ၵူၼ်းပၢႆႈၽေးသိုၵ်း မိူင်းယၢင်းလႅင် ဢၼ်ပၢႆႈမႃးသွၼ်ႈဝႆႉ တီႈဝဵင်းယွင်ႁူၺ်ႈ ႁူဝ်ၵူၼ်းၼပ်ႉႁဵင်ၼၼ်ႉ သိုၵ်းမၢၼ်ႈ ၸႂ်ႉပွၵ်ႈၶိုၼ်းႁိူၼ်းယေး ႁဵတ်းႁႂ်ႈမီးလွင်ႈယၢပ်ႇၽိုတ်ႇႁႅင်း။

ယၢမ်းလဵဝ် ၾၢႆႇၽွင်းငမ်း ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ် ပၼ်ႁႅင်းဢီး ႁႂ်ႈၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉ ၸွမ်းဝတ်ႉဝႃးၽႃသိူဝ်ႇ ၼႂ်းဝဵင်းယွင်ႁူၺ်ႈ ၸိုင်ႈတႆးပွတ်း ၸၢၼ်းၼႆႉ ႁႂ်ႈဢွၼ်ၵၼ် ပွၵ်ႈ ၶိုၼ်းႁိူၼ်းယေးၽႂ်းမၼ်း တင်းမူတ်း တေႃႇထိုင်လိူၼ်ၼႆႉသဵင်ႈ ဝႃႈၼႆ။

ၵဵဝ်ႇလူၺ်ႈ လွင်ႈသိုၵ်းမၢၼ်ႈ ၸႂ်ႉပွၵ်ႈၶိုၼ်းႁိူၼ်းယေး ၸိူင်ႉၼႆၼႆႉ ၵူၼ်းပၢႆႈၽေးသိုၵ်း တၢင်းဝၢၼ်ႈဝေႃးလၶႄႉ၊ ၽႃသွင်း ၸိူဝ်းၼႆႉတႄႉ ယွၼ်ႉႁိူၼ်းယေးၺႃးၸၢၵ်ႇမၢၵ်ႇၾႆးမႆႈလူႉၵွႆလႄႈ တႃႇတေပွၵ်ႈ မိူဝ်းယူႇၶိုၼ်းၼၼ်ႉ ပဵၼ်ဢၼ်ယၢပ်ႇၽိုတ်ႇဝႆႉတင်းၼမ် ၼႆယဝ်ႉ။

ၵူၼ်းပၢႆႈၽေးသိုၵ်း ၼႂ်းဝဵင်းယွင်ႁူၺ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေး ဢၼ်ပၢႆႈမႃးတီႈၼႆႈၼႆႉ ဢမ်ႇၸႂ်ႈႁူဝ်ၵူၼ်းဢေႇၼႃ။ မိူၼ်ၼင်ႇ – ဝေႃးလၶႄႉ၊ ၽရူသူဝ်ႇ၊ ၽႃသွင်း ၊ တီႇမေႃးသူဝ်ႇ ၸိူဝ်းၼႆႉ ႁဵတ်းႁိုဝ်ၵေႃႈ ဢမ်ႇၸၢင်ႈမိူဝ်းၶိုၼ်းယဝ်ႉ။ ယွၼ်ႉႁိူၼ်းယေးၶဝ် ဢမ်ႇမီးယဝ်ႉ ၺႃးမၢၵ်ႇလူႉၵွႆမူတ်း”- ဝႃႈၼႆ။

သိုပ်ႇလၢတ်ႈဝႃႈ – “ၵမ်ႈၽွင်ႈၼႆႉ ပၢႆႈမႃးမီးၸမ် 4 ပီယဝ်ႉ။ ပေႃးမိူဝ်းၶိုၼ်းၼႆ လႅပ်ႈဢမ်ႇမီးတီႈယူႇယဝ်ႉ။ ၵူၼ်းပၢႆႈၽေးသိုၵ်း ဢၼ်ဢမ်ႇမီးႁိူၼ်းယဝ်ႉၼၼ်ႉ လိုပ်ႈၶဝ်မိူဝ်းၼႆ ႁဵတ်း ႁိုဝ်ၵေႃႈ ဢမ်ႇၸၢင်ႈမိူဝ်း၊ ၵႃႈလႆႈသိုပ်ႇယူႇၵႂႃႇတီႈၼႆႈၵူၺ်း။ ယွၼ်ႉဢမ်ႇၸၢင်ႈမိူဝ်းလႄႈ ၸင်ႇယူႇတီႈၼႆႈ ပေႃးမီးႁိူၼ်းတႄႉ ၽႂ်ၵေႃႈ ၶႂ်ႈမိူဝ်းယူႇႁိူၼ်းယေး ၽႂ်မၼ်းယူႇ။ ၶဝ်တေဢဝ်လၢႆးတၢင်းၸိူင်ႉႁိုဝ်သေ လိုပ်ႈတႄႉဢမ်ႇႁူႉ။ ပေႃးတေမိူဝ်းၼႆ တေလႆႈၵႂႃႇတၢင်းဝဵင်းသီႇသႅင်ႇၼၼ်ႉ သဵၼ်ႈလဵဝ်ၵူၺ်း”- ဝႃႈၼႆ။

