မိူဝ်ႈဝၼ်းတီႈ 26/03/2025 ႁွင်ႈၵၢၼ်ပိုၼ်ၽၢဝ်ႇငဝ်းႁၢင်ႈသဵင် မိူင်းဝႃႉ WSTV ႁၢႆးငၢၼ်းၵႂႃႇ လွင်ႈလုမ်းတႅပ်းတတ်း တြႃး တပ်ႉသိုၵ်းမိူင်းဝႃႉ UWSA ပၼ်တူတ်ႈတၢမ်ႇတၢႆ ၽူႈၸၢႆး ၵူၼ်းၸပ်းယိၼ်ႉယႃႈမဝ်းၵမ်ၵေႃႉၼိုင်ႈ ၾၢႆႇၼႃႈၵူၼ်းတင်းၼမ် တီႈၼႂ်းမိူင်းပွၵ်ႉ ၼႃႈတီႈၵုမ်းၵမ် တပ်ႉသိုၵ်းဝႃႉ UWSA ။
ၵူၼ်းၸၢႆးၵေႃႉၺႃးပၼ်တူတ်ႈတၢမ်တၢႆၼႆႉ ပဵၼ်ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်ပလိၵ်ႈ မိူင်းဝႃႉ ၸိုဝ်ႈႁွင်ႉ ၶျဵၼ်ႇသၢႆႇတၢဝ်ႉ ဢႃႇယု 24 ပီ ယူႇသဝ်းၼႂ်းၸေႈဝဵင်းမိူင်းမႂ်ႇ ၸေႈတွၼ်ႈ မိူင်းမႂ်ႇ ၼႃႈတီႈ တပ်ႉသိုၵ်းဝႃႉ UWSA တူင်ႉၼိုင်ၵုမ်းၵမ် ။
မိူဝ်ႈဝၼ်းတီႈ 9/9/2024 ၼၼ်ႉမၼ်းၸၢႆး ၽိတ်းမေႃးထဵင်ၵၼ်တင်း ဢူၺ်းၵေႃႉမၼ်းသေ ဢဝ်လႅမ်ႈလဵၵ်းပေႃႉ ႁႅမ်တႅင်းသႂ်ႇ ထိုင်တၢႆ။
တွၼ်ႈတႃႇတေတႅပ်းတတ်း ပၼ်တူတ်ႈတၢမ်ႇတၢႆ ၵူၼ်းၸၢႆးၵေႃႉၼႆႉၼၼ်ႉ ၾၢႆႇလုမ်းတႅပ်းတတ်းတြႃး လႆႈၸႂ်ႉၶၢဝ်း ယၢမ်းၵူတ်ႇထတ်းႁိုင် မွၵ်ႈ 6 လိူၼ်- ဝႃႈၼႆ။
လႆႈႁူႉဝႃႈ ၵူၼ်းၸၢႆးၵေႃႉၼႆႉ ၵွၼ်ႇပႆႇၺႃးတၢင်းၽိတ်း ၶႃႈႁႅမ်ၵူၼ်းတၢႆ မၼ်းၸၢႆး ၺႃး ဢဝ်လိူင်ႈ ဝႆႉ လူၺ်ႈတၢင်းၽိတ်း ယႃႈမဝ်းၵမ်၊ လၵ်ႉၸၵ်ႉၶုတ်ႈ လႄႈ ၵၢၼ်လွၵ်ႇလႅၼ် ၸဵမ်ၸိူဝ်းၼႆႉ လၢႆလၢႆပွၵ်ႈယူႇၼႆ ၽူႈမီးပုၼ်ႈၽွၼ်း တပ်ႉသိုၵ်းဝႃႉ UWSA ပိုၼ်ၽၢဝ်ႇၵႂႃႇ ၽွင်းဢဝ်မၼ်းၸၢႆးလဵပ်ႈပၼ်ႇဝဵင်းၼၼ်ႉ ၼင်ႇၼႆ ။
မိူၼ်ၼၼ်ၼင်ႇၵဝ်ႇ မိူဝ်ႈပူၼ်ႉမႃး ပီ 2024 လိူၼ်ဢွၵ်ႊထူဝ်ႊပိူဝ်ႊၼၼ်ႉၵေႃႈ တပ်ႉသိုၵ်းမိူင်းဝႃႉ UWSA ယၢမ်ႈ ပၼ်တူတ်ႈတၢမ်ႇတၢႆ ၵူၼ်းၸိူဝ်းႁဵတ်းၽိတ်း ပူၼ်ႉပႅၼ်ၶႃႈႁႅမ်ၵူၼ်းတၢႆ – တေႃႇၼႃႈၵူၼ်းမိူင်းတင်းၼမ် ၼႂ်းၸေႈဝဵင်း ႁူဝ်ပၢင်ႇ၊ ၸေႈတွၼ်ႈႁူဝ်ပၢင်ႇ ။
တႅမ်ႈ- ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