢတ်ႊၶျ် ဝၼ်းတီႈ 7 ၼၼ်ႉၵေႃႈ ၾၢႆႇသိုၵ်းတဢၢင်း လိုပ်ႈလမ်းပေႃႉထုပ်ႉ သိုၵ်းၶၢင် KIA ဢွၵ်ႇၵႂႃႇတီႈလုမ်းၵပ်းသၢၼ် ဢၼ်ပိုတ်ႇဝႆႉတီႈဝဵင်းၵူတ်ႉၶၢႆၼၼ်ႉသေ ဢဝ်ၵႃးလူင် မႃးတေႃႉတၢင်ႇဢဝ်သိုၵ်းၶၢင်မွၵ်ႈ 40 ၵေႃႉ ၵႂႃႇသူင်ႇဝႆႉတၢင်းၼမ်ႉၽၵ်းၵႃ ၾၢႆႇၼွၵ်ႈဝဵင်းၵူတ်ႉၶၢႆၼၼ်ႉ ၼႆယဝ်ႉ။

တႅမ်ႈ – ၽူၺ်းၼုမ်ႇ