ၽွင်းသိုၵ်းလွႆတဢၢင်း TNLA ပိုၼ်ၽၢဝ်ႇပဵၼ်တၢင်းၵၢၼ်ဝႃႈတေဢုပ်ႇလွင်ႈၵိုတ်းတိုၵ်းၵၼ်တင်းသိုၵ်းမၢၼ်ႈ၊ ၶမ်ႈလိူၼ် 12 လပ်း ၶမ်ႈႁပ်ႉပီမႂ်ႇတႆး ယၢမ်းႁူဝ်ၶမ်ႈ ၶိူင်ႈမိၼ်သိုၵ်းမၢၼ်ႈမႃးပွႆႇမၢၵ်ႇသႂ်ႇတီႈ ဝၢၼ်ႈ ၼႂ်းၸႄႈဝဵင်းၵျွၵ်ႉမႄး တူၵ်းသႂ်ႇႁေႃၼၢႆးၶၢဝ် ၵူၼ်းဝၢၼ်ႈလႄႈ ၼၢႆးၶၢဝ် တၢႆ 10 ပၢႆ မၢတ်ႇၸဵပ်း 20 ပၢႆ။
ဝၼ်းတီႈ 30/11/2024 လိူၼ်သိပ်းသွင်လပ်း ယၢမ်းႁူဝ်ၶမ်ႈ 6 မူင်းၶိုင်ႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတူၵ်းသႂ်ႇ တီႈၼိူဝ်လွႆပဝ်း(ဢိၼ်ႇၵျိၼ်းတွင်ႇ) ဢၼ်မီးၼႂ်းပွၵ်ႈ ထူင်းၽူဝ်ႇ ဝဵင်းၵျွၵ်ႉမႄး။
“ မၢၵ်ႇတူၵ်းသႂ်ႇၼိူဝ်ႁေႃၼၢႆးၶၢဝ်လီလီ ။ ႁိူၼ်းယေးႁိမ်းၶၢင်ႈၼၼ်ႉၵေႃႈၵွႆ။ ၼၢႆးၶၢဝ်ၵေႃႈတၢႆ ၵူၼ်းဝၢၼ်ႈၵေႃႈတၢႆ။ တၢႆ 10 ပၢႆ။ မၢတ်ႇၸဵပ်းမီး 20 ပၢႆ။ လိၼ်ဝႃႇႁိူၼ်းဝႃႇၵူၼ်ႇတဵင်သႂ်ႇ ၵူၼ်းၶမ်ဝႆႉတႂ်ႈမၼ်းဢဝ်ၵၼ်ဢွၵ်ႇယၢပ်ႇ ။ မၢတ်ႇၸဵပ်းႁႅင်းလႄႈ တေႃႉသူင်ႇႁူင်းယႃယဝ်ႉ။ ၵမ်ႈၽွင်ႈမၢတ်ႇၸဵပ်းႁႅင်းၼႃႇ ထိုင်တီႈလီမႆႈၸႂ် တေႃႇထိုင် ၵၢင်ၶမ်ႈ 8 မူင်းၼႆႉၾႆးမႆႈႁိူၼ်းယေး ၵျွင်းၼၢႆးၶၢဝ်ယင်းပႆႇမွတ်ႇ“ – ၵူၼ်းမိူင်းၵျွၵ်ႉမႄး လၢတ်ႈၼင်ႇၼႆ။
တီႈယွမ်ႇၼိူဝ်လွႆၼၼ်ႉ မိူဝ်ႈၵူႈပွၵ်ႈ ပဵၼ်တီႈယူႇ သိုၵ်းမၢၼ်ႈ။ ယၢမ်းလဵဝ် TNLA ပိုၼ်ၽၢဝ်ႇဝႃႈ ယိုတ်းလႆႈဝဵင်းၵျွၵ်ႉမႄးယဝ်ႉၼႆလႄႈ သိုၵ်းမၢၼ်ႈၵေႃႈဢမ်ႇမီးယဝ်ႉ။ ယွၼ်ႉသင်လႄႈသိုၵ်းမၢၼ်ႈ ဢဝ်ၶိူင်ႈမိၼ်မႃးပိုတ်းယိုဝ်းတီႈဝၢၼ်ႈၼၼ်ႉတႄႉ ဢမ်ႇပႆႇႁူႉတႅတ်ႈတေႃးၵူၼ်းၵျွၵ်ႉမႄးလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