မိူဝ်ႈၽွင်းပၢႆႈမႃးၼၼ်ႉ ၵူၼ်းပၢႆႈၽေးၶဝ် လႆႈပွႆႇပိုၼ်ႉပႅတ်ႈ ၶူဝ်းၶွင်ႁိူၼ်းယေးသေမႃး သင်မိူဝ်းၶိုၼ်း ၼႆ ၶူဝ်းႁိူၼ်းၽိူၼ်ဝၢၼ်ႇၸိူဝ်းၼႆႉ လႅပ်ႈတေလူႉၵွႆမူတ်းယဝ်ႉ။ ယွၼ်ႉၼၼ် တႃႇတေမိူဝ်းတင်ႈတူဝ် သၢင်ႈၶိုၼ်းမႂ်ႇမႂ်ႇၼႆ ပဵၼ်လွင်ႈမႆႈၸႂ်ဝႆႉ ယၢမ်းလဵဝ်သမ်ႉ ၵၢၼ်ငၢၼ်းဢမ်ႇမီး ငိုၼ်းၶဝ်ႈဢမ်ႇမီး ၼၼ်ႉယဝ်ႉ။

“ၵမ်ႈၼမ်တႄႉ ဢွၼ်ၵၼ်ပွၵ်ႈမိူဝ်းၶိုၼ်းယဝ်ႉသေတႃႉ မိူၼ်ၼွင်ႉယိင်းၶႃႈ မိူဝ်းၵႂႃႇယဝ်ႉ။ ၽွင်းပၢႆႈမႃးၵေႃႈ ဢမ်ႇတၼ်းလႆႈသင်မႃး ၽိူဝ်ႇမိူဝ်းၶိုၼ်းၵေႃႈ ဢမ်ႇၵိုတ်းသင်ယဝ်ႉ တႃႇတေႁႃၼမ်ႉၵိၼ် တၢင်းတေယၢပ်ႇၽိုတ်ႇ။ လွင်ႈယၢပ်ႇၽိုတ်ႇၼႆႉ ဢမ်ႇၸၢင်ႈလၢတ်ႈယဝ်ႉ။ ပေႃးပဵၼ်ၵူၼ်းမီးငိုၼ်းၶဝ်တႄႉ တေငၢႆႈလူမ်ၸႂ်ဢိတ်းၼိုင်ႈယူႇ”- ၵူၼ်းပၢႆႈၽေးသိုၵ်း တီႈဝဵင်းယွင်ႁူၺ်ႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ်သမ်ႉ ၸဝ်ႈတႃႇၼ ဢၼ်တေမႃးၵမ်ႉၸွႆႈၵေႃႈ ဢမ်ႇမီးယဝ်ႉ ယွၼ်ႉငဝ်းလၢႆးၵူႈလွင်ႈလႄႈ တႃႇၵူၼ်းပၢႆႈၽေးသိုၵ်းၶဝ် တေႁဵတ်းႁိုဝ် တင်ႈတူဝ်ၶိုၼ်းဢၼ်ဝႃႈၼၼ်ႉ ဝူၼ်ႉပေႃးဢမ်ႇဢွၵ်ႇယဝ်ႉ ဝႃႈၼႆ။

ၵူၼ်းပၢႆႈၽေးသိုၵ်း ၼႂ်းၸႄႈဝဵင်းလွႆၶေႃ လၢတ်ႈတီႈၽူႈတွႆႇႁွၵ်ႈဝႃႈ – “တၢင်းဝၢၼ်ႈႁဝ်းၶႃႈၼႆႉ ဢမ်ႇမီးတၢင်းမုင်ႈမွင်းယဝ်ႉ။ ပေႃးပဵၼ်ၼႂ်းဝဵင်းလွႆၶေႃတႄႉ ဢမ်ႇပေႃးလႆႈမႆႈၸႂ်သေတႃႉ ပေႃးပဵၼ်တၢင်းၶဝ်ႈ ဢွၵ်ႇဝဵင်းတႄႉ လႆႈမႆႈၸႂ်ဢေႃႈ။ တီႈဝၢၼ်ႈၶႃႈၶဝ်ၼႆႉ သမ်ႉပဵၼ်တၢင်းၶဝ်ႈဢွၵ်ႇဝဵင်းလႄႈ ယွၼ်ႉၼၼ် လႆႈမႆႈၸႂ်တႄႉတႄႉ။ ပေႃးဝႃႈ မိူဝ်းယူႇလႆႈၵေႃႈ တေလႆႈၾၢင်ႉယူႇၾၢင်ႉၵိၼ်။ ယွၼ်ႉဝႃႈ ပၢင်တိုၵ်းၼႆႉ ၸၢင်ႈပဵၼ်လႆႈၵူႈၶၢဝ်းယၢမ်း။ ပေႃးဝႃႈပဵၼ်ထႅင်ႈၼႆ ႁဝ်းၶႃႈ ဢမ်ႇၸၢင်ႈပၢႆႈထႅင်ႈယဝ်ႉ”- ဝႃႈၼႆ။

