ၸဵမ်မိူဝ်ႈၽႅၼ်ယၼ်ႇသိုၵ်း 1027 တႄႇပဵၼ်မႃးၼၼ်ႉ ပၼ်ႁႃၼႂ်းၵႄႈသိုၵ်းၸၢဝ်းၶိူဝ်းၼင်ႇၵၼ်ၵေႃႈ မီးၼမ်ၶိုၼ်ႈမႃး။ မိူၼ်ၼင်ႇ ၼႂ်းၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇၼႆႉၵေႃႈ သိုၵ်းၵဝ်ႈၵၢင်ႉတင်း သိုၵ်းၶၢင် မီးလွင်ႈထဵင်မေႃးၵၼ် ၵဵဝ်ႇလူၺ်ႈလွင်ႈၶဝ်တူင်ႉၼိုင် ၼႂ်းပိုၼ်ႉတီႈသေ ဢမ်ႇႁၢၼ်ႉၸႂ်ၼိူဝ်ၵၼ်။ ၽႂ်ၵေႃႈဝႃႈ ပဵၼ်ၼႃႈတီႈၽႂ်မၼ်းသေ ထိုင်တီႈလူင်းမိုဝ်းႁဵတ်းႁၢႆႉတေႃႇၵၼ်ၶိုၼ်း။

ဝၼ်းတီႈ 22/12/2024 ၼႆႉ သိုၵ်းၵဝ်ႈၵၢင်ႉ MNDAA ဢမ်ႇၸႅင်ႈဢမ်ႇလၢတ်ႈသင်ဝႆႉလူင်ႈၼႃႈသေ ၶဝ်ႈ ၸူးထိုင် တပ်ႉပၢင်သဝ်းၸုမ်းပျီႇတူႉၸိတ်ႉ ဢၼ်ယူႇတႂ်ႈသိုၵ်း KIA ႁိမ်းဝၢၼ်ႈပၢင်ယၢင်းၶႃး ဢိူင်ႇမိူင်း ၸီး ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇၼၼ်ႉလႄႈ တင်းသွင်ၾၢႆႇ မီးလွင်ႈထဵင်မေႃးၵၼ် ထိုင်တီႈ လူင်းတိၼ်လူင်းမိုဝ်းႁဵတ်းႁၢႆႉတေႃႇၵၼ်။ ပၼ်ႁႃသိုၵ်းၸၢဝ်းၶိူဝ်းၼင်ႇၵၼ်ၼႆႉ ယူႇယူႇၵေႃႈ ၵႆႉပဵၼ်ၼႆ သေ ၵမ်ႈၼမ် တေပဵၼ်ယွၼ်ႉလုၵ်ႈၸုမ်းသိုၵ်းပႃႈတႂ်ႈဢမ်ႇပေႃးၶဝ်ႈၵၼ်။ ပေႃးပဵၼ်ၼၼ်မႃး ၵူၼ်း လူင်ၸၼ်ႉပႃႈၼိူဝ်ၶဝ် လႆႈႁွင်ႉဢုပ်ႇဢူဝ်းငူပ်ႉငီႉၵၼ်တႃႇသေႇ။ မၢင်ပွၵ်ႈ ၵေႃႈ ဢွၵ်ႇၶၢဝ်ႇ မၢင်ပွၵ်ႈ ၵေႃႈ ဢမ်ႇဢွၵ်ႇၶၢဝ်ႇၼႆ ၵူၼ်းမိူင်းၵူတ်ႉၶၢႆ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ၸႂ်ႈဢေႃႈ မၼ်းပဵၼ်သိုၵ်း MNDAA ၶဝ် ၵႂႃႇယႃႉၵဵတ်ႉလၢၼ်ႇ KIA ၼႆဢေႃႈ။ KIA ၶဝ်ၵေႃႈ ၶိုၼ်းထႅမ် ႁႅင်းသိုၵ်းသေ ၵႂႃႇယႃႉၵဵတ်ႉ MNDAA ၶဝ်ၶိုၼ်း။ ႁဵတ်းၼၼ်သေ ဢဝ်ၵွင်ႈထုပ်ႉပၼ်ၵၼ် ႁူဝ်ပေႃး တႅၵ်ႇၸိူဝ်းၼႆႉၼႆၶႃႈ။ ပဵၼ်ႁၢဝ်ႈႁႅင်းဝႆႉယူႇဢေႃႈၼၼ်ႉ။ ႁဵတ်းၼႆယဝ်ႉ ၾၢႆႇတႂ်ႈၽိတ်းၵၼ်သေ ၵူၼ်းလူင်သမ်ႉ ၶိုၼ်းဢုပ်ႇၵၼ် ႁဵတ်းၼႆတႃႇသေႇယဝ်ႉ”- ဝႃႈၼႆ။

