ႁၢင်လိူၼ်ၵျုၼ်ႊၼႆႉ ၸုမ်းပျီႇတူႉၸိတ်ႉ ပဢူဝ်း PNO ဢၼ်ယူႇတႂ်ႈသိုၵ်းမၢၼ်ႈ ယိုတ်းမိူင်း ၵုမ်းၵမ် ၸီႉသင်ႇ ၵၢင်ႉ ၵႄႇၼႂ်းထုင်ႉပူင်း ႁႂ်ႈသူင်ႇၵူၼ်းမႂ်ႇပၼ် တႃႇၾိုၵ်းၵၢၼ်သိုၵ်း ၼိုင်ႈဝၢၼ်ႈလႂ် တေဢမ်ႇလႆႈယွမ်း 4 ၵေႃႉ။ ဝၢၼ်ႈလႂ် ဢမ်ႇပၼ်လႆႈသမ်ႉ ၵဵပ်းငိုၼ်းၼပ်ႉႁူဝ်သိပ်းသႅၼ်ပျႃး။ ၼႂ်းငဝ်းလၢႆးၵၢၼ်သိုၵ်း ၵၢၼ်မိူင်းဢမ်ႇလီ ပၢႆးမၢၵ်ႈမီးတူၵ်း ႁႃၵိၼ်လဵင်ႉတွင်ႉယၢပ်ႇ ၸိူင်ႉၼႆ သမ်ႉတဵၵ်းၵဵပ်း ငိုၼ်းတီႈ ၵူၼ်းမိူင်းထႅင်ႈ ႁဵတ်းႁႂ်ႈၵူၼ်းမိူင်း ယူႇယၢပ်ႇၵိၼ်းၸႂ် တေသိုပ်ႇယူႇၵေႃႈယၢပ်ႇ တေပၢႆႈပႅတ်ႈၵေႃႈၵိၼ်း ၼႆယဝ်ႉ။

ထုင်ႉပူင်း (ဢမ်ႇၼၼ်) ထုင်ႉတၢမ်ၽၢၵ်ႇၼႆႉ တေမီးဝႆႉပဵၼ် 3 တွၼ်ႈ ၊ တွၼ်ႈၼိုင်ႈယူႇၼႂ်းၸႄႈဝဵင်း ႁူဝ်ပူင်း ၊ တွၼ်ႈ ၼိုင်ႈ ယူႇၼႂ်းၸႄႈဝဵင်းသီႇသႅင်ႇလႄႈ ထႅင်ႈတွၼ်ႈၼိုင်ႈ ယူႇၼႂ်းၸႄႈဝဵင်းၵျွၵ်ႉတလူင်း ၸႄႈတွၼ်ႈတူၼ်ႈတီး ၸိုင်တႆးပွတ်းၸၢၼ်း ။

ဢၼ်ၸုမ်း PNO လႄႈ သိုၵ်းမၢၼ်ႈ ၵဵပ်းၵူၼ်းၼုမ်ႇၵႂႃႇၾိုၵ်းၵၢၼ်သိုၵ်း၊ ၽႂ်ဢမ်ႇပၼ်ၵူၼ်းလႆႈသမ်ႉ ၵဵပ်းငိုၼ်း။ ၼႆႉပဵၼ် ဝၢၼ်ႈဢၼ်ယူႇသၢပ်ႇၼမ်ႉတၢမ်ၽၢၵ်ႇ ၾင်ႇတၢင်းတူၵ်း မိူၼ်ၼင်ႇ – ဝၢၼ်ႈတူၼ်ႈမူင်ႈ၊ ဝၢၼ်ႈႁူဝ်တၢတ်ႇ၊ ဝၢၼ်ႈ ႁၢင်လွႆး၊ ဝၢၼ်ႈသီႇသုင်ႇ၊ ဝၢၼ်ႈတိုဝ်ႉႁိူဝ်း၊ ဝၢၼ်ႈၸဝ်ႈမိူင်း၊ ဝၢၼ်ႈ ၶႂၢင်၊ ဝၢၼ်ႈယေႇဝုၼ်း၊ ဝၢၼ်ႈၼွၵ်ႈမၢၵ်ႇၵဵင်ႁွမ် ၸဵမ်ၸိူဝ်းၼႆႉ။ ၼႂ်းၼၼ်ႉ မၢင်ဝၢၼ်ႈလႆႈပၼ်ငိုၼ်း မၢင်ဝၢၼ်ႈ လႆႈပၼ်ၵူၼ်း။

