လူင်ပွင်ၸိုင်ႈ ၽွမ်ႉႁူမ်ႈၸိူဝ်ႉၸၢတ်ႈ NUG ပိုၼ်ၽၢဝ်ႇဝႃႈ ၸူဝ်ႈသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃး ၶၢဝ်းတၢင်း 4 ပီၼႆႉ သိုၵ်းမၢၼ်ႈတင်း ပလိၵ်ႈ ဢၼ်ႁဵတ်း CDM တင်းမူတ်း မီး 15,000 ၵေႃႉ ဢၼ်ၶဝ်ႈႁူမ်ႈ ၸုမ်းလုၵ်ႉၽိုၼ်ႉသေ ၶိုၼ်းၶဝ်ႈပၢင်တိုၵ်း ပိုတ်းယိုဝ်းသိုၵ်းမၢၼ်ႈၶိုၼ်း မီး 480 ပၢႆ။

ၸိူဝ်းမႃးၶဝ်ႈႁူမ်ႈ တပ်ႉသိုၵ်းလုၵ်ႉၽိုၼ်ႉၼၼ်ႉ ၵမ်ႈၽွင်ႈ ၶဝ်ႈႁၢပ်ႇၵၢၼ် ၼႂ်းလုမ်းၼႂ်းၸႆး၊ ၵမ်ႈၽွင်ႈ ၶဝ်ႈႁၢပ်ႇၵၢၼ် ၼႂ်းႁွင်ႈၵၢၼ်ၾၢႆႇဝၢင်းၽႅၼ်ယၼ်ႇသိုၵ်း၊ ၵမ်ႈၽွင်ႈ ၶဝ်ႈပႃးၼႂ်းၾၢႆႇတိုၵ်းတေႃး ၵမ်းသိုဝ်ႈသေ ဢဝ်တီႈယူႇပဵၼ်ၽူႈ ၵွၼ်းတပ်ႉ ၸိူဝ်းၼႆႉဝႆႉၵေႃႈမီး – NUG ပိုၼ်ၽၢဝ်ႇဝႆႉၼင်ႇၼႆ။

ဢၼ်ႁဵတ်း CDM သၢၼ်ၶတ်းဢႃႇၼႃႇသိုၵ်း ၽွင်းငမ်းၼၼ်ႉတႄႉ ႁူဝ်ၼပ်ႉသိုၵ်း 3,872 ၵေႃႉလႄႈ ႁူဝ်ၼပ်ႉပလိၵ်ႈ 10,888 ၵေႃႉ ႁူမ်ႈသဵၼ်ႈ 14,760 ၵေႃႉ။ ၼႂ်းၼၼ်ႉ ပႃးၽူႈမီးၸၼ်ႉႁိမ်းၸမ် 500 ၵေႃႉ ပဵၼ်ၸၼ်ႉၸဝ်ႈသိုၵ်း 5 ၵေႃႉ၊ ၸၼ်ႉၸဝ်ႈႁၢၼ် 42 ၵေႃႉ၊ ၸၼ်ႉၶုၼ်သိုၵ်းလူင် 323 ၵေႃႉလႄႈ ၸၼ်ႉၶုၼ်သိုၵ်း 102 ၵေႃႉ။

ၼွၵ်ႈလိူဝ်ၼၼ်ႉ ယွၼ်ႉပၢင်တိုၵ်းတူဝ်ႈမိူင်းၼႆႉသေ ၼႂ်းၶၢဝ်းတၢင်းပီ 2024 ၼႆႉ ဢဵၼ်ႁႅင်းသိုၵ်းမၢၼ်ႈ လႆႈလူႉသုမ်း ၵႂႃႇ 2 မိုၼ်ႇပၢႆ၊ သိုၵ်းလုၵ်ႉၽိုၼ်ႉယိုတ်းလႆႈ 8 ဝဵင်း – NUG ပိုၼ်ၽၢဝ်ႇဝႆႉၼင်ႇၼႆ။

ဢၢင်ႈဢိင် – BBC