သိုၵ်းတဢၢင်း TNLA ၼႄးတၢင်းၽိတ်းတႅပ်းမႆႉတႃႇႁဵတ်းႁိူၼ်းၼႆသေ တီႉၵူၼ်းဝၢၼ်ႈၼႂ်းဢိူင်ႇပၢင်ပဝ်း 17 ၵေႃႉလႆႈလိူၼ်ယဝ်ႉၸင်ႇပွႆႇပၼ်ၶိုၼ်း ၵူၼ်းဝၢၼ်ႈထုၵ်ႇပေႃႉထုပ်ႉထဵတ်ႈထၢမ်မၢတ်ႇၸဵပ်းမႃးလႄႈ ယၢမ်းလဵဝ်လႆႈယူတ်းယႃတူဝ်ဝႆႉၵေႃႈမီး ဝႃႈၼႆ။
ၵူၼ်းဝၢၼ်ႈ 17 ၵေႃႉၼႆႉပဵၼ်ၵူၼ်းဝၢၼ်ႈ ဝၢၼ်ႈလူင်ၵဵင် (ၵျွင်းၵုင်း) ဢိူင်ႇပၢင်ပဝ်း ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ၊ ၺႃးသိုၵ်းတဢၢင်း TNLA ၼႄးဝႃႈၽိတ်းမၢႆမီႈ ပၵ်းပိူင် တႅပ်းမႆႉသၵ်း ၼႆသေ တီႉၺွပ်းၵုမ်းၶင် ၸဵမ်မိူဝ်ႈဝၼ်းတီႈ 22/01/2025 ။ ထိုင်မႃးဝၼ်းတီႈ 26/2/2025 ၸင်ႇပွႆႇပၼ်ၶိုၼ်း။ ယၢမ်းလဵဝ်ၵူၼ်းဝၢၼ်ႈၸိူဝ်းၼၼ်ႉ မၢတ်ႇၸဵပ်းဝႆႉ ယွၼ်ႉၺႃးပေႃႉထုပ်ႉထဵတ်ႈထၢမ်လႄႈ လႆႈယူတ်းယႃတူဝ်ဝႆႉ ဝႃႈၼႆ။
ၼၢင်းယိင်းၵူၼ်းပိုၼ်ႉတီႈဢၼ်လႆႈပၢႆႈၽေးသိုၵ်းဝႆႉၼၼ်ႉ လၢတ်ႈၽူႈတွႆႇႁွၵ်ႈဝႃႈ-“ TNLA ၼႄးဝႃႈ ၶဝ်ၵႂႃႇတႅပ်းမႆႉတီႈႁူဝ်ဝၢၼ်ႈမႃးႁဵတ်းႁိူၼ်းၼႆႉၽိတ်းမၢႆမီႈၶဝ်ၼႆသေ တီႉ ။ ၵူၺ်းၵႃႈမႆႉၸိူဝ်းၼၼ်ႉ ၵူၼ်းဝၢၼ်ႈၽုၵ်ႇဝႆႉၸဵမ်လႂ် ၸဵမ်မိူဝ်ႈပၢၼ် SSPP တူင်ႉၼိုင် ။ ၸဵမ်မိူဝ်ႈ TNLA ပႆႇမႃးယူႇပုၼ်ႉ။ ယဝ်ႉၵေႃႈ ၵူၼ်းဝၢၼ်ႈ တႅပ်းၸႂ်ႉမႃးတႃႇသေႇ ဢမ်ႇမီးၽႂ်ဝႃႈသင်။ တႅပ်းႁဵတ်းႁိူၼ်း ႁဵတ်းႁူဝ်ႉၵူၺ်း။ ဢမ်ႇလႆႈဢဝ်ၵႂႃႇ ၶၢႆတီႈလႂ်သေပွၵ်ႈ။ တလဵဝ် ၶဝ်ဝႃႈၽိတ်းမၢႆမီႈပၵ်းပိူင်ၶဝ်ဝႃႇ ၸူဝ်ႈၶဝ်မႃးယူႇၼႂ်းၶၢဝ်းတၢင်း မွၵ်ႈပီၼိုင်ႈၼႆႉ ၶဝ်တမ်ႉဢမ်ႇတွၼ်ႉမႃးသပ်းလႅင်းၼေၵူၼ်းဝၢၼ်ႈသေပွၵ်ႈဝႃႈ မၢႆမီႈၶဝ်ပဵၼ်သင်လၢႆလၢႆၼႆ။”- ဝႃႈၼႆ။
