ၵူၼ်းပၢႆႈၽေးသိုၵ်း ဢၼ်မႃးသွၼ်ႈယူႇဝႆႉတီႈ ၼႂ်းၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်းၼၼ်ႉ လႆႈၵူႈယိုမ်ငိုၼ်းတွင်းသေ မႃးၵႄႈလိတ်ႈပၼ်ႁႃ – ႁႃၵိၼ်လဵင်ႉတွင်ႉ။

သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း တင်းတပ်ႉသိုၵ်းၽွမ်ႉႁူမ်ႈ လုၵ်ႉၽိုၼ်ႉယၢင်းလႅင် ပိုတ်းယိုဝ်းၵၼ် ႁၢဝ်ႈႁႅင်း ၼႂ်း ၸႄႈဝဵင်းပၢင်လွင်း တႄႇၼႂ်းၵၢင်လိူၼ်ဢွၵ်ႊထူဝ်ႊပိူဝ်ႊမႃး ယၢမ်းလဵဝ် သိုၵ်ႈမၢၼ်ႈၵႆႉ ဢဝ်ၶိူင်ႈမိၼ်မႃး ပၼ်ႇလဵပ်ႈၸွမ်းဝၢၼ်ႈသေ ပွႆႇမၢၵ်ႇတူၵ်းသႂ်ႇၵူႈဝၼ်း ယွၼ်ႉၼၼ် ၵူၼ်းဝၢၼ်ႈဢွၼ်ၵၼ် ပၢႆႈ ၵႂႃႇတၢင်းၸႄႈဝဵင်းယွင်ႁူၺ်ႈ ႁူဝ်ၵူၼ်းမီးၸမ်ႁဵင် ဝႃႈၼႆ။

ယၢမ်းလဵဝ် ယွၼ်ႉဢမ်ႇမီးၵၢၼ်ငၢၼ်း၊ ၸဝ်ႈတႃႇၼၵေႃႈ ဢမ်ႇမီးလႄႈ လႆႈၵူႈငိုၼ်းသေ ၵႄႈလိတ်ႈပၼ်ႁႃ လဵင်ႉတွင်ႉဝႆႉၼႆ ၵူၼ်းၸၢႆး ပၢႆႈၽေးသိုၵ်း မႃးမီးဝႆႉတီႈဝဵင်းယွင်ႁူၺ်ႈ လၢတ်ႈၽူႈတွႆႇႁွၵ်ႈၼင်ႇၼႆ။

“ၵၢၼ်ၵေႃႈဢမ်ႇမီး၊ ႁႃၵၢၼ်ၵေႃႈ ယၢပ်ႇၼႃႇ။ လူဝ်တၢင်းၸွႆႈထႅမ်ၼႃႇဢေႃႈ၊ ဢၼ်ယူႇဝႆႉယၢမ်းလဵဝ်သမ်ႉ ၵႆၵေႃႈၵႆဝဵင်းလႄႈ ၶႅၼ်းယၢပ်ႇၸႂ်၊ တႃႇတေၵႂႃႇမႃးၵေႃႈယၢပ်ႇ၊ တႃႁႃၵိၼ်လဵင်ႉတွင်ႉၼႆႉ လႆႈၵူႈငိုၼ်းၵူၼ်းဝၢၼ်ႈဢေႃႈ၊ ပေႃးၵႂႃႇႁဵတ်းၵၢၼ် လႆႈငိုၼ်းမႃးဢိတ်းဢွတ်း ၸင်ႇမႃးတႅၼ်းၼီႈသၢႆႈၼီႈ ၶိုၼ်းဢေႃႈ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်မႃးမီးယူႇဝႆႉ တီႈၼႂ်းဝဵင်းယွင်ႁူၺ်ႈၼႆႉ ပဵၼ်ၵူၼ်းတၢင်း ၸႄႈဝဵင်းပၢင်လွင်း ဢၼ်လုၵ်ႉ တၢင်းဝၢၼ်ႈမွၵ်ႇ၊ ၵုင်းပဝ်း၊ လွႆဝူဝ်း  ၸိူဝ်းၼႆႉမႃး။ ယၢမ်းလဵဝ် မႃးသွၼ်ႈယူႇဝႆႉ တီႈၵျွင်းမုၼ်ၸဝ်ႈလႄႈ ႁူင်းႁေႃးၵၢင်ဝဵင်း ၼႂ်းဝဵင်းယွင်ႁူၺ်ႈ၊ ပၢင်လွင်းလႄႈ တၢင်းဝၢၼ်ႈၸၢၼ်းယေႇၵျီႇ၊ ဝၢၼ်ႈႁၢႆးသၢၵ်ႇ၊ ဝၢၼ်ႈၼႃးမွၼ် ၸိူဝ်းၼႆႉ။ 

