ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ သိုၵ်းတႆး SSPPလႄႈ သိုၵ်းတဢၢင်း TNLA ၶဵင်ႈၶႅင်ၵၢၼ်သိုၵ်းတေၢႇၵၼ်ႁၢဝ်ႈႁႅင်း ၵူၼ်းမိူင်းၵူဝ်ပဵၼ်ပၢင်တိုၵ်းလဵၵ်ႉၼႂ်းၵႄႈပၢင်တိုၵ်းယႂ်ႇ။
ဢၼ်သိုၵ်း 2 ၸုမ်းၶဵင်ႈၶႅင်ၵၼ်ၼႆႉ ပဵၼ်တၢင်းဝၢၼ်ႈၼွင်ပိင် ၸႄႈဝဵင်းၵျွၵ်ႉမႄး ။ ၵူၼ်းၸမ်ၸႂ် သိုၵ်း တင်းသွင်ၸုမ်းလၢတ်ႈတီႈၽူႈတွႆႇႁွၵ်ႈဝႃႈ – ပဵၼ်ၵူၼ်းတၢင်းတႂ်ႈမၼ်းၶဵင်ႈၶႅင်တေႃႇၵၼ်မိူၼ်ၵူႈပွၵ်ႈၵူၺ်းဝႃႈၼႆ။
ၼၢင်းယိင်းသႅၼ်းပၢၼ်ပႃႈ ၵေႃႉၼိုင်ႈလၢတ်ႈဝႃႈ-“တႃႇတေပဵၼ်ပၢင်တိုၵ်းယႂ်ႇလူင်တႄႉ ယၢမ်းလဵဝ်တႄႉ လႅပ်ႈပႆႇပဵၼ်လႆႈ။ ၵူၺ်းၵႃႈ လွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်၊ လွင်ႈၶွင်ႉၶမ်ၵၼ် မီးပၼ်ႁႃတေႃႇၵၼ်ၸိူဝ်းၼႆႉတႄႉမီးယူႇၵူႈၶၢဝ်းယၢမ်းဢေႃႈ ။ ၸၢင်ႈပဵၼ်လႆႈၵေႃႈ ယိုဝ်းၵၼ်ထွင်ႉထွင်ႉထႅင်ႉထႅင်ႉၵူၺ်းၶႃႈဢိူဝ်ႈ။ ၵူၼ်းတၢင်းတႂ်ႈမၼ်းၵူၺ်းၶႃႈၼႃႇ မီးပၼ်ႁႃတေႃႇၵၼ်။ ၵူၼ်းတၢင်းၼိူဝ်မၼ်းတႄႉပိူၼ်ႈဢုပ်ႇၵၼ်ယူႇတႃႇသေႇ”- ဝႃႈၼႆ။
လွင်ႈၶဵင်ႈၶႅင်ၵၢၼ်သိုၵ်းၵၼ်ယၢမ်းလဵဝ်ၵေႃႈ ယူႇတီႈၽူႈတွႆႇႁွၵ်ႈ ၵပ်းသိုပ်ႇၸူး တင်းသွင်တပ်ႉၸုမ်းယူႇၵေႃႈ ၵပ်းသိုပ်ႇဢမ်ႇလႆႈ။
တီႈဝဵင်းၵျွၵ်ႉမႄးၼႆႉၵေႃႈ ယွၼ်ႉသိုၵ်းမၢၼ်ႈလႄႈသိုၵ်းၵႅတ်ႇၶႄၵူၼ်းမိူင်း သိုၵ်းတဢၢင်း ပိုတ်းယိုဝ်းတိုၵ်းတေႃးၵၼ်ႁၢဝ်ႈႁႅင်းလႄႈၵူၼ်းမိူင်းလႆႈပၢႆႈၽေးသိုၵ်းဝႆႉ တေႃႇထိုင်ယၢမ်းလဵဝ်ပႆႇၸၢင်ႈပွၵ်ႈၶိုၼ်းႁိူၼ်းယေး။
ၼၢင်းယိင်းၼုမ်ႇၵူၼ်းမိူင်းၵျွၵ်ႉမႄး လၢတ်ႈဝႃႈ-“ ပၢင်တိုၵ်းယႂ်ႇတႄႉႈပႆႇပဵၼ်။ ၵူၺ်းၵႃႈႁဝ်းၶႃႈတႄႉ ယၢမ်ႈယူႇၼႂ်းၵႄႈပၢင်တိုၵ်းလူင်မႃးလႄႇ။ ၵႃႈပဵၼ်ၶူဝ်းလမ်ႇလွင်ႈတႄႉႁၢင်ႈႁႅၼ်းၵဵပ်းဝႆႉယဝ်ႉတူဝ်ႈလီငၢမ်း။ပေႃးသဵင်ပိုတ်းယိုဝ်းၵၼ်ၶဝ်ႈဝၢၼ်ႈမႃးၵေႃႈလူဝ်ႇလႆႈဢဝ်ၶူဝ်းသေပၢႆႈၵူၺ်းယဝ်ႉၼႃႇွ တေပဵၼ်မႃးၸိူင်ႉႁိုဝ်တႄႉတႄႉ ႁဝ်းတမ်ႉဢမ်ႇႁူႉလႆႈ”- ဝႃႈၼႆ။
ၽွင်းပၢင်တိုၵ်းပဵၼ်ႁႅင်းၼၼ်ႉၵူၼ်းမိူင်းပၢႆႈဢွၵ်ႇဝဵင်းၵႂႃႇယူႇတၢင်ႇတီႈ။ ၽိူဝ်ႇပၢင်တိုၵ်းယဵၼ် ၵူၼ်းမိူင်းပွၵ်ႈတူၺ်းၶိုၼ်းႁိူၼ်းယေး။ သမ်ႉၺႃးသိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇလႄႈ ႁိူၼ်း လူႉၵွႆမူၼ်း ။ ဢမ်ႇၸၢင်ႈၵႂႃႇယူႇတီႈလႂ် ယူႇၸွမ်းဝတ်ႉဝႃးၽႃသိူဝ်ႇၵူၺ်း။
TNLA ပိုၼ်ၽၢဝ်ႇဝႃႈ ပၢင်တိုၵ်းတႃႇယိုတ်းၸႄႈဝဵင်းၵျွၵ်ႉမႄးၼႂ်းၶၢဝ်းတၢင်း 2 လိူၼ်ၼႆႉ ၶိူင်ႈၵွင်ႈလူင် လႄႈၶိူင်ႈမိၼ်သိုၵ်းမၢၼ်ႈမႃးပွႆႇမၢၵ်ႇ။ တူၵ်းတႅၵ်ႇတိူဝ်ႉသႂ်ႇႁိူၼ်းယေး 300 ၵၢႆ၊ ဢၼ်တၢႆၵႂႃႇယွၼ်ႉပၢင်တိုၵ်းမီး 80 ပၢႆ၊ ႁိူၼ်းယေးၵူၼ်းမိူင်းၵူၼ်ႇပင်းလူႉၵွႆ 300 ပၢႆ။
