ဝၼ်းတီႈ 4/5/2018 ၼႆႉ သိုၵ်းလွႆ TNLA ၶိုၼ်ႈယိုဝ်းသိုၵ်း SSPP တီႈ ဝၢၼ်ႈသႃႇဢွၼ်ႇ ထုင်ႉမိူင်း ယဵၼ် ၸႄႈဝဵင်းၼမ်ႉတူႈ ၵူၼ်းမိူင်း မၢတ်ႇၸဵပ်း 2 ၵေႃႉ၊ ၽွင်းၼၼ်ႉသိုၵ်းလူင်ပွင်ၸိုင်ႈမၢၼ်ႈ ယူႇတီႈ ဢမ်ႇၵႆ ဢမ်ႇၸမ်သေ ႁႅၼ်းသိုၵ်းတူဝ်ႈတၼ်းပႂ်ႉတူၺ်းဝႆႉယူႇဝႃႈၼႆ။
မိူဝ်ႈၼႆႉ ယၢမ်းၵၢင်ၼႂ် 9 မူင်းၶိုင်ႈသိုၵ်းလွႆ ၸႅၵ်ႇႁဵတ်းသၢမ်ၸုမ်းႁႅင်းသိုၵ်း 300 ပၢႆ ၶိုၼ်ႈယိုဝ်း တပ်ႉ ပၢင်သဝ်း ပႃႇတီႇမႂ်ႇသုင်ၸိုင်ႈတႆး SSPP/SSA ဢၼ်မီး ႁႅင်းသိုၵ်း မွၵ်ႈပၢၵ်ႇ ဢၼ်ပၵ်းယူႇ ၸူဝ်ႈၶၢဝ်းတီႈ ဝၢၼ်ႈသႃႇ။ သွင်ၾၢႆႇ ပဵၼ်ပၢင်တိုၵ်းၵၼ် တေႃႇထိုင် ဝၢႆးဝၼ်း 2 မူင်းပၢႆ။ ၽွင်းၼၼ်ႉ သိုၵ်းမၢၼ်ႈ ယူႇတီႈ ဝၢၼ်ႈၵုင်းမူင်ႈ ဢၼ်ၶႅၼ်ႈတူင်ႈၼႃး သေ ပႂ်ႉတူၺ်း။
“ႁဝ်းၶႃႈမီးဝႆႉတီႈ ဝၢၼ်ႈသႃႇဢွၼ်ႇ။ လွႆသမ်ႉမီးတီႈဝၢၼ်ႈသႃႇလူင်။ သိုၵ်းမၢၼ်ႈ သမ်ႉမီးတီႈဝၢၼ်ႈၵုင်း မူင်ႈ။ မိူဝ်ႈတႄႇၶဝ်မႃးၵၢၼ်းယိုဝ်းႁဝ်း ပဵၼ်ပၢင်တိုၵ်းလဵၵ်ႉလဵၵ်ႉဢွၼ်ႇၵူၺ်း။ ၵမ်းၼႆႉ ထႅမ်မႃး ႁႅင်းသိုၵ်း သၢမ်ငႃး – ႁႅင်းၶဝ်မီးၵႂႃႇ 300 ပၢႆ ၊ ႁႅင်းသိုၵ်းၾၢႆႇႁဝ်းမီး 100 ပၢႆ ။ ပၼ်ႁႃ သင်ၵေႃႈ ယဝ်ႉ ႁဝ်းဢဝ် လၢႆးလီၵႄႈလိတ်ႈမႃး။ ၶဝ်ၶိုၼ်ႈမႃးယိုဝ်းလႄႈ ပဵၼ်ပၢင်တိုၵ်းၵူၺ်း။ တေႃႈလဵဝ် တႄႉ သွင်ၾၢႆႇထႅမ်ႁႅင်း သိုၵ်းထႅင်ႈလႄႈ ပဵၼ်ၵႂႃႇ ပၢင်တိုၵ်းလူင်” – ၽူႈၼမ်းၼႂ်း 2 ၸဝ်ႈသိုၵ်းၸၢႆးသုလၢတ်ႈ။