တီႈဢိူင်ႇမိူင်းၸီး ၸႄႈဝဵင်းၵူတ်ႉၶၢႆၼႆႉ မီးၸုမ်းယိပ်းၵွင်ႈၵၢင်ႇ ဢၼ်ယူႇတႂ်ႈတပ်ႉၸုမ်း 10 ၶွင်သိုၵ်း ၶၢင် KIA ဝႆႉ 2 ၸုမ်း မိူၼ်ၼင်ႇ – ၸုမ်းပျီႇတူႉၸိတ်ႉ MHH လႄႈ ၸုမ်းၵႅတ်ႇၶႄပိုၼ်ႉတီႈ GMH (ဒေ သကာကွယ်ရေး) ၸဵမ်ၸိူဝ်းၼႆႉ။ ၸုမ်းၸိူဝ်းၼႆႉ ယူႇယူႇၵေႃႈ ၵႆႉမီးလွင်ႈတုမ်ႉတိူဝ်ႉၵၼ်တင်း သိုၵ်း ၵဝ်ႈၵၢင်ႉ MNDAA သေ တင်းသွင်ၾၢႆႇ ၵမ်းၵမ်းမီး လွင်ႈထဵင်မေႃးၵၼ်မႃးတႃႇသေႇ။ ၶၢဝ်းသိုၵ်းမၢၼ်ႈ ယိုတ်းမိူင်းၼႆႉ ၶႅၼ်းၵႆႉမီးပၼ်ႁႃယဝ်ႉၼႆ ၽူႈလဵပ်ႈႁဵၼ်းၵၢၼ်သိုၵ်း တီႈၵူတ်ႉၶၢႆ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“MHH ဢၼ်ဝႃႈၼႆႉ မၼ်းၵေႃႈ မိူၼ်တပ်ႉပႂ်ႉၵႅတ်ႇၶႄပိုၼ်ႉတီႈသႅၼ်းၼိုင်ႈယူႇ။ ပေႃးဢဝ်ၵႂၢမ်းၶၢင်ၶဝ် ဝႃႈတႄႉ ပွင်ႇဝႃႈပဵၼ်ၸုမ်းပျီႇတူႉၸိတ်ႉၼၼ်ႉယဝ်ႉ။ GMH တႄႉၵေႃႈ ၶဝ်တင်ႈၸိုဝ်ႈၸုမ်းၶဝ်ၼႂ်း ပိုၼ်ႉတီႈႁင်းၵူၺ်း။ လွင်ႈၼႆႉ ၸၢင်ႈပဵၼ်ပၼ်ႁႃၵၼ်မႃး ၼႂ်းၵၢၼ်ၽွင်းငမ်း ၸွမ်းၼႃႈတီႈ  ၸိူဝ်း ၼၼ်ႉၶႃႈဢေႃႈ။ ယွၼ်ႉဝႃႈ တၢင်းပွတ်းမိူင်းၸီး၊ မိူင်းၵူဝ်း ၸိူဝ်းၼႆႉၼႆ ၵူႈပွၵ်ႈၵေႃႈ ယၢမ်ႈမီးတပ်ႉပၢင် သဝ်း ဢၼ်ယူႇတႂ်ႈတပ်ႉမႁႃ မၢႆ 10 ၶွင်သိုၵ်းၶၢင် KIA ၶဝ်ယူႇဝႆႉၶႃႈလူးၼေႃႈ။ မိူဝ်ႈဢွၼ်တၢင်းတႄႉ ၶဝ်ပွင်ႇၸႂ်ၵၼ်လီယူႇ။ ဝၢႆးၼႆႉသမ်ႉ ၽႂ်ၵေႃႈ ၶႂ်ႈလႆႈၼႃႈတီႈလႄႈ ၾၢႆႇၸၼ်ႉၼိူဝ်ၶဝ်တႄႉ ဢမ်ႇမီး ပၼ်ႁႃသင်သေတႃႉ သိုၵ်းၸၼ်ႉတႂ်ႈၶဝ်တႄႉ မီးလိူင်ႈၵၼ်မႃးတင်းသိုၵ်းၵဝ်ႈၵၢင်ႉ ယူႇယဝ်ႉ”- ဝႃႈၼႆ။

မိူဝ်ႈလိူၼ်ဢွၵ်ႊထူဝ်ႊပိူဝ်ႊ ပူၼ်ႉမႃးၼၼ်ႉ ပွတ်းတၢင်းမူႇၸေႊ သႅၼ်ဝီ ၸိူဝ်းၼႆႉၵေႃႈ သိုၵ်းၶၢင် KIA လႄႈ သိုၵ်းၵဝ်ႈၵၢင်ႉ MNDAA မီးလွင်ႈထဵင်ၵၼ် ဢမ်ႇယွမ်း 3 ပွၵ်ႈ။ ၽွင်းၶဝ်လတ်းၽၢၼ်ႇၵႂႃႇမႃးသေ ႁူပ်ႉၸုၼ်ၽႃႇၺႃးၵၼ်လႄႈ လႆႈပိုတ်းယိုဝ်းၵၼ်။ ၶၢဝ်းတၢင်း ၽႅၼ်ယၼ်ႇသိုၵ်း 1027 တႄႇမႃးပီပၢႆၼႆႉ ၵဵဝ်ႇလူၺ်ႈ ၼႃႈတီႈလႅၼ်လိၼ်ၸိူဝ်းၼႆႉသေ ၸုမ်းဢူၺ်းလီပွတ်းႁွင်ႇၼင်ႇၵၼ် မိူၼ်ၼင်ႇ သိုၵ်းၵဝ်ႈၵၢင်ႉ၊ သိုၵ်းတဢၢင်း ၸိူဝ်းၼႆႉၵေႃႈ မီးပၼ်ႁႃၵၼ်မႃးၶိူဝ်းယႂ်း။