ၽွင်းသိုၵ်းတဢၢင်း TNLA ၶဝ်ႈတီႉၵူၼ်းဝၢၼ်ႈၸိူဝ်းတႅပ်းမႆႉယူႇၸိူဝ်းၼၼ်ႉ တီႉၵႂႃႇပႃး ထေႃႈလႃႈၵျီႈ တၢင်ႇမႆႉၸိူဝ်းၼႆႉၵႂႃႇပႃး။ ၵုမ်းၶင်ဝႆႉလိူၼ်ၼိုင်ႈတဵမ်တဵမ်။ ၵူတ်ႇထတ်းထဵတ်ႈထၢမ်ပေႃႉထုပ်ႉဝႆႉပႃး။ ၽွင်းပွႆႇမႃးၶိုၼ်းၼၼ်ႉ ႁွႆးပေႃႉထုပ်ႉဝႆႉၸွမ်းတူဝ်သမ်ႉပေႃးမၢၼ်ႉၵမ်ႇလမ်ၵႂႃႇမူတ်း ။
ဢၼ်ပူၼ်ႉလွတ်ႈဢွၵ်ႇမႃးၶိုၼ်းၼႆႉၵေႃႈၵူၼ်းဝၢၼ်ႈ လႆႈဢဝ်ငိုၼ်းပၼ်ၵၢင်ႉၵႄႇ တွၼ်ႈတႃႇၼိုင်ႈၵေႃႉ 10 သႅၼ်ပျႃးသေ ၵၢင်ႉၵႄႇၸွႆႈဢဝ်ဢွၵ်ႇမႃးပၼ် ၵူၼ်းပိုၼ်ႉတီႈ ဢၼ်ႁူႉႁၼ်ၸွမ်းၼၼ်ႉလၢတ်ႈၼင်ႇၼႆ။
“ ၾၢႆႇတၢင်းသိုၵ်းလွႆတႄႉ ဢမ်ႇယွၼ်းငိုၼ်းၶႃႈၼႃ။ ၵူၺ်းၵႃႈ တႃႇလႆႈဢွၵ်ႇမႃးၶိုၼ်းၼႆႉတႄႉ ၵူၼ်းဝၢၼ်ႈလႆႈဢဝ်ငိုၼ်းပၼ်တီႈၵၢင်ႉၵႄႇၶဝ် ၵႂႃႇၸွႆႈၼၼ်ႉယဝ်ႉၶႃႈ။ ငိုၼ်းၼၼ်ႉၵၢင်ႉၵႄႇ ဢဝ်ၵႂႃႇပၼ်ၽႂ်တီႈလႂ်တႄႉ ဢမ်ႇလႆႈႁူႉၸွမ်း။ ”- ဝႃႈၼႆ ။
ၵူၼ်းဝၢၼ်ႈ ဢၼ်သိုၵ်း TNLA တီႉၺွပ်းပေႃႉထုပ်ႉ ၸဵပ်းႁႅင်းလႄႈ ဢၼ်လႆႈယူတ်းယႃႇတူဝ်ဝႆႉၼၼ်ႉပဵၼ် လုင်းၸၢႆး ဢႃယု 50 ပီ ပဵၼ်ၵူၼ်းဝၢၼ်ႈ ၵုင်းၵလႃး ပၢႆႈၽေးသိုၵ်းမႃးယူႇတီႈ ဝၢၼ်ႈၵျွင်းၵုင်း ၽွင်းပၢင်တိုၵ်း ၽႅၼ်ယၼ်သိုၵ်း ပွၵ်ႈၵမ်းၼိုင်ႈ ပီ 2023 ။
“လုင်းၸၢႆးၼၼ်ႉ ယွၼ်ႉၶဝ်ထုပ်ႉပေႃႉမင်လႄႈ သမ်ႉပေႃးၵမ်ႇဝႆႉတင်းတူဝ်၊ တီႈၶေႃႈမိုဝ်းၼၼ်ႉၵေႃႈ ႁွႆးၶဝ်ၶတ်းသေႃးမိုဝ်းဝႆႉ သမ်ႉပေႃးၵႂ်ႈပေႃးပွင်းလူင်ဝႆႉ။ တလဵဝ် လႆႈႁွင်ႉမေႃယႃ မႃးသမ်းၶဵမ်ပၼ် တီႈႁိူၼ်း ၊ ဢမ်ႇပွင်ႇၵႂၢမ်းၵၼ်ၵေႃႈပႃး ဢမ်ႇပေႃးမေႃလၢတ်ႈမေႃတွပ်ႇၵေႃႈႁင်းမၼ်းယူဝ်ႉ။ သိုၵ်းလွႆဢမ်ႇၶိုတ်းၸႂ်လႄႈ ပေႃႉပၼ်မၼ်းၼႆ ၶႂ်ႈၸဵပ်းႁႅင်းဝႆႉတူၺ်းတႄႉ ” – ၵူၼ်းဝၢၼ်ႈ လၢတ်ႈၼင်ႇၼႆ။