မိူၼ်ၼင်ႇ ၵူၼ်းၼႂ်းဢိူင်ႇၼမ်ႉၵူတ်ႉ ယူႇတွၼ်ႈတၢင်းၼိူဝ် တၵ်းလႆႈပၼ်ၵူၼ်း –  ၼိုင်ႈဝၢၼ်ႈလႂ် 4 ၵေႃႉ။ ပေႃးဢမ်ႇ ၸၢင်ႈပၼ်ၵူၼ်း တႃႇၼိုင်ႈၵေႃႉ တေလႆႈပၼ် 40 သႅၼ်ပျႃး။ ၵူၼ်းဝၢၼ်ႈဢမ်ႇမီး ငိုၼ်းပၼ်လႄႈ ၵႃႈလႆႈသူင်ႇလုၵ်ႈလၢင်းၵႂႃႇၾိုၵ်းၵၢၼ်သိုၵ်း ၼႂ်းၵႄႈလွင်ႈယၢပ်ႇၽိုတ်ႇလၢႆလွင်ႈ။ ၵူၼ်းထုင်ႉပူင်းလၢတ်ႈၼႄၼင်ႇၼႆ –

“ၸုမ်း PNO ၶဝ် ႁႂ်ႈၵႂႃႇၾိုၵ်းၵၢၼ်သိုၵ်း 1 ဝၢၼ်ႈလႂ် 4-5 ၵေႃႉ။ တေလႆႈဝႃႈ ဝၢၼ်ႈဢၼ်ယူႇ တၢင်းတူၵ်း ၼမ်ႉၼၼ်ႉ ဢေႃႈ။ ၶဝ်လၢတ်ႈဝႃႈ တေႁွင်ႉၵႂႃႇၾိုၵ်းဝႆႉ တႃႇၵႅတ်ႇၶႄဢိူင်ႇဝၢၼ်ႈၽႂ်မၼ်းၵူၺ်းၼႆ ဢေႃႈ။ ပေႃးဢမ်ႇၵႂႃႇသမ်ႉဝႃႈ ၼိုင်ႈၵေႃႉလႂ် 40 သႅၼ်ၼႆဢေႃႈ။ ၵူၼ်းဝၢၼ်ႈၶဝ် ဢမ်ႇပဵၼ်လႆႈငိုၼ်း လႄႈ ၵႃႈလႆႈၵႂႃႇ။ ႁူဝ်ၼပ်ႉၵူၼ်းတႄႉ ပႆႇႁူႉတႅတ်ႈတေႃး”- ဝႃႈၼႆ။

ၵူၼ်းၼုမ်ႇ ၵမ်ႈၼမ် ပၢႆႈၸဵမ်မိူဝ်ႈပိူင်ၵဵပ်းသိုၵ်းဢွၵ်ႇ၊ ၵမ်ႈၽွင်ႈၵေႃႈ ဢမ်ႇၸၢင်ႈပၢႆႈ ယွၼ်ႉဝႃႈ လမ်ႇလွင်ႈတႃႇၵၢၼ်ႁႃလဵင်ႉၼႃႈႁိူၼ်း။ ၵမ်ႈၽွင်ႈ လူဝ်ႇလုမ်းလႃးၵူၼ်းထဝ်ႈ တီႈႁိူၼ်းၽႂ်မၼ်း။ ၼႂ်းဢိူင်ႇၼမ်ႉၵူတ်ႉၼႆႉ ဢၼ်လႆႈၵႂႃႇၶဝ်ႈပၢင်တိုၵ်းၵမ်းသိုဝ်ႈၼႆတႄႉ ပႆႇမီးၽႂ်ၼင်ႇၵဝ်ႇ။ ယွၼ်ႉၵူၼ်းဢၼ်ယူႇ ပွတ်းၼႆႉ မၼ်းဢမ်ႇပွင်ႇၵႂၢမ်းပဢူဝ်းၵေႃႈ ႁင်းမၼ်း ယွၼ်ႉဝႃႈ ပဵၼ်တႆးယူႇဝႆႉလွၼ်ႉလွၼ်ႉၼႆ ၵူၼ်း ပိုၼ်ႉတီႈသိုပ်ႇလၢတ်ႈ။

