တႄႇႁူဝ်ပီ 2025 မႃး သိုၵ်းမၢၼ်ႈၸႂ်ႉၶိူင်ႈမိၼ်တိုၵ်းသေ ပွႆႇမၢၵ်ႇသႂ်ႇ ၼႂ်းၸေႈမိူင်း တင်း ၸေႈတိူင်း လၢႆလၢႆတီႈ။ တိူဝ်ႉၺႃးၸွမ်းဝၢၼ်ႈသူၼ်ႁႆႈၼႃး ၵူၼ်းမိူင်းလူႉတၢႆၸွမ်း ၼႂ်းလိူၼ်လဵဝ် တၢႆ 100  ၵေႃႉဝႃႈၼႆ။

ၵူၼ်းမိူင်းၸိူဝ်းၺႃး မၢၵ်ႇၶိူင်ႈမိၼ်တိုၵ်းသိုၵ်းမၢၼ်ႈသေ လူႉတၢႆၵႂႃႇၼၼ်ႉ ပဵၼ်ၵူၼ်းၼႂ်းတိူင်းမၢၼ်းတလေး မိူၼ်ၼင်ႇ ၸေႈဝဵင်း ၸျိၼ်ႉၵူး (စဉ့်ကူးမြို့နယ်) တီႈဝၢၼ်ႈလႅတ်ႉပၢၼ်ႇလႃႉ (လက်ပံလှ ) ၼၼ်ႉ တၢႆ 40 ၵေႃႉ၊ ၼႂ်းတိူင်းၸႄႈၵႅင်းသမ်ႉ 8 ၵေႃႉ ၊ တိူင်းမၵူၺ်း 55 ၵေႃႉ၊ ၼႂ်းမိူင်းတႆးပွတ်းႁွင်ႇ 50 ပၢႆ  ။

ၵဵဝ်ႇၵပ်းလွင်ႈၼႆႉ ၽူႈထတ်းသၢင်ၵၢၼ်မိူင်းၵေႃႉၼိုင်ႈ လၢတ်ႈၼႄဝႃႈ “သိုၵ်းမၢၼ်ႈၼႆႉ သုမ်းသိုၵ်းၼႂ်း ၼႃႈ လိၼ်ပၢင်တိုၵ်း ၼမ်မႃးတိၵ်းတိၵ်းလႄႈ ထိုင်တီႈပေႃးလႆႈဢဝ် ၶိူင်ႈမိၼ်တိုၵ်းၸွႆႈၼၼ်ႉၼႃႇ။ ၾၢႆႇၼိုင်ႈ ၵေႃႈ သဵၼ်ႈတၢင်းတႃႇၶဝ် တေႃႉသူင်ႇႁႅင်းသိုၵ်း ၽိူမ်ႉၶဝ်ႈၼမ်ႉတၢင်းၵိၼ်ၶဝ်ၵေႃႈ ဢမ်ႇငၢႆႈလူး။ ၼႃႈတီႈ ၸိူဝ်းၶဝ် လႆႈသုမ်းၵၢၼ်ႉၵႂႃႇၼၼ်ႉ ၶဝ်ဝူၼ်ႉဝႃႈ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈၼႆႉ ၵမ်ႉထႅမ်ပၼ်သိုၵ်း ၸၢဝ်းၶိူဝ်းၼႆႁႄ ၼင်ႇႁိုဝ် ၵူၼ်းမိူင်းပေႃးတေဢမ်ႇ ႁတ်းၵမ်ႉထႅမ်ပၼ်သိုၵ်းၸၢဝ်းၶိူဝ်းၼၼ်ႉ ၶဝ်ၵေႃႈ ၸင်ႇဢဝ် ၶိူင်ႈမိၼ်  မိူဝ်းပွႆႇမၢၵ်ႇသႂ်ႇတိၵ်းတိၵ်း။ လမ်ႇလွင်ႈတႄႉ ၶဝ်ၶႂ်ႈႁႂ်ႈၵူၼ်းမိူင်းမီးၸႂ်ၵူဝ်။ ၵွပ်ႈၼၼ် ဝၢႆးလင်မႃးၼႆႉ ဢမ်ႇပဵၼ်ပၢင်တိုၵ်းၵေႃႈ ဢဝ်ၶိူင်ႈမိၼ်မိူဝ်းပွႆႇမၢၵ်ႇသႂ်ႇ ၵူၼ်းမိူင်း ၸိူဝ်းယူႇဝႆႉ ၼႂ်းပိုၼ်ႉတီႈ ၼႃႈလိၼ်ၶဝ်သုမ်းသိုၵ်းၼၼ်ႉ” – ဝႃႈၼႆ။