ယၢမ်းလဵဝ် ငဝ်းလၢႆးပၢင်တိုၵ်း ၸွမ်းလႅၼ်လိၼ် မိူင်းတႆး – မိူင်းယၢင်းလႅင်ၼႆႉ တိုၵ်ႉသိုပ်ႇပဵၼ်ႁၢဝ်ႈႁႅင်းဝႆႉ ယွၼ်ႉၼၼ် တႃႇၵူၼ်းဝၢၼ်ႈၶဝ် တေပွၵ်ႈၶိုၼ်းၼၼ်ႉ လႆႈမႆႈၸႂ်ပႃးလွင်ႈပၢင်တိုၵ်း၊ သင်ပွၵ်ႈမိူဝ်းသေ တေလႆႈပၢႆႈထႅင်ႈၼႆ ၸၢင်ႈထူပ်းတၢင်းယၢပ်ႇၽိုတ်ႇ လိူဝ်ၼႆႉ ဝႃႈၼႆ။

ၵူၼ်းပိုၼ်ႉတီႈ မိူင်းပၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈၶဝ်ပဵၼ်ပၢင်တိုၵ်းၵၼ်ၼၼ်ႉ ၵႆတႄႉၵႆယူႇ ပေႃးယူႇတီႈဝၢၼ်ႈသေတူၺ်းတႄႉ မၼ်းႁၼ်ၸႅင်ႈလီၼႃႇ။ ၶဝ်သမ်ႉ ပွႆႇမၢၵ်ႇၸွမ်းႁိမ်းႁွမ်းလွႆ ၸိူဝ်းၼၼ်ႉ။ မႆႈၸႂ်ဢေႃႈ မိူၼ်ၸိူင်ႉၶဝ်ၽုၵ်ႇဝႆႉ ထူဝ်ႈၼၼ်ႉၵေႃႈ ၵမ်းၵမ်းမၢၵ်ႇမႃးတူၵ်းသႂ်ႇသေ လႆႈၶိုၼ်းပၢႆႈမိူဝ်း မၢင်ဝၼ်းၵေႃႈ လႆႈၵႂႃႇသူၼ်ၶိုင်ႈဝၼ်းသေ လႆႈပွၵ်ႈၶိုၼ်း။ မၢင်ဝၼ်းၵေႃႈ တိုၵ်ႉၵႂႃႇၵူၺ်း လႆႈပွၵ်ႈၶိုၼ်းၵေႃႈမီး။ ၶူဝ်းၸိူဝ်းၼႆႉ လႆႈႁၢင်ႈႁႅၼ်းတူဝ်ႈတၼ်းဝႆႉသေႇသေႇယဝ်ႉ”- ဝႃႈၼႆ။

တႄႇဢဝ် ၵၢင်လိူၼ်ၼူဝ်ႊဝႅမ်ႊပိူဝ်ႊ ပီ 2023 ၼၼ်ႉမႃး ယွၼ်ႉသိုၵ်းမၢၼ်ႈ ယိုတ်းမိူင်းတင်း သိုၵ်းယၢင်းလႅင် ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈဝဵင်းလွႆၶေႃ။ ယွၼ်ႉပၢင်တိုၵ်း ၼၼ်ႉသေ ၵူၼ်းမိူင်း ယၢင်းလႅင် လႆႈပၢႆႈၽေးသိုၵ်းမႃးသွၼ်ႈယူႇဝႆႉ ၼႂ်းဝဵင်းယွင်ႁူၺ်ႈ မီးၼပ်ႉႁူဝ်ႁဵင်။

ယၢမ်းလဵဝ် ၵူၼ်းပၢႆႈၽေးသိုၵ်း ၸိူဝ်းပွၵ်ႈမိူဝ်းၶိုၼ်းႁိူၼ်းယေးၼၼ်ႉ မၢင်ၸိူဝ်းယွၼ်ႉဢမ်ႇမီးတီႈယူႇ တၼ်းသဝ်းလႄႈ လႆႈဢွၼ်ၵၼ်ႁဵတ်းသုမ်ႉသွင်းသေ သွၼ်ႈယူႇဝႆႉ ၼႂ်းဝၢင်းဝတ်ႉမုၼ်ၸဝ်ႈ တီႈဝဵင်းလွႆၶေႃၼႆႉ မီးၵူၼ်းပၢႆႈၽေးသိုၵ်း ဢမ်ႇယွမ်းႁဵင် ၼႆယဝ်ႉ။