မိူဝ်ႈႁူဝ် လိူၼ်ၵျုၼ်ႊပူၼ်ႉ မႃးၼႆႉၵေႃႈ ၸုမ်း PNO ၶဝ်မၵ်းၶၢၼ်းမႃး ႁႂ်ႈၵႂႃႇႁၢပ်ႇၵၢၼ်သိုၵ်း ၼိုင်ႈဝၢၼ်ႈလႂ် 4 ၵေႃႉ။ ၼၼ်ႉၵေႃႈ ၽႂ်ၵေႃႈဢမ်ႇၶႂ်ႈၵႂႃႇလႄႈ ႁႂ်ႈၸူၵ်းမႄး ပႃးၸိုဝ်ႈၽႂ်ၵေႃႈ ႁႂ်ႈၵႂႃႇ။ ၵူၺ်းၵႃႈ ပွၵ်ႈၼၼ်ႉၵေႃႈ ၵူၼ်းမိူင်းဢမ်ႇၽွမ်ႉၸွမ်း။ ယွၼ်ႉဝႃႈ ပႃးၸိုဝ်ႈၽႂ်ၵေႃႈ တေဢမ်ႇလီၼႆသေ ၵူၼ်းမိူင်း ၸင်ႇဢွၵ်ႇသဵင်လဵဝ်ဝႃႈ တေဢမ်ႇႁဵတ်းၸွမ်းၼႆသေ ၸုမ်း PNO ၸင်ႇၸႂ်ႉၵၢင်ႉၵႄႇ ၵဵပ်းငိုၼ်းၼိုင်ႈ ႁိူၼ်းလႂ် သၢမ်သႅၼ်ႁႃႈ 350,000 ပျႃး။ ဢၼ်ၶဝ်ၵဵပ်းၼႆႉ မီးမွၵ်ႈ 5 ဝၢၼ်ႈ။ ယူႇတီႈ ဝၢၼ်ႈလဵၵ်းဝၢၼ်ႈ ယႂ်ႇသေ ဢၼ်ၶဝ်ၵဵပ်းၶၼ်ငိုၼ်းတေပိူင်ႈၵၼ်။ ဢၼ်ၶဝ်ၵဵပ်းၵႂႃႇၼႆႉၵေႃႈ ဢမ်ႇႁူႉဝႃႈငိုၼ်းထိုင်ၼႂ်း မိုဝ်းၽႂ်တႄႉတႄႉလႄႈ ၵူၼ်းဝၢၼ်ႈတႄႉ ၵူဝ်ၶဝ်ႁဵတ်းၵိၼ်ႁင်းၶဝ်ၵူၺ်းယဝ်ႉၼႆ ၵူၼ်းထုင်ႉပူင်း လၢတ်ႈၼႄဝႆႉၼင်ႇၼႆ –

