ဝၼ်းတီႈ 7/3/2025 ယၢမ်းဝၢႆးဝၼ်း သိုၵ်းတဢၢင်း TNLA ၶဝ်ႈလုမ်းၵပ်းသၢၼ် ၸုမ်းသိုၵ်းၶၢင် KIO ဢၼ်မီးတီႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ၊ လိုပ်ႈသိုၵ်းၶၢင်ဢွၵ်ႇလုမ်း၊ တီႉသိုၵ်ၶၢင်ၵႂႃႇၽွင်ႈဝႃႈၼႆ။

 မိူဝ်ႈဝႃးယၢမ်းဝၢႆးဝၼ်းမွၵ်ႈ 5 မူင်းၼႆႉသိုၵ်းတဢၢင်း ဢဵၼ်ႁႅင်းမွၵ်ႈ 100 ႁွတ်ႈထိုင်လုမ်းၵပ်းသၢၼ် KIO တီႈဝဵင်းၵူတ်ႉၶၢႆသေ ဢုပ်ႇလၢတ်ႈထဵင်မေႃးၵၼ်ႁႅင်း ၼႆၵူၼ်းမိူင်းဝဵင်းၵူတ်ႉၶၢႆၵေႃႉၼိုင်ႈလၢတ်ႈၼင်ႇၼႆ။

“တီႈလုမ်းၵပ်းသၢၼ်ၼၼ်ႉမီးသိုၵ်းၶၢင်ပႂ်ႉဝႆႉ ဢိတ်းၼိုင်ႈၵူၺ်း။ သိုၵ်းတဢၢင်းမႃးထိုင်ယဝ်ႉလိုပ်ႈၶဝ်ၶိုၼ်ႈရူတ်ႉၵႃး။ သိုၵ်းၶၢင်သမ်ႉဢမ်ႇၶိုၼ်ႈသေ ထဵင်မေႃးၽိတ်းၵၼ် ထုပ်ႉတွႆႇၵၼ်။ၵူၼ်းၶဝ်ၼမ်လူး – သိုၵ်းၶၢင်ပႂ်ႉလုမ်းမီးမွၵ်ႈ 20 ၼႆႉၵူၺ်းလႄႇ။  ၶဝ်လၢၵ်ႈလိၵ်ႈသိုၵ်းၶၢင်ၶိုၼ်ႈၵႃးသေ ဢွၵ်ႇၵႂႃႇဢေႃႈ”

ၽႃႈၽႅၼ်ႇၶူဝ်းၸႂ်ႉတိုဝ်း လႄႈ ၽိုၼ်လိၵ်ႈၽိုၼ်လၢႆးသိုၵ်းၶၢင်တီႈလုမ်းၵပ်းသၢၼ်ၼၼ်ႉၵေႃႈ  သိုၵ်းတဢၢင်းယိုတ်းဢဝ်ၵႂႃႇပႃးမူတ်း ဝႃႈၼႆ။

လွင်ႈၼႆႉ ၵပ်းသိုပ်ႇၸူးၽူႈၶၢၼ်ပၢၵ်ႇသိုၵ်းၶၢင်လႄႈ သိုၵ်းတဢၢင်းၵေႃႈဢမ်ႇလႆႈ လႄႈ ဢမ်ႇလႆႈႁူႉႁူဝ်ယွႆႈတႅတ်ႈတေႃး။

 တီႈဝဵင်းၵူတ်ႉၶၢႆၼႆႉ မီးသိုၵ်းၶၢင် KIO  သိုၵ်းတဢၢင်း TNLA လႄႈ သိုၵ်းၵဝ်ႈၵၢင်ႉ MNDAA  ၸိူဝ်းၼႆႉတူင်ႉၼိုင်ယူႇသဝ်း။ ၵႆႉမီးပၼ်ႁႃၽိတ်းမေႃးၵၼ်။