သိုၵ်း RCSS တင်း SSPP ယိုဝ်းၺႃးၵၼ် ၼိူဝ်တၢင်းလူင် (ႁိမ်းမၢႆလၵ်း 13/14) ဝူင်ႈၵၢင်ၼမ်ႉတူႈ တင်း ဝဵင်းလႃႈသဵဝ်ႈ ယၢမ်းဝၢႆးဝၼ်းမိူဝ်ႈဝႃးၼႆႉ။
ဝၼ်းတီႈ 17/5/2018 ၼၼ်ႉ ႁႅင်းသိုၵ်းပႃႇတီႇမႂ်ႇသုင်ၸိုင်ႈတႆးမွၵ်ႈပၢၵ်ႇ ထူဝ်းသိုၵ်းဢဝ်ႁူမ်ႇလူမ်ႈ ဝူင်ႈ ၵၢင်ၼမ်ႉတူႈ လႃႈသဵဝ်ႈ၊ ၸမ်ၾၢႆႇဝဵင်းၼမ်ႉတူႈ။ ၽွင်းၼၼ်ႉ သိုၵ်း RCSS ၵေႃႈ ႁွတ်ႈထိုင်ပၵ်းသဝ်း ဝႆႉႁိမ်းၼၼ်ႉ။
သွင်ၾၢႆႇယိုဝ်းၺႃးၵၼ် ယၢမ်းဝၢႆးဝၼ်း 3 မူင်း 40 မိၼိတ်ႉပၢႆပၢႆ တေႃႇ 3 မူင်း 50 မိၼိတ်ႉပၢႆပၢႆ။ ပဵၼ်ပၢင်တိုၵ်းၵၼ် မွၵ်ႈ 10 မိၼိတ်ႉ။ တင်းသွင်ၾၢႆႇဢမ်ႇတိူဝ်ႉမၢတ်ႇသင် – ဝႃႈၼႆ။
ဢိင်ၼိူဝ်ဢၼ်လႆႈတွင်ႈထၢမ် တင်းသွင်ၾၢႆႇသေ – ၾၢႆႇSSPP ဝႃႈ- မီးသိုၵ်းၸုမ်းၼိုင်ႈငွႆးယိုဝ်း ၵူၼ်းပႂ်ႉယၢမ်း။ ယင်းဢမ်ႇထၢင်ႇပဵၼ်သိုၵ်း RCSS ယွၼ်ႉၵပ်းသိုပ်ႇၵၼ်ယူႇ – ဝႃႈၼႆ။ ၾၢႆႇ RCSS ၵေႃႈသမ်ႉဝႃႈ – သိုၵ်း SSPP ဢဝ်ၵွင်ႈလူင်ပွႆႇသႂ်ႇႁဝ်း ဢွၼ်တၢင်း – ဝႃႈၼႆ။
ၸၢႆးၶမ်း ဝၢၼ်ႈၸၢမ်မိူင်းမူႉ လၢတ်ႈဝႃႈ – သိုၵ်းၸိူဝ်းၼႆႉ ၶဝ်ႁဵတ်းသင်ပေႃးဢမ်ႇႁူႉယဝ်ႉ။ သိုၵ်းမၢၼ်ႈ သိုၵ်းလွႆယိုဝ်းၵၼ်၊ သိုၵ်းတႆး သိုၵ်းလွႆ ယိုဝ်းၵၼ်။ သိုၵ်းတႆး ၼင်ႇၵၼ်ၵေႃႈ ယိုဝ်းၵၼ်ထႅင်ႈ – ဝူၼ်ႉဢမ်ႇ ပွင်ႇယဝ်ႉ ။
ၼႂ်းၸေႈဝဵင်းၼမ်ႉတူႈၼႆႉ မိူဝ်ႈ လိူၼ်မၢတ်ႉ သိုၵ်း TNLA တင်း သိုၵ်း RCSS ယိုဝ်းၵၼ်ႁၢဝ်ႈႁႅင်း ၵူၼ်းမိူင်းမွၵ်ႈႁဵင် ၺႃးၽေးသိုၵ်းသိူဝ်၊ ၽွင်းၼၼ်ႉ သိုၵ်းမၢၼ်ႈ တင်း TNLA ၵေႃႈ ပဵၼ်ပၢင်တိုၵ်းၵၼ် ဢမ်ႇထၢတ်ႇ။
ထိုင်မႃး ႁူဝ်လိူၼ်မေႊ သိုၵ်း TNLA သမ်ႉ ၶိုၼ်ႈယိုဝ်း လေႃႇတိုၵ်း SSPP ထႅင်ႈ – လွင်ႈတၢင်း ၸိူဝ်းၼႆႉ ႁဵတ်းႁႂ်ႈၵူၼ်းမိူင်း ဢမ်ႇႁတ်းလူင်းႁႆႈ လူင်းသူၼ် တႃႇၽုၵ်ႇသွမ်ႈ ႁႃၵိၼ် လဵင်ႉတွင်ႉ ။