မိူဝ်ႈဝၼ်းတီႈ 23/4/2024 ၼၼ်ႉၵေႃႈ လုၵ်ႈၸုမ်းသိုၵ်းၵဝ်ႈၵၢင်ႉ MNDAA ဢဝ်ၶေႃႈဢၢင်ႈဢၼ်ဝႃႈ ၸၼ်ႉပႃႈၼိူဝ်သင်ႇမႃးၼႆသေ ၵႂႃႇယိုတ်းဢဝ်လုမ်းၵေႃလိၵ်ႈလၢႆးလႄႈၾိင်ႈငႄႈၶၢင် ဢၼ်ပၵ်းဝႆႉၼႂ်း ပွၵ်ႉ 4 တီႈဝဵင်းမိူင်းၵူဝ်း ၸႄႈတွၼ်ႈမူႇၸေႊ။ ဢၼ်သိုၵ်းၶၢင်ၶဝ် ဢၢၼ်းႁဵတ်းဢွင်ႈတီႈၼႄၾိင်ႈ ထုင်းၶၢင် (မနောကွင်း) တီႈၼႂ်းမိူင်းၵူဝ်းၼၼ်ႉ ၵေႃႈ သိုၵ်းၵဝ်ႈၵၢင်ႉႁႄႉႁၢမ်ႈသေ သၢႆးမၢၵ်ႇႁိၼ် ဢၼ်ၵွင်ဝႆႉ တႃႇၵေႃႇသၢင်ႈ ၸိူဝ်းၼႆႉၵေႃႈ ႁႂ်ႈတေႃႉၶၢႆႉတင်းသဵင်ႈ ၼႆယဝ်ႉ။ ဢိင်ၼိူဝ်ပၼ်ႁႃ ဢၼ်ၼႆႉၵေႃႈ ထိုင်မိူဝ်ႈလဵဝ် ၵႄႈလိတ်ႈပႆႇယဝ်ႉ ဝႃႈၼႆ။

ဝၼ်းတီႈ 09/12/2024 ၼႆႉၵေႃႈ မီးၶၢဝ်ႇလိုဝ်းဢွၵ်ႇမႃးဝႃႈ သိုၵ်းတဢၢင်း TNLA ယိုၼ်ႈလိၵ်ႈထိုင် သိုၵ်းၶၢင် KIA ထွႆ ဢွၵ်ႇမိူင်းမိတ်ႈ၊ ဝၼ်းတီႈ 15/12/2024 ႁႂ်ႈပဵၼ်ဝၼ်းလိုၼ်းသုတ်း ၼႆယဝ်ႉ။ တႃႇယိုၼ်ယၼ်လႆႈၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူးၽူႈၶၢၼ်ပၢၵ်ႇ တင်းသွင်ၾၢႆႇဝႆႉယူႇၵေႃႈ ပႆႇႁပ်ႉတွပ်ႇသင်ပၼ်။

သိုၵ်း MNDAA , TNLA , KIA , SSPP ၸိူဝ်းၼႆႉ ပဵၼ်လုၵ်ႈၸုမ်း FPNCC ၶွမ်ႊမတီႊ ဢုပ်ႇဢူဝ်းလွင်ႈ ငမ်းယဵၼ် မိူင်းႁူမ်ႈတုမ် ဢၼ်ဝႃႉ UWSA ဢွၼ်ႁူဝ်ၼၼ်ႉၼင်ႇၵၼ်သေတႃႉၵေႃႈ ယူႇယူႇၵေႃႈ မီးလွင်ႈတုမ်ႉတိူဝ်ႉသၢၼ်ၶတ်း ၵၼ်မႃး။ ၶၢဝ်းတၢင်းယၼ်ႇသိုၵ်း 1027 ၼႆႉ ယိင်ႈၶႅၼ်းမီးပၼ်ႁႃၵၼ်ၵဵဝ်ႇ လူၺ်ႈၼႃႈတီႈဢၼ်ၶဝ်ယၢမ်ႈၵုမ်းၵမ်။ လွင်ႈၸိူဝ်းၼႆႉ တူၵ်းလွၵ်းသိုၵ်းမၢၼ်ႈ ထုၵ်ႇၸႂ်သိုၵ်းမၢၼ်ႈ ယိုတ်းမိူင်း ၵူၺ်းယဝ်ႉၼႆ ၵူၼ်းၼုမ်ႇၽူႈလဵပ်ႈႁဵၼ်းၵၢၼ်မိူင်း ၵေႃႉၼိုင်ႈလၢတ်ႈ။