“သိုၵ်းမၢၼ်ႈၶဝ် သင်ႇ PNO လူင်းမႃးတႄႉ ၼိုင်ႈဝၢၼ်ႈလႂ် 4 ၵေႃႉ ႁႂ်ႈၵႂႃႇႁၢပ်ႇၵၢၼ်သိုၵ်းၼၼ်ႉၶႃႈဢေႃႈ။ ၵူၺ်းၵႃႈ ၽႂ်ၵေႃႈ ဢမ်ႇၶႂ်ႈၵႂႃႇ။ ပေႃးၸူၵ်းမႄးၼႆၵေႃႈ ပႃးၽႂ်ၵေႃႈဢမ်ႇလီၼႆလႄႈ ၸင်ႇၵဵပ်း ငိုၼ်းၵၼ်။ ၼိုင်ႈႁိူၼ်းလႂ် သၢမ်သႅၼ်ႁႃႈ 350,000 ပျႃး။ ပေႃးၼပ်ႉတူၺ်းသဵင်ႈသဵင်ႈတႄႉ ႁူမ်ႈၵၼ် တေမီးသႅၼ်ႁွမ်းပဵၼ် ႁဵင် 1,800 ။ မၢင်ဝၢၼ်ႈ ၵေႃႈ ၵဵပ်းၵၼ်မွၵ်ႈသၢမ်သႅၼ်ႁႃႈမိုၼ်ႇပျႃး ၵမ်ႈၽွင်ႈ ၵေႃႈလိူဝ်ၼၼ်ႉ မၼ်းယူႇတီႈဝၢၼ်ႈလဵၵ်ႉဝၢၼ်ႈယႂ်ႇ။ ၽူႈယႂ်ႇ ၵူၼ်းလူင် ဢၼ်ပဵၼ်ၸႂ်သိုၵ်းမၢၼ်ႈ ၶဝ်ၼၼ်ႉတႄႉ လၢတ်ႈဝႃႈ ပေႃးၵဵပ်းငိုၼ်းယဝ်ႉ တေပၼ်ဝႂ်တိုတ်း (ဝႂ်ဢၼ်တွၵ်ႇၸုမ်ႈဝႆႉ ဝႃႈၸၢႆႇငိုၼ်းယဝ်ႉ) ဝႃႈၼႆသေ ဢမ်ႇႁၼ်ၶဝ်မႃးပၼ်။ ၶဝ်ႁဵတ်းၵိၼ်ၵူၺ်းႁိုဝ်ဢမ်ႇႁူႉ”- ဝႃႈၼႆ။

ယၢမ်းလဵဝ် မိူင်းတႆးပွတ်းဢွၵ်ႇ ပွတ်းၸၢၼ်း သဵင်ၵွင်ႈဢမ်ႇတႅၵ်ႇသေတႃႉ ထူပ်းၽေးသိုၵ်းမၢၼ်ႈ ၵဵပ်းသိုၵ်းမႂ်ႇ၊ ဢမ်ႇမီးၵူၼ်း သမ်ႉလႆႈပၼ်ငိုၼ်းၸိူဝ်းၼႆႉ ႁဵတ်းႁႂ်ႈၵူၼ်းမိူင်းယူႇယၢပ်ႇၵိၼ်းၸႂ်။ 

ၵဵဝ်ႇလူၺ်ႈ လွင်ႈသိုၵ်းမၢၼ်ႈ ယိုတ်းမိူင်းၵဵပ်းသိုၵ်းၼႆႉသေ ၸုမ်းၸၢတ်ႈၸိုင်ႈလုမ်ႈၾႃႉ ဢွၵ်ႇလိၵ်ႈ ပိုၼ်ၽၢဝ်ႇဝႆႉ မိူဝ်ႈဝၼ်းတီႈ 26/6/2024 ၼၼ်ႉဝႃႈ ၼႂ်းသိုၵ်းမၢၼ်ႈ ၵဵပ်းသိုၵ်းၵႂႃႇၼႆႉ ပႃးဝႆႉ ၵူၼ်းၼုမ်ႇ ၸိူဝ်းဢႃယုပႆႇတဵမ် ႁူဝ်ၼပ်ႉၵူၼ်း 1,102 ၵေႃႉ ဝႃႈၼၼ်သေတႃႉ ၾၢႆႇပိုၼ်ၽၢဝ်ႇ သိုၵ်းမၢၼ်ႈ ယိုတ်းမိူင်းတႄႉ ၶိုၼ်းၵၢဝ်ႇၼႄးဝႃႈ ဢမ်ႇၸႂ်ႈလွင်ႈတႄႉ ၶိုၼ်းထတ်းတူၺ်းသဵၼ်ႈမၢႆၵေႃႈ မီးဢမ်ႇယွမ်း 9 ၵေႃႉ ဝႃႈၼႆ။