လိူၼ်ၼႆႉဝၼ်းတီႈ 26  ယၢမ်းႁူဝ်ၶမ်ႈ  သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း သွင်လမ်းသေ ပွႆႇမၢၵ်ႇသႂ်ႇ ၸွမ်းဝၢၼ်ႈ ၼႂ်းၸေႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇလႄႈ ႁဵတ်းႁႂ်ႈၵူၼ်းမိူင်းလူႉတၢႆ 4 ၵေႃႉ မၢတ်ႇၸဵပ်း  4 ၵေႃႉ။ ၵူၼ်းမိူင်းၸိူဝ်းတၢႆၵႂႃႇၼႆႉ ပဵၼ်ၼၢင်းယိင်း သွင်ၵေႃႉ လႄႈ ၵူၼ်းၸၢႆးသွင်ၵေႃႉ ၼႆယဝ်ႉ။

ၸွမ်းၼင်ႇ ၸုမ်းၶၢဝ်ႇၽူႈတွႆႇႁွၵ်ႈ ယိုၼ်းထိုင်လႆႈသေ ၵဵပ်းၶေႃႈမုလ်းဝႆႉၼၼ်ႉ သိုၵ်းမၢၼ်ႈၼႆႉ ၸႂ်ႉၶိူင်ႈမိၼ်  ပွႆႇမၢၵ်ႇ ၼႂ်းၸေႈဝဵင်းၼွင်ၶဵဝ် ဢမ်ႇယွမ်း 5 ပွၵ်ႈ။ ႁဵတ်းႁႂ်ႈမၢၵ်ႇလူင်တူၵ်းသႂ်ႇ ၸွမ်းဝၢၼ်ႈၸွမ်းသူၼ် ဝတ်ႉဝႃးၽႃ သိူဝ်ႇၸိူဝ်းၼႆႉ လူႉၵွႆတင်းၼမ်ၵူၺ်းဢမ်ႇၵႃး ၵူၼ်းမိူင်း ဢိၵ်ႇပႃး သင်ႇၶၸဝ်ႈ လႆႈ လူႉလွၼ်ႇတၢႆၵႂႃႇ တင်းမူတ်ႈမီးမွၵ်ႈ 44 ၵေႃႉ ၼႆယဝ်ႉ။

မိူဝ်ႈဝၼ်းတီႈ 22 ၼၼ်ႉသမ်ႉ သိုၵ်းမၢၼ်ႈၸႂ်ႉၶိူင်ႈမိၼ်တိုၵ်းမိူဝ်းပွႆႇမၢၵ်ႇသႂ်ႇ ၼႂ်းတိူင်းမၵူၺ်း တီႈႁွင်ႈယႃ ၼႂ်းဝဵင်း ၵၢၼ်ႉၵေႃး တိူဝ်ႉၺႃးၵူၼ်းမိူင်းတၢႆ 11 ၵေႃႉ မၢတ်ႇၸဵပ်း  6 ၵေႃႉ ပႃးမေႃယႃလူင် လႄႈ လုၵ်ႈဢွၼ်ႇ ဝႃႈၼႆ။

မိူၼ်ၼႆၼင်ႇၵဝ်ႇ ဝၼ်းတီႈ 14/03/2025 ၼၼ်ႉၵေႃႈ သိုၵ်းမၢၼ်ႈၸႂ်ႉၶိူင်ႈမိၼ်တိုၵ်း မိူဝ်းပွႆႇမၢၵ်ႇသႂ်ႇ တီႈဝၢၼ်ႈ  လႅတ်ႉပၢၼ်ႇလႃႉ ဢၼ်မီးၼိူဝ်သဵၼ်ႈတၢင်းလူင် လူတ်ႉၵႃး ဝဵင်းလိူဝ်ႇ- မိူင်းၵုတ်ႈၼၼ်ႉ တိူဝ်ႉၺႃးၵူၼ်းမိူင်းတၢႆၵႂႃႇ 40 ၵေႃႉ မၢတ်ႇၸဵပ်းၵႂႃႇ 50 ၵေႃႉပၢႆ။ ပႃးလုၵ်ႈဢွၼ်ႇတင်းမူတ်း 7 ၵေႃႉ၊ ၼႂ်းၼၼ်ႉ  လုၵ်ႈဢွၼ်ႇလႅင်ဢၼ်တိုၵ်ႉလႆႈ 4 လိူၼ်ပၢႆ ပႃးၵေႃႉၼိုင်ႈ  ။

 ႁွင်ႈၵၢၼ်ၽွင်းလူင် သုၼ်ႇလႆႈၵူၼ်း လူင်ပွင်ၸိုင်ႈ မိူင်းႁူမ်ႈတုမ် ၸူဝ်ႈၶၢဝ်း (NUG) ႁၢႆးငၢၼ်း ဝႆႉဝႃႈ တႄႇပီ 2023 တေႃႇထိုင် ၼႂ်းလိူၼ်မၢတ်ႉၶျ် ပီ 2025 ၼႆႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ ၼႂ်းၼႃႈလိၼ် ဢၼ်ၶဝ် သုမ်းသိုၵ်းဝႆႉၼၼ်ႉ မီးၵႂႃႇ 2190 ပွၵ်ႈ။ ႁဵတ်းႁႂ်ႈလုၵ်ႈဢွၼ်ႇတၢႆၵႂႃႇ 372 ၵေႃႉယဝ်ႉ ဝႃႈၼႆ။

တႅမ်ႈ- ၽူၺ်းၼုမ်ႇ