ၵူၼ်းၸၢႆး ဢႃယု 40 ပီ ဢၼ်ပၢႆႈၽေးသိုၵ်းဝႆႉၼၼ်ႉ လၢတ်ႈၽူႈတွႆႇႁွၵ်ႈဝႃႈ -“ၵၢၼ်ႁႃၵိၼ်ဝၼ်းလႂ်ဝၼ်းၼၼ်ႉၵေႃႈ 1 ဝူင်ႈၼႆႉ တေမီးမွၵ်ႈ 1 ဝၼ်းၼႆႉၵူၺ်း၊ ၼိုင်ႈဝၼ်းလႆႈငိုၼ်း 9,000 ပျႃး၊ ၶိုၼ်းဢဝ် မႃးသိုဝ်ႉ ၵိၼ်ၶဝ်ႈ 1 ပေႇလႆႈပၼ် 6,000 ပျႃးယဝ်ႉ။ သိုဝ်ႉၶဝ်ႈၵေႃႈ သဵင်ႈယဝ်ႉၶႃႈ၊ ဢၼ်တီႈႁဝ်းမႃးယူႇၼႆႉ ဝၢၼ်ႈသမ်ႉလဵၵ်ႉ။ ၵူၼ်းပၢႆႈၽေးသိုၵ်းသမ်ႉ မႃးယူႇသမ်ႉၼမ်။ ၵၢၼ်သမ်ႉဢေႇ၊ တႃႇႁႃၵိၼ်လဵင်ႉတွင်ႉယၢပ်ႇၽိုတ်ႇ။ ၵႃႈလႆႈၵႂႃႇၵူႈၵိၼ်ၶဝ်ႈ ၼမ်ႉမီႇ ၼမ်ႉမၼ်း တီႈၵူၼ်းဝၢၼ်ႈဢေႃႈ”- ဝႃႈၼႆ။

ယွၼ်ႉဢမ်ႇမီးၵၢၼ်ငၢၼ်း ဢမ်ႇမီးငိုၼ်းၶဝ်ႈလႄႈ လုၵ်ႈဢွၼ်ႇၵူၼ်းလူင် ပေႃးၸဵပ်းမႆႈၶႆႈၼၢဝ်မႃး ဢမ်ႇၸၢင်ႈႁဵတ်းႁိုဝ် ၵႂႃႇယူတ်းယႃ။ ပဵၼ်ဢၼ်ယၢပ်ႇၽိုတ်ႇၵိၼ်းၸႂ်တႄႉယဝ်ႉ မၼ်းၸၢႆးသိုပ်ႇလၢတ်ႈၼင်ႇၼႆ။ 

“တီႈဝၢၼ်ႈဢၼ်မႃးယူႇၼႆႉ ဢမ်ႇမီးႁူင်းယႃႇ၊ ပေႃးပဵၼ်ၶႆႈၼၢဝ်ၵေႃႈ လႆႈမိူဝ်းယႃ တၢင်းပၢင်လွင်း ၊ ၼွင်တရႃး ၸိူဝ်းၼႆႉ။ ၵၢၼ်ၵေႃႈဢမ်ႇမီး ၵႃႈၵႃးၵေႃႈ ၵႃႈၼႃႇၶႃႈ၊ လုၵ်ႉတီႈဝၢၼ်ႈၼႆႉသေၵႂႃႇ ပၢင်လွင်း ၵႃႈၵႃးသဵင်ႈ  4 -5 မိုၼ်ႇ၊ ၵႆၵၼ်မွၵ်ႈ 15 လၵ်းၼႆႉၶႃႈလူး။ ယွၼ်ႉၼၼ် ပေႃးပဵၼ်ဝတ်းဢႆ ၶႆႈၼၢဝ်ၵေႃႈ ဢမ်ႇၸၢင်ႈယူတ်းယႃတူဝ်ၶႃႈ”- ဝႃႈၼႆ။

ယၢမ်းလဵဝ် ၼႂ်းဝဵင်းပၢင်လွင်း ပၢင်တိုၵ်း ယဵၼ်ဝႆႉယူႇသေတႃႉ သိုၵ်းမၢၼ်ႈတင်း ပျီတူႉၸိတ်ႉပဢူဝ်း ပႆႇပၼ်ၵူၼ်းဝၢၼ်ႈ ပွၵ်ႈမိူဝ်းယူႇၶိုၼ်းတီႈႁိူၼ်းၼႆ ၵူၼ်းပိုၼ်ႉတီႈ လၢတ်ႈၼင်ႇၼႆ။  

တႄႇဢဝ် ဝၼ်းတီႈ 03/10/2024 မႃး သိုၵ်းမၢၼ်ႈလႄႈ ပျီႇတူႉၸိတ်ႉပဢူဝ်း PNO တင်း တပ်ႉၽွမ်ႉႁူမ်ႈ လုၵ်ႉၽိုၼ်ႉယၢင်းလႅင် ယိုဝ်းၵၼ် ၼႂ်းၸႄႈဝဵင်းပၢင်လွင်း။ ၵူၼ်းမိူင်း တႃႇ 13 ဝၢၼ်ႈ ပၢႆႈၽေးသိုၵ်း ႁူဝ်ၼပ်ႉၵူၼ်းတင်းမူတ်း ဢမ်ႇယွမ်း 2 မိုၼ်ႇ ဝႃႈၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)