ၵဵဝ်ႇၵပ်းလွင်ႈၼႆႉ ၽူႈတွႆႇႁွၵ်ႈၶတ်းၸႂ်တိတ်းတေႃႇၸူး TNLA ယူႇၵေႃႈဢမ်ႇႁပ်ႉၾူၼ်း ဢမ်ႇတွပ်ႇပၼ်။
ဢၼ်ၶဝ်မႃးတီႉၵူၼ်းဝၢၼ်ႈႁဝ်းၶႃႈၼႆႉ ပဵၼ်ၶမ်ႈၶိုၼ်းဝၼ်းတီႈ 22/01/2025။ လႆႈၵႂႃႇၵူၼ်းဝၢၼ်ႈ 17 ၵေႃႉ။ ၼႂ်းၼၼ်ႉ ပႃးၼၢင်းယိင်း 5 ၵေႃႉ။ လုၵ်ႈဢွၼ်ႇယိင်း ဢႃယု 14 ပီ 2 ၵေႃႉ။ ၵူၼ်းၸၢႆးလဵၵ်ႉယႂ်ႇၼုမ်ႇထဝ်ႈ 10 ၵေႃႉ။
ၵူၼ်းဝၢၼ်ႈၵျွင်းၵုင်း ဢၼ်ၺႃးတီႉမတ်ႉၵႂႃႇပဵၼ် ၸၢႆးထူၺ်းမွင်ႇ၊ ၸၢႆးၵၢၼ်ႇၺုၼ်ႉ၊ ၸၢႆးၺုၼ်ႉဝုၼ်း၊ ၸၢႆးဢွင်ႇၸေႃႇ၊ ၸၢႆးဢွင်ႇဢွင်ႇ၊ ၸၢႆးဢွင်ႇသူၺ်ႇ၊ ၸၢႆးလႃႉဢူး – (7) ၵေႃႉ။ ၵူၼ်းဝၢၼ်ႈၼွင်ပဵတ်းသမ်ႉ 2 ၵေႃႉ။ ၵူၼ်းဝၢၼ်ႈဢၼ်ယူႇႁိမ်းသဵၼ်ႈတၢင်းရူတ်ႉၾႆးသမ်ႉ 2 ၵေႃႉ။ ၵူၼ်းဝၢၼ်ႈၵွင်းလၢင်း 4 ၵေႃႉ။ ၼႂ်းၼၼ်ႉ ပႃးလုၵ်ႈဢွၼ်ႇ ဢႃယု 14 ပီ 2 ၵေႃႉ။
ဝၢၼ်ႈလူင်ၵဵင် (ၵျွင်းၵုင်း) ၼႆႉ မီးၾၢႆႇၸၢၼ်းဝၢၼ်ႈၼွင်ပိင် ယၢၼ်ၵႆၵၼ် မွၵ်ႇ 1 လၵ်း မီးၼႂ်း ဢိူင်ႇပၢင်ပဝ်း ဝဵင်းၵျွၵ်ႉမႄး ။ ပဵၼ်ၼႃႈတီႈဢၼ် သိုၵ်း SSPP သိုၵ်း TNLA လႄႈ သိုၵ်းၽွမ်ႉႁူမ်ႈ PDF ၶဝ်ၵႂႃႇမႃးတူင်ႉၼိုင် ၵဵပ်းၶွၼ်ႇတီႈၵူၼ်းမိူင်း။ၵူၺ်းၵႃႈပေႃးၵူၼ်းမိူင်းထုၵ်ႇတီႉၺွပ်းပေႃႉထုပ်ႉပူၼ်ႉပႅၼ်သုၼ်ႇလႆႈၸိူင်ႉၼႆ ၽႂ်ၸုမ်းလႂ်ၵေႃႈဢမ်ႇႁပ်ႉပုၼ်ႈၽွၼ်းၵႅတ်ႇၶႄႁႄႉၵင်ႈပၼ်ၵူၼ်းဝၢၼ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