ၵဵဝ်ႇၵပ်းလွင်ႈပၢင်တိုၵ်းသေ ၽူႈၵွၼ်းဢိူင်ႇ မိူင်းယဵၼ်လုင်းထုၼ်းလႅင်းလၢတ်ႈဝႃႈ – ယွၼ်ႉပၢင်တိုၵ်း သေ မၢၵ်ႇလူင်တူၵ်းသႂ်ႇႁိူၼ်းၵူၼ်းဝၢၼ်ႈ၊ ႁိူၼ်းလုင်းၸၢႆး – လု ၵွႆၼမ်ဝႆႉ တူဝ်လုင်းၸၢႆး ၵေႃႈ ၺႃး ၸၢၵ်ႇ မၢၵ်ႇ လူင်တီႈဢူၵ်း ၾၢႆႇသၢႆႉ။ သူင်ႇႁူင်းယႃလႃႈသဵဝ်ႈဝႆႉယဝ်ႉ။ ထႅင်ႈၵေႃႉၼိုင်ႈသမ်ႉ ပဵၼ်ၽူႈယိင်း သူင်ႇ ယႃ တူဝ်ဝႆႉ တီႈ ႁူင်းယႃၼမ်ႉတူႈ ၊ ၵူၼ်းဝၢၼ်ႈသႃႇဢွၼ်ႇ ၵေႃႈ ဢွၼ်ၵၼ်ပၢႆႈသိုၵ်းမႃးမီးယူႇတီႈ မိူင်း ယဵၼ် ၶူဝ်းၵေႃႈဢမ်ႇလႆႈသင်မႃး – ဝႃႈၼႆ။
ၽွင်းသွင်ၾၢႆႇပဵၼ်ပၢင်တိုၵ်းၵၼ်ယူႇၼၼ်ႉ သိုၵ်းလူင်ပွင်ၸိုင်ႈမၢၼ်ႈ ႁိူဝ်းဝိၼ်သိုၵ်းလုၵ်ႉလႃႈသဵဝ်ႈ သေ ဢွၵ်ႇမိၼ် လဵပ်ႈၵႂႃႇ လဵပ်ႈမႃး ထုင်ႉၼၼ်ႉယူႇ။ ႁႅင်းသိုၵ်းမၢၼ်ႈ မွၵ်ႈပၢၵ်ႇပၢႆ တႄႉမီးယူႇတီႈ ၵုင်းမူင်ႈ။ ဢိူင်ႇမိူင်းယဵၼ်ၼႆႉ မီးၾၢႆႇႁွင်ႇ ဝဵင်းၼမ်ႉတူႈ ယၢၼ် မွၵ်ႈ 15 လၵ်း။
ၸုမ်းသိုၵ်း တဢၢင်း (လွႆ) TNLA ၼႆႉ မိူဝ်ႈလိူၼ် ၻီႊသႅမ်ႊပိူဝ်ႊဝၼ်းတီႈ 5 (ပီ 2017) ပူၼ်ႉမႃးၼႆႉ ၵေႃႈ ယၢမ်ႈၶိုၼ်ႈယိုဝ်း ပၢင်သဝ်းပႃႇတီႇမႂ်ႇသုင်ၸိုင်ႈတႆး ဢၼ်ယူႇထုင်ႉၼႆႉမႃးယဝ်ႉၵမ်းၼိုင်ႈ။ ၵမ်းၼၼ်ႉၵေႃႈ ယိုဝ်းသႂ်ႇၼႂ်းဝၢၼ်ႈ လႄႈ ႁိူၼ်းပႃႈဢႆႇ ဝၢၼ်ႈဝဵင်းၼၼ် လုၵွႆ ၵႂႃႇဝႃႈၼႆ။
သိုၵ်း SSPP/SSA တင်း ၸုမ်းသိုၵ်း တဢၢင်း (လွႆ) TNLA ၼႆႉ ပဵၼ်လုၵ်ႈၸုမ်း FPNCC ၸုမ်းဢူၺ်း လီ ပွတ်းႁွင်ႇ ဢၼ်ဝႃႉ ဢွၼ်ႁူဝ် ဝႆႉတင်းသွင်ၸုမ်း။
